Ang Tawo nga Nakapausab sa Kalibotan

Binilyon ka tawo na ang nabuhi ug namatay niining kalibotana. Kadaghanan kanila walay nahimong talagsaong butang nga niana sila mahinumdoman. Apan, dunay pipila nga nakaimpluwensiya sa latas sa kasaysayan—ug bisan gani sa imong adlaw-adlaw nga pagkinabuhi.

PAGMATA nimo sa buntag, imong gipasiga ang suga. Nangandam ka aron motrabaho. Nagkuha kag libro o magasin aron duna kay mabasa samtang magbiyahe. Nahinumdom ka sa pagtomar sa giresetang antibiotic aron makasukol ang imong lawas sa impeksiyon. Mao pa ganiy pagsugod sa imong adlaw, nakapahimulos ka na sa mga nahimo sa pipila ka iladong tawo.

Michael Faraday Kining physicist nga taga-England nga natawo niadtong 1791 mao ang nakaimbento sa electric motor ug sa dynamo. Ang iyang mga imbensiyon nakatabang aron mas daghang tawo ang makagamit ug koryente.

Ts’ai Lun Siya usa ka opisyal sa palasyo sa emperador sa China ug maoy nakakaplag sa mas maayong paagi sa paghimog papel niadtong mga 105 C.E. nga nakapadaghan sa produksiyon niini.

Johannes Gutenberg Niadtong mga 1450, naimbento sa German nga si Johannes Gutenberg ang unang imprentahanan nga movable type. Tungod niini, dili na gastoso ang pag-imprenta ug busa dali nang mabatonan ang mga basahon nga naghisgot ug lainlaing mga ulohan.

Alexander Fleming Niadtong 1928, kining tigdukiduki nga taga-Scotland nakadiskobre sa antibiotic nga iyang ginganlag penicillin. Ang mga antibiotic kaylap karong gigamit sa pagtambal sa mga impeksiyon tungod sa bakterya.

Walay duhaduha, tungod sa mga kaplag ug mga imbensiyon sa pipila ka tawo, binilyon ang nakapahimulos ug pipila ka bentaha o nakabaton pa ganig mas maayong panglawas.

Apan may usa ka tawo nga labaw kanilang tanan. Wala siya mailhi tungod sa mga kaplag labot sa siyensiya o sa medisina. Hinunoa, kining tawhana nga kabos ug kagikan nga namatay duolan na sa 2,000 ka tuig kanhi nagbilin ug usa ka mensahe—usa ka kusganong mensahe sa paglaom ug paghupay. Kon sukdon ang epekto sa iyang mensahe diha sa kinabuhi sa mga tawo sa tibuok kalibotan, daghan ang mouyon nga siya gayod ang tawo nga nakapausab sa kalibotan.

Kanang tawhana mao si Jesu-Kristo. Unsa ang mensahe nga iyang gisangyaw? Ug sa unsang paagi makaapekto sa imong kinabuhi ang iyang mensahe?