“Tamdon Ninyo Silang Naghago Taliwala Kaninyo”
“Tamdon Ninyo Silang Naghago Taliwala Kaninyo”
“Tamdon ninyo silang naghago taliwala kaninyo ug nagdumala kaninyo diha sa Ginoo ug nagpahimangno kaninyo.”—1 TES. 5:12.
1, 2. (a) Unsay kahimtang sa kongregasyon sa Tesalonica sa dihang una silang gisulatan ni Pablo? (b) Unsay gidasig ni Pablo kanila?
HANDURAWA nga membro ka sa kongregasyon sa Tesalonica, usa sa mga unang natukod sa Uropa sa unang siglo. Si apostol Pablo migugol ug dakong panahon sa pagdasig sa mga igsoon didto. Lagmit nagtudlo siyag mga ansiyano aron magdumala, sama sa iyang gihimo sa ubang kongregasyon. (Buh. 14:23) Apan human matukod ang kongregasyon, ang mga Hudiyo nagsugnib sa mga manggugubot aron papahawaon si Pablo ug Silas sa siyudad. Ang nahibiling mga Kristohanon tingali mibating giabandonar, nga lagmit nangahadlok pa.
2 Sa pagbiya sa Tesalonica, natural lang nga si Pablo nabalaka sa bag-ong kongregasyon. Misulay siya pagbalik, apan “si Satanas miali” sa iyang dalan. Busa gipadala niya si Timoteo aron palig-onon ang kongregasyon. (1 Tes. 2:18; 3:2) Sa dihang si Timoteo miuli nga nagdalag maayong report, natukmod si Pablo sa pagsulat sa mga taga-Tesalonica. Gidasig sila ni Pablo nga ‘tamdon kadtong nagdumala kanila.’—Basaha ang 1 Tesalonica 5:12, 13.
3. Nganong angayng hatagan sa mga Kristohanon sa Tesalonica ug labawng pagtahod ang mga ansiyano?
3 Ang mga brader nga nagdumala sa mga Kristohanon sa Tesalonica dili sama ka eksperyensiyado kang Pablo ug sa iyang mga kauban sa panaw. Sila bag-ohan pa kon itandi sa mga ansiyano sa Jerusalem. Gani, wala pay usa ka tuig ang kongregasyon! Bisan pa niana, angay nilang pabilhan ang ilang mga ansiyano, kinsa “naghago” ug “nagdumala” sa kongregasyon ug “nagpahimangno” sa mga igsoon. Sa pagkatinuod, angay nilang “hatagan [ang mga ansiyano] ug labaw sa kasagaran nga pagtahod diha sa gugma.” Dayon sila gitambagan ni Pablo nga ‘magmadaiton sa usag usa.’ Kon didto ka pa sa Tesalonica, pabilhan mo ba ang buluhaton sa mga ansiyano? Unsay imong tinamdan bahin sa “mga gasa nga mga lalaki” nga gitagana sa Diyos pinaagi ni Kristo sa inyong kongregasyon?—Efe. 4:8.
“Naghago”
4, 5. Nganong hago alang sa mga ansiyano sa adlaw ni Pablo ang pagtudlo sa kongregasyon, ug nganong mao man usab karon?
4 Sa didto na si Pablo ug Silas sa Berea, sa unsang paagi “naghago” ang mga ansiyano sa Tesalonica? Agig pagsundog kang Pablo, seguradong gitudloan nila ang kongregasyon gamit ang Kasulatan. Tingali maghunahuna ka, ‘Gipabilhan kaha sa mga Kristohanon sa Tesalonica ang Pulong sa Diyos?’ Kay nag-ingon man gud ang Bibliya nga ang mga taga-Berea “mas hamilig-hunahuna kay niadtong sa Tesalonica, . . . nga sa adlaw-adlaw maampingong nagasusi sa Kasulatan.” (Buh. 17:11) Apan ang gitandi mao ang mga Hudiyo sa Tesalonica, dili ang mga Kristohanon. Kadtong nahimong mga magtutuo ‘nagdawat sa Pulong sa Diyos, dili ingong pulong sa tawo, kondili ingong pulong sa Diyos.’ (1 Tes. 2:13) Ang mga ansiyano naghago gayod sa pagpakaon kanila sa espirituwal.
5 Sa atong adlaw, ang matinumanon ug maalamong ulipon nagtagana sa panon sa Diyos sa “pagkaon sa hustong panahon.” (Mat. 24:45) Ang mga igsoon mahimong dunay daghang binase-sa-Bibliya nga basahon, Watch Tower Publications Index ug Watchtower Library sa CD-ROM. Dugang pa, ubos sa pagdumala sa ulipon nga matang, ang mga ansiyano naghago sa pagpakaon sa ilang mga igsoon sa espirituwal. Aron matagan-an ang espirituwal nga panginahanglan sa kongregasyon, sila naggugol ug daghang oras sa pagpangandam sa ilang mga bahin aron ikapresentar kini sa epektibong paagi. Nakahunahuna ka ba kon unsa ka dakong panahon ang gigugol sa mga ansiyano sa pag-andam sa ilang mga bahin sa mga tigom, asembliya, ug kombensiyon?
6, 7. (a) Unsang panig-ingnan ang gipakita ni Pablo sa mga ansiyano sa Tesalonica? (b) Nganong malisdan tingali ang mga ansiyano karon sa pagsundog kang Pablo?
6 Ang mga ansiyano sa Tesalonica nahinumdom sa maayong panig-ingnan ni Pablo sa pag-atiman sa panon. Kadto dili lamang obligasyon o basta pagduaw sa mga igsoon. Sumala sa miaging artikulo, si Pablo “nahimong malumo . . . , sama sa usa ka nagpasusong inahan nga nagpangga sa iyang kaugalingong mga anak.” (Basaha ang 1 Tesalonica 2:7, 8.) Gani siya andam mohatag sa iyang kalag! Ingong magbalantay, ang mga ansiyano angayng mosundog kaniya.
7 Ang mga ansiyano karon nagsundog kang Pablo pinaagi sa pagpangga sa panon. Ang pipila ka igsoon tingali dili kinaiyanhong maluloton ug mahigalaon. Bisan pa niana, ang mga ansiyano maningkamot sa pagsabot kanila ug mangitag maayong kinaiya diha kanila. (Prov. 16:20) Tinuod, kay dili hingpit, dili sayon sa mga ansiyano nga magbaton ug positibong panglantaw sa matag usa. Apan, samtang maningkamot siya sa pagpakitag kalumo sa tanan, angay siyang komendahan sa iyang mga paningkamot nga mahimong maayong magbalantay ubos ni Kristo.
8, 9. Unsa ang pipila ka paagi nga ang mga ansiyano karon ‘nagabantay sa atong mga kalag’?
8 Kitang tanan angayng “magmapinasakopon” sa mga ansiyano. Sama sa gisulat ni Pablo, ‘sila nagabantay sa atong mga kalag.’ (Heb. 13:17) Kana magpahinumdom kanato sa literal nga magbalantay, nga usahay dili matulog aron panalipdan ang iyang panon. Sa susama, mahimong isakripisyo sa mga ansiyano ang ilang pagkatulog aron atimanon kadtong masakiton o may emosyonal o espirituwal nga problema. Pananglitan, ang mga brader nga membro sa Hospital Liaison Committee pukawon aron tabangan kadtong nagsagubang ug medikal nga emerhensiya. Pagkamapasalamaton nato sa ilang tabang sa dihang kita makasinati sa maong kahimtang!
9 Ang mga ansiyano sa mga Regional Building Committee ug relief committee naghago sa pagtabang sa mga igsoon. Takos gayod sila sa atong bug-os nga pagpaluyo! Tagda ang buluhatong panghinabang human mohapak ang Bagyong Nargis sa Myanmar sa 2008. Aron makaabot sa Bothingone Congregation sa rehiyon sa Irrawaddy Delta nga gilampornas sa bagyo, ang grupo nga nagdala sa hinabang mibiyahe agi sa napayhag nga mga dapit diin nagkatag ang mga patay. Pagkakita sa mga igsoon nga ang unang grupo nga miabot sa Bothingone naglakip sa kanhi nilang magtatan-aw sa sirkito, sila mipatugbaw: “Tan-awa! Atong magtatan-aw sa sirkito! Si Jehova nagluwas gayod kanato!” Gipabilhan ba nimo ang paghago sa mga ansiyano adlaw ug gabii? Ang ubang ansiyano gitudlo nga mahimong membro sa espesyal nga mga komite aron husayon ang lisod hudisyal nga mga kaso. Sila dili manghambog sa ilang nahimo; apan mapasalamaton kaayo kadtong nakabenepisyo sa ilang serbisyo.—Mat. 6:2-4.
10. Unsa pay laing buluhaton sa mga ansiyano nga wala mahibaloi sa uban?
10 Daghang ansiyano usab karon ang nag-atiman sa mga report ug eskedyul. Pananglitan, ang koordinetor sa lawas sa mga ansiyano mag-andam sa eskedyul alang sa senemanang mga tigom. Ang sekretaryo magrekord sa binulan ug tinuig nga mga taho sa kanataran. Ang magtatan-aw sa tunghaan maampingong maghikay sa eskedyul sa tunghaan. Kada tulo ka bulan, iawdit ang kuwenta sa kongregasyon. Basahon sa mga ansiyano ang mga sulat gikan sa sangang buhatan ug sundon ang instruksiyon nga makatabang sa paghupot sa “pagkausa sa pagtuo.” (Efe. 4:3, 13) Pinaagi sa pagpaningkamot sa kugihang mga ansiyano, ang ‘tanang butang may kahapsay ug gihimo pinaagig kahikayan.’—1 Cor. 14:40.
“Nagdumala Kaninyo”
11, 12. Kinsa ang nagdumala sa kongregasyon, ug unsay nalangkit niana?
11 Si Pablo naghubit sa kugihang mga ansiyano sa Tesalonica ingong “nagdumala” sa kongregasyon. Ang orihinal nga pulong nagpasabot nga “pagbarog sa atubangan” ug mahimong hubaron nga “nagatultol; nagapanguna.” (1 Tes. 5:12; potnot sa New World Translation of the Holy Scriptures—With References.) Si Pablo miingon usab nga ang maong mga ansiyano “naghago.” Siya wala magtumong sa usa ka “nagadumalang magtatan-aw” kondili sa tanang ansiyano sa kongregasyon. Sa atong adlaw, ang kadaghanang ansiyano mobarog atubangan sa kongregasyon ug modumala sa mga tigom. Ang bag-ong termino nga “koordinetor sa lawas sa mga ansiyano” makatabang kanato sa pag-isip nga ang tanang ansiyano membro sa nahiusang lawas.
12 Ang ‘pagdumala’ sa kongregasyon wala lamang maglangkit sa pagtudlo. Kana nga ekspresyon gigamit usab sa 1 Timoteo 3:4. Si Pablo miingon nga ang magtatan-aw angay nga “usa ka tawo nga nagdumala sa iyang kaugalingong panimalay sa maayong paagi, nga may mga anak nga nagpasakop uban ang bug-os nga kaugdang.” Ang ekspresyong “nagdumala” dayag nga naglakip dili lamang sa pagtudlo sa iyang mga anak kondili sa pagpanguna usab sa iyang pamilya ug nga siya “may mga anak nga nagpasakop.” Oo, ang mga ansiyano ang manguna sa kongregasyon, nga magtabang sa tanan nga magpasakop kang Jehova.—1 Tim. 3:5.
13. Sa dihang magmiting ang mga ansiyano, nganong nagkinahanglan tingali silag panahon una mohimog desisyon?
13 Aron madumala pag-ayo ang panon, hisgotan sa mga ansiyano kon sa unsang paagi itagana ang panginahanglan sa kongregasyon. Tingali mas dali kon usa lang ka ansiyano ang mohimo sa tanang desisyon. Apan, agig pagsundog sa panig-ingnan sa nagamandong lawas sa unang siglo, ang mga lawas sa mga ansiyano karon maghisgot nga way-pagpanuko sa mga butang maylabot sa kongregasyon, nga magpagiya sa Kasulatan. Ang ilang tumong mao ang pagpadapat sa mga prinsipyo sa Kasulatan ngadto sa panginahanglan sa kongregasyon. Molampos gayod kini kon ang matag ansiyano mangandam alang sa ilang mga miting, nga tun-an ang Kasulatan ug mga instruksiyon gikan sa matinumanon ug maalamong ulipon. Siyempre, nagkinahanglan kinig panahon. Kon magkalahi ang opinyon, sama sa nahitabo sa nagamandong lawas sa unang siglo maylabot sa isyu sa pagtuli, lagmit gikinahanglan ang dugang panahon ug pagpanukiduki sa Kasulatan aron sila magkauyon.—Buh. 15:2, 6, 7, 12-14, 28.
14. Gipabilhan mo ba ang nagkahiusang lawas sa mga ansiyano? Ngano?
14 Unsa kahay mahitabo kon ang usa ka ansiyano moinsistir sa iyang opinyon? O komosta kon adunay—sama kang Diotrefes sa unang siglo—magpahinabog pagkabahinbahin? (3 Juan 9, 10) Seguradong mag-antos ang tibuok kongregasyon. Kon si Satanas naningkamot sa pagbungkag sa kongregasyon sa unang siglo, tino nga gusto sab niya kanang buhaton karon. Mahimong pahimuslan niya ang hakog nga mga kiling sa tawo, sama sa tinguha nga mahimong dungganon. Busa, kinahanglang ugmaron sa mga ansiyano ang pagkamapainubsanon ug magtinabangay ingong usa ka lawas. Pagkadalayegon sa maong mga ansiyano!
“Nagpahimangno Kaninyo”
15. Unsay motibo sa mga ansiyano sa dihang magpahimangno sa usa ka igsoon?
15 Sunod, gipasiugda ni Pablo ang lisod apan hinungdanong buluhaton sa mga ansiyano: ang pagpahimangno sa panon. Sa Kristohanon Gregong Kasulatan, si Pablo lamang ang migamit sa Gregong pulong nga gihubad ug “nagpahimangno.” Kini mahimong magtumong sa bug-at nga tambag apan dili pagpangasaba. (Buh. 20:31; 2 Tes. 3:15) Pananglitan, si Pablo misulat sa mga taga-Corinto: “Ako nagsulat niining mga butanga, dili sa pagpakaulaw kaninyo, kondili sa pagpahimangno kaninyo ingong hinigugma ko nga mga anak.” (1 Cor. 4:14) Ang iyang motibo sa pagpahimangno mao ang mahigugmaong kabalaka sa uban.
16. Unsay hinumdoman sa mga ansiyano sa dihang magpahimangno sa uban?
16 Angayng hinumdoman sa mga ansiyano nga importante ang paagi sa paghatag ug pahimangno. Sila maningkamot sa pagsundog kang Pablo pinaagi sa pagkahimong maluloton, mahigugmaon, ug matinabangon. (Basaha ang 1 Tesalonica 2:11, 12.) Siyempre, ang mga ansiyano ‘hugot nga mangupot sa kasaligang pulong aron sila makatambag pinaagi sa makapahimsog nga pagtulon-an.’—Tito 1:5-9.
17, 18. Unsay angay nimong hinumdoman sa dihang tambagan kag ansiyano?
17 Siyempre ang mga ansiyano dili-hingpit ug makabungat ug mga pulong nga basolan nila sa ulahi. (1 Hari 8:46; Sant. 3:8) Nahibalo sab ang mga ansiyano nga kon sila magpahimangno, ang mga igsoon sagad dili ‘malipay, hinunoa maguol.’ (Heb. 12:11) Busa sa dihang may tambagan ang usa ka ansiyano, lagmit siya namalandong ug nag-ampo na bahin niini. Kon ikaw ang gitambagan, pabilhan ba nimo ang iyang mahigugmaong kabalaka?
18 Ibutang ta nga ikaw may sakit nga lisod maila. Dayon may usa ka doktor nga hustong nakadayagnos sa imong sakit, apan nalisdan ka sa pagdawat niana. Masuko ka ba niya? Dili! Bisan pag morekomendar siyag operasyon, lagmit mosugot ka kay kana makaayo nimo. Tingali nahiubos ka sa paagi sa pagpakigsulti sa doktor kanimo, apan angay bang maapektohan niana ang imong desisyon? Dili. Sa susama, ang paagi sa pagtambag dili angayng himoong rason nga dili ka na mamati niadtong gigamit ni Jehova ug ni Jesus sa pagtabang kanimo nga mapanalipdan ang imong relasyon kang Jehova.
Pabilhi ang mga Ansiyano nga Gitagana ni Jehova
19, 20. Sa unsang paagi nimo ikapakita ang imong pagpabili sa “mga gasa nga mga lalaki”?
19 Unsay imong buhaton kon makadawat kag espesyal nga regalo? Pabilhan mo ba kana pinaagi sa paggamit niana? Ang “mga gasa nga mga lalaki” mao ang gitagana ni Jehova kanimo pinaagi ni Jesu-Kristo. Imong ikapakita ang imong pagpabili niini nga mga gasa pinaagi sa pagpamati pag-ayo sa pakigpulong sa mga ansiyano ug sa pagpadapat sa mga punto nga gipasiugda. Makapakita ka usab ug pagpabili pinaagi sa paghatag ug makapadasig nga mga komento panahon sa tigom. Suportahi ang mga buluhaton nga gipangunhan sa mga ansiyano, sama sa pagsangyaw. Kon nakabenepisyo ka sa tambag sa usa ka ansiyano, dili ba nimo siya pasalamatan? Gawas pa, mahimo sab nimong pasalamatan ang mga pamilya sa mga ansiyano. Hinumdomi, ang paghago sa usa ka ansiyano nagpasabot nga gisakripisyo sa iyang pamilya ang panahon nga sila unta magkauban.
20 Oo, angay gayod natong pabilhan ang mga ansiyano nga naghago, nagdumala, ug nagpahimangno kanato. Kining “mga gasa nga mga lalaki” usa gayod ka mahigugmaong tagana gikan ni Jehova!
Nahinumdom Ka Ba?
• Nganong angayng pabilhan sa mga Kristohanon sa Tesalonica kadtong nagapanguna kanila?
• Sa unsang paagi naghago ang mga ansiyano alang kaninyo?
• Sa unsang paagi makabenepisyo ka sa pagdumala sa mga ansiyano?
• Kon pahimangnoan ka sa usa ka ansiyano, unsay angay nimong hinumdoman?
[Mga Pangutana sa Pagtuon]
[Hulagway sa panid 27]
Gipabilhan mo ba ang pag-atiman sa mga ansiyano sa kongregasyon?
