3 Unsaon Pag-ampo?

KON bahin sa pag-ampo, daghang relihiyon ang naghatag ug dakong pagtagad sa posisyon, mga pulong, ug rituwal. Apan gipakita sa Bibliya nga dili kana ang angayng hatagag pagtagad, kondili dunay labaw pa nga angayng tagdon.

Ang Bibliya naghisgot bahin sa matinumanong mga alagad sa Diyos nga nag-ampo sa lainlaing kahimtang ug posisyon. Sila nag-ampo nga hilom o sa makusog depende sa kahimtang. Sila nag-ampo nga naghangad o nagduko. Wala sila mogamit ug mga imahen, rosaryohan, o mga nobenahan apan sinsero nilang gibungat kon unsay anaa sa ilang kasingkasing. Nganong gidungog man ang ilang pag-ampo?

Sumala sa gihisgotan sa nag-unang artikulo, sila nag-ampo sa usa lang ka Diyos—si Jehova. Ang laing rason gihisgotan diha sa 1 Juan 5:14: “Kini ang pagsalig nga atong nabatonan diha kaniya, nga, bisan unsay atong pangayoon sumala sa iyang kabubut-on, siya magpatalinghog kanato.” Ang atong pag-ampo kinahanglang uyon sa kabubut-on sa Diyos. Unsay ipasabot niana?

Aron makaampo kita uyon sa kabubut-on sa Diyos, kinahanglang mahibalo kita kon unsay iyang kabubut-on. Busa ang pagtuon sa Bibliya hinungdanon. Nagpasabot ba kini nga kinahanglang mga eskolar kita sa Bibliya aron dunggon sa Diyos ang atong pag-ampo? Wala, apan buot sa Diyos nga hibaloon nato ang iyang kabubut-on, sabton kini, ug ipadapat. (Mateo 7:21-23) Kinahanglang mag-ampo kita kaharmonya sa atong nakat-onan.

Samtang nag-uswag ang atong kahibalo bahin kang Jehova ug sa iyang kabubut-on, molig-on usab ang atong pagtuo—ang laing gikinahanglan aron dunggon ang atong pag-ampo. Si Jesus miingon: “Ang tanang butang nga inyong pangayoon diha sa pag-ampo, nga may pagtuo, madawat ninyo.” (Mateo 21:22) Ang pagbaton ug pagtuo wala magpasabot nga ang usa daling motuo. Hinunoa, kini nagpasabot nga siya motuo sa usa ka butang bisag dili makita tungod sa lig-on kaayong ebidensiya. (Hebreohanon 11:1) Bisag dili nato makita si Jehova, dunay daghang ebidensiya diha sa Bibliya nga siya tinuod, kasaligan, ug andam motubag sa pag-ampo niadtong dunay pagtuo kaniya. Dugang pa, kita makahangyo kaniya nga hatagan kitag dugang pagtuo, ug buot ni Jehova nga hatagan kita sa atong gikinahanglan.—Lucas 17:5; Santiago 1:17.

Aniay lain pang hinungdanong butang bahin sa pag-ampo. Si Jesus miingon: “Walay makaadto sa Amahan kon dili pinaagi kanako.” (Juan 14:6) Oo, si Jesus ang dalan aron kita makaduol sa Amahan, si Jehova. Busa giingnan ni Jesus ang iyang mga sumusunod sa pag-ampo pinaagi sa iyang ngalan. (Juan 14:13; 15:16) Kini wala magpasabot nga kita angayng moampo kang Jesus. Hinunoa, kita moampo pinaagi sa ngalan ni Jesus, tungod kay  pinaagi kaniya kita makaduol sa atong hingpit ug balaang Amahan.

Ang mga apostoles ni Jesus mihangyo kaniya: “Ginoo, tudloi kami kon unsaon sa pag-ampo.” (Lucas 11:1) Dayag nga wala sila mangutana bahin sa mga butang nga bag-o lang natong gihisgotan. Gusto silang mahibalo kon unsay angay nilang iampo.

[Blurb sa panid 6]

Aron dunggon sa Diyos ang atong pag-ampo, kinahanglan nga kini uyon sa kabubut-on sa Diyos, inubanag pagtuo, ug itanyag pinaagi sa ngalan ni Jesus