Panalipdi ang Imong Kaugalingon Batok sa Daotang mga Espiritu

SI James nagdako sa usa ka hilit nga bahin sa isla sa Malaita, sa Solomon Islands. Sukad sa iyang pagkabata, siya gitudloan sa pagtahod sa mga espiritu. “Wala gyod ko makahunahuna sukad nga mohangyo sa mga espiritu aron daoton ang uban,” matod niya, “apan nagtuo ko nga imposibleng magmalipayon kon dili mosunod sa rarafono [kostumbre sa pagpangayog tabang sa mga espiritu] aron mapanalipdan batok sa kadaot.”

Sama sa kahimtang sa mga tawo sa uban pang mga dapit sa kalibotan, ang mga molupyo sa Solomon Islands nagtuo nga ang mga espiritu mahimong motabang o modaot sa usa ka tawo. Gani, daghang Melanesian ang naghunahuna nga ang buotan kono nga mga espiritu dili angayng kahadlokan, kondili tahoron.

Mapadayag sa lainlaing paagi nga ang usa nagtuo sa daotang mga espiritu. Pananglitan, sa bata pa si James, ang mga babaye sa iyang baryo magdalidalig pasulod sa ilang mga bata sa balay kon ilang madungog ang tingog sa langgam nga korokoro, o kokok. Ngano man? Sila nagtuo nga ang tingog sa maong langgam nagpasabot nga dunay daoton.

Ang pipila ka taga-baryo magbutang ug linaing puti nga bato ibabaw sa pultahan sa ilang mga balay. Gibuhat kana ni James kay nagtuo siya nga mapanalipdan siya niini batok sa daotang mga espiritu. Kon si James anaa sa trabahoan, iyang hiposon ang iyang salin sa paniudto, nga iya rang ilabay sa ulahi. Nabalaka siya nga basig makit-an kini sa usa ka barangan ug gamiton kini sa pagdaot kaniya.

Bisan tingalig ang maong mga buhat dili komon sa inyong dapit, lagmit sama kang James imong gibati nga kinahanglang sundon ang maong mga kostumbre aron mapanalipdan batok sa daotang mga espiritu. Nagtuo ka tingali nga ang pagsunod niana makaayo kanimo.

Kon imong gitahod ang Bibliya, sa walay duhaduha gusto nimong mahibaloan kon unsay tubag niana sa mosunod nga mga pangutana: (1) Unsang kadaot ang mahimong ipahinabo kanimo sa daotang mga espiritu? (2) Ang pagsunod ba sa pipila ka kostumbre magpailalom kanimo sa impluwensiya sa mga demonyo? (3) Sa unsang paagi nimo makaplagan ang tinuod nga proteksiyon batok sa daotang mga espiritu ug magmalipayon?

 Kon sa Unsang Paagi Nagpahinabog Kadaot ang Daotang mga Espiritu

Gipadayag sa Bibliya nga ang daotang mga espiritu dili mao ang espiritu sa mga patay. “Ang mga buhi nasayod nga sila mamatay,” nag-ingon ang Pulong sa Diyos, “apan bahin sa mga patay, sila walay nahibaloan nga bisan unsa.” (Ecclesiastes 9:5) Sa pagkatinuod, ang daotang mga espiritu mao ang rebelyosong mga manulonda nga miduyog kang Satanas sa pagpahisalaag sa katawhan.—Pinadayag 12:9.

Ang Kasulatan klarong nag-ingon nga kita nagkinahanglag proteksiyon batok sa daotang mga espiritu. Si apostol Pablo misulat sa mga Kristohanon sa Efeso: “Kita adunay pakigdumog, dili batok sa dugo ug unod, kondili batok . . . sa daotang mga puwersa nga espirituhanon sa langitnong mga dapit.” Si apostol Pedro nag-ingon nga ang magmamando sa tanang daotang mga espiritu, si Satanas nga Yawa, nahisama sa “usa ka leyon nga nagangulob, nga nagapangitag matukob.”—Efeso 6:12; 1 Pedro 5:8.

Si Satanas nagpahinabog kadaot pinaagi sa pagpahisalaag sa mga tawo, nga naglimbong o nagtental kanila sa pagbuhat sa mga butang nga makapasuko sa Diyos. Ang Bibliya nag-ingon nga si Satanas “kanunayng naghimo sa iyang kaugalingon nga usa ka manulonda sa kahayag.” (2 Corinto 11:14) Siya magpakaaron-ingnong buotan nga espiritu, apan sa pagkatinuod, daotan ang iyang tuyo. Gibutaan ni Satanas ang hunahuna sa mga tawo aron dili sila makakita sa kamatuoran bahin kaniya ug bahin sa Diyos. (2 Corinto 4:4) Unsay iyang tumong sa pagpahisalaag sa mga tawo?

Gusto ni Satanas nga simbahon siya sa mga tawo, nahibaloan man nila kini o wala. Sa dinhi pa sa yuta ang Anak sa Diyos nga si Jesus, buot ni Satanas nga siya ‘mohapa ug mohimog usa ka buhat sa pagsimba’ kaniya. Si Jesus miingon: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon.’” (Mateo 4:9, 10) Si Jesus wala gayod mobuhat ug bisan unsa nga magpaila nga iyang gisimba si Satanas.

Si Jehova mao ang labing gamhanan sa tanang espirituhanong persona ug dili siya motugot nga makaagom sa permanenteng kadaot ang nagmasinugtanon kaniya. (Salmo 83:18; Roma 16:20) Apan kon gusto natong pahimut-an si Jehova nga Diyos sama sa gibuhat ni Jesus, kinahanglang likayan nato ang paghimo ug bisan unsa nga nagpaila nga kita nagpasakop kang Satanas o sa iyang mga demonyo. Aron malikayan kana, kinahanglan natong mailhan ang mga kostumbre nga nagpasidungog sa daotang mga espiritu. Unsaon nimo pag-ila niana?

Pag-ila sa mga Kostumbre nga Dili Makapahimuot sa Diyos

Gipasidan-an ni Jehova nga Diyos ang iyang katawhan kaniadto, ang mga Israelinhon, batok sa pagsundog sa pipila ka kostumbre sa sikbit nga mga nasod. Siya miingon: “Walay makaplagan diha kanimo nga bisan kinsang . . . nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot.” Mahitungod niadtong nagasunod sa maong mga kostumbre, ang Bibliya nag-ingon: “Bisan kinsa nga nagabuhat niining mga butanga dulumtanan kang Jehova.”—Deuteronomio 18:10-12.

Busa sa dihang tagdon nimo ang mga kostumbre nga kaylap sa inyong dapit, isukna ang mosunod nga mga pangutana: Ang mao bang kostumbre nag-awhag ug pagtuo sa mga tilimad-on? Kana ba naggamit ug mga anting-anting ug mga orasyon? Kana ba maglangkit ug pagpasakop sa usa ka espiritu gawas kang Jehova o sa iyang tinudlong hawas, si Jesus?—Roma 14:11; Filipos 2:9, 10.

Hinungdanon nga imong likayan ang bisan unsang kostumbre nga nalangkit sa daotang mga espiritu. Ngano? Si apostol Pablo giinspirar sa pagsulat: “Dili kamo mahimong moambit sa ‘lamesa ni Jehova’ ug sa lamesa sa mga demonyo.” Siya nagpasidaan nga kadtong naningkamot nga parehong pahimut-an ang Diyos ug ang daotang mga espiritu ‘nag-aghat kang Jehova sa pagpangabugho.’ (1 Corinto 10:20-22) Si Jehova nga Diyos nangayo ug bug-os nga pagkamahinalaron ug takos gayod siya niana.—Exodo 20:4, 5.

Tagda usab kining pangutanaha: Ang mao bang kostumbre nagpasiugda sa ideya nga ang  usa ka tawo dili manubag sa iyang binuhatan? Pananglitan, ang pagpanapaw ug pagpakigsekso una ang kasal wala uyoni diha sa daghang komunidad ug gisaway sa Bibliya. (1 Corinto 6:9, 10) Apan, diha sa pipila ka kultura sa Pasipiko, mahimo kining dalawaton kon ang dalaga moingon nga siya gilumay. a

Apan ang Bibliya nagtudlo nga kitay manubag sa atong binuhatan. (Roma 14:12; Galacia 6:7) Pananglitan, ang unang babaye, si Eva, naghunahuna nga siya gilimbongan ni Satanas maong misupak siya sa Diyos, nga nag-ingon: “Ang halas—kini naglimbong kanako ug busa ako mikaon.” Apan, gisilotan ni Jehova si Eva tungod sa iyang gibuhat. (Genesis 3:13, 16, 19) Kita manubag usab kang Jehova sa atong binuhatan.—Hebreohanon 4:13.

Unsay Kinahanglan Nimong Buhaton?

Kon gusto nimong pahimut-an ang Diyos ug magkinabuhi uyon sa mga prinsipyo sa Bibliya, kinahanglang buhaton nimo ang tanan aron mapanalipdan ang imong kaugalingon batok sa daotang mga espiritu. Ang matinud-anog-kasingkasing nga mga taga-Efeso sa unang siglo nagpakitag maayong panig-ingnan niining bahina. Aron mahigawas sila sa impluwensiya sa daotang mga espiritu, ilang gitigom ang tanan nilang basahon nga nalangkit sa espiritismo ug ‘gisunog kini atubangan sa tanan.’—Buhat 19:19.

Sa wala pa nila sunoga kining mga basahona, sila “managsugid ug sa dayag managtaho sa ilang mga binuhatan.” (Buhat 19:18) Kay natandog ang ilang kasingkasing sa gitudlo ni Pablo bahin kang Kristo, sila napalihok sa pagsunog sa ilang mga basahon bahin sa espiritismo. Gibag-o usab nila ang ilang pagbati maylabot sa ilang mga kostumbre.

Tinuod, dili tingali sayon ang pagbiya sa maong mga kostumbre. Si James, nga gihisgotan ganina, nalisdan usab. Siya misugod pagtuon sa Bibliya uban sa mga Saksi ni Jehova ug nalipay sa iyang nakat-onan. Apan, nagpadayon siya sa pagsunod sa rarafono. Sa dihang gisusi niya ang iyang pagbati maylabot sa maong kostumbre, iyang nasuta nga siya nagtuo sa mga saad ni Jehova alang sa umaabot apan iyang gibati nga aron mapanalipdan siya batok sa kadaot, kinahanglan gihapon niyang mosunod sa mga kostumbre.

Unsay nakatabang kang James sa pagbag-o sa iyang panghunahuna? Siya miingon: “Ako nag-ampo kang Jehova alang sa panalipod ug tabang aron ako mosalig kaniya. Sa samang higayon, akong gibiyaan ang maong mga kostumbre.” May daotan bang nahitabo kaniya? “Wala,” miingon si James. “Ang nahitabo lamang mao nga ako nakakat-on sa pagsalig kang Jehova. Akong nasinati nga mahimo diayng suod kaayo nga higala si Jehova.” Gani, si James nag-alagad ingong bug-os-panahong ministro sulod na sa pito ka tuig, nga nagtabang sa uban sa pagkat-on kon unsay gitudlo sa Bibliya.

Nganong dili nimo sundogon ang panig-ingnan ni James? Susiha ang mga kostumbre nga gisunod diha sa inyong komunidad, ug gamita ang imong “gahom sa pagpangatarongan” aron sa pagtino kon kaharmonya ba kini sa “kabubut-on sa Diyos.” (Roma 12:1, 2) Dayon magmaisogon sa pagbiya sa mga patuotuo. Kon imo kanang buhaton, makasalig ka nga “pasudlon” ug panalipdan ka ni Jehova. (2 Corinto 6:16-18) Sama kang James, imong masinati nga tinuod ang saad sa Bibliya: “Ang ngalan ni Jehova usa ka malig-ong torre. Nganha niana ang matarong modagan ug mahatagan sa panalipod.”—Proverbio 18:10.

[Footnote]

[Hulagway sa panid 19]

Kokok

[Credit Line]

Courtesy of Dr. Bakshi Jehangir

[Hulagway sa panid 19]

Gipamunit sa usa ka dalagita ang mga mumho aron dili kini magamit sa pagdaot kaniya