“Sa Dihang Mag-ampo Kamo, Ingnon Ninyo, ‘Amahan’”

“Amahan.” Unsay imong mahunahunaan nianang pulonga? Ang usa ba ka mahigugmaong tawo nga nahingawa pag-ayo sa kaayohan sa iyang pamilya? O usa ka tawong iresponsable, tingali abusado pa gani? Nagdepende kana sa kon unsang matanga sa pagkatawo ang imong amahan.

ANG terminong “amahan” maoy sagad gamiton ni Jesus sa dihang makigsulti sa Diyos ug maghisgot bahin Kaniya. * Sa pagtudlo ni Jesus sa iyang mga sumusunod sa pag-ampo, siya miingon: “Sa dihang mag-ampo kamo, ingnon ninyo, Amahan.” (Lucas 11:2) Apan unsang matanga sa amahan si Jehova? Hinungdanon gayod ang tubag niini. Ngano? Kon mas masabtan nato ang matang sa pagkaamahan ni Jehova, kita mas masuod ug mas mahigugma kaniya.

Walay laing mas takos nga mopaila kanato sa atong langitnong Amahan kay kang Jesus. Siya suod kaayo sa iyang Amahan. Si Jesus miingon: “Walay usa nga bug-os nakaila sa Anak gawas sa Amahan, ni may usa nga bug-os nakaila sa Amahan gawas sa Anak ug kaniya nga buot sa Anak nga ipadayag siya.” (Mateo 11:27) Busa, ang  kinamaayohang paagi nga mailhan ang Amahan maoy pinaagi sa Anak.

Unsay atong makat-onan kang Jesus bahin sa atong langitnong Amahan? Tagda kining giingon ni Jesus: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Gipaila niini ang pangunang hiyas sa atong langitnong Amahan—ang gugma. (1 Juan 4:8) Gipakita ni Jehova ang iyang gugma sa lainlaing paagi, sama sa iyang pag-uyon, pagkamaluluy-on, pagpanalipod, ug pagdisiplina, maingon man sa pagtagana sa atong panginahanglan.

Gipasaligan sa Pag-uyon sa Atong Amahan

Ang mga anak mapalig-on ug madasig sa dihang bation nila ang pag-uyon sa ilang ginikanan. Handurawa ang gibati ni Jesus sa dihang nadungog niya ang iyang Amahan nga miingon: “Kini mao ang akong Anak, ang hinigugma, nga akong giuyonan.” (Mateo 3:17) Sa baylo, gipasaligan kita ni Jesus sa gugma ug pag-uyon sa Amahan kanato pinaagi sa pag-ingon: “Siya nga nahigugma kanako higugmaon sa akong Amahan.” (Juan 14:21) Pagkamakapahupay niana! Apan, dunay gustong mohikaw nato niana.

Gusto ni Satanas nga magduhaduha ta maylabot sa pag-uyon sa atong langitnong Amahan. Buot niyang kombinsihon kita nga dili ta takos niana. Sagad himoon niya kana sa dihang kita huyang kaayo—masakiton, luya, o tigulang na o sa dihang nagmagul-anon ta tungod sa mga kapakyasan ug kahigawad. Tagda ang batan-ong si Lucas, kinsa mibating dili takos sa pag-uyon sa Diyos. Siya miingon nga nausab gayod ang iyang ginikanan sa batan-on pa siya, nga nagbiya sa mga prinsipyo nga ilang gitudlo kaniya. Tingali tungod niana, nalisdan siya sa pagpakigsuod sa iyang langitnong Amahan. Dugang pa, kay mahinaykon siya, sagad siyang makakitag away. Apan sa hinayhinay, ang iyang mapailobon ug buotang asawa—kinsa gitawag ni Lucas nga “usa ka linaing panalangin, usa ka gasa gikan sa Diyos”—nakatabang niya sa pagpugong sa kaugalingon. Naamgohan ni Lucas nga “si Kristo Jesus mianhi sa kalibotan aron sa pagluwas sa mga makasasala.” (1 Timoteo 1:15) Si Lucas miingon nga ang pagpamalandong bahin sa gugma ug pag-uyon sa Diyos nakahatag niyag kalipay ug katagbawan.

Kon pananglitan magduhaduha ka kon si Jehova nahigugma o may pag-uyon ba nimo, tingali madasig ka kon imong basahon ug palandongon ang Roma 8:31-39. Dinhi, si apostol Pablo mahigugmaong nagpasalig nato nga walay “makabulag kanato gikan sa gugma sa Diyos nga anaa kang Kristo Jesus nga atong Ginoo.” *

Amahan sa Malumong Kaluoy

Ang atong langitnong Amahan mobati sa atong pag-antos. Siya maoy Diyos sa “malumong kaluoy.” (Lucas 1:78) Gibanaag ni Jesus ang pagkamaluluy-on o pagkamabination sa iyang Amahan alang sa dili-hingpit nga mga tawo. (Marcos 1:40-42; 6:30-34) Ang matuod nga mga Kristohanon maningkamot usab sa pagsundog sa pagkamaluluy-on sa ilang langitnong Amahan. Sila nagsunod sa tambag sa Bibliya nga “magmaluloton sa usag usa, magmalumo uban ang pagkamabination.”—Efeso 4:32.

Tagda ang kasinatian ni Felipe. Usa ka adlaw samtang nagpaingon siya sa trabahoan, kalit siyang mibatig grabeng kasakit, nga daw gidunggab ang iyang likod. Gidali siya pagdala sa ospital. Human sa 8 ka oras nga pag-eksamin, nakahinapos ang mga doktor nga nasìsì ang sulod nga bahin sa iyang aorta, ang kinadak-ang ugat sa lawas. Sila miingon nga wala nay paglaom bisag operahan siya kay 25 minutos na lang ang tagal sa iyang kinabuhi.

Diha niadtong tungora ang pipila ka isigkamagsisimba ni Felipe, ug ang ilang pagkamabination nagtukmod nila sa paglihok. Gihikay dayon nila nga mabalhin siya sa laing ospital, diin siya gioperahan, ug sila nagpabilin hangtod natapos ang operasyon. Ikalipay, si Felipe nakalabang niana. Sa paghinumdom, mapasalamaton si Felipe sa pagkamabination sa iyang mga isigkamagsisimba. Apan, kombinsido siya  nga ang iyang langitnong Amahan maoy nagpalihok nila. “Sama rag ang Diyos, ingong mahigugmaong amahan, nagtindog sa akong tupad aron sa paglig-on nako,” miingon si Felipe. Sa pagkatinuod, si Jehova sagad magpakita sa iyang pagkamabination pinaagi sa pagpalihok sa iyang mga alagad sa yuta sa pagbanaag niana nga hiyas.

Ang Atong Amahan Manalipod

Kon makamatikod ang usa ka bata nga siya nameligro, siya modangop sa iyang amahan alang sa proteksiyon. Ang bata mobating luwas sa mahigugmaong mga bukton sa iyang amahan. Si Jesus bug-os nga nagsalig kang Jehova ingong tigpanalipod. (Mateo 26:53; Juan 17:15) Kita usab mobating luwas ilalom sa panalipod sa atong langitnong Amahan. Sa panguna, ang panalipod ni Jehova karon maoy espirituwal. Sa ato pa, siya manalipod nato batok sa espirituwal nga kadaot pinaagi sa pagsangkap nato sa atong gikinahanglan aron malikayan ang kapeligrohan ug maampingan ang atong suod nga relasyon kaniya. Ang usa ka paagi nga siya manalipod nato maoy pinaagig tambag nga binase sa Bibliya. Sa dihang makadawat kita niana nga tambag, sama rag anaa si Jehova sa atong luyo nga nag-ingon: “Mao kini ang dalan. Lakaw kamo niini.”—Isaias 30:21.

Tagda ang pananglitan ni Tiago ug sa iyang mga igsoong si Fernando ug Rafael, kinsa mga membro sa rock-and-roll nga banda. Nalipay kaayo sila sa dihang napili silang motugtog sa usa sa labing inilang music hall sa São Paulo, Brazil. Daw makab-ot na nila ang ilang pangandoy. Apan, dihay isigkamagsisimba nga nagpasidaan nila bahin sa kapeligrohan sa pagpakigsuod niadtong wala magsunod sa mga prinsipyo sa Diyos. (Proverbio 13:20) Iyang gipasiugda kining binase-sa-Bibliya nga tambag pinaagi sa pag-asoy sa iyang kasinatian. Ang iyang igsoong lalaki nalangkit sa dili maayong panggawi tungod sa daotang pakig-uban. Si Tiago ug ang iyang mga igsoon nakadesidir nga moundang sa pagkamusikero. Silang tulo karon maoy bug-os-panahong Kristohanon nga mga ministro. Kombinsido silang ang pagsunod sa tambag sa Pulong sa Diyos nanalipod nila batok sa espirituwal nga kadaot.

Ang Atong Langitnong Amahan Nagdisiplina Kanato

Ang usa ka mahigugmaong amahan magdisiplina sa iyang mga anak, kay hinungdanon kaniya kon unsa silang matanga sa pagkatawo inigkadako nila. (Efeso 6:4) Ang maong amahan estrikto tingali, apan dili gayod siya maghinobra sa pagdisiplina sa iyang mga anak. Sa susama, may mga panahon tingali nga kinahanglan tang disiplinahon sa atong langitnong Amahan. Apan ang Iyang disiplina kanunayng mahigugmaon ug dili gayod mapintason. Sama sa iyang Amahan, si Jesus wala gayod maghinobra sa pagtul-id sa iyang mga tinun-an, bisag may mga panahon nga wala dayon sila mosanong niana.—Mateo 20:20-28; Lucas 22:24-30.

 Matikdi kon sa unsang paagi ang lalaking si Ricardo nakaapresyar nga siya mahigugmaong gidisiplina ni Jehova. Siya giabandonar sa iyang amahan sa pito ka bulan pa lang siya. Sa natin-edyer na siya, gibati niya ang panginahanglan sa pagmahal sa usa ka amahan. Nalangkit siya sa daotang mga buhat, ug gihasol siya sa iyang konsensiya. Kay nakaamgo nga ang iyang pagkinabuhi dili kaharmonya sa moral nga sukdanan sa mga Kristohanon, nakadesidir siyang makigsulti sa mga ansiyano sa kongregasyon nga iyang gitambongan. Ang mga ansiyano naghatag niyag lig-on apan mahigugmaong tambag nga binase sa Bibliya. Naapresyar ni Ricardo ang disiplina, apan padayon siyang nag-antos tungod sa iyang nahimo—siya dili makatulog, maghilak, ug nagmagul-anon. Sa kataposan, iyang naamgohan nga ang pagdisiplina kaniya nagpasabot nga gihigugma gihapon siya ni Jehova. Nahinumdoman ni Ricardo ang giingon sa Hebreohanon 12:6: “Ang gihigugma ni Jehova iyang ginadisiplina.”

Angay natong hinumdoman nga ang disiplina naglangkit ug labaw pa kay sa pagsilot o pagbadlong. Sa Bibliya gilangkit usab kini sa pagbansay. Busa ang atong mahigugmaon nga langitnong Amahan magdisiplina tingali kanato pinaagi sa pagtugot nga antoson nato ang dili-maayong sangpotanan sa atong kasaypanan. Bisan pa niana, gipakita sa Bibliya nga ang iyang disiplina nagbansay nato, nagtabang nato sa pagsubay sa matarong nga dalan. (Hebreohanon 12:7, 11) Oo, ang atong Amahan may kahingawa gayod kanato ug magtul-id nato alang sa atong kaayohan.

Ang Atong Amahan Nagtagana sa Atong Panginahanglan

Ang usa ka mahigugmaong amahan magtagana sa pisikal ug materyal nga panginahanglan sa iyang pamilya. Ingon usab niana si Jehova. “Ang inyong langitnong Amahan nahibalo nga gikinahanglan ninyo kining tanang butanga,” miingon si Jesus. (Mateo 6:25-34) Si Jehova nagsaad: “Dili ko gayod ikaw pagabiyaan ni sa bisan unsang paagi pagatalikdan.”—Hebreohanon 13:5.

Napamatud-an sa usa ka babayeng si Nice nga tinuod kanang mga pulonga sa dihang nawad-ag trabaho ang iyang bana. Bag-o lang siyang miundang sa iyang dakog-suweldong trabaho aron makagugol ug dugang panahon sa ilang duha ka anak nga babaye ug sa pag-alagad sa Diyos. Karon unsa na may ilang panginabuhian? Siya miampo kang Jehova. Pagkaugma dayon, ang iyang bana mibalik sa trabahoan aron sa pagkuha sa iyang mga butang. Sa katingala sa bana, giingnan siya sa iyang boss nga dihay laing trabaho nga nabakante ug gitanyag kini kaniya! Busa usa lang ka adlaw nga nawad-ag trabaho ang bana ni Nice. Si Nice ug ang iyang bana nagpasalamat sa ilang langitnong Amahan tungod sa maayong resulta. Ang ilang kasinatian nagpahinumdom nato nga ingong atong mahigugmaong Magtatagana, si Jehova dili gayod malimot sa iyang matinumanong mga alagad.

Pag-apresyar sa Gugma sa Atong Amahan

Sa pagkatinuod, kulang ang mga pulong sa paghubit sa kahibulongang gugma sa atong langitnong Amahan! Sa dihang atong palandongon ang lainlaing paagi diin iyang gipakita ang iyang amahanong gugma—pinaagi sa iyang pag-uyon, pagkamaluluy-on, pagpanalipod, ug pagdisiplina, maingon man sa pagtagana sa atong panginahanglan—kita makahinapos gayod nga siya ang labing maayong Amahan sa tanan!

Sa unsang paagi nato ikapakita ang atong apresasyon sa gugma nga gipasundayag kanato sa atong langitnong Amahan? Maningkamot ta sa pagkat-og dugang bahin kaniya ug sa iyang katuyoan. (Juan 17:3) Ipahiuyon nato ang atong kinabuhi sa iyang kabubut-on ug mga paagi. (1 Juan 5:3) Ipabanaag nato ang iyang gugma sa atong pagpakiglabot sa uban. (1 Juan 4:11) Pinaagi nianang tanan, atong ikapakita nga atong gilantaw si Jehova ingong atong Amahan ug giisip natong usa ka kadungganan nga mahimong iyang mga anak.

[Mga footnote]

[Blurb sa panid 19]

Kon mas masabtan nato ang matang sa pagkaamahan ni Jehova, kita mas masuod ug mas mahigugma kaniya

[Blurb sa panid 22]

Atong ikapakita nga atong gilantaw si Jehova ingong atong Amahan ug giisip natong usa ka kadungganan nga mahimong iyang mga anak

[Kahon/Mga hulagway sa panid 21]

GIPAKITA NI JEHOVA ANG IYANG AMAHANONG GUGMA SA LAINLAING PAAGI

PAG-UYON

PAGKAMALULUY-ON

PAGPANALIPOD

PAGDISIPLINA

PAGTAGANA