Ibutang sa Lugar ang Alkoholikong Ilimnon

SI Tony, nga gihisgotan sa unang artikulo, nakapahimulos pa unta sa iyang kinabuhi kon iyang giatubang ang iyang problema sa pag-inom. Apan tungod kay wala ra man siyay namatikdan nga dili-maayong epekto sa iyang sobrang pag-inom, siya naghunahuna nga kontrolado ra niya ang iyang kinabuhi. Nganong sayop man ang iyang panghunahuna?

Ang iyang panghunahuna natuis tungod sa sobrang pag-inom sa alkoholikong ilimnon. Naamgohan man kana ni Tony o wala, ang iyang utok, nga maoy nagkontrolar sa iyang lawas, panghunahuna, ug emosyon, palyado na. Samtang nagkadaghan ang iyang giinom, nagkamenos usab ang katakos sa iyang utok sa pagsusi sa iyang kahimtang.

Ang laing rason kon nganong sayop ang panghunahuna ni Tony mao ang iyang naglabaw nga tinguha nga dili hunongon ang iyang bisyo. Si Allen, nga gihisgotan sa nag-unang mga artikulo, dili usab modawat sa sinugdan nga siya may problema sa pag-inom. “Tinagotago ang akong pag-inom,” siya miadmitir, “ug mohimo kog daghang pasangil ug pakamatarongon ko pa ang akong pag-inom. Usa lang ang anaa sa akong hunahuna—ipadayon ang akong bisyo sa pag-inom.” Bisan tuod nakita sa uban nga naadik na si Tony ug Allen sa alkoholikong ilimnon, sila kanunayng mangatarongan nga wala ray problema ang ilang pag-inom. Silang duha kinahanglang mohimog lakang aron makontrolar ang ilang pag-inom. Unsa kana?

Lihok Dayon!

Daghan nga nakaundang sa pag-abuso sa alkoholikong ilimnon ang milihok uyon sa giingon ni Jesus: “Karon, kon kanang imong tuo nga  mata nagapapandol kanimo, lusoka kini ug isalibay kini gikan kanimo. Kay mas makaayo pa kanimo nga mawad-an sa usa sa imong mga sangkap kay sa itambog ang imong tibuok nga lawas ngadto sa Gehenna.”—Mateo 5:29.

Siyempre, si Jesus wala magpasabot nga atong daoton ang atong lawas. Hinunoa, sa mahulagwayong paagi siya nagtudlo nga atong wad-on sa atong kinabuhi ang bisan unsang butang nga makadaot sa atong relasyon sa Diyos. Tinuod, kini tingali nagkinahanglag grabeng panlimbasog ug gani moresulta pa sa pisikal ug emosyonal nga kasakit. Apan kini manalipod kanato batok sa panghunahuna ug sa mga situwasyon nga motultol sa pag-abuso sa alkoholikong ilimnon. Busa kon sultihan ka sa uban nga sobra na ang imong pag-inom, lihok dayon aron makontrolar kini. a Kon dili ka makakontrolar niini, nan maayo nga dili ka na lang gyod moinom. Tingali dili kana sayon, apan mas maayo na lang kana kay sa madaot ang imong kinabuhi.

Bisag dili ka palainom, ikaw ba matental sa pag-inom ug sobra? Kon mao, unsang praktikal nga mga lakang ang imong himoon aron imong ikabutang sa lugar ang imong pag-inom?

Unsay Makatabang Kanimo?

1. Pagbatog pagtuo sa gahom sa makanunayon ug kinasingkasing nga pag-ampo. Ang Bibliya nagtambag niadtong gustong mopahimuot kang Jehova nga Diyos: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.” (Filipos 4:6, 7) Unsay imong iampo aron makabaton kag kalinaw sa hunahuna?

Angkona nga ikaw dunay problema sa pag-inom, usa ka problema nga ikaw mismo ang responsable. Kon imong itug-an sa Diyos ang mga lakang nga imong buhaton, ang Diyos magapanalangin sa imong paningkamot aron makaundang ug aron makalikay sa mas seryosong mga problema. “Siya nga nagatabon sa iyang kalapasan dili molampos, apan siya nga nagasugid ug nagabiya niini pagakaluy-an.” (Proverbio 28:13) Si Jesus usab miingon nga kita makaampo: “Ayaw kami dad-a ngadto sa tentasyon, apan luwasa kami gikan sa usa nga daotan.” (Mateo 6:13) Apan sa unsang paagi ka molihok uyon sa maong mga pag-ampo, ug asa ka makakaplag ug mga tubag sa imong mga pangamuyo?

2. Batoni ang kusog gikan sa Pulong sa Diyos. “Ang pulong sa Diyos buhi ug gamhanan . . . ug makatugkad sa mga hunahuna ug mga tuyo sa kasingkasing.” (Hebreohanon 4:12) Daghang palainom kanhi ang natabangan pinaagi sa pagbasa ug pagpamalandong sa mga teksto sa Bibliya adlaw-adlaw. “Malipayon ang tawo nga wala magalakaw sa tambag sa mga daotan,” miingon ang mahinadlokon sa Diyos nga salmista, “hinunoa ang iyang kalipay anaa sa balaod ni Jehova, ug sa iyang balaod siya nagabasa sa hinayng tingog sa adlaw ug gabii. . . . Ang tanan nga ginabuhat niya magmalamposon.”—Salmo 1:1-3.

Si Allen, nga nakabatog kusog sa pagbuntog sa iyang problema sa pag-inom tungod sa pagtuon sa Bibliya uban sa mga Saksi ni Jehova, miingon, “Ako kombinsido nga kon wala pa ang Bibliya ug ang mga prinsipyo sa Bibliya nga maoy mitabang kanako sa pag-undang sa pag-inom, patay na unta ko.”

3. Ugmara ang pagpugong-sa-kaugalingon. Ang Bibliya nagtaho nga ang kanhing mga palahubog diha sa Kristohanong kongregasyon nahinloan “sa espiritu sa atong Diyos.” (1 Corinto 6:9-11) Sa unsang paagi? Ang usa ka paagi mao nga sila natabangan sa pag-undang sa paghuboghubog ug sa hudyaka pinaagi sa pag-ugmad sa pagpugong-sa-kaugalingon, usa ka hiyas nga maugmad tungod sa tabang sa balaang espiritu sa Diyos. “Ayaw kamo pagkahubog sa bino, nga niini adunay unodnong pagpatuyang, kondili magmapuno sa espiritu.” (Efeso 5:18; Galacia 5:21-23) Si Jesu-Kristo nagsaad nga ang “Amahan sa langit mohatag ug balaang espiritu niadtong nagapangayo kaniya.” Busa, “padayon sa pagpangayo, ug kini igahatag kaninyo.”—Lucas 11:9, 13.

 Kadtong nangandoy nga dawaton ni Jehova ang ilang pagsimba makaugmad sa pagpugong-sa-kaugalingon pinaagi sa pagbasa ug pagtuon sa Bibliya ug pinaagi sa makanunayon ug kinasingkasing nga pag-ampo. Inay nga maluya, salig sa saad nga makaplagan sa Pulong sa Diyos: “Siya nga nagapugas alang sa espiritu moani ug kinabuhing walay kataposan gikan sa espiritu. Busa dili kita mohunong sa pagbuhat ug maayo, kay sa takdang panahon kita moani kon kita dili molunga.”—Galacia 6:8, 9.

4. Pagpilig maayong mga kauban. “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Proverbio 13:20) Sultihi ang imong mga higala sa imong determinasyon nga molikay sa sobrang pag-inom. Apan ang Pulong sa Diyos nagpasidaan nga sa dihang ikaw moundang na sa “pagpatuyang sa bino, hudyaka, [ug] palabwanay sa inom,” ang kanhing mga higala ‘mahibulong ug magpadayon sa pagsulti nga mapasipalahon kanimo.’ (1 Pedro 4:3, 4) Angay kang molikay sa pagpakig-uban sa mga tawong dili maayog impluwensiya kanimo kon bahin sa pag-inom.

5. Pagtakdag limitasyon. “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Kon imong tugotan ang mga prinsipyo sa Pulong sa Diyos sa pagtabang kanimo sa pagtakdag limitasyon inay nga ang imong mga higala o kining “sistemaha sa mga butang,” dawaton sa Diyos ang imong paagi sa pagkinabuhi. Apan unsaon nimo pagtino sa imong limitasyon?

Ang gidaghanon sa alkoholikong ilimnon nga makapabag-o sa dagan sa imong hunahuna ug makapahuyang sa imong katakos sa panghukom maoy sobra na alang kanimo. Busa kon ikaw moinom, dili maalamon ang pagbanabana lang sa gidaghanon sa imong imnon nga dili ka pa mahubog. Magmatinud-anon  sa pagsusi sa imong kaugalingon ug pagtakdag tinong limitasyon sa gidaghanon nga imong imnon.

6. Kat-oni ang pagbalibad. “Himoa lang ang inyong pulong nga Oo magkahulogan ug Oo, ang inyong Dili, Dili.” (Mateo 5:37) Kat-oni ang pagbalibad sa matinahorong paagi kon adunay magsigeg agda kanimo sa pag-inom. “Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.”—Colosas 4:6.

7. Pangayog tabang. Pangayog tabang sa mahigugmaong mga higala nga andam mopaluyo kanimo sa pagkontrolar sa imong pag-inom ug mohatag kanimog espirituwal nga tabang. “Ang duha mas maayo kay sa usa, tungod kay sila adunay maayong balos sa ilang kahago. Kay kon ang usa kanila mapukan, ang usa makabangon sa iyang kauban.” (Ecclesiastes 4:9, 10; Santiago 5:14, 16) Ang National Institute on Alcohol Abuse and Alcoholism sa Amerika nagtambag usab: “Usahay lisod ang pagkontrolar sa imong pag-inom. Pangayog tabang sa imong pamilya ug mga higala aron paluyohan ka sa pagkab-ot sa imong tumong.”

8. Kab-ota gayod ang imong tumong. “Mahimong mga magtutuman sa pulong, ug dili tigpaminaw lamang, nga limbongan ang inyong kaugalingon pinaagi sa bakak nga pangatarongan. Apan siya nga magasud-ong pag-ayo sa hingpit nga balaod nga iya sa kagawasan ug magpadayon diha niana, kini nga tawo, tungod kay siya dili usa ka malimtanong tigpaminaw, kondili usa ka magtutuman sa buluhaton, malipayon siya sa iyang pagbuhat niini.”—Santiago 1:22, 25.

Kon Unsaon Pagbuntog sa Maong Bisyo

Dili ang tanan nga moinom ug daghan mahimong palainom. Apan ang uban nga misugod sa pag-inom ug daghan—o subsob na nga moinom—naadik niini. Kon ang usa maadik sa alkoholikong ilimnon, ang iyang lawas magpangita na niini tungod sa isog nga substansiya nga anaa niini. Busa, dili lamang determinasyon ug espirituwal nga tabang ang gikinahanglan aron makalingkawas sa maong bisyo. “Sa dihang miundang ko sa pag-inom,” matod ni Allen, “grabe kaayo ang epekto niini sa akong lawas. Busa nakahukom ko nga magpatambal, gawas pa sa espirituwal nga tabang nga akong nadawat.”

 Daghang palainom ang nagpatambal aron abagan ang ilang determinasyon sa paglingkawas sa pag-abuso sa alkoholikong ilimnon. b Ang uban gani nagpaospital tungod sa grabeng epekto sa ilang pag-undang o nagpatambal aron mapugngan ang sobra nilang pagpangitag alkoholikong ilimnon ug aron bug-os nang makalikay niini. Ang Anak sa Diyos nga naghimog mga milagro miingon: “Kadtong mga lig-on wala magkinahanglan ug mananambal, kondili kadtong mga masakiton.”—Marcos 2:17.

Mga Kaayohan sa Pagsunod sa Sugo sa Diyos

Ang maalamong tambag sa Bibliya bahin sa alkoholikong ilimnon naggikan sa matuod nga Diyos, kinsa interesado gayod sa atong kaayohan—dili lang sa atong kalipay karon kondili sa atong walay kataposang kaayohan. Bayente-kuwatro ka tuig human sa iyang pag-undang, si Allen nahinumdom: “Nalipay kaayo ko nga makahimo diay ko sa pagbag-o, nga si Jehova gustong motabang kanako sa pagtul-id sa akong kinabuhi, nga siya . . . ” Si Allen mihunong kadiyot samtang gipugngan ang iyang mga luha tungod sa iyang mga kaagi. “Ah, . . . ang pagkasayod nga si Jehova mosabot kanako ug moatiman ug motabang kanako—talagsaon kaayo kana.”

Busa kon ikaw adunay problema sa pag-inom, dili ka angayng mawad-ag paglaom. Si Allen ug ang daghang uban pa nakasinati sa imong kahimtang karon ug sila milampos sa pagkontrolar o sa pag-undang sa pag-inom. Sila wala magmahay sa ilang gibuhat, ug ingon usab niana ang imong masinati.

Kon modesisyon ka sa pag-inom nga kasarangan o kaha dili na gayod moinom, sunda ang mahigugmaong tambag sa Diyos: “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.”—Isaias 48:18.

[Mga footnote]

[Kahon/Hulagway sa panid 8]

 Kontrolado Ka na ba sa Alkoholikong Ilimnon?

Tingali makapangutana ka:

• Mas daghan na ba karon ang akong ginainom?

• Mas sagunson na ba karon ang akong pag-inom?

• Mas isog na ba ang akong ginainom karon?

• Moinom ba ko aron makalimot sa tensiyon ug mga problema?

• Aduna na bay usa ka higala o membro sa pamilya nga nakigsulti kanako bahin sa akong pag-inom?

• Ang ako bang pag-inom nahimo nang problema sa balay, sa trabaho, o samtang nagbakasyon?

• Dili na ba ko mahimutang kon dili ko makainom sulod sa usa ka semana?

• Malain ba ko kon ang uban dili moinom?

• Gililong ko ba sa uban ang gidaghanon sa akong mainom?

Kon oo ang imong tubag bisan sa usa lang niining mga pangutanaha, lagmit nga kinahanglan kang mohimog aksiyon sa pagkontrolar sa imong pag-inom.

[Kahon/Hulagway sa panid 9]

Kon Unsaon Paghimog Maalamong mga Desisyon Maylabot sa Alkoholikong Ilimnon

Sa dili ka pa moinom, hunahunaa kini:

• Angay ba kong moinom o dili?

Sugyot: Kon dili ka makakontrolar sa imong pag-inom, ayaw na lag inom.

• Unsa ka daghan ang akong imnon?

Sugyot: Tinoa ang imong limitasyon sa dili ka pa moinom.

• Kanus-a ko moinom?

Sugyot: Ayawg inom kon magdrayb ka o kon duna kay himoon nga kinahanglang alerto ka; ayawg inom kon makigbahin ka sa relihiyosong mga kalihokan, kon mabdos ka o nagtomar ug tambal.

• Asa ko moinom?

Sugyot: Ayawg inom sa mga dapit nga matental ka sa pag-inom ug sobra; ayawg inom nga tinagotago o kon dunay mga tawo nga masilo.

• Kinsay akong pakig-ubanan kon ako moinom?

Sugyot: Pakig-uban sa mga higala ug mga membro sa pamilya nga may maayong impluwensiya kanimo; ayaw pakig-uban sa mga kusog moinom.

[Kahon/Hulagway sa panid 10]

Ang Pulong sa Diyos Nakatabang sa Kanhing Palahubog

Si Supot, nga taga-Thailand, palahubog kaayo. Sa sinugdan, magabii lang siya moinom. Kadugayan, moinom na siya kada buntag ug ingon man sa udto. Siya moinom aron lang mahubog. Apan misugod siya sa pagtuon sa Bibliya uban sa mga Saksi ni Jehova. Sa dihang iyang nakat-onan nga ang paghuboghubog gihukman ni Jehova nga Diyos, siya miundang sa pag-inom. Apan paglabay sa pipila ka panahon, mibalik siya sa iyang bisyo. Kana nakapaguol pag-ayo sa iyang pamilya.

Bisan pa niana, si Supot nahigugma gihapon kang Jehova ug buot niyang mosimba sa Diyos sa hustong paagi. Ang mga higala ni Supot padayong mitabang kaniya ug ilang gidasig ang iyang pamilya nga mogugol ug daghang panahon uban kaniya ug dili moundang sa pagtabang kaniya. Nianang panahona, ang pintok nga mga pulong sa 1 Corinto 6:10 nga ang ‘mga palahubog dili makapanunod sa gingharian sa Diyos’ nagpaamgo kang Supot sa pagkaseryoso sa iyang kahimtang. Iyang nasabtan nga kinahanglan niyang buhaton ang tanan aron mabiyaan ang iyang bisyo.

Niining higayona si Supot determinado nga moundang na gayod sa iyang bisyo sa pag-inom. Sa ngadtongadto, pinaagi sa gahom sa balaang espiritu ug sa paggiya sa Pulong sa Diyos, maingon man sa tabang sa iyang pamilya ug mga igsoon sa pagtuo, si Supot nakabatog espirituwal nga kusog mao nga iyang nabuntog ang tinguha nga moinom. Nalipay kaayo ang iyang pamilya sa dihang siya nagpabawtismo ingong simbolo sa iyang pagpahinungod sa Diyos. Si Supot karon aduna nay suod nga relasyon sa Diyos nga mao gayoy iyang gitinguha, ug iyang gigamit ang iyang panahon sa pagtabang sa uban nga masuod usab sa Diyos.