Ang Kamatuoran Bahin sa Armagedon

‘Ang mga demonyo . . . nangadto sa mga hari sa tibuok gipuy-ang yuta . . . , ug ilang gitigom sila sa dapit nga gitawag sa Hebreohanon ug Har–​Magedon.’​—⁠PINADAYAG 16:​14, 16.

ANG Armagedon, nga usahay hubaron ug “Har–​Magedon,” maoy ngalan sa usa ka dapit. Hinunoa, mopatim-awng wala kana maglungtad sa bisan asang literal nga dapit sa yuta.

Nan, unsa man gyoy tinuod nga kahulogan sa pulong nga “Armagedon”? Nganong sagad man kining ilangkit sa usa ka panghitabo, sama sa gubat?

Gitigom sa Usa ka Dapit nga Gitawag ug Armagedon

Ang orihinal nga Hebreohanong pulong nga Har–​Magedon literal nga nagkahulogang “Bukid sa Megiddo.” Bisag wala maglungtad kanang bukira, dihay dapit nga nailhang Megiddo. Nahimutang kini sa interseksiyon sa duha ka dagkong dalan, nga amihanan-kasadpan sa dapit nga gipuy-an sa karaang nasod sa Israel. Daghang dagkong gubat ang nahitabo duol nianang dapita. Busa, ang ngalang Megiddo gilangkit sa gubat. *

Apan, ang tinuod nga kahulogan sa Megiddo maoy, dili kon unsang mga gubata ang gisangka didto, kondili kon nganong kana gisangka. Ang Megiddo maoy bahin sa Yutang Saad nga gihatag ni Jehova nga Diyos sa mga Israelitas. (Exodo 33:1; Josue 12:​7, 21) Siya nanumpa  kanila nga panalipdan sila batok sa mga kaaway, ug gibuhat niya kana. (Deuteronomio 6:​18, 19) Pananglitan didto sa Megiddo, milagrosong giluwas ni Jehova ang mga Israelitas batok sa nanulong nga mga sundalo sa Canaanhong hari nga si Jabin ug sa pangulo sa iyang kasundalohan nga si Sisera.​—⁠Maghuhukom 4:​14-16.

Busa, ang pulong nga “Har–​Magedon,” o “Armagedon,” dunay dakong simbolikong kahulogan. Kini nalangkit sa usa ka paggubatay, diin duha ka gamhanang puwersa ang magsangka.

Ang tagna sa Pinadayag naghisgot sa usa ka panahon sa haduol nga umaabot sa dihang palihokon ni Satanas ug sa mga demonyo ang mga gobyerno sa tawo sa pagtigom sa ilang kasundalohan, sa ingon maghulga sa katawhan sa Diyos. Ang maong pag-atake moresulta sa kamatayon sa minilyon sa dihang pukanon sa Diyos ang mga kaaway.​—⁠Pinadayag 19:​11-18.

Nganong ang Diyos, kinsa gihubit sa Bibliya ingong “maluluy-on, mahinay sa kasuko ug dagaya sa mahigugmaong-kalulot,” magpahinabo man sa kamatayon sa daghan? (Nehemias 9:17) Aron masabtan ang buhaton sa Diyos, kinahanglan natong tubagon ang tulo ka pangutana: (1) Kinsay magsugod sa gubat? (2) Nganong malangkit man ang Diyos? (3) Unsay dumalayong epekto niini sa yuta ug sa mga molupyo niini?

1. KINSAY MAGSUGOD SA GUBAT?

Sa gubat sa Armagedon, dili ang Diyos ang mounag atake. Hinunoa, iyang depensahan ang maayong mga tawo batok niadtong molaglag nila. Niini nga gubat ang mouna pag-atake mao ang “mga hari sa tibuok gipuy-ang yuta,” ang mga lider sa kalibotan. Nganong moatake man sila? Tungod kay sama sa usa ka maayong tigpalihok ug kikokiko, maniobrahon ni Satanas ang mga gobyerno ug mga ahensiya sa militar sa paghimog bug-os nga pag-atake niadtong nagasimba kang Jehova nga Diyos.​—⁠Pinadayag 16:​13, 14; 19:​17, 18.

Kay gipabilhan sa pipila ka nasod karon ang kagawasan sa pagsulti ug ang kagawasan sa relihiyon, morag imposibleng limitahan o did-an sa mga gobyerno ang bisan unsang relihiyosong kalihokan. Apan, ang maong mga pag-atake nahitabo sa ika-20ng siglo ug nagpadayon karon. * Bisan pa niana, dunay labing  menos duha ka dagkong kalainan tali sa nag-unang mga pag-atake ug nianang nalangkit sa Armagedon. Una, kini nga pag-atake maoy tibuok kalibotan. Ikaduha, ang himoon ni Jehova mas puwersado kay sa bisan unsa nga iyang nahimo kaniadto. (Jeremias 25:​32, 33) Ang Bibliya naghubit sa panagsangka ingong “gubat sa dakong adlaw sa Diyos nga Labing Gamhanan.”

2. NGANONG MALANGKIT MAN ANG DIYOS?

Si Jehova nagsugo niadtong nagsimba kaniya nga magmakigdaiton ug higugmaon ang mga kaaway. (Miqueas 4:​1-3; Mateo 5:​43, 44; 26:52) Busa sila dili mogamit ug armas aron depensahan ang kaugalingon inigkahitabo niini nga pag-atake. Kon dili molihok ang Diyos sa pagluwas sa iyang katawhan, sila mapapha. Busa, maapektohan niini ang ngalan o reputasyon ni Jehova nga Diyos. Kon molampos ang mga kaaway sa paglaglag sa Iyang katawhan, mopatim-awng si Jehova dili-mahigugmaon, dili-makataronganon, o walay gahom. Imposible gayod kana!​—⁠Salmo 37:​28, 29.

Dili buot sa Diyos nga may malaglag, busa siya naghatag ug pasidaan kon unsay iyang himoon. (2 Pedro 3:⁠9) Pinaagi sa mga asoy sa Bibliya, iyang gipahinumdoman ang tanan nga sa miagi siya mibalos sa dihang giatake ang iyang katawhan. (2 Hari 19:35) Ang Bibliya nagpasidaan usab nga sa umaabot, sa dihang si Satanas ug ang iyang tawhanong mga kikokiko moatake na sa katawhan sa Diyos, si Jehova molihok na usab batok niadtong buot molaglag sa iyang katawhan. Gani, ang Pulong sa Diyos dugay nang nagtagna nga laglagon ni Jehova ang mga daotan. (Proverbio 2:​21, 22; 2 Tesalonica 1:​6-9) Nianang panahona, seguradong mahibalo ang mga kaaway nga sila nakig-away diay sa Labing Gamhanan.​—⁠Ezequiel 38:​21-23.

3. UNSAY DUMALAYONG EPEKTO NIINI NGA GUBAT?

Ang gubat sa Armagedon moresulta sa kaluwasan sa minilyong kinabuhi. Sa pagkatinuod, kini maoy pasiuna sa usa ka yugto sa kalinaw dinhi sa yuta.​—⁠Pinadayag 21:​3, 4.

Ang basahon sa Pinadayag naghisgot bahin sa dili-maihap nga “dakong panon” nga makalabang-buhi niining maong gubat. (Pinadayag 7:​9, 14) Ilalom sa paggiya sa Diyos, sila motabang sa pagpasig-uli sa yuta ngadto sa Paraiso nga maoy orihinal nga katuyoan ni Jehova.

Nahibalo ba kita kon kanus-a mahitabo kini nga pag-atake batok sa katawhan sa Diyos?

[Mga footnote]

[Hulagway sa panid 6]

Gidepensahan ni Jehova ang iyang katawhan sa miagi

[Hulagway sa panid 7]

Depensahan pag-usab ni Jehova ang iyang katawhan sa gubat sa Armagedon