Ang Bag-ong Pinayanong Ingles nga Edisyon

KAMI nalipay sa pagpahibalo nga sugod niining gulaa sa tun-anang edisyon, kami magpatik usab ug pinayanong Ingles nga edisyon sa The Watchtower. Kini sulayan sulod sa usa ka tuig. Kini naundan sa tun-anang mga artikulo ug ubang artikulo. Kami nagtuo nga mas matagan-an niini ang espirituwal nga panginahanglan sa daghang Saksi ni Jehova. Ngano?

Ang Ingles nga pinulongan maoy sagad gamiton sa atong mga igsoon sa ubang nasod sama sa Fiji, Ghana, Kenya, Liberia, Nigeria, Papua New Guinea, ug Solomon Islands. Bisag duna silay lokal nga mga pinulongan, sagad Ingles ang ilang gamiton diha sa mga tigom ug pagsangyaw sa kanataran. Apan, ang ilang Iningles mas simple kay sa gigamit sa atong mga publikasyon. Gawas pa, dunay mga alagad ni Jehova nga namalhin sa mga nasod diin kinahanglan silang mag-Iningles bisag limitado ra ang ilang kahibalo niana. Dugang pa, walay mga tigom sa kongregasyon didto sa ilang pinulongan.

Ang mga artikulo sa Bantayanang Torre nga atong ginatun-an sa tigom matag semana mao ang pangunang paagi aron kita matagan-an sa nunot-sa-panahon nga espirituwal nga pagkaon. Busa aron ang tanan bug-os makabenepisyo, ang pinayanong Ingles nga edisyon naggamit ug daling masabtan nga mga pulong ug simpleng gramarya. Kining bag-o nga edisyon adunay lahi nga hapin. Ang mga sub-ulohan, parapo, repasong pangutana, ug hulagway sa tun-anang mga artikulo susama ra sa regular nga edisyon. Busa, ang tanan makasunod ug makakomento sa Watchtower Study, bisag unsang edisyon ang gamiton. Aron makita ang kalainan sa duha ka edisyon, tan-awa ang pananglitan sa ubos nga gikuha gikan sa parapo 2 sa unang tun-anang artikulo niining gulaa.

Hinaot nga kining bag-ong tagana magtubag niadtong nag-ampo kang Jehova: “Pasabta ako, aron makakat-on ako sa imong kasugoan.” (Sal. 119:73) Masaligon kami nga kadtong limitado rag kahibalo sa Ingles ug ang mga bata nga Iningles ug sinultihan, mas makapangandam alang sa Watchtower Study. Kami mapasalamaton kaayo kang Jehova nga tungod sa iyang “gugma alang sa tibuok kapunongan sa mga igsoon,” iyang gigamit ang “matinumanon ug maalamong ulipon” sa pagtaganag dagayang espirituwal nga pagkaon.—1 Ped. 2:17; Mat. 24:45.

Nagamandong Lawas sa mga Saksi ni Jehova