Pagsukol nga Takos sa Pagtahod

PANAHON sa mabangis nga pagmando sa chancellor sa Germany nga si Adolf Hitler, siya nakadawat ug tinagpulo ka libong sulat. Niadtong 1945, human sakopa sa mga Russian ang dapit palibot sa Berlin, daghan niining mga sulata ang gitipigan sa Moscow. Ang historyanong si Henrik Eberle nagsusi sa linibo sa maong mga sulat aron masayran kon kinsay nagpadala niana ug kon ngano. Gipatik ni Eberle ang iyang nadiskobrehan diha sa librong Briefe an Hitler (Mga Sulat Kang Hitler).

“Ang mga magtutudlo, estudyante, madre ug pari, mga walay trabaho ug dagkong negosyante, admiral ug ordinaryong mga sundalo—silang tanan nagsulat kang Hitler,” miingon si Dr. Eberle. “Ang pipila nag-isip kaniya ingong Mesiyas nga natawo pag-usab; ang uban naghunahuna nga siya daotan kaayo.” Nakadawat ba si Hitler ug sulat gikan sa kadagkoan sa simbahan maylabot sa kadaotan nga gihimo sa National Socialists, o mga Nazi? Oo, apan diyutay lang kini.

Hinunoa, sa tipiganag dokumento sa Moscow, nakakita si Eberle ug daghang sulat para kang Hitler gikan sa mga Saksi ni Jehova sa lainlaing bahin sa Germany, agig protesta sa gihimo sa mga Nazi. Gani, ang mga Saksi gikan sa mga 50 ka nasod nagpadala kang Hitler ug mga 20,000 ka sulat ug telegrama nga nagprotesta sa pagmaltratar sa mga Saksi ni Jehova. Linibo ka Saksi ang gidakop, ug gatosan ang gipamatay o nangamatay tungod sa pagmaltratar kanila sa mga Nazi. Si Dr. Eberle mihinapos nga kon itandi sa minilyon nga nabiktima sa mga Nazi, ang mga Saksing biktima diyutay ra kaayo. Apan naagoman nila kini tungod sa ilang lig-on ug hiniusang pagsukol, ug sila takos sa pagtahod.