DAGHAN karon ang mibating nag-inusara. Ilang gibating walay tinuod nga nahingawa kanila. Ang mga tigulang sagad mobati niini. Apan daghan sa kabataan karon, bisan sa mga nag-alagad sa Diyos, ang mibati usab nga sila nag-inusara ug nahadlok. Nahibalo ka bag ngano?— *

Daghan ang rason nga sila mibati niini. Pananglitan atong hisgotan ang usa ka tawo nga nabuhi kanhi—duolag usa ka libo ka tuig sa wala pa matawo si Jesus. Elias ang iyang ngalan. Siya nagkinabuhi sa dihang ang nasod sa Israel mibiya sa pagsimba sa matuod nga Diyos, si Jehova. Kadaghanan misimba sa bakak nga diyos nga si Baal. Si Elias miingon: “Ako lamang ang nahibilin.” Apan sa imong hunahuna, tinuod bang si Elias na lamang ang nahibiling nag-alagad kang Jehova?—

Wala masayod si Elias nga duna pay uban sa Israel nga nagsimba gihapon sa matuod nga Diyos. Apan sila nanago. Sila nahadlok. Nahibalo ka bag ngano?—

Si Ahab nga hari sa Israel wala mag-alagad kang Jehova. Siya nagsimba kang Baal, ang bakak nga diyos sa iyang daotang asawa nga si Jezebel. Busa gipangita nilang duha kadtong nag-alagad kang Jehova aron patyon sila, ilabina si Elias. Maong si Elias mikalagiw. Siya mipanaw ug mga 483 ka kilometros hangtod sa desyerto sa Horeb, ang dapit nga gitawag usab sa Bibliya ug Sinai. Didto, mga ginatos ka katuigan sa wala pa si Elias, gihatag ni Jehova sa iyang katawhan ang Napulo ka Sugo ug ang  uban sa iyang Balaod. Si Elias mitago nga nag-inusara sa usa ka langob sa Horeb. Sa imong hunahuna, si Elias ba angayng mahadlok?—

Gipakita sa Bibliya nga una pa niana gigamit ni Jehova si Elias sa paghimog mga milagro. Dihadiha gitubag ni Jehova ang pag-ampo ni Elias nga magpakanaog ug kalayo gikan sa langit aron sa pagsunog sa halad. Sa ingon, gipamatud-an ni Jehova nga Siya mao ang matuod nga Diyos, dili si Baal. Karon, samtang si Elias didto sa langob, si Jehova nakigsulti kaniya.

Si Jehova nangutana, “Unsay imong gibuhat dinhi?” Mao ning higayona nga si Elias miingon, ‘ako lamang ang nahibilin sa mga nagsimba kanimo.’ Dayon si Jehova malulotong nagtul-id kaniya nga nag-ingon, ‘duna pay pito ka libo nga nag-alagad kanako.’ Gisugo siya ni Jehova sa pagbalik ug giingnan nga Siya daghan pag ipabuhat kaniya.

Sa imong hunahuna, unsay atong makat-onan sa panig-ingnan ni Elias?— Bisan kadtong nag-alagad kang Jehova mahadlok usahay. Busa kitang tanan, bata man o tigulang, kinahanglang mangayo ug tabang kang Jehova. Ang Bibliya nagsaad: “Si Jehova haduol kanilang tanan nga nagatawag kaniya.”

Duna pay laing leksiyon: Bisan diin, duna kitay mga igsoon nga nahigugma kang Jehova ug kanato. Ang Bibliya miingon: “Ang samang mga butang maylabot sa mga pag-antos nagakahitabo diha sa tibuok kapunongan sa inyong mga igsoon dinhi sa kalibotan.” Dili ka ba malipay sa pagkasayod nga kita wala gayod mag-inusara?—