“PARA sa unsa na?” nangutana si George Naish samtang gitudlo ang 18 metros nga mga troso nga gipatong-patong diha sa pondohanag armas kaniadto sa Saskatoon, Saskatchewan, Canada. Siya giingnan nga gigamit kadto sa pagtukod ug mga signal tower panahon sa Gubat sa Kalibotan I. “Akong nahunahunaan nga puwede kadtong gamiton sa pagtukod ug mga radio tower,” miestorya si Brader Naish sa ulahi, “ug tungod niadto nakaideya ming magbaton ug estasyon sa radyo alang sa pagsangyaw.” Mga usa lang ka tuig ang milabay, sa 1924, ang CHUC nagsugod sa pagsibya. Kadto ang usa sa unang mga estasyon sa radyo sa Canada nga dunay programa bahin sa relihiyon.

Kay dako man kaayo ang Canada, nga halos sama ka dako sa Europe, haom kaayo ang pagsangyaw pinaagig radyo. “Tungod sa maong mga programa, ang kamatuoran nakaabot sa daghang tawo nga dili namo maestorya sa personal,” miingon si Florence Johnson, nga nagtrabaho sa estasyon sa Saskatoon. “Ug kay mao pay pagkauso sa radyo niadtong panahona, ang mga tawo mahinam sa pagpaminaw bisan unsay isibya.” Pagka-1926, ang mga Estudyante sa Bibliya (maoy tawag sa mga Saksi ni Jehova kaniadto) duna nay kaugalingong mga estasyon sa radyo diha sa upat ka siyudad sa Canada. *

Unsay madunggan niini nga mga programa? Ang mga mag-aawit gikan sa lokal nga kongregasyon sagad duyogan sa mga manunugtog ug sa gagmayng mga orkestra. Siyempre, ang mga brader mopakigpulong usab ug manguna sa mga panaghisgot sa Bibliya. Si Amy Jones, nga nakaapil niini nga mga panaghisgot, nahinumdom, “Dihang magsangyaw ko ug magpailaila sa akong kaugalingon, ang tagbalay usahay moingon, ‘Ay, o, napaminawan na ti ka sa radyo.’”

Ang mga Estudyante sa Bibliya sa Halifax, Nova Scotia, migamit sa bag-ong estilo sa programa diha sa radyo—usa ka talk show diin ang mga mamiminaw puwedeng manawag ug mosuknag mga pangutana bahin sa Bibliya. “Maayo kaayo ang sanong sa mga tawo niining matanga sa programa,” misulat ang usa ka brader. “Tungod sa kadaghang  manawag sa estasyon, dili na namo kana matubag tanan.”

Sama kang apostol Pablo, ang mga Estudyante sa Bibliya nakadawat ug lainlaing sanong sa mensahe nga ilang gisibya. (Buh. 17:1-5) Ang uban ganahan sa mensahe. Pananglitan, dihang napaminawan ni Hector Marshall sa radyo ang bahin sa Studies in the Scriptures, siya miorder ug unom ka tomo. “Nakahunahuna ko nga gamiton ang maong mga libro sa pagtudlo sa Sunday school,” misulat siya sa ulahi. Apan dihang nahuman niyag basa ang Tomo I, midesisyon si Hector nga mobiya sa iyang simbahan. Siya nahimong masibotong magsasangyaw ug matinumanong nag-alagad kang Jehova hangtod sa iyang kamatayon sa 1998. Sa sidlakang Nova Scotia, usa ka adlaw human gisibya ang pakigpulong nga “Ang Gingharian, ang Paglaom sa Kalibotan,” giingnan ni Colonel J. A. MacDonald ang usa ka lokal nga brader: “Gahapon, nadunggan sa mga tawo sa Cape Breton Island ang kinanindotang mensahe nga nadungog sukad niining dapita.”

Sa laing bahin, ang mga pari nangasuko. Ang ubang Katoliko sa Halifax nanghulga nga bombahan ang estasyon nga nagsibya sa mga programa sa mga Estudyante sa Bibliya. Pagka-1928, sa pagsulsol sa mga lider sa relihiyon, kalit nga gipahibalo sa gobyerno nga dili na nila i-renew ang lisensiya sa mga estasyon nga gipanag-iya sa mga Estudyante sa Bibliya. Agig protesta niining dili makataronganong desisyon, ang mga igsoon nag-apod-apod sa handbill nga Who Owns the Air? Apan ang gobyerno midumili gihapon sa pag-renew sa ilang lisensiya.

Nakapaluya ba kadto sa gamayng grupo sa mga alagad ni Jehova sa Canada? “Sa sinugdan, daw nagmadaogon ang kaaway,” miingon si Isabel Wainwright. “Apan nahibalo ko nga gitugotan kadto ni Jehova nga mahitabo kay nahiuyon kadto sa iyang kabubut-on. Mao nga basin kinahanglan ming mogamit ug laing mas maayong paagi sa pagsangyaw sa maayong balita sa Gingharian.” Imbes magsalig lang sa radyo alang sa pagsangyaw, ang mga Estudyante sa Bibliya sa Canada nagsugod sa pagduaw sa mga tawo diha sa balay. Apan seguradong dako kaayog natabang ang radyo sa pagsibya sa “kinanindotang mensahe nga nadungog sukad.”—Gikan sa among archives sa Canada.