Ika-128 nga Graduwasyon sa Gilead

Mga Misyonaryo Gipadala sa “Paghimog mga Tinun-an”

“ARON ang tanang nasod makadungog sa maayong balita, ang ubang Kristohanon kinahanglang andam mobiya sa ilang pamilya ug balay aron mosangyaw sa langyawng nasod.” Kini ang pasiunang mga pulong sa usa ka membro sa Nagamandong Lawas sa mga Saksi ni Jehova nga si David Splane niining makapalipayng espirituwal nga okasyon.

Niadtong Marso 13, 2010, duolan sa 8,000 ang mitambong sa graduwasyon sa ika-128 nga klase sa Watchtower Bible School of Gilead. Sila maoy mga higala, membro sa pamilya, ug mga bisita gikan sa 27 ka lainlaing nasod.

“Ang mga Tinun-an Wala ra Magpondo sa Ilang mga Balay”

Ang programa gisugdan sa tsirman nga si Brader Splane pinaagi sa paghisgot sa sugo ni Jesus: “Panglakaw kamo ug paghimog mga tinun-an sa katawhan sa tanang kanasoran.” (Mateo 28:19, 20) Iyang gipasiugda nga si Jesus nagsugo sa iyang mga tinun-an sa pag-adto sa mga tawo. Tinuod, niadtong Pentekostes 33 C.E., ang mga tawo gikan sa Mesopotamia, North Africa, ug sa lainlaing lugar sa Imperyo sa Roma miadto sa Jerusalem mao nga sila nakadungog sa maayong balita. Apan, matod pa sa mamumulong, “ang mga tinun-an wala ra magpondo sa ilang mga balay ug wala maghulat nga silay adtoon sa mga tawo sa tanang kanasoran. Ilang giadto ang mga tawo sa kinalay-ang dapit sa yuta.”—Buhat 1:8.

“Dili lang basta gisultihan ni Jesus ang iyang mga tinun-an kon unsay ilang buhaton,” matod ni Brader Splane; “kondili iyang gitudloan sila. Wala lang siya magsugo kanila sa pag-ampo; gitudloan niya sila kon unsaon pag-ampo. Wala lang siya magsugo kanila sa pagsangyaw; gitudloan niya sila kon unsaon kana paghimo. Dili lang siya basta nag-ingon nga angay silang mahimong maayong mga magtutudlo kondili iyang gipakita kanila kon unsa ang maayo ug epektibong mga paagi sa pagtudlo.”

Gidasig sa tsirman ang mga ginikanan sa mga estudyante pinaagi sa pagkutlo sa pasalig ni Jesus sa iyang mga tinun-an: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.” (Mateo 28:20) Gipasaligan ni Brader Splane ang mga nanambong nga dili pasagdan ni Jesus ang mga estudyante sa dapit diin sila ipadala.

“Ipanghambog si Jehova”

Si Anthony Morris nga membro sa Nagamandong Lawas nagdasig sa mga estudyante sa ‘pagpanghambog.’ Siya miingon nga adunay maayo ug di-maayong pagpanghambog. Ang di-maayong pagpanghambog naglangkit sa pagpasidungog sa atong kaugalingon. Ang maayong pagpanghambog gihubit sa 1 Corinto 1:31: “Siya nga nagapanghambog, manghambog siya diha kang Jehova.” Si Brader Morris miingon: “Ang angay natong ipanghambog mao ang atong pagbaton ug lawom nga pagsabot ug kahibalo bahin kang Jehova nga Diyos. Oo, ang atong kinadak-ang pribilehiyo mao ang pagdala sa iyang balaang ngalan—ang pagkahimong Saksi ni Jehova.”—Jeremias 9:24.

Dayon giasoy sa mamumulong ang kasinatian sa usa ka misyonaryo sa Africa aron ipasiugda nga hinungdanong ipaila ang ngalan ni Jehova. Ang misyonaryo, uban sa iyang asawa, mibiyahe aron magpakigpulong bahin sa Bibliya. Pag-abot sa checkpoint, ang brader gitionan ug pusil sa usa ka batan-ong sundalo ug gipangutana kon kinsa sila. Ang asawa nahinumdom sa iyang nakat-onan sa Gilead ug mihunghong sa iyang bana, “Ingna siya nga Saksi ka ni Jehova ug paingon ka sa usa ka lugar aron magpakigpulong.” Gibuhat kana sa bana ug wala sila unsaa. Pagkasunod adlaw, ang magtiayon nakabalita sa radyo nga gipasidan-an  sa presidente ang mga sundalo nga dunay mga hired killer nga nangangkong mga misyonaryo! Kay nagpaila nga mga Saksi ni Jehova imbes mga misyonaryo, sila napanalipdan. Gitapos ni Brader Morris ang iyang pakigpulong, nga nag-ingon: “Inig-abot ninyo sa inyong asaynment, ipanghambog si Jehova. Ipanghambog ang tanang buhaton ni Jehova samtang gamiton kamo niya alang sa iyang dumalayong kahimayaan.”

“Matuman ba Ninyo ang Inyong Misyon?”

Mao kanay tema ni Geoffrey Jackson, membro sa Nagamandong Lawas nga kanhi usa ka misyonaryo. Siya nangutana, “Unsay buot ipasabot kon kita moingon nga ang usa misyonaryo?” Iyang gipatin-aw nga ang pulong “misyonaryo” naggikan sa Latin nga pulong nga nagtumong sa usa ka tawo o grupo nga nakadawat ug espesyal nga asaynment. Ingong mga Saksi ni Jehova, maoy atong misyon ang pagsangyaw sa maayong balita ug pagtabang sa uban nga makaila ug masuod sa Diyos. Ato kining gituman ingong pagsundog kang Jesu-Kristo, kinsa nagpokus gayod sa iyang misyon sa dinhi siya sa yuta. Giingnan niya ang Romanong gobernador nga si Poncio Pilato: “Tungod niini ako gipakatawo, ug tungod niini ako mianhi sa kalibotan, aron ako magpamatuod sa kamatuoran.”—Juan 18:37.

Gihisgotan sa mamumulong ang asoy sa Bibliya bahin sa gubat sa Jerico aron mapalandong kini sa mga estudyante. Sa unom ka adlaw, ang mga sundalong Israelitas mibangon ug sayo, nangandam alang sa gubat, ug nagmartsa libot sa Jerico, apan namauli ra human niana. “Sa panglantaw sa tawo,” matod sa mamumulong, “ang ilang misyon daw walay kapuslanan.” Siya miingon nga lagmit ang ubang sundalo naghunahuna nga nag-usik lang silag panahon. Apan sa ikapitong adlaw, ang mga Israelitas gisugo nga molibot ug pito ka beses sa siyudad, ug dayon mosinggit ug kusog. Unsay resulta? Ang mga paril sa Jerico nalumpag!—Josue 6:13-15, 20.

Si Brader Jackson naghisgot ug upat ka leksiyon gikan sa asoy sa Jerico. (1) Importante ang pagsunod sa instruksiyon. Angay natong sundon ang pamaagi ni Jehova, ug dili kita maghunahuna nga mas maayo ang atong paagi. (2) Hinungdanon ang pagtuo ug pagsalig kang Jehova. Ang paril sa Jerico nalumpag dili tungod sa paggamit ug mga trosong iglulumpag kondili tungod sa pagtuo. (Hebreohanon 11:30) (3) Kinahanglang magmapailobon. Sa ngadto-ngadto, ang panalangin ni Jehova ‘modangat kaninyo.’ (Deuteronomio 28:2) (4) Ayawg surender. Ayaw kalimti ang inyong misyon. Gisumaryo ni Brader Jackson ang iyang pakigpulong, nga nag-ingon, “Kon inyong hinumdoman kining mga puntoha, matuman ninyo ang inyong misyon alang sa kadayeganan ug kahimayaan ni Jehova.”

Ubang Bahin sa Programa

“Mahala ang Bibliya ug ang Awtor Niini.” Kini ang tema ni Maxwell Lloyd, nga membro sa United States Branch Committee. Iyang giingnan ang mga estudyante, “Himoa kanunayng giya ang Bibliya.” Dayon, iyang gidasig sila: Ayaw pasagdi nga mobugnaw ang inyong gugma kang Jehova nga Diyos. Ayawg hunahunaa nga ang tanan makasabot sa inyong itudlo. Kat-oni kon unsaon pagpasimple ang kamatuoran sa Bibliya aron maabot ninyo ang kasingkasing sa inyong mga estudyante. Magmapaubsanon. Ayaw paghatag ug impresyon nga mas hawod mo sa Bibliya kay sa uban. Tudloi sila pinaagi sa pagpakitag maayong panig-ingnan. Hinaot nga makita sa inyong mga estudyante ang inyong dakong gugma sa Bibliya.

“Matikdi Pag-ayo ang mga Uwak.” Ang maong tema gipahayag ni Michael Burnett, usa sa mga instruktor ug misyonaryo kanhi. Siya miingon nga usahay mobati kitag kabalaka. Apan hinumdomi ang tambag ni Jesus: “Matikdi pag-ayo nga ang mga uwak wala magpugas ug binhi ni mag-ani, . . . [apan] ang Diyos nagapakaon kanila.” (Lucas 12:24) Sumala sa Moisesnong Balaod, ang mga uwak mahugaw ug dili angayng kaonon. Sila giisip nga makaluod. (Levitico 11:13, 15) Bisan pa niana, sila gipakaon sa Diyos. “Busa kon mobati unya kamog tumang kabalaka,” matod pa ni Brader Burnett, “hinumdomi ang uwak. Kon giatiman sa Diyos kining mahugaw ug makaluod nga langgam, labaw pa kamong atimanon sa Diyos kinsa mahinlo sa iyang mga mata.”

 “Ako Walay Nabuhat nga Sayop Kaninyo.” Gipatin-aw sa laing instruktor sa Gilead nga si Mark Noumair ang ilustrasyon ni Jesus maylabot sa mamumuo sa parasan. Ang ubang mamumuo tibuok adlawng nagtrabaho. Ang uban usa lang ka oras. Apan silang tanan parehas rag nadawat nga suhol! Kadtong mitrabahog taas nga oras nagbagulbol. Giingnan sa agalon sa parasan ang mga bagulbolan: ‘Ako walay nabuhat nga sayop kaninyo. Nakigsabot kamo kanako alang sa usa ka denario, dili ba? Dawata ang inyong suhol ug lakaw.’ (Mateo 20:13, 14) Unsay atong makat-onan niini? Ayaw itandi ang inyong kaugalingon sa uban. ‘Dili mo magmalipayon kon inyong itandi ang inyong kaugalingon sa uban. Posible pa gani nga biyaan ninyo ang inyong asaynment ug talikdan ang inyong talagsaong pribilehiyo,’ miingon si Brader Noumair. Iyang gipahinumdoman ang mga estudyante nga si Jesus maoy nagdumala sa espirituwal nga pag-ani karon ug siyay magbuot kon unsay iyang ihatag sa iyang mga sumusunod. Kon kabubut-on ni Jehova ug ni Jesus nga mohatag ug labaw pa sa uban, sila walay nabuhat nga sayop. Angayng isentro sa mga estudyante ang ilang hunahuna sa ilang buluhaton, ug dili tugotan nga ang “suhol” sa uban makababag sa ilang pagtuman sa buluhaton nga gihatag ni Jehova kanila.

Mga Kasinatian ug Interbiyo

Gawas sa pagtambong sa klase ug paghimog homwork, ang mga estudyante sa Gilead miduyog usab sa pagsangyaw uban sa lokal nga mga kongregasyon sa mga Saksi ni Jehova. Si Sam Roberson, nga usa sa mga instruktor sa Gilead, nag-interbiyo sa pipila ka estudyante bahin sa ilang mga kasinatian. Pananglitan, si Sister Alessandra Kirchler nakahimamat ug usa ka babaye nga nabalaka pag-ayo kay ang iyang anak nga lalaki kusog manigarilyo. Gibalikan siya ni Alessandra dala ang magasing Pagmata! nga dunay artikulo bahin sa pagpanigarilyo. Walay tawo sa balay mao nga iya na lang gibilin ang magasin. Sa ulahi, naabtan niya ang babaye ug siya gipadayon. Nagustohan sa babaye ang maong artikulo ug miingon: “Kanunay kong naghunahuna kon nganong ginasulayan ko sa Diyos.” Gipakita ni Alessandra diha sa Bibliya nga ang Diyos dili maoy hinungdan sa daotang mga butang nga atong masinati. (Santiago 1:13) Karon, ang babaye ug ang iyang anak nagtuon na sa Bibliya.

Si Melvin Jones sa Service Department nag-interbiyo sa tulo ka kanhing estudyante sa Gilead: si Jon Sommerud, nga nag-alagad sa Albania; si Mark Anderson, nga nag-alagad sa Kenya; ug si James Hinderer, nga nag-alagad sa Theocratic Schools Department. Silang tulo miingon nga ang Gilead makatabang gayod sa mga estudyante dili lamang sa pagkat-on bahin sa pangunang mga pagtulon-an sa Bibliya kondili sa pagpadapat usab niana bisan asa pa sila mag-alagad.

Dayon gibasa sa usa sa mga estudyante ang ilang sulat nga nagpahayag sa ilang pasalamat. Ang 96-anyos nga si John Barr, nga kinatigulangang membro sa Nagamandong Lawas, maoy mitiklop sa programa pinaagig pag-ampo kang Jehova nga panalanginan ang buluhaton sa ika-128 nga klase sa Gilead.

 [Chart/Mapa sa panid 31]

ESTADISTIKA SA KLASE

8 nasod nga gihawasan

54 estudyante

27 magtiayon

35.2 aberids nga edad

19.1 aberids nga katuigan sukad sa pagbawtismo

13.8 aberids nga katuigan sa bug-os panahong pag-alagad

[Mapa]

(Alang sa aktuwal nga pagkahan-ay, tan-awa ang publikasyon)

Ang mga misyonaryo giasayn sa 25 ka nasod nga gipakita sa ubos:

ASAYNMENT SA MGA MISYONARYO

HONDURAS

GUATEMALA

NICARAGUA

DOMINICAN REPUBLIC

ARUBA

GUYANA

ECUADOR

BOLIVIA

PARAGUAY

LATVIA

ROMANIA

KOSOVO

SERBIA

ALBANIA

GUINEA

LIBERIA

CÔTE D’IVOIRE

GHANA

NAMIBIA

RWANDA

MADAGASCAR

MONGOLIA

TAIWAN

CAMBODIA

INDONESIA

(TERITORYO NGA GIDUMALA SA SANGANG BUHATAN SA AUSTRALIA)

[Hulagway sa panid 30]

Mga estudyante nga nagpasundayag sa ilang kasinatian sa pagsangyaw

[Hulagway sa panid 31]

Ika-128 nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.