Sulat Gikan sa Dominican Republic

“Karon pa Gyod Ko Makasinati nga Gihigugma”

SI Niurka naghatag sa iyang unang presentasyon bahin sa Bibliya diha sa among kongregasyon nianang semanaha. Iyang giandam ang iyang presentasyon diha sa Braille ug unya gisag-ulo kini. Ako ang iyang kauban diha sa plataporma ug konohay ako ang tagbalay nga interesadong mokat-on sa kamatuoran sa Bibliya. Mosulti ako pinaagi sa mikropono nga madungog niya sa iyang headphone. Kay nakadayeg, ang nanambong kusog kaayong namakpak pagkahuman sa among presentasyon nga nadunggan kana ni Niurka. Makita sa iyang pahiyom nga nalipay kaayo siya. Nalipay sab ako. Makapatagbaw gayod ang pag-alagad ingong misyonaryo!

Bisag duha ka tuig na ang nakalabay, lab-as pa sa akong panumdoman ang unang higayon nga nakita nako si Niurka. Human sa tunga sa oras nga pagmaneho sa abogon nga dalan sa baryo, ako siyang nakita nga naglingkod sa kayda sa ilang kasarangang balay—nga hinimo sa kahoy ug hollow block ug tayaon ang atop. Misugat kanamo ang kabanha ug baho sa mga kanding, koneho, ug mga iro diha sa palibot. Si Niurka naglingkod nga nagduko ug huyhoy ang abaga, nga masulub-on kaayo. Mas tigulang siyang tan-awon kay sa iyang edad nga 34.

Gipikpik nako ang iyang abaga, ug siya mihangad kanamo bisan pag siya buta sulod na sa 11 ka tuig. Pinaagi sa pagsultig kusog duol sa iyang dalunggan, akong gipailaila ang akong kaugalingon ug ang akong kauban sa pagsangyaw. Sa ulahi, among nahibaloan nga si Niurka nasakit diay ug Marfan syndrome, nga grabeng nagpaantos kaniya. Diabeteson usab siya mao nga kinahanglang eksaminon kanunay ang iyang dugo.

Sa dihang gipakupot nako siya ug Bibliya, siya nakaila niini ug miingon nga magbasahan siya sa Kasulatan sa wala pa siya mabuta. Apan, sa unsang paagi man nako matudloan sa makapadasig nga kamatuoran sa Pulong sa Diyos kining masulub-on, mapaubsanon, ug makaluluoy nga babaye? Sanglit nahibalo man siya sa alphabet, hatagan nako siyag plastik nga mga letra aron iyang kapkapon. Dali ra niyang nailhan ang mga letra. Dayon, pinaagi sa pagkapkap niya sa akong kamot samtang nagsenyas, iyang nakat-onan kon unsang letraha ang akong gisenyas diha sa American Sign Language. Siya anam-anam nga nakakat-on sa uban pang mga senyas. Sanglit bag-o lang kong nagtuon niini nga pinulongan, mogugol kog dakong panahon sa pagpangandam. Apan, kay interesado man kaayo mi ni Niurka, dali ra kaayo ming nakamao.

Mas mikusog pa ang pag-uswag ni Niurka sa dihang gihatagan siyag hearing aid sa usa ka organisasyon. Dako kaayo kinig tabang kaniya bisan  pag dili kini ang kinabag-ohang modelo. Tungod kay dili makakita ug halos dili makadungog kapin na sa napulo ka tuig, siya magpirme na lang sa balay. Apan sa tabang sa balaang espiritu ni Jehova, nahibalik ang iyang kadasig tungod kay ang iyang kasingkasing ug hunahuna napuno sa kahibalo, paglaom, ug gugma. Wala madugay, gamit ang sungkod, si Niurka magduawan na sa iyang mga silingan, sa pagpaambit kanila sa kamatuoran sa Bibliya.

Gitun-an ni Niurka ug Bibliya ang iyang iyaan ug duha ka ig-agaw. Mangandam siya pag-ayo sa tun-anan, nga abanteng magsag-ulo niana sa matag pagtuon. Basahon sa iyang gitun-an ang parapo, ug human niana, basahon usab ni Niurka ang pangutana diha sa iyang Braille nga libro. Ang tubag sa iyang gitun-an sa Bibliya kusgon pagsulti o kaha isenyas sa kauban ni Niurka ngadto kaniya.

Ang tibuok kongregasyon nagtabang ug nagdasig kang Niurka. Daghan sa iyang mga igsoon sa pagtuo magdala kaniya ngadto sa mga tigom ug mga asembliya. Ang uban mokuyog kaniya diha sa pagsangyaw. Si Niurka di pa dugayng miingon kanako: “Karon pa gyod ko makasinati nga gihigugma.” Siya nagplano nga magpabawtismo sa sunod namong distritong kombensiyon.

Samtang nagsingabot kami sa balay ni Niurka, nakita namo siyang nainitan sa adlaw nga naglingkod diha sa kayda ug daw nagtan-aw sa unahan nga mapahiyomon. Ako siyang gipangutana kon nganong malipayon siya. Siya mitubag: “Ako namalandong sa umaabot sa dihang ang yuta mahimo nang paraiso. Ug akong gihunahuna nga ako atua na didto.”

[Hulagway sa panid 25]

Si Niurka kauban sa pipila ka membro sa among kongregasyon atubangan sa Kingdom Hall

[Hulagway sa panid 25]

Si Niurka nagpaambit sa iyang nakat-onan