Sulat Gikan sa Congo (Kinshasa)

Duol sa Bukid nga Nagkalayo

INIGSUBANG sa adlaw sa siyudad sa Goma, ang panganod mahimong kolor rosas ug orens. Matag adlaw, makita namo ang nindot nga Bukid sa Nyiragongo, ang usa sa labing aktibong bolkan sa kalibotan. Kanunayng nagautbo ang baga nga aso gikan sa baba sa bolkan. Inigkagabii, ang aso mopula nga nagpaaninag sa laba sa bolkan.

Sa Swahili, ang bukid gitawag nga Mulima ya Moto, o Bukid nga Nagkalayo. Ang kataposang kusog nga pagbuto niini nahitabo niadtong 2002. Kadaghanan sa among mga silingan ug higala dinhi sa Goma nawad-an sa tanang kabtangan. Sa ubang sikbit nga dapit diin magsangyaw mi sa akong bana, moagi mi sa nagbalodbalod ug nangabagtok nga laba, ug nahanduraw nako kon ingon ba niini ang pagbaktas sa buwan. Ang mga tawo dinhi dili sama sa gahi nga laba. Sila matinagdanon ug madinawaton sa maayong balita nga among gimantala. Maong malipay ming magsangyaw duol sa Bukid nga Nagkalayo.

Pagka-Sabado sa buntag, naghinamhinam kong mibangon. Kami sa akong bana, uban sa among bisitang mga higala ug mga isigkamisyonaryo, mosangyaw sa tibuok adlaw sa refugee camp sa Mugunga, sa gawas mismo sa utlanan sa siyudad dapit sa kasadpan. Daghan ang nangalagiw dinhi tungod sa kapintasan sa ilang lungsod.

Among gikargahan ang trak ug mga literatura sa Bibliya sa pinulongang Pranses, Kiswahili, ug Kinyarwanda. Dayon, kami nanggikan. Samtang nagbiyahe mi sa libaongong dalan sa Route Sake, puliki na ang siyudad. Ang mga batan-on nagtulod na sa ilang kargadong chukudus (eskoter nga kahoy nga gihimong kargahanan). Ang mga babayeng nagsul-ob ug hayag ug kolor nga mga patadyong nindot tan-awong nanglakaw sa daplin sa dalan nga naglukdog dagkong bantal. Ang mga traysikol naghatod sa mga pasaherong mangadto sa trabaho ug sa merkado. Nagkatag sa palibot ang kahoyng mga balay nga pinintalag lugom nga brawon ang bungbong ug asul ang mga hamba.

Nangabot mi sa Kingdom Hall sa Ndosho aron mahimamat ang kauban namong mga Saksi ni Jehova nga manguban ug sangyaw sa kampo. Natandog ko sa pagkakita sa mga batan-on, biyuda, ilo, ug mga maluyahon. Daghan kanila ang nakasinatig grabeng pag-antos apan miuswag ang ilang kinabuhi tungod sa pagpadapat sa mga prinsipyo sa Bibliya. Nagdilaab ang ilang kadasig sa paglaom sa Bibliya, ug maikagon silang ipaambit kini sa uban. Human sa kadiyot nga panaghisgot kon  unsang mga tekstoha ang among gamiton sa pagdasig sa mga tawo nga among mahibalag, kaming 130 nanakay sa lima ka minibus ug usa ka trak.

Mga 30 minutos sa ulahi, nangabot mi sa kampo. Ginatos sa gagmayng puti nga mga tolda ang gitukod ibabaw sa laba. Dihay nindot pagkalumbay nga publikong mga kasilyas ug labhanan. Bisan asa imong makita ang mga tawo nga nanglaba, nagluto, nagpakpak ug mga batong, ug nanilhig atubangan sa ilang mga tolda.

Nahimamat namo ang usa ka tawo nga gitawag nilag Papa Jacques, nga maoy tinugyanan sa usa ka seksiyon sa kampo. Nabalaka siya sa pagmatuto sa iyang mga anak niining malisod nga panahon. Nalipay siya nga gibinlan namog librong Mga Pangutanang Gisukna sa mga Batan-on—Mga Tubag nga Mosaler ug siya miingon nga iya kadtong basahon ug magdapit siyag gagmayng grupo aron ikapaambit niya ang iyang nakat-onan.

Sa unahag diyutay, among nailaila ang usa ka babaye nga gitawag nilag Mama Beatrice. Nangutana siya kon nganong gitugotan sa Diyos ang pag-antos. Siya nagtuong gisilotan siya sa Diyos. Namatay ang iyang bana sa gubat, ang iyang anak nga babaye nag-inusarang nagpadako sa anak niini diha sa kampo, ug ang iyang anak nga lalaki taudtaod nang gikidnap. Wala siya masayod kon hain na kini.

Ang kaguol ni Mama Beatrice nagpahinumdom kanako kon unsa gayoy gibati ni Job sa pagkadungog sa tanang makalilisang nga balita. Gipatin-aw namo niya kon unsay hinungdan sa mga pag-antos ug gipasaligan siya nga dili kini silot gikan sa Diyos. (Job 34:10-12; Santiago 1:14, 15) Gipakita pod namo kaniya ang mga kausaban nga himoon unya sa Gingharian sa Diyos alang sa yuta. Misayag ang iyang dagway, ug siya miingon nga determinado siyang magpadayon sa pagtuon sa Bibliya ug mag-ampo sa Diyos aron siya tabangan.

Ang tanan sa grupo nalipay nianang adlawa, ug gibati namo nga gitabangan gyod mi ni Jehova sa pagdalag paglaom ug pagdasig sa mga tawo. Pagbiya namo sa kampo, daghang residente ang naggunit sa ilang mga tract, magasin, ug mga libro samtang sila nagwarawara sa pagpanamilit kanamo.

Namalandong ko samtang namauli na mi. Mapasalamaton kaayo ko sa maong espesyal nga adlaw. Mahanduraw nako ang kalipay ni Papa Jacques, ang kahupayang gibati ni Mama Beatrice, ang hugot nga lamano sa usa ka tigulang nga babaye nga mipahiyom lang kanako. Nahinumdom ko sa mga tin-edyer nga misuknag intelihenteng mga pangutana ug hamtong nag panghunahuna bisan sa ilang kabatan-on. Nakadayeg ko nila nga bisag nag-ilaid sa kalisod nakahimo gihapon sila sa pagpahiyom ug pagkatawa.

Niining dapita, nakita namo nga daghan ang tim-os nga naningkamot sa pagtabang niadtong nag-antos. Karon, usa gayod ka dakong pribilehiyo nga gamiton ang Bibliya aron ipakita sa mga tawo ang permanenteng solusyon sa ilang mga problema. Nalipay kaayo ko nga nahimong bahin sa labing dakong programa sa espirituwal nga pagtabang sa mga tawo.