Gipanalanginan kay Andam Mohimog mga Kausaban

Sumala sa giasoy ni James A. Thompson

Natawo ko sa habagatang bahin sa United States sa 1928. Niadtong panahona, dihay balaod nga dili mag-uban ang puti ug itom nga mga tawo. Ang molapas niini mapriso o grabeng silotan.

NIADTONG panahona sa pipila ka dapit sa United States, ang mga puti ug itom nga mga Saksi ni Jehova kinahanglang bulag ug mga kongregasyon, sirkito, ug distrito. Sa 1937, ang akong papa nahimong company servant (karon gitawag nga koordinetor sa lawas sa mga ansiyano) sa kongregasyon sa mga itom sa Chattanooga, Tennessee. Si Henry Nichols ang company servant sa mga puti.

Daghan kog mahinumdoman sa akong pagkabata. May mga gabii nga molingkod ko sa balkon sa likod sa among balay uban ni Papa ug Brader Nichols. Bisag wala ko kasabot sa ilang giestoryahan, ganahan kong motapad ni Papa samtang naghisgot sila kon unsay labing maayong paagi sa pagsangyaw niadtong panahona.

Sayo pa niini, sa 1930, may makapasubong hitabo sa among pamilya. Si Mama, nga 20 anyos pa, namatay. Si Papa na lang ang nag-atiman nako ug sa akong magulang nga si Doris, nga kuwatro anyos ug ako dos anyos. Bisag bag-o pang nabawtismohan si Papa, siya nagmauswagon sa espirituwal.

Mga Panig-ingnan nga Nakaimpluwensiya Kanako

Sa 1933, nakaila ni Papa ang buotang sister nga si Lillie Mae Gwendolyn Thomas, ug wala madugay sila nagminyo. Sila maoy maayong panig-ingnan kanamo ni Doris sa maunongong pag-alagad kang Jehova.

 Sa 1938, dihay kausaban sa pagpilig mga ansiyano. Imbes pilion pinaagig botasyon diha sa kongregasyon, ang hedkuwarter sa Brooklyn, New York, mao ang magtudlog mga ansiyano. Ang tanang kongregasyon giawhag nga magpasakop niini. Bisag may pipila sa Chattanooga nga wala dayon mosuportar niini, si Papa bug-os nga nagpasakop sa maong kausaban. Ang iyang panig-ingnan sa pagkamaunongon, uban sa bug-os nga pagpaluyo ni Mama Lillie, nakatabang nako hangtod karon.

Bawtismo ug Bug-os Panahong Ministeryo

Sa 1940, kadaghanan sa among kongregasyon miabang ug bus paingon sa kombensiyon sa Detroit, Michigan. Ang pipila sa among kauban sa bus nabawtismohan didto. Natingala ang uban kon nganong wala ko nagpabawtismo nga tigsangyawan na man ko sukad pa sa edad nga singko.

Dihang gipangutana ko nila, ako mitubag, “Wala pa kaayo ko kasabot kon unsay bawtismo.” Nadunggan ko ni Papa ug siya nakurat. Sukad niadto, naningkamot si Papa sa pagpasabot nako sa kahulogan ug kahinungdanon sa bawtismo. Upat ka bulan sa ulahi, sa bugnaw kaayong adlaw sa Oktubre 1, 1940, ako nabawtismohan sa usa ka linaw sa gawas sa Chattanooga.

Sa edad nga 14, tigpayunir na ko kada bakasyon sa klase. Nagsangyaw ko sa gagmayng lungsod sa Tennessee ug sa silingang estado, ang Georgia. Ako sayong momata, mag-andam ug balon, ug mosakayg tren o bus sa 6:00 s.b. paingon sa teritoryo. Makauli ko mga 6:00 s.g. Sagad dili na maabtag udto ang akong balon. Bisag naa koy kuwarta, dili ko makapalit kay itom ko. Kas-a misulod ko sa usa ka tindahan aron mopalit ug ice cream pero gipapahawa ko. Maayo na lang nga may puting babaye nga naluoy ug gidad-an kog ice cream sa gawas.

Paghayskul nako, aktibo kaayo ang mga tawo sa Habagatan sa kalihokan bahin sa pagbatog managsamang sibil nga mga katungod. Ang mga organisasyon sama sa NAACP (National Association for the Advancement of Colored People) nagdasig sa mga estudyante sa pagsuportar niini. Gipaningkamotan sa daghang eskuylahan sa mga itom, lakip ang amoa, nga paapilon ang tanang estudyante sa maong kalihokan. Ako gipugos sa pag-apil kay angay kono nakong suportahan ang among rasa. Pero mibalibad ko ug gipatin-aw kanila nga ang Diyos dili mapihigon ug walay pinalabing rasa. Busa ako nagsalig sa Diyos sa pagsulbad sa maong inhustisya.​—⁠Juan 17:14; Buh. 10:​34, 35.

Paggraduwar sa hayskul, midesisyon ko nga mobalhin sa New York City. Sa akong pagpaingon didto, mihapit ko sa Philadelphia, Pennsylvania, aron bisitahon ang akong mga higala nga nakaila nako sa miaging kombensiyon. Didto ko unang nakatambong ug kongregasyon nga nag-uban ang mga puti ug itom. Panahon sa duaw, gihatagan ko sa nagapanawng magtatan-aw ug bahin para sa sunod semana. Kadto nagtukmod nako nga magpabilin didto.

Usa sa akong mga higala sa Philadelphia mao ang batan-ong sister nga si Geraldine White, o Gerri nga maoy akong tawag niya. Sinati kaayo siya sa Bibliya ug hanas sa pagsangyaw. Ang ilabinang importante nako kay  pareho mig tumong nga magpayunir. Kami nagminyo sa Abril 23, 1949.

Gidapit sa Gilead

Tumong namo nga makatungha sa Gilead ug magmisyonaryo. Nalipay mi sa pagpasibo sa among kahimtang aron mokuwalipikar sa Gilead. Wala madugay, gihangyo mi nga mobalhin sa Lawnside, New Jersey; dayon sa Chester, Pennsylvania; ug sa ulahi sa Atlantic City, New Jersey. Samtang nag-alagad didto, kami mikuwalipikar sa pag-aplay sa Gilead kay duha ka tuig na ming minyo. Apan may problema.

Sa sayong bahin sa dekada sa 1950, daghang batan-ong lalaki ang girekluta nga magsundalo ug makiggubat sa Korea. Ang komite sa pagrekluta sa Philadelphia morag mapihigon batok sa mga Saksi tungod sa neyutralidad. Sa ulahi, usa ka huwes ang nagpahibalo nako nga giimbestigahan ko sa FBI ug nakita nga neyutral gyod ko. Busa sa Enero 11, 1952, giila ko sa Presidential Appeal Board nga usa ka ministro ug busa dili kinahanglang magsundalo.

Sa Agosto nianang tuiga, kami ni Gerri gidapit nga motungha sa ika-20 nga klase sa Gilead, nga magsugod sa Septiyembre. Nagdahom gyod mi nga maasayn sa laing nasod. Ang akong igsoong si Doris migraduwar sa ika-13 nga klase ug nag-alagad na sa Brazil. Pero nakurat mi ni Gerri dihang giasayn mi sa sirkitong buluhaton​—⁠nga moduaw sa mga kongregasyon sa mga itom sa habagatang estado sa Alabama! Medyo nahigawad mi kay gusto kaayo namong moalagad sa langyawng nasod.

Ang unang kongregasyon nga among giduaw mao ang Huntsville, diin kami miestar sa balay sa usa ka sister. Samtang nanghakot mi sa among gamit, nadunggan namo siya nga miingon sa iyang kaestorya sa telepono, “Nia na ang mga bata.” Kami 24 anyos lang ug bata kaayong tan-awon. Samtang nag-alagad sa maong sirkito, kami gianggaag Mga Bata.

Ang mga tawo sa Habagatan dakog pagtamod sa Bibliya. Busa sagad namong sugdan ang mga panaghisgot pinaagi niining tulo ka punto:

(1) Mubong komento bahin sa kahimtang sa kalibotan.

(2) Solusyon nga gihatag sa Bibliya.

(3) Ang giingon sa Bibliya nga angayng buhaton.

Dayon motanyag mig basahon nga magamit sa pagtuon sa Bibliya. Tungod sa maayong mga resulta niini, gihatagan kog bahin sa 1953 nga New World Society Assembly sa New York, diin gipasundayag nako ang maong tulo ka punto.

Sa ting-init sa 1953, natudlo ko ingong magtatan-aw sa distrito nga moduaw sa mga sirkito sa mga itom sa Habagatan. Ang among  teritoryo magsugod sa Virginia hangtod sa Florida ug apil pa ang Alabama ug Tennessee sa kasadpan. Kinahanglan gyong mapailin-ilinon ang nagapanawng mga magtatan-aw. Pananglitan, kami sagad nagpuyo sa mga balay nga way kasilyas sa sulod ug maligo sa banyera likod sa lutoanan. Hinuon nalipay ra mi kay kadto ang kinainitang bahin sa balay.

Mga Kalisdanan Tungod sa Pagpihig sa Rasa

Samtang nag-alagad sa Habagatan, kinahanglang maayo ming mangitag paagi aron mahimo ang pipila ka butang. Ang mga itom gidid-an sa paggamit sa publikong mga labhanan. Busa aron makalaba, si Gerri moingon nga si “Mrs. Thompson” ang tag-iya sa mga labhonon. Daghan ang nagtuo nga katabang siya. Kaniadto ang mga magtatan-aw sa distrito magpasalida sa pelikulang The New World Society in Action. Dihang magkinahanglan kog dakong eskrin, tawgan nako ang tindahan ug moingon nga magpareserba si “Mr. Thompson.” Dayon ako kining kuhaon sa tindahan. Kanunay ming matinahoron ug sagad malinawon ang among ministeryo.

Kadaghanan sa Habagatan dili ganahan sa mga taga-Amihanan. Kas-a ang lokal nga mantalaan mitaho nga si James A. Thompson, Jr., sa Watchtower Bible and Tract Society of New York mopakigpulong sa usa ka asembliya. Ang pipila nga nakabasa nagtuo nga taga-New York ko, ug busa gikanselar ang kontrata sa paggamit sa awditoryum sa eskuylahan. Giadto nako ang nagdumala sa eskuylahan ug giingnan sila nga sa Chattanooga ko mieskuyla kaniadto. Dayon miuyon na sila nga gamiton ang awditoryum alang sa sirkitong asembliya.

Sa tungatunga sa dekada 1950, misamot pa ang tensiyon tungod sa pagpihig sa rasa, ug usahay mahitabo ang kapintasan. Sa 1954, may mga igsoon nga naglagot kay walay itom nga mga mamumulong sa programa sa daghang distritong kombensiyon. Gidasig namo ang itom nga mga brader nga magpailob lang. Pagkasunod ting-init, gihatagan kog bahin. Human niadto, daghan nang itom nga brader sa Habagatan ang gihatagag bahin sa mga programa.

Paglabay sa panahon, wala na kaayoy kapintasan sa Habagatan, ug anam-anam nang nag-uban sa kongregasyon ang puti ug itom nga mga igsoon. Busa ang pipila ka magmamantala gihangyo nga mobalhin sa ubang kongregasyon. Kinahanglan usab nga usbon ang mga teritoryo sa kongregasyon ug ang mga kaakohan sa mga magtatan-aw. Ang ubang itom ug puti wala makauyon sa bag-ong kahikayan. Hinuon kadaghanan sa mga igsoon dili mapihigon, sama sa atong langitnong Amahan. Gani daghan ang suod nga managhigala bisan unsa pay ilang rasa. Nasinatian kana sa among pamilya samtang ako nagdako sa mga katuigang 1930 ug 1940.

Bag-ong Asaynment

Sa Enero 1969, nakadawat mi ni Gerri ug imbitasyon sa pag-alagad sa Guyana, South America, ug malipayon namo ning gidawat. Miadto una mi sa Brooklyn, New York, diin gibansay ko sa pagdumala sa buluhatong pagsangyaw sa Guyana. Pagka-Hulyo 1969 miabot  mi sa Guyana. Human sa 16 ka tuig sa nagapanawng buluhaton, dakong kausaban para namo nga magpondo sa usa ka lugar. Si Gerri mosangyaw halos kada adlaw ingong misyonaryo, ug ako nagtrabaho sa sangang buhatan.

Lakip sa akong trabaho ang pagpamutol ug sagbot, pagpadalag literatura sa 28 ka kongregasyon, ug pagpadalag sulat sa hedkuwarter sa Brooklyn. Ako motrabahog 14 o 15 oras kada adlaw. Lisod kadto para namo, pero malipayon mi sa among asaynment. Pag-abot namo, 950 pa lang ang magmamantala sa Guyana; karon kapin na sa 2,500.

Ganahan kaayo mi sa klima, mga prutas, ug utanon sa Guyana, pero mas gikalipay namo ang mapainubsanong mga tawo nga gustong mokat-on bahin sa Gingharian sa Diyos. Si Gerri sagad magdumalag 20 ka pagtuon sa Bibliya kada semana, ug daghan sa among Bible study ang nabawtismohan. Ang pipila nahimong payunir, ansiyano, ug nakatungha pa gani sa Gilead aron mahimong misyonaryo.

Mga Problema, Ilabina sa Panglawas

Sa 1983, ang akong ginikanan sa United States nagkinahanglag tabang. Busa nag-estorya mi ni Doris ug Gerri kon unsay buhaton. Si Doris, nga 35 ka tuig nang misyonaryo sa Brazil, miboluntaryo sa pag-atiman nila. Siya miingon, ‘Nganong duha man ka misyonaryo ang moundang nga pwede ra mag usa?’ Pagkamatay sa among ginikanan, si Doris nagpabilin sa Chattanooga ingong espesyal payunir.

Sa 1995, ako nadayagnos nga may prostate cancer ug kinahanglang mouli sa United States. Mipuyo mi sa Goldsboro, North Carolina, aron dili kaayo layo sa akong pamilya sa Tennessee ug sa pamilya ni Gerri sa Pennsylvania. Kontrolado na karon ang akong kanser, ug nag-alagad mi sa usa ka kongregasyon sa Goldsboro ingong infirm nga espesyal payunir.

Sa paghinumdom sa akong kapin sa 65 ka tuig nga bug-os panahong pag-alagad, mapasalamaton kaayo ko nga gipanalanginan ni Jehova ang among kaandam sa paghimog mga kausaban sa pag-alagad kaniya. Tinuod gayod ang giingon ni David bahin kang Jehova: “Sa maunongon ikaw magmaunongon”!​—⁠2 Sam. 22:⁠26.

[Mga hulagway sa panid 3]

Si Papa ug Brader Nichols maoy maayong panig-ingnan kanako

[Mga hulagway sa panid 4]

Si Gerri ug ako nga andam na sa Gilead, 1952

[Mga hulagway sa panid 5]

Human sa Gilead, kami giasayn sa nagapanawng buluhaton sa Habagatan

[Hulagway sa panid 6]

Nagapanawng mga magtatan-aw ug ilang mga asawa una pa ang distritong kombensiyon nga mag-uban ang mga puti ug itom, 1966

[Hulagway sa panid 7]

Makapalipay ang pagmisyonaryo sa Guyana