Mapasalamaton Bisan pa sa mga Trahedya—Kon sa Unsang Paagi Nakatabang Kanako ang Bibliya

Sumala sa giasoy ni Enrique Caravaca Acosta

Niadtong Abril 15, 1971, mibiyahe ko paingon sa among uma aron duawon ang among pamilya. Dugaydugay na kong wala makauli mao nga naghinamhinam ko nga makita sila. Naghunahuna ko kon atua ba silang tanan sa balay ug kon kinsay una nakong makita. Pag-abot nako didto, nalisang ko kay dihay upat ka tawo nga nagbuy-od ug lakip kanila si Mama!

DILI gayod ako makatuo sa akong nakita. Unsay nahitabo? Unsay akong buhaton? Walay tawo sa palibot nga kapangayoan nakog tabang. Sa dili pa nako ipadayon ang estorya, paasoya una kog diyutay bahin sa akong kinabuhi aron mas masabtan ninyo ang akong gibati sa maong panghitabo ug sa uban pang mga trahedya nga akong nasinati.

Among Nakaplagan ang Kamatuoran

Ako natawo sa Quirimán, duol sa Nicoya, Costa Rica. Sa 1953, sa dihang ako 37 anyos, ako nagpuyo uban sa akong ginikanan diha sa among uma. Bisag nagdako kami nga mga Katoliko, dihay mga doktrina nga wala namo mauyoni ug daghan usab kamig mga pangutana nga wala matubag.

Usa ka buntag niana, si Anatolio Alfaro miadto sa balay ug nagdasig kanamo nga magtuon sa Bibliya. Iyang gihisgotan kanamo ang daghang teksto ug mga pagtulon-an sa Bibliya. Kaming tanan naminaw kaniya—si Papa, Mama, ang usa nako ka manghod nga lalaki, ug ang manghod nako nga babaye kauban ang iyang amiga nga nagpuyo sa among balay. Taas kaayo ang among panaghisgot nga naabtan kamig kaadlawon. Daghan kaayo kamig gipangutana.

Sa among balay natulog si Anatolio ug miestar pa siya uban kanamo hangtod sa misunod nga adlaw. Kami nalipay sa among nadunggan, apan mas nalipay kami kay natubag ang among mga pangutana nga direkta sa Bibliya. Ang maong panaghisgot dakog epekto kanamo. Among gipamalandong ang among nakat-onan, ug kami kombinsido nga nakaplagan na gyod namo ang kamatuoran. Si Anatolio nagbilin ug mga magasin ug mga libro nga naghisgot bahin sa Bibliya. Sa magabii, among basahon ug tun-an kining mga basahona. Dili sayon ang paghimo niana tungod kay kami walay koryente. Sa dili pa kami magtuon, among isulod sa sako ang among batiis aron dili kami pamaakon sa lamok.

Paglabay sa unom ka bulan, lima sa among pamilya ang nabawtismohan, lakip niana ang akong ginikanan. Uban ang kahinam, kami misugod sa pagpamalaybalay aron ipaambit ang among nakat-onan. Kami magbaktas ug duha ka oras ug usahay magsakayg kabayo paingon sa  lungsod sa Carrillo aron magtigom kauban sa grupo sa mga Saksi ni Jehova didto. Si Anatolio tigduawan gihapon sa among balay aron tun-an kami sa Bibliya. Sa ulahi, gihimong tigomanan ang among balay, ug walo kami nga tigtambongan didto. Sa ngadtongadto, ang tanang tigtambongan bawtismado na. Ang maong grupo nahimong usa ka gamayng kongregasyon nga duolag 20 ang membro.

Bug-os Panahon Diha sa Buluhaton sa Diyos

Sa ulahi, ang opisina sa mga Saksi ni Jehova sa Costa Rica nag-imbitar niadtong gusto nga mahimong bug-os panahong magwawali. Sa 1957, akong gidawat ang maong imbitasyon ug misugod sa bug-os panahong ministeryo. Makapalipay gayod ang maong buluhaton. Sagad, magbaktas ko nga nag-inusara sulod sa daghang oras paingon sa mga baryo aron mosangyaw didto. Usahay ang mga tawo dili modawat sa mensahe. Nahinumdom ko nga dihay labing menos tulo ka higayon nga gihulga ko sa mga tawo nga nagdalag sundang ug ila kong gisukitsukit kon kinsa ko ug kon unsay akong tuyo sa ilang lugar.

Sa katuigan sa 1950, hilit kaayo ang mga lugar nga among sangyawan, ug nalisdan kami sa pag-adto sa mga tawo. Aron makaabot sa usa ka lugar, kinahanglang mosakay kamig kabayo. Motabok kamig mga sapa, ug usahay sa gawas kami magpalabay sa kagabhion. Lisod kaayo ang among kahimtang tungod kay daghan kaayong lamok. Kinahanglan usab kaming magbantay sa mga bitin ug buaya. Bisan pa niining tanan, nalipay ko sa pagtabang sa mga tawo nga makakat-on bahin kang Jehova nga Diyos. Sa dihang makauli na ko sa balay, malipayon ko ug kontento tungod kay napaambit nako ang kamatuoran sa uban. Ang adlaw-adlaw nga pagsangyaw ug pagtuon sa Bibliya nakatabang nga molambo ang akong gugma kang Jehova ug mas masuod pa kaniya.

Sa ngadtongadto, nakadawat kog dugang mga pribilehiyo. Sa kapig napulo ka tuig, ako nag-alagad ingong nagapanaw nga ministro, nga nagduaw ug nagpalig-on sa lainlaing kongregasyon matag semana. Tungod sa problema sa panglawas, ako kinahanglang moundang sa maong pribilehiyo. Apan ako nagpadayon gihapon sa buluhatong pagsangyaw nga bug-os panahon.

Usa ka Trahedya

Sa 1971, sa dihang atua ko sa Nicoya, ako mibiyahe aron duawon ang among pamilya. Pagsulod nako sa among balay, akong nakita ang akong 80-anyos nga inahan nga nagbuy-od sa salog. Siya gipusil ug gidunggab. Paggunit nako kaniya, siya nagginhawa pa. Sa pipila lang ka gutlo, siya namatay diha sa akong mga bukton. Akong gitan-aw ang palibot, ug akong nakita ang among kosinera nga walo ka bulang mabdos nga nagbuy-od diha sa kosina. Sa pasilyo, nakita ko usab ang patayng lawas sa usa ka Saksi nga tagadidto, samtang ang anak nga lalaki sa among kosinera nagbuy-od sa kasilyas. Silang tanan gipangdunggab ug gipamusil. Kinsay responsable sa maong ngilngig nga krimen, ug nganong gibuhat niya kadto?

Paggawas nako sa balay, akong nakita si Papa. Siya gipusil sa ulo apan buhi pa! Midalidali kog adto sa balay sa akong manghod nga lalaki, nga mga 15 minutos nga biyahe, ug akong  nahibaloan nga dihay laing babaye nga gipatay uban sa iyang anak nga lalaki. Dili ko makatuo pagkahibalo nako nga ang nagpatay kanila mao ang akong 17-anyos nga pag-umangkon nga dili Saksi! Siya walay hustong pangisip. Siya misibat ug gipangita sa mga polis. Sa kasaysayan sa Costa Rica, wala pay nahitabo sukad nga sama niana ka dako nga paningkamot sa pagpangitag kriminal.

Ang maong panghitabo nabalita sa tibuok nasod. Paglabay sa pito ka adlaw, nakaplagan sa mga polis ang kriminal, nga dunay dalang dakong kutsilyo ug kalibre .22 nga pistola nga gibaligya kaniya bisan pag siya nailhan nga wala sa hustong pangisip. Ang akong pag-umangkon gipusil ug namatay samtang siya gidakop.

Niadtong gipangita pa lang ang akong pag-umangkon, daghan ang nagtambag kanako nga mobiya sa among lugar kay basig mobalik ang akong pag-umangkon ug patyon ko. Nag-ampo ko bahin niana tungod kay gikinahanglan ko sa ubang membro sa among pamilya ug sa mga igsoon sa kongregasyon. Busa wala ko mobiya.

Lain Pang mga Trahedya

Ikasubo, paglabay sa usa ka tuig namatay si Papa. Dayon usa ka tuig human niana, gipatay ang akong manghod nga babaye, nga usa ka matinumanong alagad ni Jehova. Naguol na usab kami tungod sa pagkawala sa laing membro sa among pamilya. Dili gayod ikahubit sa pulong ang kasakit ug kaguol nga gibati namo ug sa among mga higala. Nianang mga panahona, wala koy laing gisaligan gawas kang Jehova, ug kanunay kong naghangyo nga iya kong palig-onon.

Sa 1985, ako mitambong sa tulo ka adlaw nga pagbansay alang sa mga ansiyano diha sa kaulohan sa siyudad, sa San José. Human sa klase, mibati ko nga nalig-on sa espirituwal. Sayo sa buntag sa Lunes, milakaw ko padulong sa terminal aron mosakayg bus pauli sa balay. Samtang nagpaingon ko didto, gikulata ko sa mga tulisan, ug ila kong gituok ug gitulis. Paspas kaayo ang maong panghitabo nga gani wala nako makita ang ilang nawong. Tungod sa gibuhat nila kanako, dili na ko makahimo sa pagtimbaya sa paagi nga nabatasan sa Costa Rica. Dinhi sa probinsiya sa Guanacaste, batasan sa mga lalaki nga mosinggit isip timbaya o kaha aron ipahibalo sa uban ang iyang pag-abot. Kaniadto, hawod kaayo ko niana, apan human ko kulataha, di na ko makahimo niana.

Sa 1979, nagminyo mi ni Celia, nga usa usab ka Saksi sa silingang kongregasyon. Si Celia dakog pagpabili sa Bibliya. Kada adlaw, amo kanang basahon ug tun-an. Ikasubo, nasakit siyag kanser ug namatay niadtong Hulyo 2001. Usahay, maguol kaayo ko, apan ang paglaom sa pagkabanhaw naglig-on kanako.—Juan 5:28, 29.

Malipayon Bisan pa sa mga Pagsulay

Tinuod mas grabe tingali kog nasinatian nga mga trahedya kay sa ubang tawo, apan akong gilantaw ang maong mga pagsulay ingong kahigayonan sa pagpamatuod sa akong pagtuo ug pagkamaunongon kang Jehova. (Santiago 1:13) Aron dili ko maluya sa maong mga panghitabo, kanunay nakong gihinumdoman nga “ang panahon ug ang wala damhang panghitabo” modangat kanatong tanan. (Ecclesiastes 9:11) Gihinumdoman usab nako nga kita nagpuyo sa “makuyaw nga mga panahong lisod sagubangon,” tungod kay ang mga tawo mabangis, mapintas, ug walay pagpugong sa kaugalingon. (2 Timoteo 3:1-5) Kanunay usab nakong gibutang sa hunahuna ang ehemplo ni Job. Bisan pa sa tanang pag-antos nga iyang naagoman—kamatayon sa iyang mga anak, sakit, ug pagkawala sa iyang panginabuhian —si Job nagpabiling matinumanon ug miingon: “Padayong dayegon ang ngalan ni Jehova.” Ug si Jehova nagpanalangin pag-ayo kang Job tungod sa iyang pagkamatinumanon. (Job 1:13-22; 42:12-15) Kining tanan nga mga pagtulon-an sa Bibliya nakatabang kanako nga magpabiling malipayon bisan pa sa daghang pagsulay.

Si Jehova kanunayng nagtabang kanako aron ako makapadayon sa pagbuhat sa iyang kabubut-on nga una diha sa akong kinabuhi. Ang pagbasa sa Bibliya adlaw-adlaw naghupay ug naglig-on kanako aron makalahutay. Pinaagi sa pag-ampo kang Jehova, akong natagamtam “ang kalinaw sa Diyos nga labaw sa tanang panghunahuna.” (Filipos 4:6, 7) Kana naghatag kanakog kalinaw sa hunahuna. Ang pagtambong ug pagpakigbahin sa Kristohanong mga tigom nakalig-on usab sa akong pagtuo.—Hebreohanon 10:24, 25.

Bisag tigulang na, mapasalamaton ako kang Jehova kay aduna gihapon akoy kusog sa pag-alagad kauban sa akong mga igsoon sa pagtuo, sa pagtudlo sa Bibliya ngadto sa uban, ug sa pagsangyaw. Ang pag-alagad sa uban niining paagiha naghatag kanakog kusog sa pagsagubang sa mga pagsulay. Gikan sa kahiladman sa akong kasingkasing, ako nagpasalamat kang Jehova bisan pa sa daghang trahedya sa akong kinabuhi. a

[Footnote]

[Blurb sa panid 20]

Ang pagbasa sa Bibliya adlaw-adlaw naghupay ug naglig-on kanako aron makalahutay

[Hulagway sa panid 19]

Usa sa una nakong mga pakigpulong

[Hulagway sa panid 20]

Nagsangyaw sa dihang batabata pa ko