1. Nganong ang mga piloto may ginasunod nga checklist sa dili pa magpalupad ug eroplano?

SA DILI pa magpalupad ug eroplano, inspeksiyonon una kini pag-ayo sa piloto gamit ang checklist nga may kapin sa 30 ka detalye. Kon dili kini himoon sa piloto, dako ang posibilidad nga may mahitabong aksidente. Nahibalo ka ba kon kinsa ang ilabinang giawhag kanunay nga sundon ang tanang detalye sa checklist? Ang eksperyensiyado kaayong mga piloto! Sila may tendensiya nga mokompiyansa ug dili na mosunod sa matag detalye sa checklist.

2. Unsa nga checklist ang giawhag nga gamiton sa mga Kristohanon?

² Samag piloto nga mahunahunaon sa kahilwas (safety), makagamit ka usab ug usa ka matang sa checklist aron maseguro nga dili mohuyang ang imong pagtuo panahon sa mga kalisdanan. Bag-o ka mang nabawtismohan o dugay nang nag-alagad, importante ang regular nga pagsusi kon unsa ka lig-on ang imong pagtuo ug debosyon kang Jehova nga Diyos. Kon dili nimo kini himoon, mahimong madaot ang imong relasyon kaniya. Ang Bibliya nagpasidaan: “Siya nga naghunahuna nga siya nagabarog magbantay nga siya dili mapukan.”—1 Cor. 10:12.

3. Unsay kinahanglang buhaton sa mga Kristohanon sa Galacia?

³ Kinahanglang susihon sa mga Kristohanon sa Galacia kon unsa ka lig-on ang ilang pagtuo, ug pabilhan ang ilang espirituwal nga kagawasan. Pinaagi sa halad lukat ni Jesus, kadtong may pagtuo may kahigayonan nga mailhan ang Diyos sa labing talagsaong paagi—sila mahimong mga anak sa Diyos! (Gal. 4:9) Aron mahuptan kanang espesyal kaayo nga relasyon, kinahanglang isalikway sa mga taga-Galacia ang mga pagtulon-an sa Judaismo, nga nag-insistir nga angayng sundon ang Moisesnong Balaod. Sa pagkatinuod, ang dili tinuli nga  mga Hentil sa mga kongregasyon wala sukad mailalom sa Balaod! Ang mga Hudiyo ug Hentil parehong kinahanglang mouswag sa espirituwal. Kinahanglan nilang masabtan nga ang pagsunod sa Moisesnong Balaod dili mao ang pasikaranan aron ilhong matarong.

4, 5. Unsay gitambag ni Pablo sa mga taga-Galacia, ug nganong hinungdanon kini kanato?

⁴ Ang tambag ni apostol Pablo sa mga taga-Galacia girekord aron ang tanang matuod nga Kristohanon dili mobiya sa kamatuoran ug unya mobalik sa kalibotan. Giinspirar ni Jehova ang apostol nga dasigon dili lamang ang mga kongregasyon sa Galacia kondili ang tanan usab Niyang magsisimba nga magpabiling matinumanon.

⁵ Kinahanglan natong hinumdoman kon sa unsang paagi kita nahigawas sa bakak nga mga pagtulon-an ug nahimong Saksi ni Jehova. Sa paghimo niini, hunahunaa kining duha ka pangutana: Nahinumdom ka ba sa mga lakang nga imong gihimo aron mokuwalipikar sa bawtismo? Nahinumdom ka ba kon sa unsang paagi nimo nailhan ang Diyos ug kon unsay imong gibati dihang nailhan ka niya?

6. Unsa nga checklist ang atong konsiderahon?

⁶ Sa sinugdan, atong gihimo ang siyam ka lakang. Kini nahisamag espirituwal nga checklist nga makita sa kahong  “Mga Lakang nga Motultol sa Bawtismo ug sa Padayong Pag-uswag.” Kon kanunay natong hinumdoman kining siyam ka lakang, mas molig-on ang atong determinasyon nga dili mobalik sa mga butang sa kalibotan. Ang eksperyensiyado ug mabinantayong piloto luwas nga makabiyahe kon iyang repasohon ang checklist sa dili pa magpalupad ug eroplano. Sa susama, matabangan kitang magpabiling matinumanon kon kanunay natong susihon ang atong espirituwal nga checklist.

7. Unsang sumbanan ang kinahanglan natong sundon, ug ngano?

⁷ Ang checklist sa piloto magpahinumdom kaniya nga dunay rutina nga angay niyang sundon sa matag biyahe. Mahimo usab natong regular nga susihon ang atong kaugalingon ug ang rutina nga atong ginasunod sukad sa atong bawtismo. Si Pablo misulat kang Timoteo: “Magpadayon ka sa paghupot sa sumbanan sa makapahimsog nga mga pulong nga imong nadungog gikan kanako uban sa pagtuo ug gugma maylabot kang Kristo Jesus.” (2 Tim. 1:13) Ang maong “makapahimsog nga mga pulong” anaa sa Pulong sa Diyos. (1 Tim. 6:3) Maingon nga ang sketch sa pintor maghatag kanatog ideya sa katibuk-ang hitsura sa usa ka hulagway, ang “makapahimsog nga mga pulong” makatabang usab kanatong masabtan ang katibuk-ang kinahanglanon ni Jehova kanato. Busa hisgotan nato karon ang mga lakang nga mitultol sa atong bawtismo aron makita nato kon nagsunod ba gihapon kita sa sumbanan sa kamatuoran.

8, 9. (a) Nganong angay kitang padayong mouswag sa kahibalo ug pagtuo? (b) Iilustrar ang kahinungdanon sa padayong pag-uswag sa espirituwal.

⁸ Ang unang lakang nga atong gihimo mao ang pagkuhag kahibalo. Dayon, naugmad nato ang pagtuo. Apan kinahanglang padayon kitang mouswag niining mga bahina. (2 Tes. 1:3) Kini naglangkit ug mapinadayonong pagbag-o sa kinabuhi. Busa human sa atong bawtismo, angay kitang padayon nga mouswag sa espirituwal.

⁹ Ang espirituwal nga pag-uswag ikatandi nato sa pagtubo sa usa ka kahoy. Kini mahimong motubo pag-ayo ilabina kon lalom ang pagkagamot niini. Pananglitan, ang pipila ka sedro sa Lebanon motubo sama ka taas sa 12 ka andanang bilding ug may lig-ong mga gamot. Ang lawas niini modako hangtod 12 metros. (Awit 5:15) Sa sinugdan,  paspas kaayong motubo ang maong kahoy. Samtang magkalalom ug mokatap ang mga gamot niini, magkadako ug magkataas ang kahoy. Apan ngadtongadto, dili na kaayo mamatikdan ang pagtubo niini. Ingon usab niana ang atong pag-uswag sa espirituwal. Dihang nagsugod kita sa pagtuon sa Bibliya, paspas tingali kaayo ang atong pag-uswag ug dayon nagpabawtismo. Ug nalipay ang mga igsoon sa pagkakita niana. Gani, basin kuwalipikado na kitang magpayunir o modawat ug ubang pribilehiyo. Apan sa misunod nga mga tuig, tingali dili na kaayo mamatikdan ang atong pag-uswag. Bisan pa niana, kinahanglan gihapon kitang mouswag sa pagtuo ug kahibalo hangtod nga mahisama kita sa usa ka ‘hingkod nga tawo, sa gidak-on nga iya sa kabug-osan ni Kristo.’ (Efe. 4:13) Busa dihang kita nagauswag ingong Kristohanon, sama kitag gamayng binhi nga mitubo ug nahimong usa ka lig-ong kahoy.

10. Nganong kinahanglan gihapong mouswag sa espirituwal ang hamtong nga mga Kristohanon?

¹⁰ Kutob na lang ba diha ang atong pag-uswag? Dili. Kinahanglang padayong mouswag ang atong kahibalo ug molig-on ang atong pagtuo. Niining paagiha, kita mas molig-on ug dili matarog. (Prov. 12:3) Daghan nang igsoon ang nakahimo niana. Pananglitan, usa ka brader nga kapig 30 ka tuig nang ansiyano ang miingon nga padayon gihapon siyang nag-uswag sa espirituwal. Matod niya: “Misamot ang akong apresasyon sa Bibliya. Pirme kong makakat-on ug bag-ong mga paagi sa pagpadapat sa mga prinsipyo ug balaod sa Bibliya. Nagkalalom ang akong pagpabili sa ministeryo.”

11. Sa paglabay sa panahon, sa unsang paagi nato mas mailhan si Jehova?

¹¹ Nalangkit usab sa atong pag-uswag ang pagpakigsuod kang Jehova ingong atong Higala ug Amahan. Gusto niyang mobati kitang luwas ug gimahal, sama sa bation sa bata dihang gakson sa iyang mahigugmaong ginikanan o sa atong bation dihang kauban ang atong tinuod ug maunongong higala. Siyempre, ang pagkasuod kang Jehova dili basta lang motungha, o maugmad. Ang pagkaila ug paghigugma kaniya nagkinahanglag panahon. Busa angay kitang mogahin ug panahon sa pagbasa sa iyang Pulong adlaw-adlaw ug sa matag gula sa Bantayanang Torre ug Pagmata!, maingon man sa ubang publikasyon nga binase sa Bibliya.

12. Unsay kinahanglan natong buhaton aron mailhan kita ni Jehova?

¹² Ang mga higala sa Diyos mouswag  usab sa espirituwal pinaagig sinserong mga pag-ampo ug maayong panag-ubanay. (Basaha ang Malaquias 3:16.) Si Jehova mamati “sa ilang pangamuyo.” (1 Ped. 3:12) Samag mahigugmaong ginikanan, si Jehova mamati sa atong mga pagtuaw. Busa kinahanglan kitang ‘molahutay sa pag-ampo.’ (Roma 12:12) Dili kita makasukol sa mga pagpit-os niining kalibotana ug makapabiling hamtong nga Kristohanon kon wala ang tabang sa Diyos. Kon dili kita molahutay sa pag-ampo, dili nato madawat ang kusog nga andam ihatag sa Diyos. Kontento ka na ba sa kalidad sa imong pag-ampo, o kinahanglan kining pauswagon?—Jer. 16:19.

13. Nganong hinungdanon sa espirituwal nga pag-uswag ang pagpakig-uban sa mga isigka-Kristohanon?

¹³ Gikahimut-an ni Jehova ang tanang “modangop kaniya.” Busa bisag nailhan na nato ang Diyos, buot natong makig-uban kanunay sa kongregasyon. (Nah. 1:7) Kay daotan man kaayo ang kalibotan, maalamong makig-uban kita sa atong mga igsoon. Unsay kaayohan niini? Makakaplag ka sa kongregasyon ug mga indibiduwal nga magdasig kanimo “sa paghigugma ug sa maayong mga buhat.” (Heb. 10:24, 25) Ang gugma sa usag usa nga gihisgotan ni Pablo sa iyang sulat ngadto sa mga Hebreohanon maugmad lang kon makig-uban ka sa mga igsoon sa kongregasyon. Busa tambong ug komento kanunay sa mga tigom aron regular nimong mamarkahan ang imong checklist.

14. Sa unsang paagi ang paghinulsol ug pagbag-o maoy padayong proseso?

¹⁴ Una kita nahimong Kristohanon, gikinahanglan natong maghinulsol ug magbag-o, o mobiya sa makasasalang pagkinabuhi. Apan ang paghinulsol maoy padayong proseso. Kay dili hingpit, dali ra kitang makasala. Ang sala samag bitin nga andam mopaak kanato. (Roma 3:9, 10; 6:12-14) Angay kitang magpabiling alisto ug dili balewalaon ang atong mga kahuyangan. Makapalipay nga si Jehova mapailobon kanato samtang nanglimbasog kita sa pagsukol sa atong mga kahuyangan ug sa paghimog mga kausaban. (Filip. 2:12; 2 Ped. 3:9) Dakog tabang ang maalamong paggamit sa atong panahon ug kusog, nga isalikway ang hinakog nga mga pangagpas. Usa ka sister misulat: “Nagdako ko sa kamatuoran, apan lahi kaayo ang akong panglantaw kang Jehova. Para nako, kahadlokan kaayo siya ug dili gyod nako mapahimut-an.” Sa ulahi, ang sister naluya sa espirituwal tungod sa mga sala nga iyang nahimo. Siya mipadayon: “Dili kay wala ko mahigugma kang Jehova kondili wala lang gyod ko makaila kaniya. Human sa tim-os nga mga pag-ampo, naningkamot kong magbag-o. Sama kog bata nga giagak ni Jehova. Gitabangan ko niya nga mabuntog ang mga babag, ug gipakita niya kon unsay kinahanglan nakong himoon.”

15. Unsay makita ni Jesus ug sa iyang Amahan?

¹⁵ “Padayon ninyong isulti sa katawhan” ang maayong balita. Kini ang giingon sa manulonda ngadto kang Pedro ug sa ubang apostoles human sila milagrosong gipagawas sa prisohan. (Buh. 5:19-21) Oo, anaa usab sa atong checklist ang pagsangyaw kada semana. Makita ni Jesus ug sa iyang Amahan ang atong pagtuo ug ministeryo. (Pin. 2:19) Sama sa gisulti sa ansiyano nga gihisgotan ganina: “Ang ministeryo maoy dakong bahin sa atong kinabuhi.”

16. Nganong maayong palandongon ang atong dedikasyon kang Jehova?

¹⁶ Palandonga ang imong dedikasyon. Ang labing bililhong butang nga atong nabatonan mao ang atong relasyon kang Jehova. Nakaila siya niadtong mga iya. (Basaha ang Isaias 44:5.) Mainampoong susiha  ang kalidad ug kalig-on sa imong relasyon kaniya. Hinumdomi usab ang petsa sa imong bawtismo. Magpahinumdom kini kanimo nga ang imong bawtismo nagsimbolo sa labing importanteng desisyon nga imong nahimo sukad.

17. Nganong gikinahanglan ang paglahutay aron magpabiling suod kang Jehova?

¹⁷ Sa iyang sulat sa mga taga-Galacia, gipasiugda ni Pablo ang kahinungdanon sa paglahutay. (Gal. 6:9) Kinahanglan usab kini sa mga Kristohanon karon. Makaatubang ka gayod ug mga pagsulay, apan si Jehova motabang kanimo. Pag-ampo kanunay alang sa tabang sa balaang espiritu. Ikaw mahupayan dihang pulihan niyag kalipay ug kalinaw ang imong kaguol ug kabalaka. (Mat. 7:7-11) Hunahunaa kini: Kon nahingawa si Jehova sa mga langgam, unsa pa kaha kanimo nga nahigugma ug nagpahinungod kaniya? (Mat. 10:29-31) Bisag unsa pang problema ug pagpit-os ang imong giatubang, ayawg kaluya, ayawg surender. Dagaya gayong mga panalangin ang atong madawat kay nailhan kita ni Jehova!

18. Kay nakaila ka na sa Diyos, unsay buot nimong himoon karon?

¹⁸ Nan, kon nailhan na nimo ang Diyos ug nabawtismohan di pa dugay, unsay sunod nimong himoon? Paningkamoting mas mailhan si Jehova ug padayong mouswag sa espirituwal. Komosta kon dugay ka nang bawtismado? Padayong pauswaga ang imong kahibalo bahin kang Jehova. Hinaot nga dili nato pasagdan ang atong relasyon kaniya. Susihon nato matag karon ug unya ang atong espirituwal nga checklist aron maseguro nga nagauswag ang atong relasyon sa atong mahigugmaong Amahan, Higala, ug Diyos—si Jehova.—Basaha ang 2 Corinto 13:5, 6.