Jesus—Ang Komento sa mga Tawo Kaniya

“Si Jesus sa Nasaret . . . sa walay duhaduha mao ang labing impluwensiyadong tawo sa kasaysayan.”—H. G. Wells, Ingles nga historyano.

“Si Kristo mao . . . [ang] labing talagsaon sa tanang bayani sa kasaysayan.”—Philip Schaff, teologo ug historyano nga natawo sa Switzerland.

KINSAY matawag nga labing bantogang tawo nga nabuhi sukad? Unsa may sukdanan sa kabantog sa usa tawo? Ang iya bang kahawod sa pagpakiggubat? Pisikal nga kusog? Kautokan? O ang epekto sa iyang gisulti ug gibuhat ngadto sa mga tawo ug ang sulondan nga iyang gihatag kanila?

Matikdi kon unsay komento sa mga historyano, siyentipiko, eksperto sa Bibliya, magsusulat, politiko, ug uban pa—kaniadto ug karon—bahin sa usa ka tawo nga taga-Nasaret, si Jesu-Kristo:

“Dili matuis ang kamatuoran nga ang labing impluwensiyadong tawo—dili lamang sa milabayng duha ka libo ka tuig, kondili sa tibuok kasaysayan sa tawo—mao si Jesus nga taga-Nasaret.”—Reynolds Price, Amerikanong magsusulat ug eksperto sa Bibliya.

“Ang usa ka tawong walay sala nagtanyag sa iyang kaugalingon ingong halad alang sa kaayohan sa uban, lakip na sa iyang mga kaaway ug siya nahimong lukat alang sa tanang tawo sa kalibotan. Maayo kaayo ang iyang gibuhat.”—Mohandas K. Gandhi, politikal ug espirituwal nga lider sa India.

“Sa bata pa ko, ako gitudloan bahin sa Bibliya ug sa Talmud. Hudiyo ko, apan ako nakadayeg gayod sa pagkatalagsaon ni Jesus.”—Albert Einstein, siyentipiko nga natawo sa Germany.

“Para nako, si Jesu-Kristo ang labing talagsaong tawo sa tanang panahon—sa tibuok kasaysayan—ingong Anak sa Diyos ug ingong Anak sa Tawo. Ang tanang butang nga iyang gisulti o gibuhat bililhon alang kanato karon, ug dili ka makasultig sama niana para sa ubang tawo, buhi man o patay na.”—Sholem Asch, magsusulat nga natawo sa Poland; kinutlo gikan sa Christian Herald; italiko ilaha.

“Sulod sa trayentay-singko ka tuig sa akong kinabuhi, ako walay tinuohan. [Apan] lima ka tuig kanhi, ako nakombinsir nga tinuod gayod si Jesus. Ako mituo sa doktrina ni Jesu-Kristo ug kalit nga nausab ang akong kinabuhi.”—Konde Leo Tolstoy, Ruso nga nobelista ug pilosopo.

“[Si Jesus] ang labing impluwensiyadong tawo nga nabuhi niining planetaha ug ang iyang impluwensiya nagakadako.”—Kenneth Scott Latourette, Amerikanong historyano ug awtor.

“Makaingon ba kita nga tumotumo lang ang kasaysayan ni Jesus? Sa pagkatinuod higala, dili kana tumotumo. Sa kasukwahi, ang kasaysayan ni Socrates, nga wala gayod dudahi, mas menos ug pamatuod kay nianang kang Jesu-Kristo.”—Jean-Jacques Rousseau, Pranses nga pilosopo.

Tin-aw gayod nga kon dunay takos nga mahimong sulondan sa atong kinabuhi, kana mao si Jesu-Kristo. Giawhag kita ni Pablo—usa ka edukadong tawo sa unang siglo nga gipili ni Jesus aron mahimong iyang sumusunod ug magwawali bahin kaniya ngadto sa kanasoran—sa ‘pagtutok’ kang Jesus. (Hebreohanon 12:2; Buhat 9:3) Unsay atong makat-onan kang Jesus kon sa unsang paagi kita magkinabuhi? Unsang kaayohan ang imong makuha gikan sa kinabuhi ni Jesus?