Kon Unsay Atong Makat-onan Kang Jesus

Bahin sa Matuod nga Diyos

May ngalan ba ang Diyos?

Si Jesus nagtudlo nga ang Diyos may ngalan. Siya miingon: “Mag-ampo kamo sa ingon niini nga paagi: ‘Amahan namo nga anaa sa mga langit, pagabalaanon unta ang imong ngalan.’” (Mateo 6:9) Ang Bibliya naghisgot nga ang ngalan sa Diyos maoy Jehova. (Salmo 83:18) Sa dihang nag-ampo bahin sa iyang mga sumusunod, si Jesus miingon sa iyang Amahan: “Gipaila ko ang imong ngalan kanila.”—Juan 17:26.

Kinsa si Jehova?

Tungod kay si Jehova ang Maglalalang, gitawag siya ni Jesus ingong “ang bugtong matuod nga Diyos.” (Juan 17:3) Si Jesus miingon: “Wala ba ninyo mabasa nga siya nga naglalang kanila sukad sa sinugdan nagbuhat kanila nga lalaki ug babaye?” (Mateo 19:4) Siya miingon usab: “Ang Diyos maoy Espiritu.” (Juan 4:24) Busa dili nato makita ang Diyos.—Exodo 33:17-20.

 Unsay gusto sa Diyos nga atong buhaton?

Sa dihang gipangutana si Jesus kon unsa ang kinadak-ang sugo, siya mitubag: “Ang una mao, ‘Paminaw, Oh Israel, si Jehova nga atong Diyos maoy usa ka Jehova, ug higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.’ Ang ikaduha mao kini, ‘Higugmaon mo ang imong silingan sama sa imong kaugalingon.’”—Marcos 12:28-31.

Sa unsang paagi atong ikapakita nga atong gihigugma ang Diyos?

Si Jesus miingon: “Gihigugma ko ang Amahan.” Sa unsang paagi niya kini gipakita? “Sumala gayod sa gisugo kanako sa Amahan nga pagabuhaton,” siya miingon, “kana ang akong ginabuhat.” (Juan 14:31) Siya miingon usab: “Ginabuhat ko kanunay ang mga butang nga makapahimuot kaniya.” (Juan 8:29) Atong mapalipay ang Diyos pinaagi sa pagkat-on bahin kaniya. Samtang nag-ampo si Jesus alang sa iyang mga tinun-an, siya miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos.”—Juan 17:3; 1 Timoteo 2:4.

Sa unsang paagi kita makakat-on bahin sa Diyos?

Ang usa ka paagi nga kita makakat-on bahin sa Diyos maoy pinaagi sa pagpaniid sa mga butang nga iyang gilalang. Pananglitan, si Jesus miingon: “Panid-i pag-ayo ang mga langgam sa langit, tungod kay sila wala magapugas ug binhi o magaani o magatigom sa mga balay-tipiganan; sa gihapon ginapakaon sila sa ilang langitnong Amahan. Dili ba kamo labaw pa ug bili kay kanila?” Unsay buot ipasabot ni Jesus? Dili gayod nato itugot nga ang mga kabalaka sa kinabuhi magpahunong kanato sa pag-alagad sa Diyos.—Mateo 6:26-33.

Ang labing maayong paagi aron makakat-on kita bahin kang Jehova maoy pinaagi sa pagtuon sa iyang Pulong, ang Bibliya. Si Jesus nagtawag sa Kasulatan ingong “pulong sa Diyos.” (Lucas 8:21) Siya miingon sa Diyos: “Ang imong pulong maoy kamatuoran.”—Juan 17:17; 2 Pedro 1:20, 21.

Gitabangan ni Jesus ang mga tawo nga makakat-on sa kamatuoran bahin kang Jehova. Usa sa mga tinun-an ni Jesus miingon bahin kaniya: “Dili ba ang atong mga kasingkasing nagdilaab man samtang nakigsulti siya kanato sa dalan, samtang iyang gibuksan sa bug-os ang mga Kasulatan kanato?” (Lucas 24:32) Aron makakat-on bahin sa Diyos, kita kinahanglang magmapainubsanon, ug andam magpatudlo. Si Jesus miingon: “Gawas kon kamo motalikod ug mahimong sama sa mga bata, dili gayod kamo makasulod sa gingharian sa mga langit.”—Mateo 18:3.

Nganong ang kahibalo sa Diyos makahatag ug kalipay?

Ang Diyos nagtabang kanato aron masabtan ang katuyoan sa kinabuhi. Si Jesus miingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Si Jehova nagtudlo kanato sa kinamaayohang paagi sa pagkinabuhi. “Malipayon kadtong nagapatalinghog sa pulong sa Diyos ug nagasunod niini!” miingon si Jesus.—Lucas 11:28; Isaias 11:9.

Alang sa dugang kasayoran, tan-awa ang kapitulo 1 sa librong Unsay Tinuod nga Gitudlo sa Bibliya? a

[Footnote]

[Hulagway sa panid 16]

“Gipaila ko ang imong ngalan kanila.”—Juan 17:26

[Mga hulagway sa panid 16, 17]

Makakat-on kita bahin kang Jehova gikan sa mga butang nga iyang gilalang ug gikan sa Bibliya