NAKURAT ka ba sa pangutana, “Mapintas ba ang Diyos?” Ang pipila mibati niana, apan daghan karon ang naghunahuna kon mapintas ba ang Diyos. Ang uban nagtuo nga pintas gyod siya. Ngano?

Ang pipila nga naluwas sa mga kalamidad nangutana: “Nganong gitugotan man kini sa Diyos? Wala ba siya magpakabana? O siya ba mapintas?”

Ang uban natugaw usab sa ilang pagbasa sa Bibliya. Ilang nabasa ang mga asoy sama nianang kang Noe ug sa Lunop, ug sila naghunahuna, ‘Nganong gipamatay man sa mahigugmaong Diyos ang maong mga tawo? Mapintas ba siya?’

Nakapangutana ka ba niana? O nalisdan ka ba pagtubag sa nangutana niana? Bisan unsa man, tagda ang laing pangutana nga mahimong makatabang.

Dili ta gustog kapintasan kay duna tay katakos sa pagkahibalo kon unsay husto ug sayop. Lahi ta sa mga mananap nianang bahina. Ang atong Maglalalang naghimo kanato “sumala sa iyang larawan.” (Genesis 1:27) Unsay gipasabot niana? Iya tang gihatagag katakos sa pagbanaag sa iyang mga hiyas ug moral nga mga sukdanan, ang katakos sa pagkahibalo kon unsay husto ug sayop. Tagda kini: Kon naggikan sa Diyos ang atong katakos sa pag-ila kon unsay husto ug sayop ug dili ta gustog kapintasan, wala ba kana magpamatuod nga dili sab gusto ang Diyos niana?

Gipamatud-an sa Bibliya ang maong argumento, kay diha niana, ang Diyos nagpasalig kanato: “Ang akong mga dalan mas taas kay sa inyong mga dalan, ug ang akong mga hunahuna kay sa inyong mga hunahuna.” (Isaias 55:9) Kon mohinapos kita nga ang Diyos mapintas, dili kaha nga sama rag miingon kita nga ang atong dalan mas taas pa kay sa iyang dalan? Mas maayong mokuhag dugang impormasyon sa dili pa ta moingon niana. Imbes mangutana kon mapintas ba ang Diyos, angay natong ipangutana kon nganong ang pipila niya ka buhat daw mapintas. Aron atong masabtan, hisgotan nato kon unsay tinuod nga kahulogan sa pulong nga “mapintas.”

Kon moingon kita nga ang usa mapintas, atong gihukman ang iyang motibo. Ang tawong mapintas malipay nga ang uban mag-antos, o dili magpakabana sa kasakitan sa uban. Busa, kon ang usa ka amahan magdisiplina sa iyang anak kay malipay siyang masakitan kini, siya mapintas. Apan kon ang amahan magdisiplina sa iyang anak aron kini tudloan o panalipdan, siya maayo. Dali rang masaypan ang motibo sa usa. Tingali nakasinati ka na usab nga gikuwestiyon ang imong motibo.

Atong hisgotan ang duha ka rason kon nganong ang pipila naghunahuna nga mapintas ang Diyos—ang mga kalamidad nga nagakahitabo karon ug ang mga paghukom sa Diyos nga atong mabasa sa Bibliya. Gipamatud-an ba gyod niini nga mapintas ang Diyos?