Duna ba Gayoy Tinuod nga Kahulogan ang Kinabuhi?
Duna ba Gayoy Tinuod nga Kahulogan ang Kinabuhi?
“DUNA ba gayoy kahulogan ang kinabuhi?” Daghan ang nangutana niini. Apan ikasubo nga bisag unsa pay ilang panglantaw sa kinabuhi, daghan gayod ang mibati nga ang ilang kinabuhi “walay kahulogan ug haw-ang,” ingon sa gihubit sa Austrianong neurologist nga si Viktor E. Frankl.
Nganong daghan kaayo ang mibati niini? Minilyon sa tibuok kalibotan ang nagkinabuhi sa makaluluoy kaayo nga kahimtang. Matag adlaw, sila nag-antos sa kakabos, sakit, kapintasan, ug pagdaogdaog. Ang ilang kinabuhi “tugob sa kasamok,” ingon sa gipamulong ni Job sa karaang panahon. (Job 14:1) Ang importante alang kanila nga duna lamang silay makaon matag adlaw.
Apan minilyon usab ang nagkinabuhing hamugaway. Daw kontento na kaayo sila sa ilang kinabuhi. Pero daghan kanila ang wala mobati sa ingon. Ngano? Kay sa daghang higayon ang ‘kasamok ug mga butang nga makapadaot’—ang wala damhang problema sa panalapi o makasubong mga trahedya, sama sa pagkamatay sa usa ka anak—nakapahugno sa ilang mga paglaom ug damgo.—Salmo 90:10.
May lain pang hinungdan nga nakapasamot niining pagbati nga ang kinabuhi “walay kahulogan ug haw-ang.” Unsa man kini? Ang pagkamubo kaayo sa kinabuhi. Alang sa daghan, daw dili makataronganon nga ang tawo, nga gihatagag dakong katakos, mabuhi lamang sa mubong panahon. Dili nila masabtan ang mapait nga kamatuoran: Sa madugay o madali, bisan pag makalingkawas ta sa kinadak-ang problema sa atong kinabuhi, kita mangamatay ra.—Ecclesiastes 3:19, 20.
Kanunay Bang Daw Walay Kahulogan ang Kinabuhi?
Maayo kaayo ang konklusyon niini ni Haring Solomon sa karaang Israel. Iyang nasaksihan ang kabudlay sa mga tawo sa paggamit sa ilang mga katakos sa pagpananom, pagtikad, pagpanukod, ug sa pag-atiman sa ilang mga pamilya, sama sa atong gihimo karon. Siya sama rag nakapangutana, ‘Unsa may bili niining tanan?’ Matod niya, ang tanan nga gibuhat sa tawo “walay kahulogan, usa ka paghakop sa hangin.”—Ecclesiastes 2:17, Ang Biblia, NCV.
Apan alang kang Solomon ang tanan bang gibuhat sa tawo kanunayng “walay kahulogan, usa ka paghakop sa hangin”? Dili. Gipahayag lamang niya ang realistikong panglantaw kon unsay dangatan sa kinabuhi niining dili hingpit nga kalibotan. Apan, ang Bibliya makahatag kanimog paglaom nga dili kanunayng ingon niini ang kahimtang!
Unsaon nimo pagbaton niini nga paglaom? Palihog basaha kining mosunod nga duha ka artikulo. Kini motabang kanimo sa pagsabot kon nganong ang kinabuhi daw wala gayoy kahulogan, kon unsay kasulbaran niini, ug kon sa unsang paagi imong mabatonan ang tinuod nga kahulogan sa kinabuhi bisan karon.
