Ang Pagsultig Lainlaing Pinulongan—Gikan ba sa Diyos?

“NAGLIBOG gyod ko,” matod ni Devon. “Sa among simbahan, kada semana daghan ang daw gikunsaran sa balaang espiritu ug magsultig lainlaing pinulongan sa milagrosong paagi. Ang uban kanila imoral ug kinabuhi. Pero ako, nga naningkamot man untang magtinarong, wala gyod makadawat sa maong gasa sa espiritu bisag pwerte nakong ampo. Nganong ingon man niana?”

Si Gabriel tigsimba usab sa simbahan diin ang mga membro daw gikunsaran sa balaang espiritu ug makasultig lainlaing pinulongan. “Ang nakaapan lang,” matod niya, “mabalda ang akong pag-ampo kay ang uban mosultig kusog ug walay makasabot sa ilang gipanulti, bisan sila mismo. Busa, wala gayoy makabenepisyo niana. Dili ba angay nga duna untay kapuslanan ang gasa sa balaang espiritu sa Diyos?”

Nan, motungha ang pangutana: ‘Gikan ba gayod sa Diyos ang pagsultig lainlaing pinulongan nga ginahimo sa ubang relihiyon karon?’ Aron matubag kana, atong susihon ang milagrosong gasa sa pagsultig lainlaing pinulongan sa unang siglong mga Kristohanon.

Sila “Misugod sa Pagsulti sa Lainlaing mga Pinulongan”

Sa Bibliya, atong mabasa nga dihay mga lalaki ug babaye nga gihatagag katakos sa pagsultig lainlaing pinulongan nga wala nila tun-i. Kini unang nahitabo sa Pentekostes 33 C.E., pipila ka semana human mamatay si Jesu-Kristo. Nianang adlawa sa Jerusalem, mga 120 ka tinun-an ni Jesus ang “napuno sa balaang espiritu ug misugod sa pagsulti sa lainlaing mga pinulongan.” Ang mga dumuluong gikan sa lainlaing kayutaan “nangalibog, tungod kay ang matag usa nakadungog kanilang nagasulti sa iyang kaugalingong pinulongan.”—Buhat 1:15; 2:1-6.

Ang Bibliya naghisgot sa ubang tinun-an ni Jesus nga nakabaton usab niining talagsaong katakos. Pananglitan, tungod sa tabang sa balaang espiritu, si apostol Pablo nakasultig daghang pinulongan. (Buhat 19:6; 1 Corinto 12:10, 28; 14:18) Apan ang maong gasa sa balaang espiritu sa Diyos aduna gayoy katuyoan. Kon mao, unsay katuyoan sa pagsultig lainlaing pinulongan sa unang siglo?

Ilhanan sa Pagpaluyo sa Diyos

Sa dihang si Pablo misulat sa mga Kristohanon sa siyudad sa Corinto, nga lagmit ang pipila nagsultig lainlaing pinulongan, iyang gipatin-aw nga “ang pagsultig lainlaing mga pinulongan maoy usa ka ilhanan . . . ngadto sa mga dili-magtutuo.” (1 Corinto 14:22) Busa, kini nga  katakos, lakip ang ubang milagrosong mga buhat, maoy ilhanan aron makita sa mga tawo nga ang bag-ong Kristohanong kongregasyon giuyonan ug gipaluyohan sa Diyos. Ang maong mga milagro nahisamag karatula sa dalan nga naggiya sa mga tawong nangitag kamatuoran aron ilang makaplagan ang katawhan sa Diyos.

Apan matikdi nga ang Bibliya wala mag-ingon nga si Jesus ug ang mga propeta sa wala pa ang Kristohanong panahon makasultig lainlaing pinulongan sa milagrosong paagi. Busa kini nga katakos nga gihatag ngadto sa mga tinun-an ni Jesus dayag nga adunay espesipikong katuyoan.

Usa ka Paagi sa Pagpakaylap sa Maayong Balita

Sa sayong bahin sa ministeryo ni Jesus, iyang gisugo ang iyang mga tinun-an sa pagsangyaw sa maayong balita sa Gingharian sa Diyos ngadto lamang sa mga Hudiyo. (Mateo 10:6; 15:24) Busa, sila sagad magsangyaw ngadto lamang sa mga dapit sa mga Hudiyo. Apan sa wala madugay nausab ang kahimtang.

Dili dugay human mamatay ug mabanhaw si Jesus sa 33 C.E., iyang gisugo ang iyang mga sumusunod sa “paghimog mga tinun-an sa katawhan sa tanang kanasoran.” Siya miingon usab nga sila mahimong saksi niya “hangtod sa kinalay-ang dapit sa yuta.” (Mateo 28:19; Buhat 1:8) Aron matuman kana, kinahanglang mogamit silag laing mga pinulongan gawas sa Hebreohanon.

Ugaling lang, daghan sa unang mga tinun-an ang “dili edukado ug ordinaryo” lamang. (Buhat 4:13) Nan, unsaon nila pagsangyaw sa lagyong dapit diin ang mga pinulongan wala nila sukad madunggi ni makat-oni? Ang balaang espiritu maoy naghatag ug katakos sa pipila ka madasigong mga magwawali sa pagsultig laing pinulongan aron sila makasangyaw sa uban.

Busa, ang gasa sa pagsultig lainlaing pinulongan adunay duha ka katuyoan. Una, kini nagsilbing pamatuod sa pagpaluyo sa Diyos. Ikaduha, kana maoy epektibong paagi nga matuman sa unang siglong mga Kristohanon ang sugo nga sangyawan ang mga tawo nga lainlaig pinulongan. Ang pagsultig lainlaing mga pinulongan sa daghang relihiyon karon nagpalampos ba niini nga mga katuyoan?

Pagsultig Lainlaing Pinulongan Karon—Ilhanan ba sa Pagpaluyo sa Diyos?

Asa ka magbutang ug karatula aron daghang tawo ang makakita niini? Sa sulod ba sa usa ka gamayng bilding? Dili gayod! Ang asoy bahin sa panghitabo sa adlaw sa Pentekostes nag-ingon nga dihay “panon” nga nakasaksi sa ilhanan nga gihatag sa mga tinun-an—ang milagrosong pagsultig lainlaing pinulongan. Ingong resulta, “mga tulo ka libong kalag ang nadugang” sa Kristohanong kongregasyon nianang adlawa! (Buhat 2:5, 6, 41) Kon ang mga tawo karon mangangkon nga makasultig lainlaing pinulongan apan naghimo niana diha lang sulod sa ilang simbahan, unsaon pagkakita sa mga tawong dili-magtutuo niana nga ilhanan?

Ang Bibliya nag-ingon nga ang pakighilawas ug ang ubang “mga buhat sa unod” makababag sa paglihok sa balaang espiritu, ug “kadtong nagabuhat sa maong mga butang dili makapanunod sa gingharian sa Diyos.” (Galacia 5:17-21) Kon makakita kag imoral nga mga tawo nga milagrosong makasultig lainlaing pinulongan, makapangutana ka gayod, ‘Makataronganon bang kunsaran sa balaang espiritu ang mga tawo nga nagpadayon sa pagbuhat sa mga butang nga gikondenar sa Bibliya?’ Nahisama kanag pagbutang ug karatula nga magpahisalaag sa mga tawo.

Pagsultig Lainlaing Pinulongan Karon—Usa ba ka Paagi sa Pagpakaylap sa Maayong Balita?

Komosta man kon bahin sa ikaduhang katuyoan sa pagsultig lainlaing pinulongan? Ginahimo ba kana sa mga relihiyon karon aron mapakaylap ang maayong balita ngadto sa mga tawo nga lainlaig pinulongan? Hinumdomi nga ang mga tawo nga miadto sa Jerusalem niadtong Pentekostes 33 C.E. naggikan sa lainlaing kayutaan, ug dayag nga ilang nasabtan ang mga pinulongan nga gisulti sa mga tinun-an. Sa kasukwahi,  ang mga tawo nga naghimo niana karon nagsultig pinulongan nga wala gayoy makasabot.

Tin-aw nga ang pagsultig lainlaing pinulongan karon lahi sa pagsultig lainlaing pinulongan sa mga tinun-an ni Jesus sa unang siglo. Gani, walay rekord nga nagpamatuod nga dunay nakadawat niana nga katakos human mamatay ang mga apostoles. Ang mga nagabasag Bibliya nahibalo niana. Kon bahin sa katakos sa paghimog milagro, lakip na ang pagsultig lainlaing pinulongan, si apostol Pablo nagtagna: “Kini wagtangon ra.” (1 Corinto 13:8) Kon mao, unsaon nato pag-ila karon sa mga tawo nga nakabaton sa balaang espiritu?

Unsang Relihiyona ang Napamatud-ang Nakabaton sa Balaang Espiritu?

Si Jesus nahibalo nga ang gasa sa pagsultig lainlaing pinulongan mawagtang pipila ka tuig human matukod ang Kristohanong kongregasyon. Sa hapit na siyang mamatay, si Jesus naghisgot ug permanenteng ilhanan kon kinsa ang tinuod niyang mga sumusunod. “Pinaagi niini ang tanan makaila nga kamo akong mga tinun-an,” siya miingon, “kon kamo adunay gugma sa inyong taliwala.” (Juan 13:35) Gani, ang teksto nga naghisgot nga wagtangon ra ang milagrosong mga gasa naghisgot usab nga “ang gugma dili gayod mapakyas.”—1 Corinto 13:8.

Ang gugma maoy una sa siyam ka bahin sa “bunga” sa balaang espiritu sa Diyos. (Galacia 5:22, 23) Busa kadtong tinuod nga nagbaton sa espiritu sa Diyos, kinsa iyang giuyonan, magpakitag tinuod nga gugma sa usag usa. Dugang pa, ang ikatulong bahin sa bunga sa espiritu mao ang pakigdait. Busa kadtong nagbaton sa balaang espiritu maoy mga tawong makigdaiton, nga naningkamot sa pagsalikway sa pagpihigpihig ug kapintasan.

Hinumdomi usab ang giingon ni Jesus nga nasulat sa Buhat 1:8. Siya nagtagna nga ang iyang mga tinun-an makadawat ug gahom aron mahimong mga saksi niya “hangtod sa kinalay-ang dapit sa yuta.” Gipakita usab niya nga magpadayon ang maong buluhaton “hangtod sa kataposan sa kalibotan.” (Mateo 28:20, Maayong Balita Biblia) Busa ang buluhatong pagsangyaw sa tibuok kalibotan magpadayon nga ilhanan niadtong tinuod nga nakabaton sa balaang espiritu.

Sa imong hunahuna, unsang relihiyona ang napamatud-ang nakabaton sa balaang espiritu karon? Kinsa sa tibuok kalibotan ang nagpasundayag sa bunga sa espiritu, ilabina ang gugma ug pakigdait, ug gilutos pa gani sa gobyerno tungod kay sila dili moapil sa gubat? (Isaias 2:4) Kinsa ang naningkamot sa pagsalikway sa mga buhat sa unod, sama sa pakighilawas, ug nagpalagpot pa gani sa ilang mga membro nga dili mahinulsolon? (1 Corinto 5:11-13) Kinsa ang nagsangyaw sa tibuok kalibotan bahin sa maayong balita nga ang Gingharian sa Diyos mao ang bugtong paglaom sa katawhan?—Mateo 24:14.

Ang mga magpapatik niini nga magasin dili magpanuko sa pag-ingon nga ang maong mga ilhanan nga gihisgotan sa Bibliya makita diha sa mga Saksi ni Jehova. Mahimong ikaw mismo ang magsusi aron imong mapamatud-an kon sila ba gipaluyohan gayod sa Diyos.