Nahibalo Ka Ba?

Tinuod ba nga ang mga hulmigas mag-andam sa ilang pagkaon sa ting-init ug magtigom ug pagkaon sa ting-ani?

▪ Ang Proverbio 6:6-8 nag-ingon: “Adtoa ang hulmigas, ikaw nga tapolan; tan-awa ang iyang mga dalan ug magmaalamon. Bisan kon kini walay komandante, opisyal o magmamando, kini nagaandam sa iyang pagkaon sa ting-init; kini nagtigom sa iyang taganang kalan-on sa ting-ani.”

Sa pagkatinuod, dunay daghang matang sa hulmigas nga magtigom ug pagkaon. Tingali ang gihisgotan ni Solomon mao ang harvester ant (Messor semirufus)—nga komon kaayo sa Israel karon.

Sumala sa usa ka reperensiya, “ang mga harvester ant mangitag pagkaon kon maayo ang panahon . . . [ug] mangolektag mga lugas sa mga bulan sa ting-init.” Manguha silag lugas gikan sa mga tanom o kaha mamunit niini diha sa yuta. Maghimo silag balay ilalom sa yuta nga duol sa umahan, kamalig, o galingan, diin dunay daghang lugas.

Ang ilang balay daghag lawak-lawak nga pondohanag pagkaon, ug kini nakonektar pinaagig mga dalan-dalan. Kini nga mga lawak-lawak 12 sentimetros ang diyametro ug 1 sentimetros ang gitas-on. Kon punog pagkaon ang ilang mga pondohanan, ang ilang suplay dangtag “kapin sa upat ka bulan.”

Unsay nalangkit sa pagkahimong tigtagay ug bino sa hari?

▪ Si Nehemias mao ang tigtagay ug bino ni Haring Artajerjes sa Persia. (Nehemias 1:11) Sa Tungang Sidlakan kaniadto, ang tigtagay ug bino sa hari dili ordinaryong sulugoon. Hinunoa, taas siyag ranggo. Daghang karaang basahon ug mga hulagway ang motabang kanato nga masabtan ang trabaho ni Nehemias diha sa palasyo sa mga Persianhon.

Ang tigtagay ug bino maoy unang motilaw sa bino aron maseguro nga dili mahiloan ang hari. Busa siya sinaligan sa hari. Ang historyanong si Edwin M. Yamauchi miingon: “Importante nga kasaligan ang mga tig-alagad sa palasyo tungod sa daotang mga plano batok sa hari sa Persia.” Ang tigtagay ug bino lagmit pinaboran nga opisyal ug makahimo sa pag-impluwensiya sa hari. Tungod kay adlaw-adlaw silang magkauban, makahimo siya sa pagdesisyon kon kinsay pwedeng moduol sa hari.

Tungod sa posisyon ni Nehemias, atong masabtan kon nganong gitugotan siya sa iyang hangyo nga moadto sa Jerusalem aron tukoron pag-usab ang mga paril niini. Seguradong gitamod pag-ayo sa hari si Nehemias. Ang The Anchor Bible Dictionary mikomento: “Ang nasulti lang gyod sa hari mao, ‘Kanus-a ka mobalik?’”—Nehemias 2:1-6.

[Dayagram/Hulagway sa panid 9]

Kinulit diha sa palasyo sa Persepolis sa Persia

[Dayagram]

(Alang sa aktuwal nga pagkahan-ay, tan-awa ang publikasyon)

Tigtagay ug bino

Si Prinsipe Xerxes

Si Dario nga Bantogan

[Credit Line]

© The Bridgeman Art Library International