Nganong si Jesus Wala Mag-apil-apil sa Politika?

HANDURAWA ang nahitabo usa ka hapon niana sa tuig 32 C.E. Si Jesus, ang gitagnang Mesiyas, nahimo nang ilado tungod sa pag-ayog mga masakiton ug pagbanhawg patay. Sayo-sayo nianang adlawa, linibo ka tawo ang nahingangha tungod sa iyang mga milagro ug sa iyang gitudlo kanila bahin sa Diyos. Pagkahapon, iyang gibahinbahin ang mga tawo sa gagmayng grupo, dayon siya miampo kang Jehova ug iyang gipakaon sila sa milagrosong paagi. Pagkahuman, iyang gipahipos ang sobrang pagkaon aron walay mausik. Unsay reaksiyon sa mga tawo?—Juan 6:1-13.

Buweno, human makita sa mga tawo ang mga milagro ni Jesus ug ang iyang katakos sa pagdumala kanila maingon man sa iyang pag-atiman sa ilang mga panginahanglan, sila naghunahuna nga siya angayan nga mahimong hari. (Juan 6:14) Kana dili ikatingala. Hinumdomi nga sila nangandoy ug maayong lider tungod kay ang ilang nasod nailalom sa madaogdaogong pagmando sa langyawng nasod. Busa ilang gipugos si Jesus sa pag-apil sa politika. Tagda kon unsay reaksiyon ni Jesus.

“Si Jesus, kay nahibalo nga sila moduol na ug mosakmit kaniya aron himoon siyang hari, mipahawa na usab paingon sa bukid nga nag-inusara,” miingon ang Juan 6:15. Ang baroganan ni Jesus dayag kaayo. Siya dili makigbahin sa politika. Sa tibuok niyang kinabuhi mao kana ang iyang baroganan. Siya miingon nga ang iyang mga sumusunod kinahanglang mosundog kaniya. (Juan 17:16) Nganong ingon niana ang baroganan ni Jesus?

Nganong si Jesus Neyutral sa Politika?

Ang pagkahimong neyutral ni Jesus sa politika gipasukad sa mga prinsipyo sa Bibliya. Tagda ang duha niini.

“Ang tawo nagmando sa tawo alang sa iyang kadaotan.” (Ecclesiastes 8:9) Mao kanay paghubit sa Bibliya sa pagmando sa tawo. Hinumdomi nga si Jesus dugay nang naglungtad sa langit ingong espiritu sa wala pa siya moanhi sa yuta. (Juan 17:5) Busa nahibalo siya nga ang mga tawo, bisag maayo pa ang ilang intensiyon, walay katakos sa pagtagana sa panginahanglan sa bilyon-bilyong tawo, ug dili usab katuyoan sa Diyos nga ang tawo maoy magmando sa iyang isigkatawo. (Jeremias 10:23) Si Jesus nahibalo nga ang gobyerno sa tawo dili gayod makasulbad sa mga problema sa katawhan.

“Ang tibuok kalibotan nailalom sa gahom sa usa nga daotan.” (1 Juan 5:19) Nakurat ka ba nianang mga pulonga? Mao kanay reaksiyon sa daghang tawo. Sila naghunahuna nga ang sinserong mga tawo moapil sa politika kay gusto nila nga moarang-arang ang kahimtang sa kalibotan. Apan bisan pa sa ilang paningkamot, sila dili makabuntog sa impluwensiya sa usa nga gitawag ni Jesus nga “magmamando niining kalibotana.” (Juan 12:31; 14:30) Busa giingnan ni Jesus ang usa ka politiko: “Ang akong gingharian dili bahin niining kalibotana.” (Juan 18:36) Si Jesus mao ang umaabot nga Hari sa langitnong gobyerno sa Diyos. Kon si Jesus nag-apil-apil sa politika, kana maoy pagluib sa kagamhanan sa iyang Amahan.

Si Jesus ba nagtudlo nga ang iyang mga sumusunod dili angayng magpasakop sa gobyerno sa tawo? Wala. Hinunoa, siya nagtudlo kanila nga mahimong timbang sa ilang responsabilidad ngadto sa Diyos ug sa gobyerno sa tawo.

Gitahod ni Jesus ang Gobyerno sa Tawo

Samtang nagtudlo si Jesus sa templo, gusto siyang bitkon sa iyang mga kaaway pinaagig pagpangutana kaniya kon angay bang mobayad ug  buhis. Kon si Jesus motubag ug dili, mahimong isipon sa uban nga siya batok sa Roma ug lagmit kini moaghat sa mga tawo sa pagrebelde. Apan kon motubag siyag oo, ang mga tawo maghunahuna nga siya walay pagpakabana sa inhustisya nga ilang naagoman. Ang tubag ni Jesus balanse kaayo. Siya miingon: “Ibayad gayod ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Lucas 20:21-25) Gipakita niini nga ang iyang mga sumusunod dunay obligasyon ngadto sa Diyos ug kang Cesar—nga mao ang gobyerno sa tawo.

Ang gobyerno maoy nagmentinar sa kahusay. Sila may katungod sa pag-obligar sa mga tawo nga magmatinud-anon, mobayad sa buhis, ug motuman sa balaod. Sa unsang paagi si Jesus naghatag ug maayong panig-ingnan sa pagbayad ‘kang Cesar sa mga butang ni Cesar’? Ang ginikanan ni Jesus masinundanon sa balaod bisan pag usahay lisod kanang tumanon. Pananglitan, si Jose ug ang iyang mabdos nga asawa, si Maria, mibiyaheg 150 kilometros paingon sa Betlehem agig pagtuman sa mando sa Roma nga magparehistro. (Lucas 2:1-5) Sama sa iyang ginikanan, si Jesus masinundanon sa balaod, ug nagbayad pa ganig buhis bisag dili siya obligado niana. (Mateo 17:24-27) Wala usab niya gamita ang iyang awtoridad aron manghilabot sa sekular nga mga butang. (Lucas 12:13, 14) Kita makaingon nga gitahod ni Jesus ang sistema sa gobyerno, bisan tuod wala siya makigbahin niana. Apan unsay iyang gipasabot sa dihang siya miingon nga ibayad “ang mga butang sa Diyos ngadto sa Diyos”?

Gihatag ni Jesus “ang mga Butang sa Diyos Ngadto sa Diyos”

Kas-a si Jesus gipangutana kon unsa ang kinalabwang balaod sa Diyos. Siya mitubag:  “ ‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo. Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’ ” (Mateo 22:37-39) Si Jesus miingon nga kon bahin sa pagbayad sa “mga butang sa Diyos ngadto sa Diyos,” ang unang butang nga atong ihatag Kaniya mao ang gugma—nga naglangkit sa kinasingkasing ug bug-os nga pagsunod Kaniya.

Mahimo bang bahinon ang maong gugma? Pwede ba nga ang katunga sa atong pagkamaunongon para kang Jehova nga Diyos ug sa iyang langitnong gobyerno, ug ang katunga para sa tawhanong gobyerno? Si Jesus naghisgot niini nga prinsipyo: “Walay usa nga mahimong ulipon sa duha ka agalon; kay mahimong dumtan niya ang usa ug higugmaon ang lain, o unongan niya ang usa ug tamayon ang lain.” (Mateo 6:24) Dinhi, si Jesus naghisgot bahin sa pagkamaunongon ngadto sa Diyos ug sa bahandi, apan dayag nga ang maong prinsipyo gipadapat usab niya bahin sa pag-apil-apil sa politika. Ingon usab niana ang prinsipyo sa iyang mga sumusunod sa unang siglo.

Ang karaang mga rekord nagpakita nga ang mga sumusunod ni Jesus sa unang siglo wala mag-apil-apil sa politika. Tungod kay bug-os ang ilang debosyon ngadto sa Usa nga gisimba ni Kristo, sila wala makig-alyansa sa Roma ug sa emperador niini, wala magsundalo, ug wala modawat ug posisyon sa gobyerno. Busa sila nakasinatig lainlaing kalisdanan. Ang ilang mga kaaway nag-akusar kanila nga nagdumot sa mga tawo. Husto ba ang maong akusasyon?

Ang Matuod nga mga Kristohanon Adunay Gugma sa mga Tawo

Hinumdomi nga gikutlo ni Jesus ang ikaduha nga kinalabwang sugo—“Higugmaon mo ang  imong silingan sama sa imong kaugalingon.” Busa, ang matuod nga mga Kristohanon dili gayod magdumot sa uban. Si Jesus nagmahal sa mga tawo, naghago alang kanila, ug nagtabang kanila bisan sa ginagmay nilang mga problema.—Marcos 5:25-34; Juan 2:1-10.

Apan unsay pagkaila sa mga tawo kang Jesus? Sila wala magtawag kaniya nga Mananambal, Tigpakaon sa Linibo, ug Tigbanhawg Patay—bisan pag gihimo niya ang maong kahibulongang mga butang. Hinunoa, sila nagtawag kaniya nga Magtutudlo, ug haom gayod kana. (Juan 1:38; 13:13) Gipatin-aw ni Jesus nga ang pangunang hinungdan nga siya mianhi sa yuta mao ang pagtudlo sa mga tawo bahin sa Gingharian sa Diyos.—Lucas 4:43.

Tungod niana, ang matuod nga mga sumusunod ni Kristo bug-os nga nakigbahin sa buluhaton nga gihimo sa ilang Agalon sa dinhi pa siya sa yuta—ang pagtudlo sa mga tawo bahin sa maayong balita sa Gingharian sa Diyos. Si Jesu-Kristo nagsugo nga iwali kana sa tibuok kalibotan. (Mateo 24:14; 28:19, 20) Ang maong langitnong gobyerno, nga dili gayod malumpag, magmando sa tanang kalalangan sa Diyos pinasukad sa gugma. Kini magtuman sa kabubut-on sa Diyos ug magwagtang sa pag-antos ug kamatayon. (Mateo 6:9, 10; Pinadayag 21:3, 4) Dili ikatingala nga ang Bibliya nagtawag sa mensahe ni Kristo nga “maayong balita”!—Lucas 8:1.

Busa, kon nangita ka sa matuod nga mga sumusunod ni Jesu-Kristo karon, unsaon nimo pag-ila kanila? Sila ba nag-apil-apil sa politika sa kalibotan, o sila bug-os nga nagtuman sa buluhaton nga gihimo ni Jesus—ang pagsangyaw ug pagtudlo bahin sa Gingharian sa Diyos?

Gusto ka bang makakat-on ug dugang bahin sa Gingharian sa Diyos ug kon sa unsang paagi kini makaapektar sa imong kinabuhi karon? Palihog kontaka ang mga Saksi ni Jehova sa inyong lugar o ablihi ang ilang opisyal nga Web site, www.watchtower.org.

[Kahon/Mga hulagway sa panid 24, 25]

Unsay Natabang sa mga Saksi ni Jehova Diha sa Komunidad?

Ang mga Saksi ni Jehova neyutral sa politika. Apan sila naningkamot gayod sa pagtabang sa lainlaing tawo diha sa komunidad. Tagda ang pipila ka pananglitan:

◼ Ang kapin sa pito ka milyong Saksi ni Jehova maoy mga boluntaryo nga naggugol ug kapin sa 1.5 bilyong oras matag tuig sa pagtudlo sa mga tawo bahin sa Bibliya ug kon sa unsang paagi kini makatabang sa pagbuntog sa makadaot nga mga bisyo ug kinaiya, pagbaton ug malipayong pamilya, ug sa pagpauswag sa kinabuhi.

◼ Sila nagpatik ug nanagtag ug mga basahon nga walay bayad diha sa kapin sa 500 ka pinulongan, ug gani ang uban niana nga mga pinulongan walay laing giimprentang basahon gawas nianang gipatik sa mga Saksi.

◼ Sila adunay mga programa nga nakatabang sa milyon-milyon nga mahanas sa pagpakigsulti diha sa publiko.

◼ Sila adunay mga literacy program nga nakatabang sa libolibong tawo sa tibuok kalibotan nga makakat-on sa pagbasa ug pagsulat.

◼ Sa tibuok kalibotan, sila adunay kapin sa 400 ka Regional Building Committee nga nagbansay sa mga boluntaryo sa pagtukod ug mga bilding diin ipahigayon ang pagtudlo bahin sa Bibliya. Sa miaging napulo ka tuig, kapin sa 20,000 ka tigomanan, o Kingdom Hall, ang natukod.

◼ Sila nagtabang usab sa mga biktima sa kalamidad sa tibuok kalibotan, Saksi man o dili. Sulod sa duha ka tuig human sa duha ka bagyong mihapak sa United States, ang mga Saksi nakatukod ug kapin sa 90 ka Kingdom Hall ug 5,500 ka balay.

[Hulagway sa panid 23]

Sa dihang si Jesus gipugos sa mga tawo sa pag-apil sa politika, siya mipahawa “paingon sa bukid nga nag-inusara”