Maalamong Tambag Bahin sa Pagkatagsaanon ug Kaminyoon
Maalamong Tambag Bahin sa Pagkatagsaanon ug Kaminyoon
“Kini akong ginasulti . . . sa pagpalihok kaninyo ngadto nianang nahiangay ug nianang nagkahulogan ug makanunayong pag-alagad sa Ginoo nga walay pagkalinga.”—1 COR. 7:35.
1, 2. Nganong angayng susihon ang tambag sa Bibliya bahin sa pagkatagsaanon ug kaminyoon?
ANG kalipay, kahigawad, o kabalaka mao ang sagad natong bation sa dihang makiglabot sa kaatbang nga sekso. Busa kita kinahanglang magpagiya sa Diyos. Apan dunay laing mga rason kon nganong magpagiya ta sa Diyos. Pananglitan, ang usa ka Kristohanon nga kontento na sa pagkatagsaanon lagmit mobati nga gipit-os sa iyang pamilya o mga higala sa pagminyo. Ang uban basin gusto nang magminyo apan wala pa makakitag angayng kapikas. Ang managtrato nagkinahanglag giya aron maandam sa mga responsabilidad sa pagkahimong bana o asawa. Ug ang tanang Kristohanon, tagsaanon man o minyo, nag-atubang ug mga tentasyon labot sa imoralidad.
2 Kini nga mga kahimtang makaapektar sa atong kalipay, ilabina sa atong relasyon kang Jehova. Sa 1 Corinto kapitulo 7, si Pablo naghatag ug giya bahin sa pagkatagsaanon ug kaminyoon. Buot niya nga ang iyang mga magbabasa mobuhat kon unsay husto ug padayong moalagad sa Diyos sa bug-os kasingkasing ug dili magpabalda. (1 Cor. 7:35) Samtang imong tagdon ang iyang tambag, susiha ang imong kahimtang—tagsaanon ka man o minyo—aron mas bug-os kang makaalagad kang Jehova.
Usa ka Seryosong Desisyon
3, 4. (a) Unsay mahitabo kon pit-oson sa mga higala ug paryente ang usa sa pagminyo? (b) Sa unsang paagi ang tambag ni Pablo makatabang sa pagbatog balanseng panglantaw sa kaminyoon?
3 Sama sa mga Hudiyo sa unang siglo, importante kaayo sa daghang kultura karon ang pagminyo. Kon ang usa eksakto nag edad apan wala pa maminyo, ang iyang mga higala ug paryente lagmit mabalaka ug mobati nga kinahanglan siyang tambagan. Tingali ilang dasigon siya nga maningkamot sa pagpangitag kapikas. Lagmit duna silay itap-il kaniya. Maniobrahon pa gani nila nga magkauban kining duha. Apan usahay kini moresulta sa kaulawan, kahiubos, ug pagkadaot sa panaghigalaay.
4 Si Pablo wala mag-ingon sa uban nga kinahanglan silang magminyo o magpabiling tagsaanon. (1 Cor. 7:7) Kontento siyang nag-alagad kang Jehova ingong tagsaanon, apan iyang gitahod ang katungod sa uban nga magminyo. Ang matag Kristohanon karon may katungod usab sa pagminyo o sa pagpabiling tagsaanon. Dili sila angayng pit-oson kon unsay gusto nilang himoon.
Malamposon Bisag Tagsaanon
5, 6. Nganong gidasig ni Pablo ang pagkatagsaanon?
5 Ang positibong panglantaw ni Pablo sa pagkatagsaanon dayag diha sa iyang sulat sa mga taga-Corinto. (Basaha ang 1 Corinto 7:8.) Bisag dili minyo, si Pablo wala maghunahuna nga siya labaw sa mga minyo, ingon sa gipakita sa klero sa Kakristiyanohan. Gipasiugda hinuon ni Pablo ang bentaha sa dili-minyong mga ministro sa maayong balita. Unsa kini?
6 Sagad mas sayon sa mga tagsaanon ang pagdawat ug asaynment diha sa pag-alagad kang Jehova kay sa mga minyo. Si Pablo nakapribilehiyo sa pag-alagad ingong “apostol alang sa kanasoran.” (Roma 11:13) Sa Buhat kapitulo 13 hangtod 20, atong mabasa ang mga kasinatian ni Pablo. Siya mipanaw uban sa iyang mga isigkamisyonaryo sa pagsangyaw sa bag-ong mga teritoryo ug sa pagtukod ug bag-ong mga kongregasyon. Siya nakasinatig mga kalisdanan sa ministeryo nga wala masinati sa kadaghanan karon. (2 Cor. 11:23-27, 32, 33) Apan kay daghan ang iyang natabangan nga mahimong tinun-an, siya nagmalipayon bisan pa sa mga kalisdanan. (1 Tes. 1:2-7, 9; 2:19) Mahimo kaha niya kini kon siya minyo pa o may pamilya? Lagmit dili.
7. Paghatag ug pananglitan sa mga tagsaanong nagpahimulos sa ilang kahimtang alang sa Gingharian.
7 Daghang tagsaanon ang nagpahimulos sa ilang kahimtang alang sa Gingharian. Si Sara ug Limbania, dalagang mga payunir sa Bolivia, mibalhin sa usa ka baryo nga wala masangyawi sa daghang katuigan. Problema ba nga way koryente didto? Sila miingon: “Way radyo o TV didto, mao nga ang mga tawo dili mabalda sa ilang pangunang pasatiempo, ang pagbasa.” Gipakita sa pipila ka molupyo ngadto sa mga payunir ang mga basahon sa mga Saksi ni Jehova nga ila gihapong ginabasa apan wala na imprentaha. Kay daghan kaayo ang interesado, dugay nilang nahuman ang teritoryo. Usa ka edarang babaye miingon kanila: “Duol na tingali ang kataposan kay ang mga Saksi ni Jehova nakaabot na kanamo.” Wala madugay ang pipila diha sa baryo nagtambongan na sa mga tigom.
8, 9. (a) Nganong gidasig ni Pablo ang pag-alagad ingong tagsaanon? (b) Unsay mga bentaha sa dili-minyong mga Kristohanon?
8 Siyempre, ang minyong mga Kristohanon mabungahon usab sa pagsangyaw sa lisod nga mga teritoryo. Apan ang pipila ka asaynment nga bukas alang sa tagsaanong mga payunir tingali lisod alang sa mga minyo o may mga anak. Sa pagsulat ni Pablo sa mga kongregasyon, siya nahibalo nga mapauswag pa nila ang ilang pagpakigbahin sa pagsangyaw. Gusto niya nga magmalipayon ang tanan, sama niya. Busa gidasig niya ang pag-alagad kang Jehova ingong tagsaanon.
9 Usa ka dalagang payunir sa Amerika misulat: “Ang uban nagtuo nga dili magmalipayon ang mga dili minyo. Apan akong nakita nga ang dumalayong kalipay nagdepende sa pagpakighigala kang Jehova. Ang pagkatagsaanon, bisag sakripisyo, maoy talagsaong gasa kon imo kining pahimuslan.” Para niya ang pagkatagsaanon dili babag sa kalipay. Kahigayonan kini nga ang usa magmalipayon. Siya mipadayon: “Nahibalo ko nga gimahal ni Jehova ang tanan, tagsaanon man o minyo.” Siya karon malipayong nag-alagad sa dapit nga may dakong panginahanglan sa mga magwawali. Kon ikaw tagsaanon, mapauswag ba nimo ang imong pagpakigbahin sa pagtudlo sa uban sa kamatuoran? Mahimong makita usab nimo nga ang pagkatagsaanon maoy bililhong gasa gikan kang Jehova.
Gusto Nang Magminyo
10, 11. Sa unsang paagi si Jehova motabang niadtong gusto nang magminyo apan wala pa makakitag angayng kapikas?
10 Human sa pagpabiling tagsaanon sulod sa pipila ka panahon, daghang alagad ni Jehova ang gusto nang magminyo. Kay nagkinahanglag giya, sila nangayog tabang kang Jehova aron makakitag angayng kapikas.—Basaha ang 1 Corinto 7:36.
11 Kon gusto kang makaminyog dasig usab nga alagad ni Jehova, iampo kini Kaniya. (Filip. 4:6, 7) Bisag dugay na tingali kang naghulat, ayawg kahigawad. Salig kang Jehova kay siya nahibalo sa imong panginahanglan ug tabangan ka niya sa pagsagubang sa imong situwasyon.—Heb. 13:6.
12. Unsay angay nimong palandongon kon dunay gustong makigminyo nimo?
12 Komosta kon dunay gustong makigminyo nimo nga dili dasig sa pag-alagad o dili magtutuo? Kon mahitabo kini kanimo, hinumdomi nga ang kasakit nga bation tungod sa sayop nga pagpilig kapikas mas grabe pa kay sa kamingaw nga bation sa usa ka tagsaanon. Kon minyo ka na, kamo mag-uban sa tibuok ninyong kinabuhi, sa kalipay ug kasakit. (1 Cor. 7:27) Busa ayaw pagdalidalig desisyon sa pagminyo nga imo rang basolan sa ulahi.—Basaha ang 1 Corinto 7:39.
Pangandami ang Tinuod nga Kahimtang sa Kaminyoon
13-15. Unsang posibleng mga problema sa kaminyoon ang angayng hisgotan samtang managtrato pa?
13 Bisag gidasig ni Pablo ang pag-alagad kang Jehova ingong tagsaanon, wala niya pakamenosa kadtong gustong magminyo. Hinunoa, ang iyang inspiradong tambag nagtabang sa mga magtiayon sa pag-atubang sa mga problema sa kaminyoon ug sa pagpalig-on sa panagtiayon.
14 Kinahanglang usbon sa uban ang ilang panghunahuna bahin sa kaminyoon. Sa managtrato pa, tingali naghunahuna sila nga ang ilang gugma talagsaon kaayo, nga sila magmalipayon kanunay. Sila nagminyo uban niini nga pagbati ug nagtuo nga dili gayod sila makasinatig kagul-anan. Kini nga panghunahuna dili makataronganon. Ang romantikong bahin sa kaminyoon makapalipay, apan dili kana igo aron masulbad ang mga problema sa panagtiayon.—Basaha ang 1 Corinto 7:28. *
15 Daghan sa mga bag-ong minyo ang natingala o nahigawad pa gani sa dihang sila dili magkauyon sa importanteng mga butang. Tingali dili sila magkauyon bahin sa pagbadyet ug sa panahon nga igahin sa kalingawan, kon asa sila mopuyo, ug kon kapila sila moduaw sa ilang mga pamilya. Basig may mga kinaiya sila nga makapalagot sa usag usa. Sa managtrato pa, tingali nagtuo sila nga dili ra kinahanglang estoryahan kining mga butanga, apan kini mahimong problema sa ulahi. Busa mas maayong hisgotan kini sa dili pa magminyo.
16. Nganong ang magtiayon angayng magkauyon sa pag-atubang sa mga problema sa kaminyoon?
16 Aron molampos ug magmalipayon, kinahanglang magkauyon ang magtiayon sa pag-atiman sa ilang mga responsabilidad. Sila angayng magkauyon sa pagdisiplina sa ilang mga anak ug sa pag-atiman sa tigulang nang mga ginikanan. Ang mga problema sa pamilya angayng dili magdaot sa ilang relasyon. Dihang ipadapat ang tambag sa Bibliya, ilang masulbad ang daghang problema, masagubang ang dili pa masulbad, ug sila magpabiling malipayon.—1 Cor. 7:10, 11.
17. Nganong ang mga magtiayon “mabalak-on sa mga butang sa kalibotan”?
17 Si Pablo dugang naghisgot bahin sa kaminyoon diha sa 1 Corinto 7:32-34. (Basaha.) Ang mga minyo “mabalak-on sa mga butang sa kalibotan,” sama sa pagkaon, besti, puy-anan, ug uban pa. Ngano? Sa tagsaanon pa, ang usa ka brader lagmit puliki kaayo sa ministeryo. Apan sa naminyo na, kinahanglan na niyang gahinag panahon ug kusog ang iyang asawa aron maangkon ang iyang pag-uyon. Ingon usab niana ang asawa ngadto sa iyang bana. Si Jehova nakasabot sa maong panginahanglan. Siya nasayod nga aron molampos ang kaminyoon, kinahanglang kunhoran sa magtiayon ang ilang panahon ug kusog nga gigamit sa pag-alagad Kaniya sa tagsaanon pa sila.
18. Unsang kausaban bahin sa paglingawlingaw ang angayng himoon sa dihang minyo na?
18 Apan komosta ang panahon nga igugol sa magtiayon sa paglingawlingaw ug ubang kalihokan? Kon angay nilang kunhoran ang panahon ug kusog sa pag-alagad sa Diyos aron maatiman ang usag usa, ingon usab niana ang ilang himoon sa paglingawlingaw. Unsa kahay bation sa asawa kon ang iyang bana kanunay gihapong makig-uban sa iyang mga higala diha sa esports? O unsa kahay bation sa bana kon ang iyang asawa naggahin gihapog daghang panahon uban sa iyang mga higala? Di madugay sila lagmit mobating nag-inusara, way kalipay, ug wala higugmaa. Malikayan kini kon ang magtiayon maningkamot sa pagpalig-on sa ilang kaminyoon.—Efe. 5:31.
Gibaod ni Jehova ang Moral nga Kahinlo
19, 20. (a) Nganong ang mga minyo wala mahigawas sa tentasyon sa imoralidad? (b) Unsay kapeligrohan kon ang magtiayon nahilayo sa usag usa sa taas nga panahon?
19 Ang mga alagad ni Jehova determinado nga magpabiling hinlo sa moral. Ang uban nagminyo aron makalikay sa imoralidad. Apan ang kaminyoon dili garantiya aron makalikay niini. Sa panahon sa Bibliya, ang kinutaang siyudad makapanalipod lang sa mga tawo kon sila dili mogawas niana. Kon ang usa mogawas, siya posibleng matulis o mapatay sa mga kriminal. Sa susama, ang mga magtiayon mapanalipdan lang batok sa imoralidad kon sila dili molapas sa mga balaod ug limitasyon nga gitakda ni Jehova sa kaminyoon.
20 Gihubit kini ni Pablo diha sa 1 Corinto 7:2-5. Ang seksuwal nga relasyon maoy para lang sa magtiayon. Ang matag usa gidahom nga mohatag sa iyang kapikas sa “nahiangay,” o sa seksuwal nga relasyon nga katungod sa usa ka tawong minyo. Apan ang ubang magtiayon nahilayo sa usag usa sa taas nga panahon tungod sa trabaho o kay nag-iyahayg bakasyon. Busa ilang nahikawan ang matag usa sa “nahiangay.” Hunahunaa ang kadaot nga mahitabo kon tungod sa “kawalay-pagpugong-sa-kaugalingon,” ang usa madaog ni Satanas ug makapanapaw. Si Jehova magpanalangin sa mga ulo sa pamilya nga nagtagana sa ilang panimalay nga wala ipameligro ang ilang kaminyoon.—Sal. 37:25.
Mga Kaayohan sa Pagsunod sa Tambag sa Bibliya
21. (a) Nganong lisod ang paghimog mga desisyon bahin sa pagkatagsaanon ug kaminyoon? (b) Nganong mapuslanon ang tambag sa 1 Corinto kapitulo 7?
21 Lisod ang paghimog mga desisyon bahin sa pagkatagsaanon ug kaminyoon. Magminyo ka man o dili, duna gayoy mga problema kay ang tanan dili hingpit. Ug bisag gipanalanginan ni Jehova ang iyang katawhan, usahay sila mahigawad sa mga butang nga mahitabo kanila. Apan kon imong ipadapat ang maalamong tambag sa 1 Corinto kapitulo 7, mamenosan ang maong mga problema. Tagsaanon man kita o minyo, kita makapahimuot kang Jehova. (Basaha ang 1 Corinto 7:37, 38.) Ang kinadak-ang panalangin sa atong kinabuhi mao ang pagbaton sa pag-uyon sa Diyos. Atong mabatonan ang iyang pag-uyon karon ug sa umaabot sa dihang kita atua na sa bag-ong kalibotan. Didto, ang mga lalaki ug babaye mahigawas na sa mga problema nga komon kaayo karon.
[Footnote]
^ par. 14 Tan-awa ang librong Ang Sekreto sa Kalipay sa Pamilya, kapitulo 2, parapo 16-19.
Makatubag Ka Ba?
• Nganong dili angayng pit-oson ang usa sa pagminyo?
• Sa unsang paagi nimo mapahimuslan ang imong pagkatagsaanon?
• Sa unsang paagi ang managtrato makapangandam sa mga problema sa kaminyoon?
• Nganong ang kaminyoon dili garantiya aron makalikay sa imoralidad?
[Mga Pangutana sa Pagtuon]
[Mga hulagway sa panid 14]
Malipayon ang mga tagsaanon nga naggamit sa ilang panahon sa pagpalapad sa ilang ministeryo
[Hulagway sa panid 16]
Unsang mga kausaban ang angayng himoon sa pipila human maminyo?
