Among mga Magbabasa Nangutana

Nganong Gitugotan sa Diyos ang Pag-antos?

Ang Diyos dili maoy hinungdan sa pag-antos sa tawo. “Halayo ra sa matuod nga Diyos nga mobuhat sa pagkadaotan!” nag-ingon ang Bibliya. (Job 34:10) Nan, kinsa man diay hinungdan niini?

Si Jesus nagtawag kang Satanas ingong “magmamando niining kalibotana.” (Juan 14:30) Tinuod nga si Jehova nga Diyos mao ang Soberano sa Uniberso ug dili gayod niya itugyan sa uban ang iyang pagkasoberano. Apan, sa mubong panahon, gitugotan una sa Diyos si Satanas sa pagmando sa kalibotan.—1 Juan 5:19.

Unsang matanga sa magmamando si Satanas? Sukad pa sa iyang unang paggahom sa mga tawo, si Satanas mamumuno na ug bakakon. Dako kaayong kadaot ang iyang nahimo kanila. Giyagyag ni Jesus ang pagkadaotan ni Satanas pinaagi niining mga pulonga: “Kana siya usa ka mamumuno sa iyang pagsugod, ug siya wala mobarog nga lig-on diha sa kamatuoran, tungod kay ang kamatuoran wala kaniya. Inigsulti niya sa bakak, siya nagsulti sumala sa iyang kinaiya, tungod kay siya usa ka bakakon ug ang amahan sa bakak.” (Juan 8:44) Miingon usab si Jesus nga ang mga tawo nga nagtinguha sa pagpatay kaniya maoy mga anak sa unang mamumuno. Gihimo nila ang ilang kaugalingon nga iyang mga anak pinaagi sa pagsundog sa iyang gibuhat. Uyon kini sa panultihon nga nag-ingon, kon unsa ang amahan, mao usab ang anak.

Si Satanas padayong naghilo sa hunahuna sa mga tawo aron mahimong mamumuno sama kaniya. Pananglitan, ang retiradong propesor sa University of Hawaii, U.S.A., nga si R. J. Rummel, nagbanabana nga sukad sa tuig 1900 hangtod 1987, ang lainlaing matang sa gobyerno nakapatay ug 169,198,000 ka tawo tungod sa politika, pagpihig sa rasa, ug sa uban pang dili-makataronganong hinungdan. Wala pay labot niini ang milyon-milyong gipamatay sa panggubatan nianang panahona mismo.

Kon dili pagbuot sa Diyos ang pag-antos, nganong gitugotan man niya kini? Tungod kay kinahanglang husayon ang mga isyu nga mitungha dugay na kanhi. Kini nga mga isyu, bahin sa kon unsay maayo ug daotan, nag-apektar sa tanan niyang mga linalang. Atong hisgotan ang usa niana.

Sa pagsugod sa kasaysayan sa tawo, si Adan ug Eva midapig kang Satanas. Ilang gisalikway ang pagmando sa Diyos ug misulay pagmando nga kinaugalingon, apan sa pagkatinuod sila nailalom sa pagmando sa Yawa.—Genesis 3:1-6; Pinadayag 12:9.

Ingong Diyos sa hustisya, si Jehova naghatag ug panahon aron mapamatud-an kon unsa gayoy tinuod. Unsa may gipakita sa mga ebidensiya? Napamatud-an nga ang pagmando sa tawo ilalom sa impluwensiya ni Satanas miresulta lamang sa pag-antos. Busa, ang paghatag sa Diyos ug igong panahon maoy alang sa kaayohan sa tawo. Ngano man? Kadtong mosusi sa ebidensiya ug motuo niana adunay kahigayonan nga mapakita nila ang ilang kinabubut-ong pagpasakop sa pagmando sa Diyos. Kadtong gustong makakat-on sa mga sukdanan sa Diyos ug magkinabuhi subay niana adunay paglaom nga mabuhi sa walay kataposan.—Juan 17:3; 1 Juan 2:17.

Tinuod nga ang kalibotan karon gigamhan ni Satanas. Apan dili na kana magdugay. Haduol nang gamiton ni Jehova ang iyang Anak aron sa “pagbungkag sa mga buhat sa Yawa.” (1 Juan 3:8) Ubos sa pagtultol sa Diyos, si Jesus mag-alim sa nadugmok nga mga kasingkasing ug mag-ayo sa nahugno nga mga kinabuhi tungod sa pag-antos. Iyang buhion pag-usab ang binilyong biktima sa pag-antos nga namatay sulod na sa daghang siglo.—Juan 11:25.

Ang pagkabanhaw ni Jesus maoy pamatuod sa kadaogan sa Diyos batok sa mga buhat sa Yawa—usa ka garantiya kon unsay mapaabot sa mga tawo nga magpasakop sa pagmando sa Diyos. (Buhat 17:31) Gihubit sa Bibliya ang makalilipayng kahimtang nga atong madahom sa umaabot: “Ang Diyos makig-uban [sa katawhan]. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:3, 4.