Angay Ka Bang Magmatinud-anon sa Tanang Panahon?

ANG tanan matinud-anon sa pipila ka panahon; tingali daghan ang matinud-anon sa halos tanang panahon. Apan pila ang imong nailhan nga naningkamot nga magmatinud-anon sa tanang panahon?

Sa pagkakaron, ang pagkadili-matinud-anon dayag diha sa lainlaing kahimtang sa kinabuhi. Bisan pa niana, ang mga tawo nahibalo sa panglantaw sa Diyos bahin sa pagkamatinud-anon. Pananglitan, sila sinati sa ikawalong sugo sa Napulo ka Sugo: “Dili ka mangawat.” (Exodo 20:15) Apan, daghan ang nagtuo nga dunay mga kahimtang nga daw dili ra daotan ang pagpangawat o ang ubang matang sa pagkadili-matinud-anon. Atong hisgotan ang tulo ka matang sa pagpangawat nga sagad giisip nga dili ra daotan.

Ang Kakabos Magpakamatarong ba sa Pagpangawat?

Ang usa ka Romanong estadista kas-a miingon: “Ang kakabos mao ang pangunang hinungdan sa krimen.” Ang usa ka tawong kabos lagmit mobati nga dili ra daotan ang pagpangawat. Ang ubang tawo lagmit mouyon niini. Unsay panglantaw ni Jesus bahin niini? Siya mabination kaayo sa mga nanginahanglan. “Siya naluoy kanila.” (Mateo 9:36) Apan sa bisan unsang kahimtang, wala gayod niya uyoni ang pagpangawat. Nan, unsay angayng buhaton sa tawong kabos?

Ang Diyos maluluy-on sa mga tawong naningkamot sa pagsunod kaniya, ug iyang panalanginan ang ilang paghago aron mabatonan ang ilang mga panginahanglan. (Salmo 37:25) Ang Bibliya nagsaad: “Dili itugot ni Jehova nga ang kalag sa matarong magutman, apan ang pangandoy sa mga daotan iyang ipahilayo.” (Proverbio 10:3) Makasalig ba niini ang usa ka tawong kabos? Si Victorine kombinsido gayod.

Si Victorine maoy biyuda nga dunay lima ka anak nga nagtungha, ug lisod kaayo ang ilang kinabuhi. Siya nagpuyo sa usa ka kabos nga nasod, diin limitado ang pinansiyal nga tabang gikan sa gobyerno. Sa matag adlaw ang mga tawo anaa sa gawas diin dako ang kahigayonan sa pagpangawat. Apan si Victorine wala matental sa pagpangawat. Hinunoa, siya naningkamot nga makabaton sa ilang mga panginahanglan ingong matinud-anong tindera diha sa kadalanan. Unsay nakatukmod kaniya nga magmatinud-anon?

“Una, nagtuo ko nga ang Diyos matinud-anon ug siya magmatinud-anon kanako kon sundogon ko siya. Ikaduha, ang akong mga anak makakat-on nga magmatinud-anon kon ila kanang makita kanako.”

 Komosta ang ilang kinabuhi? “Aduna miy pagkaon, besti, ug puy-anan. Apan dunay mga higayon nga mohangyo kog tabang sa akong mga higala, pananglitan, alang sa wala damhang mga bayranan sa pagpatambal. Kanunay namong nabatonan kon unsay among gikinahanglan. Ngano? Tungod kay ang akong mga higala nahibalo nga matinud-anon nakong gisulti kanila ang akong kahimtang ug wala nako pahimusli ang higayon aron makakuhag labaw kay sa akong gikinahanglan.

“Ang mga bata nagdako nga matinud-anon. Di pa dugay, ang usa ka silingan nakakitag mga sensilyo diha sa among lamesa ug nangutana kon wala ba ko mabalaka nga kuhaon kini sa mga bata. Daw dili siya makatuo sa dihang ako siyang giingnan nga dili gayod nila kana buhaton. Wala ko kahibalo nga iya diay silang gisulayan. Sekreto niyang gibilin sa among balay ang duha ka tag-100 franc nga sensilyo sa dapit nga daling makit-an sa mga bata. Pagbalik niya pagkasunod adlaw, nahingangha siya kay ang mga sensilyo anaa ra. Ang pagbaton ug matinud-anong mga anak mas maayo pa kay sa pagbaton ug daghang materyal nga mga butang.”

“Ang Tanan Nagbuhat Niini”

Kaylap kaayo ang pagpangawat diha sa trabahoan. Tungod niini, daghan ang moingon, “Ang tanan nagbuhat niini, busa dili daotan nga mangawat pod ko!” Sa kasukwahi, ang Bibliya nag-ingon: “Dili ka mosunod sa panon sa katawhan alang sa daotang katuyoan.” (Exodo 23:2) Kining tambaga gisunod ni Victoire. Nakahatag ba kanag kaayohan kaniya?

Sa dihang siya 19 anyos, si Victoire nakatrabaho sa usa ka planta nga naghimog lana sa palma. Wala madugay iyang namatikdan nga ang 40 ka babaye nga nagtrabaho didto naggamit sa ilang mga basket sa pagpayuhot ug mga liso sa palma pagawas sa planta. Sa matag hinapos sa semana, ilang ibaligya ang mga liso, nga motumbas sa tulo o upat ka adlaw nga suweldo. Si Victoire miingon: “Ang tanan nagbuhat niini. Ilang gidahom nga moduyog ko kanila, apan midumili ko, ug giingnan ko sila nga gusto kong magmatinud-anon. Ila kong gibiaybiay ug giingnan nga makaluluoy kono ko.

“Usa ka adlaw niana, samtang pagawas na mi sa planta, ang manedyer miabot ug kalit. Iyang gisusi ang tanan namong basket ug iyang nakita nga dihay mga liso sa palma sa matag basket, gawas lang sa akoa. Ang tanang nasakpan gipapahawa sa trabaho o kaha gipatrabahog duha ka semana nga walay suweldo. Sulod sa maong duha ka semana, ang mga babaye nakaamgo nga dili ako ang makaluluoy.”

“Iya na sa Nakakita”

Unsay imong bation kon makakaplag kag bililhong butang nga nawala sa uban? Para sa daghan, ila na kining angkonon ug dili na maghunahuna sa pag-uli niini. Ang ilang prinsipyo mao nga kini “iya na sa nakakita.” Ang uban mobati nga dili ra kini daotan. Total, matod pa nila, ang tag-iya wala na magdahom nga makita pa kini pag-usab. Ang uban moingon nga dili na nila responsabilidad ang pagpangita sa tag-iya tungod kay kini budlay kaayo.

Unsay panglantaw sa Diyos bahin niini? Gipakita sa Deuteronomio 22:1-3 nga dili itago sa nakakita ang butang nga iyang nakaplagan kondili iyang hiposon kini “hangtod nga siya [ang tag-iya] mokuha niini, ug dayon ibalik kini kaniya.” (The New English Bible) Kon dili ipahibalo sa nakakita ang butang nga iyang nakaplagan, siya mahimong akusahan nga nangawat. (Exodo 22:9) Praktikal pa ba kini karon? Si Christine kombinsido niana.

Si Christine maoy direktor sa usa ka pribadong eskuylahan. Usa niana ka adlawng Miyerkoles, iyang gikobra ang iyang binulang suweldo. Sumala sa naandan didto sa Kasadpang Aprika, iyang gibugkosan ang iyang kuwarta ug gisulod kana sa bag. Dayon misakay siyag traysikol aron motambong sa usa ka panagkatigom. Sa pag-abot, siya nangukayg sensilyo sa iyang bag aron iplete. Kay ngitngit, wala niya mamatikdi nga nahulog sa dalan ang iyang kuwarta.

Pipila ka minutos sa ulahi, ang 19 anyos nga si Blaise, nga dili taga didto, miagi sa maong dalan. Siya nakigsabot sa usa ka higala nga magkita sila diha sa tigom nga tambongan usab ni Christine.  Iyang nakaplagan ang kuwarta ug gibutang kana sa iyang bulsa. Pagkahuman sa tigom, giingnan ni Blaise ang iyang higala nga diha siyay nakit-an sa gawas, ug kon dunay nawad-an, mahimo siyang tawgan sa telepono aron ilhon kini.

Pag-abot ni Christine sa ilaha nianang gabhiona, nakurat siya kay nawala ang iyang usa ka bulang suweldo. Usa ka semana sa ulahi, sa dihang iyang gisultihan ang iyang higala nga si Josephine bahin niini, siya giingnan nga dunay nakit-an ang usa ka bisita sa maong tigom. Gitawgan ni Christine si Blaise ug iyang gisulti kaniya kon unsay nawala. Siya nalipay kaayo sa dihang giuli ni Blaise ang kuwarta. Unsay gibati ni Blaise? Iyang gitipigan ang kuwarta sulod sa usa ka semana, apan siya miingon, “Mas dako ang akong kalipay sa pag-uli sa kuwarta kay sa akong pagtipig niana.”

Kon Nganong Naningkamot Sila nga Magmatinud-anon sa Tanang Panahon

Si Victorine, Victoire, ug Blaise nagpuyo sa lainlaing lugar ug sila dili magkaila. Apan adunay usa ka butang nga sila managsama. Sila mga Saksi ni Jehova, kinsa nagsunod sa giingon sa Bibliya bahin sa pagkamatinud-anon. Ilang gipaabot nga matuman ang saad sa Diyos labot sa usa ka bag-ong kalibotan. “Adunay bag-ong mga langit ug usa ka bag-ong yuta nga atong ginapaabot sumala sa iyang saad, ug niini magpuyo ang pagkamatarong.” Ang tanang tawo matarong na unya—ug matinud-anon.—2 Pedro 3:13.

Gamay rag posibilidad nga moasenso ang panginabuhi ni Victorine hangtod nga ipahinabo sa Diyos ang maong mga kausaban. Bisan pa niana, siya dato sa espirituwal, usa ka butang nga dili mabayrag salapi. Ang iyang mga anak matinud-anon ug maayog pamatasan. Matag Dominggo sila malipayon kaayong makigsulti sa ilang mga silingan bahin sa pagkamaayo sa Diyos ug magpatin-aw kon sa unsang paagi tagbawon sa Diyos ang “tanan nga nagatawag kaniya sa kamatinud-anon” ug bantayan ang “tanang nahigugma kaniya.”—Salmo 145:7, 18, 20.

Sa ngadtongadto, si Victoire mihawa sa planta nga iyang gitrabahoan. Siya nagsugod ug kaugalingong negosyo ug namaligyag garri (usa ka matang sa pagkaon nga hinimo gikan sa balanghoy) diha sa merkado. Ang iyang pagkamatinud-anon nakadanig daghang kustomer. Tungod niini, iyang namenosan ang panahon nga gigahin sa pagpamaligya ug migugol siyag mas daghang panahon sa pagpakigsulti sa uban bahin sa paglaom nga mabuhi diha sa usa ka kalibotan diin wala nay pagpanglimbong. Sa ulahi siya naminyo, ug silang magtiayon nag-alagad karon ingong bug-os-panahong mga ministro.

Nawala ni Christine ang iyang kuwarta sa atubangan sa Kingdom Hall sa mga Saksi ni Jehova. Diyutay ra ang kaila ni Blaise sa maong panagkatigom, apan siya nahibalo nga sila maoy iyang Kristohanong mga igsoon, kinsa naningkamot nga magmatinud-anon sa tanang panahon.

Unsa ka daghan ang imong nahibaloan nga naningkamot gayod nga magmatinud-anon sa tanang panahon? Handurawa nga ikaw anaa taliwala sa 50, 100, o 200 ka tawong matinud-anon. Mao kana ang malipayong kasinatian sa mga Saksi ni Jehova diha sa ilang mga Kingdom Hall. Nganong dili nimo sulayan ang pagtambong aron mailhan sila?

[Blurb sa panid 12]

“Ang pagbaton ug matinud-anong mga anak mas maayo pa kay sa pagbaton ug daghang materyal nga mga butang.”—VICTORINE

[Kahon sa panid 14]

Gipakamatarong ba sa Proverbio 6:30 ang Pagpangawat?

Ang Proverbio 6:30 nag-ingon: “Ang mga tawo dili magatamay sa usa ka kawatan tungod lang kay siya nangawat aron sa pagbusog sa iyang kalag dihang siya gigutom.” Kini ba nagpakamatarong sa pagpangawat? Wala. Ang palibot nga mga teksto nagpakita nga papanubagon gihapon sa Diyos ang kawatan tungod sa iyang sala. Ang misunod nga bersikulo nag-ingon: “Apan, kon hisakpan, siya magabayad sa pito ka pilo nga gidaghanon; siya magahatag sa tanang manggad sa iyang balay.” (Proverbio 6:31) Bisan tuod ang kawatan nga nangawat tungod sa kagutom dili sama ka daotan sa usa nga nangawat tungod sa kahakog o sa tuyo nga daoton ang iyang biktima, siya sa gihapon obligadong ‘mobayad.’ Kadtong nagtinguha sa pag-uyon sa Diyos angay gayong molikay sa pagpangawat sa bisan unsang kahimtang.