1. Unsay gihimo sa mga klero sa Kakristiyanohan panahon sa gubat?

KABUBUT-ON ba sa Diyos nga ang matuod nga mga Kristohanon makiggubat ug mopatayg mga tawo nga laig rasa? Sa milabayng 100 ka tuig, sagad gihimo kana sa daghan nga nag-angkong Kristohanon. Ang mga tsaplin nga Katoliko nagbendisyon sa ilang mga sundalo ug armas diha sa mga gubat batok sa mga Katoliko sa kaatbang nga nasod. Gihimo usab kana sa mga tsaplin nga Protestante. Ang Gubat sa Kalibotan II mao ang pangunang pananglitan niana nga pagpinatyanay taliwala sa nag-angkong Kristohanon.

2, 3. Unsay baroganan sa mga Saksi ni Jehova panahon sa Gubat sa Kalibotan II ug sa katuigan sa ulahi, ug ngano?

² Unsay gihimo sa mga Saksi ni Jehova panahon sa maong gubat? Gipakita sa kasaysayan nga sila nagpabiling neyutral. Unsay basehanan sa ilang baroganan? Ang panguna niana mao ang panig-ingnan ug mga pagtulon-an ni Jesus. Siya miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Gisunod usab nila ang dugang kapadapatan sa giingon ni apostol Pablo sa iyang sulat ngadto sa mga Kristohanon sa Corinto.—Basaha ang 2 Corinto 10:3, 4.

 ³ Busa, ang matuod nga mga Kristohanon, kansang tanlag nabansay sa Bibliya, dili mokat-on sa pagpakiggubat ni makiggubat. Tungod sa ilang pagpabiling neyutral, linibo sa mga Saksi, bata ug tigulang, lalaki ug babaye, ang gilutos. Daghan ang nag-antos diha sa mga kampo sa pinugos nga pagtrabaho ug mga prisohan. Panahon sa mga Nazi sa Germany, ang uban gipamatay pa gani. Bisan pa sa mapintas nga paglutos nga ilang naagoman sa Europe, ang mga Saksi wala gayod malimot sa ilang responsabilidad nga mosangyaw sa maayong balita sa Gingharian ni Jehova. Padayon nila kanang gibuhat diha sa mga prisohan, kampo konsentrasyon, ug sa mga dapit diin sila gidestiyero. * Katuigan sa ulahi, ang mga Saksi ni Jehova wala makigbahin sa pagpuo sa rasa sa Rwanda niadtong 1994. Neyutral usab sila sa gubat sa kayutaan sa Balkan dihang nabahin ang kanhing Yugoslavia.

4. Sa unsang paagi ang pagpabiling neyutral sa mga Saksi ni Jehova nakaapektar sa uban?

⁴ Ang pagpabiling neyutral sa mga Saksi ni Jehova nakapakombinsir sa linibo ka tawo sa tibuok kalibotan nga ang mga Saksi nagpakitag tinuod nga gugma sa Diyos ug sa silingan. Sa laing pagkasulti, ilang gipamatud-an nga sila matuod nga Kristohanon. Apan, may lain pang bahin sa atong pagsimba nga nakapakombinsir sa daghan nga ang mga Saksi ni Jehova maoy matuod nga mga Kristohanon.

5. Unsang kausaban ang kinahanglang himoon sa mga tinun-an ni Kristo?

⁵ Sukad sa sinugdanan sa iyang ministeryo, gipasiugda ni Jesus ang kahinungdanon sa pagmantala sa maayong balita sa Gingharian sa Diyos. Mipili siyag 12 ka tinun-an nga makauban niya sa pagsugod niining buluhatona nga sa ulahi himoon sa tibuok yuta; human niana, siya nagbansay ug lain pang 70 ka tinun-an. (Luc. 6:13; 10:1) Sila giandam sa pagsangyaw sa maayong balita ngadto sa uban, una ngadto sa mga Hudiyo. Dayon, dihay butang nga wala nila dahoma! Sila gisugo ni Jesus nga isangyaw kini ngadto sa dili tinuling mga tawo sa kanasoran. Dako gayod kana nga kausaban alang sa masiboton nga Hudiyong mga tinun-an!—Buh. 1:8.

6. Nganong nakaamgo si Pedro nga si Jehova dili mapihigon?

⁶ Si apostol Pedro gisugo sa pag-adto sa balay ni Cornelio, usa ka dili tinuli nga Hentil. Busa nakaamgo si Pedro nga ang Diyos dili mapihigon. Si Cornelio ug ang iyang panimalay nabawtismohan. Mas dako na karon ang teritoryo sa mga Kristohanon; ang mga tawo sa tanang kanasoran mahimo nang makadungog sa kamatuoran ug modawat niana. (Buh. 10:9-48) Ang teritoryo mao na ang tibuok kalibotan.

7, 8. Unsay gihimo sa organisasyon ni Jehova aron ang tanang tawo makadungog sa maayong balita? (Tan-awa ang hulagway sa panid 7.)

⁷ Sa modernong adlaw nga kasaysayan sa mga Saksi ni Jehova, ang mga nagapanguna masibotong nagpaluyo ug nag-organisar sa pagpanudlo ug pagsangyaw sa maayong balita sa tibuok kalibotan. Karon, halos walo ka milyong masibotong mga Saksi ang naningkamot sa pagpakaylap sa mensahe ni Kristo sa kapig 600 ka pinulongan, ug nagkadaghan pa kini! Ang mga Saksi ni Jehova nailhan pinaagi sa ilang pagsangyaw sa balaybalay ug sa pagsangyaw sa kadalanan, usahay gamit ang mga displeyhanang lamesa ug cart.

⁸ Kapig 2,900 ka maghuhubad ang nakadawat ug talagsaong pagbansay sa paghubad sa Bibliya ug sa mga literatura sa Bibliya. Ang maong mga literatura wala lang hubara ngadto sa dagkong pinulongan. Gihubad usab kana ngadto sa gatosan ka pinulongan nga dili kaayo ilado apan gigamit sa minilyon  ka tawo. Pananglitan, sa Spain, ang mga Catalonian naggamit sa lumad nga pinulongang Catalan. Ug niining bag-o pa, gigamit pag-usab ang Catalan sa Andorra, Alicante, Balearic Islands, ug Valencia. Karon ang mga Saksi ni Jehova nagpatik na ug mga literatura sa Bibliya sa pinulongang Catalan, ug ang mga tigom gipahigayon sa pinulongan nga makapatandog sa kasingkasing sa mga Catalonian.

9, 10. Unsay nagpakita nga ang organisasyon sa Diyos interesado sa espirituwal nga panginahanglan sa tanang tawo?

⁹ Ang maong paghubad ug pagpanudlo gihimo usab sa lainlaing pinulongan sa tibuok kalibotan. Pananglitan, sa Mexico kadaghanan sa mga tawo nagsultig Spanish, apan daghang lumad nga grupo ang nagsultig lainlaing pinulongan. Usa na niana ang Maya. Ang branch sa Mexico nagpabalhin sa mga maghuhubad sa Maya nga pinulongan ngadto sa dapit diin sila makasulti ug makadungog sa maong pinulongan adlaw-adlaw. Ang laing pananglitan mao ang Nepali, usa sa mga pinulongan nga gigamit sa Nepal, nga kapig 29 ka milyon ang populasyon. Mga 120 ka pinulongan ang gigamit sa maong nasod, apan kapig 10 ka milyon ang nagsultig Nepali ug daghan pa ang naggamit niini ingong ikaduhang pinulongan. May mga literatura usab kita nga gipatik sa maong pinulongan.

¹⁰ Ang organisasyon ni Jehova sinsero kaayo sa pagtuman sa responsabilidad niini nga isangyaw ang maayong balita sa Gingharian sa tibuok kalibotan. Makita kini sa ilang pagpaluyo sa daghang team sa maghuhubad sa tibuok kalibotan. Minilyong tract, brosyur, ug magasin ang libreng gipanagtag sa tibuok kalibotan. Kini gisuportahan pinaagig boluntaryong donasyon sa mga Saksi ni Jehova, kinsa nagsunod sa sugo ni Jesus: “Nadawat ninyo nga walay bayad, ihatag nga walay bayad.”—Mat. 10:8.

11, 12. Unsay epekto sa uban sa tibuok kalibotang pagsangyaw sa mga Saksi ni Jehova?

¹¹ Ingong debotadong mga magsasangyaw ug magtutudlo, ang mga Saksi ni Jehova kombinsido kaayo nga ilang nakaplagan ang kamatuoran mao nga sila mihimog dagkong sakripisyo aron mapaambit ang mensahe ngadto sa mga tawo sa ubang nasod ug kultura. Daghan ang nagpasimple sa ilang kinabuhi, nagtuon ug laing pinulongan, ug mipasibo sa laing kultura aron makapakigbahin niining hinungdanong buluhaton. Kining tibuok kalibotang pagsangyaw ug pagpanudlo maoy laing butang nga nakapakombinsir sa  daghan nga ang mga Saksi ni Jehova maoy matuod nga mga sumusunod ni Kristo Jesus.

¹² Kining tanan gihimo sa mga Saksi kay kombinsido sila nga ilang nakaplagan ang kamatuoran. Apan unsa pay nakapakombinsir sa milyonmilyon nga ang mga Saksi ni Jehova nakabaton sa kamatuoran?—Basaha ang Roma 14:17, 18.

13. Sa unsang paagi nahuptang hinlo sa mga Saksi ang organisasyon?

¹³ Makabenepisyo kita sa giingon sa debotadong mga Kristohanon sa atong panahon, kinsa kombinsido nga nabatonan nila ang kamatuoran. Usa ka dugay nang alagad ni Jehova mipahayag sa iyang pagbati niining paagiha: “Gihimo ang tanan aron ang organisasyon ni Jehova magpabiling hinlo sa moral, bisag kinsa pay kinahanglang tambagan ug disiplinahon.” Sa unsang paagi nila nahuptan kining hataas nga sukdanan sa moral? Pinaagi sa pagsunod sa mga sukdanan nga gilatid diha sa Pulong sa Diyos ug sa sumbanan nga gihatag ni Jesus ug sa iyang mga tinun-an. Busa, sa kasaysayan sa modernong adlaw nga mga Saksi ni Jehova, diyutay lang ang kinahanglang ipalagpot sa kongregasyon kay wala mosunod sa mga sukdanan sa Diyos. Ang kadaghanan—lakip na sa pipila kinsa kanhi wala uyoni sa Diyos apan nagbag-o—naghupot ug hinlo, dalayegong kinabuhi.—Basaha ang 1 Corinto 6:9-11.

14. Unsay gihimo sa daghang napalagpot, ug unsay resulta?

¹⁴ Komosta kadtong kinahanglang ipalagpot sa kongregasyon, agig pagsunod sa sugo sa Bibliya? Linibo ang naghinulsol sa ilang sayop nga binuhatan ug gidawat pag-usab sa kongregasyon. (Basaha ang 2 Corinto 2:6-8.) Kay kanunayng gigamit sa mga Saksi ni Jehova ang Bibliya ingong giya sa ilang panggawi, nagpabiling hinlo ang kongregasyon. Pamatuod kini nga ang ilang organisasyon giuyonan sa Diyos. Ang pagsunod sa mga Saksi ni Jehova sa mga sukdanan sa Diyos—nga sukwahi kaayo sa pagkamatinugoton sa ubang relihiyon—maoy nakapakombinsir sa daghan nga nabatonan sa mga Saksi ang kamatuoran.

15. Unsay nakapakombinsir sa usa ka brader nga iyang nabatonan ang kamatuoran?

¹⁵ Nganong ang ubang dugay nang mga Saksi nagtuo nga ilang nakaplagan ang kamatuoran? Usa ka brader nga kapin nag 50 anyos miingon: “Sukad sa akong pagkatin-edyer, nagtuo na ko sa tulo ka pangunang haligi sa kamatuoran: (1) nga ang Diyos naglungtad; (2) nga iyang giinspirar ang Bibliya; ug (3) nga iyang gigamit ug gipanalanginan ang Kristohanong kongregasyon sa mga Saksi ni Jehova karon. Sa akong pagtuon latas sa katuigan, kanunay nakong susihon ang maong mga haligi ug pangutan-on ang akong kaugalingon kon lig-on ba gyod ang pundasyon niini. Kada tuig misamot ka daghan ang ebidensiya niana, busa milig-on ang akong pagtuo ug milalom ang akong kombiksiyon nga ato gayong nabatonan ang kamatuoran.”

16. Nganong kombinsido ang usa ka sister nga nabatonan niya ang kamatuoran?

 ¹⁶ Usa ka minyong sister nga nag-alagad sa tibuok kalibotang hedkuwarter sa New York mipahayag bahin sa organisasyon ni Jehova: “Kini lamang ang nagmantala sa ngalan ni Jehova. Makataronganon gayod kana, kay kon atong hinumdoman ang balaang ngalan makita mga 7,000 ka beses diha sa Bibliya. Nadasig ko sa giingon sa 2 Cronicas 16:9: ‘Mahitungod kang Jehova, ang iyang mga mata nagalibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.’” Siya midugang: “Tungod sa kamatuoran, akong nasayran kon sa unsang paagi makabaton ug bug-os nga kasingkasing aron ipakita ni Jehova kanako ang iyang kusog. Para nako, ang akong relasyon kang Jehova mao ang labing bililhon. Ug akong gipabilhan ang papel ni Jesus sa pagtaganag lalom nga kahibalo sa Diyos, nga maoy nakapalig-on kanako.”

17. Sa unsa nakombinsir ang usa ka kanhing ateyista, ug ngano?

¹⁷ Usa ka kanhing ateyista miingon: “Ang kalalangan nakapakombinsir kanako nga gusto sa Diyos nga magmalipayon ang mga tawo ug busa dili niya tugotan nga magpadayon ang pag-antos. Dugang pa, samtang misamot ang pagkadili-diyosnon sa kalibotan, miuswag ang pagtuo, kasibot, ug gugma sa mga Saksi ni Jehova. Ang espiritu lamang ni Jehova ang makahimo niining modernong adlaw nga milagro.”—Basaha ang 1 Pedro 4:1-4.

18. Unsay imong pagbati bahin sa gipahayag sa duha ka brader?

¹⁸ Lain pang dugay nang Saksi mipahayag kon nganong mituo siya sa kamatuoran nga atong gisangyaw: “Ang akong pagtuon latas sa katuigan nakapakombinsir kanako nga ang mga Saksi naningkamot gayod sa pagsunod sa sumbanan sa unang siglong mga Kristohanon. Sa akong pagbiyahe sa tibuok kalibotan, nakita nako mismo ang panaghiusa sa mga Saksi ni Jehova. Ang kamatuoran sa Bibliya nakatagbaw ug nakapalipay gayod kanako.” Dihang gipangutana ang usa ka brader nga kapig 60 anyos kon nganong kombinsido siya nga iyang nakaplagan ang kamatuoran, siya miingon: “Among gitun-an pag-ayo ang kinabuhi ug ministeryo ni Jesus ug among gipabilhan ang iyang panig-ingnan. Mihimo mig kausaban sa among kinabuhi aron mas masuod sa Diyos pinaagi kang Kristo Jesus. Among giila ang halad lukat ni Kristo ingong basehanan sa kaluwasan. Ug nahibalo mi nga siya gibanhaw. Gipamatud-an kana sa kasaligang mga saksi nga nakakita niana.”—Basaha ang 1 Corinto 15:3-8.

19, 20. (a) Unsang responsabilidad ang gipasiugda ni Pablo ngadto sa kongregasyon sa Roma? (b) Ingong dedikadong mga Kristohanon, unsay atong pribilehiyo?

¹⁹ Ingong mga Kristohanon nga nahigugma sa atong silingan, dili kita makaako nga iluom ang bililhong kamatuoran. Si Pablo miingon sa kongregasyon sa Roma: “Kon imong ipahayag sa dayag kanang ‘pulong sa imong kaugalingong baba,’ nga si Jesus maoy Ginoo, ug magpasundayag ug pagtuo sa imong kasingkasing nga ang Diyos nagbangon kaniya gikan sa mga patay, ikaw maluwas. Kay pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa nagahimog pagpahayag sa dayag alang sa kaluwasan.”—Roma 10:9, 10.

²⁰ Ingong dedikadong mga Saksi ni Jehova, kita kombinsido nga nabatonan nato ang kamatuoran ug nahibalo sa atong pribilehiyo sa pagtudlo sa uban sa maayong balita bahin sa pagmando sa Gingharian sa Diyos. Samtang atong gituman ang atong buluhatong pagsangyaw, hinaot ang uban makombinsir dili lang sa atong gitudlo kondili sa atong kombiksiyon usab.