Ang Kamatuoran Makabag-o sa Imong Kinabuhi

TINGALI ikaw nakadungog o natudloan ug usa sa kabakakan bahin sa Diyos nga giyagyag niini nga serye sa mga artikulo. Bisan pa niana, magpanuko ka tingali sa pagbag-o sa imong pagtuo, ilabina kon dugay na nimo kanang gituohan.

Natural lang kana. Ang pipila ka relihiyon wala magdasig nga itandi ang ilang pagtulon-an sa giingon sa Bibliya. Ang uban naningkamot sa pagdepensa sa ilang bakak nga pagtulon-an pinaagi sa pag-ingon nga ang Bibliya komplikado, nga wala himoa aron masabtan sa tanan. Apan kadaghanan sa mga tinun-an ni Jesus maoy ordinaryong mga tawo, dili taas ug edukasyon, hinunoa sila nakasabot dayon sa iyang gitudlo.—Buhat 4:13.

Tingali maghunahuna ka usab nga wala kay pagtuo kon imong susihon ang imong tinuohan. Apan makataronganon ba nga ang Diyos masuko nimo kon imong tun-an ang Bibliya, ang iyang mensahe sa katawhan, aron masabtan ang iyang gipangayo kanimo? Sa kasukwahi, ang iyang Pulong nag-awhag nimo nga personal nga susihon ang Bibliya: ‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’—Roma 12:2.

Hinungdanon nga imong susihon ang kamatuoran bahin sa Diyos, dili lang aron duna kay bag-ong makat-onan, kondili aron mahimong mas maayo pa ang imong kinabuhi. (Juan 8:32) Si Deanne, nga gihisgotan sa unang artikulo, nagtuo na karon sa Diyos pinasukad sa Iyang Pulong. Siya miingon: “Kon wala ko magtuon sa Bibliya, dili nako maamgohan nga tin-aw diay kaayo ang Kasulatan. Karon nakaila na ko kang Jehova, dili ingong way-pagbati nga Diyos, kondili ingong akong mahigugmaong langitnong Amahan. Duna nay tinuod nga katuyoan ang akong kinabuhi.”

Tingali nagtuon kag Bibliya kaniadto apan gibati nimong wala ka makabenepisyo. Kon mao, ayawg hunong sa pagtuon. Ang pagpaningkamot nga masabtan ang Bibliya samtang gitudloag kabakakan bahin sa Diyos sama rag pagsulbad ug jigsaw puzzle nga sayop ang hulagway nga gisundan. Tingali mohaom ang pipila ka bahin, apan sa kadugayan mosurender ka kay wala kini motakdo sa hulagway nga imong gibasehan. Apan kon hustong hulagway ang imong sundan, mapahaom nimo ang tanang bahin.

Buot ba nimong makat-onan ang kamatuoran bahin sa Diyos? Kami nag-awhag nimo sa pagkontak sa mga Saksi ni Jehova sa inyong dapit o sa pagsulat sa nahiangayng adres sa panid 4 niining magasina alang sa libreng pagtuon sa Bibliya.

[Blurb sa panid 9]

‘Pamatud-i sa inyong kaugalingon ang maayo ug dalawaton ug hingpit nga kabubut-on sa Diyos.’—ROMA 12:2