Ikaw Magmalipayon Bisan pa sa Kahigawad

KINSA may wala mahigawad? Ang tinuod, bisan ang atong langitnong Amahan nga si Jehova nga Diyos nakasinati usab ug kahigawad. Pananglitan, iyang giluwas ang mga Israelinhon gikan sa pagkaulipon sa Ehipto ug dagaya silang gipanalanginan. Apan, ang Bibliya nag-ingon: “Sublisubli nga ilang gisulayan ang Diyos, ug ilang gipasakitan bisan ang Balaang Usa sa Israel.” (Salmo 78:41) Bisan pa niana, “malipayong Diyos” gihapon si Jehova.—1 Timoteo 1:11.

Sa pagkatinuod, adunay daghang hinungdan sa kahigawad. Unsay atong buhaton aron dili kita mawad-ag kalipay tungod niini? Unsay atong makat-onan sa paagi nga giatubang ni Jehova nga Diyos ang kahigawad?

Mga Butang nga Makapahigawad

“Ang panahon ug ang wala damhang panghitabo” modangat kanatong tanan, nag-ingon ang Pulong sa Diyos. (Ecclesiastes 9:11) Sa kalit lang, ang usa ka krimen, aksidente, o sakit makapahugno—ug makapahigawad kanato. Ang Bibliya nag-ingon usab: “Ang pagdahom nga nalangan makapasakit sa kasingkasing.” (Proverbio 13:12) Mahinamon kaayo kitang magpaabot sa usa ka maayong butang, apan kon dili kana moabot, kita mahigawad pag-ayo. Pananglitan, si Duncan a gusto gayong magpadayon sa pag-alagad ingong misyonaryo. Apan, miabot ang panahon nga kinahanglang moundang silang magtiayon aron atimanon ang ginikanan. “Sa unang higayon, gibati nako nga walay direksiyon ang akong kinabuhi,” miingon siya. “Wala na koy tumong. Daw wala nay bili ang tanan.” Usahay dugayng mawala ang kaguol nga bation tungod sa kahigawad, sama sa kahimtang ni Claire. Miingon siya: “Pito ka bulan ang akong tiyan sa dihang ako nakuhaan. Dugay na kadto, apan hangtod karon, kon makakita kog batang lalaki nga magbasag Bibliya sa plataporma, ako maghunahuna, ‘Kon buhi pa unta ang akong anak, ingon ana na unta siya kadak-a.’”

Sakit usab kaayo kon pakyason ka sa uban, sama sa dihang bulagan ka sa imong trato, biyaan ka sa imong kapikas, suklan ka sa imong anak, o luiban ka sa imong higala. Sanglit nagkinabuhi  man kita taliwala sa mga tawo nga dili hingpit ug sa malisod nga panahon, kita makasinati gayod ug kahigawad.

Ang atong mga kapakyasan makapahigawad usab kanato. Pananglitan, kon kita wala makapasar sa pasulit, wala dawata sa trabaho, o wala sugta sa atong gipangulitawhan, kita mobati tingali nga kita walay pulos. Mahigawad usab kita kon ang atong minahal mohunong sa pagsubay sa Kristohanong dalan. Si Mary nag-ingon: “Sa sinugdan ang akong anak nga babaye daw madasigon sa Kristohanong buluhaton. Nagtuo ko nga naghatag akog maayong ehemplo kaniya. Apan sa dihang iyang gitalikdan si Jehova nga Diyos ug gilapas ang mga sukdanan sa pamilya, gibati nako nga pakyas gyod ko. Ang akong mga kalamposan sa ubang bahin sa kinabuhi dili makahulip sa akong kaguol. Nahugno gyod ko.”

Sa unsang paagi atong masagubang ang kahigawad? Aron matubag kana, atong tagdon ang panig-ingnan nga gipakita ni Jehova sa pag-atubang sa kahigawad.

Hunahunaa ang Solusyon

Si Jehova nga Diyos mahigugmaong nagtagana sa panginahanglan sa unang magtiayon, apan sila nahimong ingrato ug mirebelde. (Genesis, kapitulo 2 ug 3) Unya ang ilang anak nga si Cain nakaugmad ug dili maayong tinamdan. Iyang gibalewala ang pasidaan ni Jehova ug iyang gipatay ang iyang igsoon. (Genesis 4:1-8) Mahanduraw ba nimo ang kahigawad nga gibati ni Jehova?

Bisan pa niana, nganong nagmalipayon gihapon ang Diyos? Tungod kay iyang katuyoan nga pun-on ang yuta sa hingpit nga mga tawo ug naghimo siyag mga paagi nga matuman kana. (Juan 5:17) Iyang gitagana ang halad lukat ug ang iyang Gingharian. (Mateo 6:9, 10; Roma 5:18, 19) Si Jehova nga Diyos naghunahuna sa solusyon, dili sa problema.

Ang Pulong sa Diyos nagdasig kanato sa paghunahuna sa positibong mga butang inay sa atong mga kapakyasan. Kini nag-ingon: “Bisan unsang butang matuod, bisan unsang butang nga maugdang, bisan unsang butang matarong, bisan unsang butang maputli, bisan unsang butang hiligugmaon, bisan unsang butang dungganon, kon aduna may pagkahamili ug kon aduna may butang nga dalayegon, magpadayon sa pagpalandong niining mga butanga.”—Filipos 4:8.

Hustong Paagi sa Pagsagubang sa Kahigawad

Hayan mahitabo ang mga butang nga makapausab gayod sa atong kinabuhi. Tingali mawad-an kitag trabaho, mamatyan ug kapikas, o matangtangan ug pribilehiyo. Basin kita masakit, mawad-ag pinuy-anan, o mga higala. Sa unsang paagi ato kanang masagubang?

Nakita sa uban nga makatabang ang pagtino kon unsang mga butanga ang angayng unahon. Si Duncan nga gihisgotan ganina, miingon: “Sa dihang nakita namo sa akong asawa nga dili na kami makabalik sa pag-alagad ingong misyonaryo, kami nahugno gayod. Sa ngadtongadto, nagtakda kamig duha ka prioridad: ang pag-atiman kang Mama ug kon posible, ang pagpadayon diha sa bug-os-panahong pag-alagad. Sa dihang mohimo kamig mga desisyon, among hunahunaon kon unsay epekto niini sa among mga prioridad. Tungod niini, dili na kaayo kami maglisod sa paghimog hustong mga desisyon.”

Sa dihang kita mahigawad, daghan kanato ang magsige na lag hunahuna sa atong kapakyasan. Pananglitan, kon mapakyas kita pagmatuto sa atong anak, kon wala kita madawat sa trabaho, o kon dili mabungahon ang atong pagsangyaw sa maayong balita ngadto sa mga tawo nga lahig pinulongan, maghunahuna tingali kita, ‘Pakyas gyod ko.’ Apan, maingon nga ang pagrebelde sa unang tawo wala magpakita nga pakyas ang Diyos, wala magpasabot nga pakyas kita tungod lang kay ang atong paningkamot wala dayon molampos.—Deuteronomio 32:4, 5.

 Dali ra kitang maglagot sa dihang pakyason kita sa mga tawo. Apan dili ingon niana si Jehova. Nahigawad si Jehova sa dihang si Haring David nanapaw ug dayon gipapatay ang bana sa babaye. Bisan pa niana, nakita ni Jehova ang kasinsero sa paghinulsol ni David busa wala niya kini isalikway. Sa samang paagi, ang matinumanong hari nga si Jehosapat nakasala sa dihang siya nakig-alyansa sa mga kaaway sa Diyos. Ang manalagna ni Jehova nag-ingon: “Tungod niini adunay kasuko batok kanimo gikan sa atubangan ni Jehova. Bisan pa, adunay maayong mga butang nga nakaplagan diha kanimo.” (2 Cronicas 19:2, 3) Nakita ni Jehova nga bisag nasayop si Jehosapat wala kini magpasabot nga iya nang gitalikdan ang Diyos. Sa samang paagi, dili kita mawad-ag mga higala kon dili dayon kita maglagot sa dihang sila masayop. Bisan pa sa ilang gihimo, duna gihapon silay maayong mga hiyas.—Colosas 3:13.

Sa atong paningkamot nga molampos, dili kalikayan nga kita makasinatig kahigawad. Tingali maguol kita sa dihang kita makasala. Apan, maulian ra kita kon kita mohimo sa gikinahanglang mga lakang ug maningkamot nga dili na usbon ang maong sala. Sa dihang si David nahigawad pag-ayo sa iyang kaugalingon, siya misulat: “Ang akong mga bukog nagabok sa akong pag-agulo sa tibuok adlaw. . . .  Sa kataposan gisugid ko kanimo [Jehova] ang akong sala . . . , ug ikaw mismo nagpasaylo sa pagkadaotan sa akong mga sala.” (Salmo 32:3-5) Kon atong maamgohan nga wala nato mabuhat ang gidahom sa Diyos kanato, kinahanglan nga mangayo kitag pasaylo kaniya ug bag-ohon ang atong mga gawi ug maningkamot nga sundon gayod ang tambag sa Diyos.—1 Juan 2:1, 2.

Pag-andam sa Kaugalingon

Sa walay duhaduha, kitang tanan makasinati gayod ug kahigawad. Unsa may atong buhaton aron maandam ang atong kaugalingon? Makaiikag ang mga komento ni Bruno, usa ka tigulang nga Kristiyano nga nakasinatig kapakyasan nga nakapausab sa iyang kinabuhi. Siya miingon: “Ang nakatabang gayod kanako sa pagsagubang sa kahigawad mao ang pagpadayon sa pagbuhat sa mga butang nga akong gibuhat kaniadto aron molig-on ang akong espirituwalidad. Akong nasayran kon nganong gitugotan sa Diyos nga magpadayon kining daotan nga sistema sa mga butang. Nakagugol akog daghang katuigan sa pag-ugmad ug suod nga relasyon kang Jehova. Mapasalamaton kaayo ko nga ako kanang gibuhat. Ang kahupayan nga akong gibati tungod sa pagkahibalo nga siya nagauban kanako maoy nakatabang kanako sa paglahutay.”

Samtang nagalantaw kita sa umaabot, makaseguro kita niini: Bisan tuod kita mobatig kahigawad tungod sa atong mga kapakyasan o tungod kay gipakyas kita sa uban, dili gayod kita pakyason sa Diyos. Gani, siya nag-ingon nga ang iyang ngalang Jehova nagpasabot nga “Ako mamao kon unsay mamao ako.” (Exodo 3:14) Tungod niana, makasalig kita nga himoon niya kon unsay gikinahanglan aron matuman ang iyang mga saad. Siya nagsaad nga pinaagi sa iyang Gingharian, ang iyang kabubut-on matuman “maingon sa langit, mao man usab sa yuta.” Mao kanay hinungdan nga si apostol Pablo misulat: “Kombinsido ako nga dili ang kamatayon ni kinabuhi ni mga manulonda ni mga kagamhanan . . . ni bisan unsang ubang linalang ang makabulag kanato gikan sa gugma sa Diyos nga anaa kang Kristo Jesus.”—Mateo 6:10; Roma 8:38, 39.

Makasalig gayod kita nga matuman ang saad sa Diyos pinaagi kang manalagnang Isaias: “Ania, ako naglalang ug bag-ong mga langit ug usa ka bag-ong yuta; ug ang unang mga butang dili na pagahinumdoman, ni kini sila motungha pa sa kasingkasing.” (Isaias 65:17) Pagkadako unya sa atong kalipay sa dihang ang tanang masakit nga kasinatian tungod sa kahigawad mapapas na sa atong panumdoman!

[Footnote]

[Blurb sa panid 13]

Wala magpasabot nga pakyas kita tungod lang kay ang atong paningkamot wala dayon molampos

[Blurb sa panid 14]

Ang Pulong sa Diyos nagdasig kanato sa paghunahuna sa positibong mga butang inay sa atong mga kapakyasan

[Mga hulagway sa panid 15]

Ang Diyos malipayon, bisan pa sa kapakyasan sa mga tawo, tungod kay ang iyang katuyoan seguradong matuman

[Hulagway sa panid 16]

Ang pag-una sa espirituwal nga mga butang makatabang kanato sa pagsagubang sa kahigawad