Ang Bibliya klarong nag-ingon nga si Jesus namanhaw ug mga patay. Ang maong mga asoy dili tumotumo; kadto nahitabo sa tinuod nga mga lugar ug espesipikong panahon. Pananglitan, panahon sa ting-init sa tuig 31 C.E., usa ka dakong panon ang miuban kang Jesus gikan sa Capernaum paingon sa Nain. Pag-abot didto, nakasugat silag mga tawong nagyayong ug patay. Makasalig kang tinuod ang misunod nga nahitabong pagbanhaw kay kini narekord sa Pulong sa Diyos, ang Bibliya, ug daghang tawo ang nakakita.—Basaha ang Lucas 7:11-15.

Gibanhaw sab ni Jesus ang iyang higalang si Lazaro, nga upat ka adlaw nang patay. Makatuo kang nahitabo gyod kana kay daghan sab ang nakakita niana.—Basaha ang Juan 11:39-45.

Si Jesus namanhaw ug mga patay kay naluoy siya. Gihimo sab niya kana aron ipakita nga ang iyang Amahan, ang Maglalalang sa kinabuhi, naghatag kaniyag gahom sa pagpamanhaw.—Basaha ang Juan 5:21, 28, 29.

Tungod sa pagpamanhaw ni Jesus, makasalig ta sa iyang mga saad bahin sa umaabot. Banhawon niya ang daghang nangamatay, apil ang mga dili matarong nga wala makaila sa matuod nga Diyos. Hatagan silag kahigayonan nga mailhan ug higugmaon si Jehova nga Diyos.—Basaha ang Buhat 24:15.