Ang mga Patay Makatabang ba sa mga Buhi?

SI Tamba, usa ka batan-ong lalaki nga taga-West Africa, hapit nang mokuhag eksaminasyon sa eskuylahan. a Miinsistir ang iyang inahan nga angay siyang magpatabang sa iyang namatayng mga paryente aron makapasar. Sa Palermo, Sicily, ang mga turista mobisita sa mga sementeryo nga anaa sa ilalom sa yuta diin gidispley ang ginatos ka patayng lawas nga maayong pagkapreserbar. Nagtuo ang pipila nga ang maong mga patay makapanalipod sa mga buhi. Kada tuig, ang mga tawo mobisita sa Lily Dale, usa ka lungsod sa kasadpang New York State, U.S.A. nga ilado tungod sa daghang espiritista nga nagpuyo didto. Gilaoman sa maong mga tawo nga ilang makontak ang patay na nilang mga paryente o mga higala aron sila katabangan.

Sa tibuok kalibotan, daghan pa gihapon ang nagtuo nga ang mga patay makatabang sa mga buhi. Unsay imong hunahuna? Tingali adunay nagtudlo kanimo sa maong tinuohan o kaha aduna kay mga suod nga nagtuo niana. Natural lang nga mingawon ta sa atong mga minahal nga namatay. Ang mga espiritista mopasalig nga ilang tambalan ang maong kamingaw. Ingon sa gikutlo sa magasing Time, usa ka espiritista miingon nga ang kalibotan sa mga espiritu “andam kanunay kon adunay magpatabang.” Tinuod ba kana? Ang mga patay makatabang ba sa mga buhi? Basin matingala ka sa tin-aw nga tubag sa Bibliya.

Ang mga Patay Buhi Kaha sa Laing Dapit?

Simple ug daling masabtan ang eksplinasyon sa Bibliya maylabot sa kahimtang sa mga patay. Matikdi ang giingon sa Ecclesiastes 9:5: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” Aduna pa kahay pagbati ang mga patay? Ang bersikulo 6 nagtubag: “Ang ilang gugma ug ang ilang pagdumot ug ang ilang pangabugho nahanaw na, ug sila wala nay bahin hangtod sa panahong walay tino sa bisan unsa nga buhaton ilalom sa adlaw.” Matikdi usab nga ang bersikulo 10 sa samang kapitulo nag-ingon nga “walay buluhaton ni lalang ni kahibalo ni kaalam sa Sheol, ang dapit diin ikaw moadto.” Ang Hebreohanong pulong “Sheol” nga gigamit dinhi nagkahulogang “komong lubnganan sa katawhan.” Makaiikag nga ang Gregong katumbas niining pulonga, “Hades,” gigamit diha sa Kasulatan sa pagtumong sa dapit nga nahimutangan ni Jesu-Kristo human siya mamatay.—Buhat 2:31.

Daghang tawo ang gitabangan ni Jesus samtang siya buhi pa, apan nasayod siya nga kinahanglan siyang mamatay. Iya bang gidahom nga makatabang pa siya sa mga tawo samtang atua siya sa lubnganan? Wala. Iyang gitandi ang iyang umaabot nga kamatayon ngadto sa kagabhion diin wala nay buluhaton nga himoon. (Juan 9:4) Nasayod gayod si Jesus nga sa dihang wala nay kinabuhi ang mga tawo, sila ‘wala nay mahimo diha sa kamatayon.’—Isaias 26:14.

Si Jesus migamit ug lain pang pagtandi bahin sa kamatayon nga nagpasiugda sa samang punto. Sa pagkamatay sa iyang higalang si Lazaro, gitandi ni Jesus ang kamatayon ngadto sa pagkatulog. (Juan 11:11-13) Dili gayod nato dahomon nga ang tawong natulog makatabang kanato. Ang natulog walay panimuot ug walay mahimo sa pagtabang kang bisan kinsa.

Ang Kalag ba Dili Mamatay?

Ang daghan gitudloan nga sa pagkamatay sa tawo, ang kalag mobulag sa lawas ug magpabiling buhi. Lahi ang gitudlo sa Bibliya. Ang unang basahon sa Bibliya, ang Genesis, nagpaila kanato kon unsay kalag. Ang Genesis 2:7 nag-ingon nga sa  paglalang sa unang tawo, siya “nahimong buhing kalag.” Ang tawo mismo maoy kalag; ang mga hayop maoy mga kalag usab. (Genesis 1:20-25) Busa, makataronganon nga sa pagkamatay sa usa ka tawo o hayop, ang kalag mamatay. Kini gipamatud-an sa Bibliya.—Ezequiel 18:4.

Apan ang pipila tingali mangutana, ‘Unsa na man ang daghang estorya bahin sa mga tawo nga nakapakigsulti sa mga patay, nakadungog sa ilang mga tingog, o nakakita pa gani kanila?’ Sa daghang bahin sa kalibotan, ang maong mga estorya maoy kasagaran, ug tungod niana ang nagbangotang mga paryente o suod nga mga higala nahupong sa paglaom, ug daghan ang nadasig sa pagpangitag espiritista nga nangangkong makakontak sa mga patay.

Tinuod ba kanang mga estoryaha? Kon mao, dili ba kana mosumpaki sa mga pulong sa Bibliya nga nahisgotan na? Si Kristo Jesus nagbatbat sa Pulong sa Diyos ingong kamatuoran. (Juan 17:17) Ang kamatuoran wala magkasumpaki. Sa tinuoray, tin-aw ang instruksiyon diha sa Bibliya kon unsay angay natong pag-isip sa mga pangangkong ang mga patay makatabang sa mga buhi. Ang Bibliya naghisgot bahin sa usa nga misulay nga magpatabang sa mga patay. Ang pagsusi sa maong asoy mobutyag sa kamatuoran.

Usa ka Hari Nagpatabang sa mga Patay

Ang asoy nag-ingon nga si Haring Saul ug ang iyang kasundalohan didto sa natad-panggubatan sa amihanang Israel. Sila gisulong sa gikahadlokang kasundalohan sa mga Filistehanon. Sa pagkakita ni Saul sa kampo sa mga Filistehanon, “ang iyang kasingkasing nangurog sa hilabihan.” Niadtong panahona sa iyang paghari, si Saul mibiya na sa matuod nga pagsimba. Ingong resulta, ang iyang mga hangyo kang Jehova wala gayod tubaga. Kinsay dangpan ni Saul alang sa tabang? Patay na niadto ang propeta sa Diyos nga si Samuel.—1 Samuel 28:3, 5, 6.

Si Saul nagpakisayod sa usa ka espiritista sa En-dor. Iyang gihangyo ang espiritista nga “ipatungha si Samuel” gikan sa mga patay. Gitawag sa espiritista ang usa nga gikan sa mga patay. Ang maong “Samuel” nagsulti kang Saul nga ang mga Filistehanon magmadaogon ug nga si Saul ug ang iyang mga anak nga lalaki mamatay sa panggubatan. (1 Samuel 28:7-19) Si Samuel ba gayod ang mibalik gikan sa mga patay?

Palandonga kini. Ang Bibliya nag-ingon nga sa pagkamatay, ang usa ka tawo ‘mobalik sa iyang yuta’ ug “mahanaw ang iyang mga hunahuna.” (Salmo 146:4) Si Saul ug Samuel nahibalo nga gidili sa Diyos ang pagkonsultag mga espiritista. Ngani, sayo pa niana si Saul maoy nanguna sa pagwagtang sa mga buhat sa espiritismo gikan sa yuta!—Levitico 19:31.

Matikdi kini: Kon buhi pa niadto ang matinumanong si Samuel ingong espiritu, lapason ba niya ang balaod sa Diyos ug mokooperar sa usa ka espiritista aron makigkita kang Saul? Midumili na si Jehova sa pagpakigsulti kang Saul. Nan, usa ka espiritista na ba hinuon ang makapugos sa Diyos nga Labing Gamhanan sa pagpakigsulti kang Saul pinaagi sa patay nang si Samuel? Dili. Tin-aw nga ang maong “Samuel” dili mao ang matinumanong propeta sa Diyos. Usa kadto ka espiritu—usa ka daotang demonyo nga nagtakobang ang patay nang si Samuel.

Ang mga demonyo maoy mga manulonda nga mirebelde batok sa awtoridad sa Diyos sa sayong bahin sa kasaysayan sa tawo. (Genesis 6:1-4; Judas 6) Sila makapaniid sa mga tawo samtang buhi pa kining mga tawhana; nasayod sila sa sinultihan,  hitsura, ug panggawi sa matag usa. Maikagon sila sa pagpasiugda sa ideya nga dili tinuod ang ginaingon sa Bibliya. Dili katingad-ang ang Bibliya nagpasidaan batok sa pagpakigkontak sa maong espiritung mga puwersa! (Deuteronomio 18:10-12) Ang maong daotang mga espiritu aktibo gihapon karon.

Busa nasabtan na nato karon kon nganong daghan ang moestorya nga sila “nakadungog” o “nakakita” sa patay nilang mga minahal. Bisan pag ang maong mga patay nga nagpakita daw matinabangon usahay, ang tuyo sa daotang mga espiritu mao gayod ang paglimbong sa mga tawo. b (Efeso 6:12) Gawas pa, hunahunaa kini: Si Jehova maoy mahigugmaong Diyos nga matinagdanon kanato. Kon ang mga patay buhi sa laing dapit ug makatabang sa ilang mga higala ug pamilya, idili ba sa atong mahigugmaong Maglalalang ang pagpakigsulti kanila ug tawgon kini nga “dulumtanan”? Seguradong dili! (1 Pedro 5:7) Nan, aduna bay kasaligang tinubdan sa tabang?

Ang Tinuod nga Tabang Alang sa mga Buhi ug mga Patay

Atong nasabtan sa nag-unang mga impormasyon nga ang mga patay dili makatabang sa mga buhi. Gawas pa, ang tinguha nga magpatabang sa mga patay dili lang kay walay kapuslanan; kini daotan gayod ug labihan ka peligroso kay kini maoy paglapas sa balaod sa Diyos ug magpameligro kanato nga maimpluwensiyahan sa mga demonyo.

Ang Bibliya nagtultol kanato ngadto sa kinamaayohang Tinubdan sa tabang—ang atong Maglalalang, si Jehova. Siya makaluwas kanato gikan sa kamatayon mismo. (Salmo 33:19, 20) Sa atong panahon karon, siya andam sa pagtagana ug tabang alang kanato. Busa, siya naghatag ug tinuod nga paglaom, nga lahi sa bakak nga mga paglaom gikan sa mga espiritista.

Si Tamba, nga gihisgotan sa introduksiyon, nakakat-on mismo sa kalainan tali sa bakak nga mga paglaom nga gitanyag sa mga espiritista ug sa kamatuorang gitanyag kanato ni Jehova. Giingnan siya sa mga espiritista nga kon dili siya mohalad ngadto sa iyang patayng mga katigulangan, dili siya makapasar sa eksaminasyon sa eskuylahan. Si Tamba nagtuon na niadto sa Bibliya uban sa mga Saksi ni Jehova. Nakat-onan niya ang tinuod nga kahimtang sa mga patay ug kon kinsa gayod kadtong nagtakoban nga patayng mga katigulangan. Bisan pa sa pagpugos sa iyang inahan nga magpatabang siyag espiritista, si Tamba midumili ug miingon kaniya, “Kon dili ko makapasar, mas maningkamot ko sa sunod tuig.”

Unsay resulta? Siya ang kinatas-ag kuha sa eksaminasyon! Ang iyang inahan natingala, nawad-ag pagtuo sa mga espiritista, ug wala na gayod maghisgot sa maong mga paghalad. Nakat-onan ni Tamba nga si Jehova nagpasidaan kanato nga dili “mosangpit sa mga patay alang sa mga buhi.” (Isaias 8:19) Ang pagtuon sa Bibliya maoy naghatag kang Tamba ug pagsalig nga kon ang iyang kalipay anaa sa balaod sa Diyos, siya magmalamposon.—Salmo 1:1-3.

Apan, komosta na man ang atong namatay nga mga minahal? Aduna ba silay paglaom? Gawas pa sa pagtabang kanatong mga buhi, si Jehova misaad sa pagtabang niadtong anaa sa lubnganan. Human sa pagbatbat nga ang mga patay wala gayoy mahimo, matikdi kon unsay gipahibalo sa propetang si Isaias sa kapitulo 26, bersikulo 19: “Ang imong mga patay mangabuhi. . . . Pagmata ug paghugyaw sa kalipay, kamong mga pumoluyo sa abog!” Ang tagna dugang nag-ingon nga ‘kadtong walay gahom diha sa kamatayon’ mabuhi pag-usab.

Tiaw mo na! Ang way-mahimo nga binilyong nangatulog diha sa lubnganan mabuhi pag-usab! Ngani, ang Bibliya nagbutyag nga si Jehova ‘nangandoy’ sa pagbuhi sa mga patay. (Job 14:14, 15) Daw imposible ba ang maong mga saad? Segurado kaayo si Jesus bahin sa maong paglaom nga gani iyang gibatbat nga sa panan-aw ni Jehova ang mga patay daw buhi na.—Lucas 20:37, 38.

Buot ba nimong maangkon kini nga paglaom? c Padayon sa pagkuhag tukmang kahibalo gikan sa Bibliya. Samtang magtuon ka, makombinsir ka nga si Jehova makatabang sa mga buhi ug sa mga patay ug nga ang iyang mga saad maoy “kasaligan ug matuod.”—Pinadayag 21:4, 5.

[Mga footnote]

[Blurb sa panid 19]

Natural lang nga mingawon ta sa atong mga minahal nga namatay

[Hulagway sa panid 20]

Mibalik ba gayod ang propetang si Samuel gikan sa mga patay ug nakigsulti kang Haring Saul?