Seryosoha ang Pag-alagad Kang Jehova
Seryosoha ang Pag-alagad Kang Jehova
“Bisan unsang butang nga maugdang, . . . magpadayon sa pagpalandong niining mga butanga.”—FILIP. 4:8.
1, 2. Nganong giuna sa daghan karon ang kalingawan, ug unsang mga pangutana ang motungha?
KITA nagkinabuhi sa usa sa labing lisod nga mga yugto sa kasaysayan. Para sa mga tawong wala mag-alagad kang Jehova, lisod kaayo ang pagsagubang niining “makuyaw nga mga panahon.” (2 Tim. 3:1-5) Sila nagsalig lang sa ilang kaugalingong katakos sa pagsulbad sa mga problema—ug sagad dili bug-os makasulbad niana. Daghan ang kanunay nga mangitag bag-ong matang sa kalingawan aron malimtan ang ilang kagul-anan.
2 Aron masagubang ang kapit-os sa kinabuhi, sagad unahon sa mga tawo ang kalingawan. Kon dili magbantay, ang mga Kristohanon daling makasundog sa maong pagkinabuhi. Sa unsang paagi malikayan kana? Angay bang likayan nato ang tanang kalingawan? Sa unsang paagi nato mabalanse ang kalingawan ug mga responsabilidad? Unsang mga prinsipyo sa Kasulatan ang angayng maggiya kanato aron dili kita mahimong sobra kaseryoso sa kinabuhi?
Pagkaseryoso Diha sa Kalibotan nga Hilig ug Kalingawan
3, 4. Sa unsang paagi gipakita sa Kasulatan nga kinahanglan kitang magseryoso?
3 Dayag nga gipabilhan pag-ayo niining kalibotana ang ‘gugma sa kalipayan.’ (2 Tim. 3:4) Ang pagpasiugda niini sa paglipaylipay mahimong makapameligro sa atong espirituwalidad. (Prov. 21:17) Busa, may katarongan nga ang mga sulat ni apostol Pablo kang Timoteo ug Tito naglakip ug tambag bahin sa pagkaugdang o pagkaseryoso. Ang pagpadapat niana makapanalipod kanato batok sa dili-seryosong tinamdan sa kalibotan bahin sa kinabuhi.—Basaha ang 1 Timoteo 2:1, 2; Tito 2:2-8.
4 Kasiglohan kanhi, si Solomon misulat nga mas maayo ang pagpamalandong sa seryosong mga butang kay sa kanunayng paghunahuna sa kalingawan. (Eccl. 3:4; 7:2-4) Sa pagkatinuod, tungod sa kamubo sa kinabuhi, kinahanglan kitang ‘manlimbasog’ aron maluwas. (Luc. 13:24) Busa, kinahanglang pamalandongon nato ang tanang butang nga “maugdang.” (Filip. 4:8, 9) Kana nagpasabot nga tagdon nato pag-ayo ang tanang butang nga nalangkit sa pagka-Kristohanon.
5. Unsa ang usa ka bahin sa kinabuhi nga angay natong seryosohon?
5 Pananglitan, sa pagsundog kang Jehova ug kang Jesus, ang mga Kristohanon kinahanglang seryoso sa ilang responsabilidad nga magmakugihon. (Juan 5:17) Ingong resulta, sila sagad gidayeg sa ilang kakugihan ug pagkakasaligan. Ang mga ulo sa pamilya ilabinang magmakugihon aron masuportahan ang pamilya. Gani, ang dili pagtagana sa materyal nga panginahanglan sa pamilya sama ra nga ilang “gisalikway si Jehova”!—1 Tim. 5:8, potnot sa New World Translation of the Holy Scriptures—With References.
Seryoso Apan Malipayon nga Tinamdan sa Atong Pagsimba
6. Nganong angay natong seryosohon ang atong pagsimba kang Jehova?
6 Hinungdanon kang Jehova nga siya simbahon sa hustong paagi. Ingong pananglitan, ilalom sa Moisesnong Balaod, ang mga Israelinhon nakaagom ug mapait nga sangpotanan sa dihang sila mitalikod kang Jehova. (Jos. 23:12, 13) Sa unang siglo K.P., ang mga sumusunod ni Kristo kinahanglang makigbisog aron ang matuod nga pagsimba dili mahugawan sa bakak nga mga pagtulon-an ug tinamdan. (2 Juan 7-11; Pin. 2:14-16) Karon, ang matuod nga mga Kristohanon nagbaton ug seryosong tinamdan sa ilang pagsimba.—1 Tim. 6:20.
7. Sa unsang paagi si Pablo nangandam sa iyang ministeryo?
7 Ang atong ministeryo sa kanataran maoy usa ka tinubdan sa kalipay. Apan, aron padayon kitang magmalipayon, kinahanglan kitang mamalandong niini ug abanteng mangandam. Si Pablo misaysay nga siya nagmahunahunaon sa mga tawo nga iyang gitudloan. Siya misulat: “Ako nahimong tanang butang ngadto sa tanang matang sa katawhan, aron maluwas ko sa bisan unsa mang paagi ang pipila. Apan gihimo ko ang tanang butang tungod sa maayong balita, aron ako mahimong mag-aambit niini sa uban.” (1 Cor. 9:22, 23) Nagmalipayon si Pablo sa pagtabang sa mga tawo sa espirituwal nga paagi, ug siya namalandong kon unsaon pagpahaom ang iyang mensahe sa iyang mamiminaw. Busa, siya nakadasig kanila sa pagsimba kang Jehova.
8. (a) Unsay angay natong tinamdan sa mga tawo nga atong gitudloan? (b) Sa unsang paagi ang pagdumalag pagtuon sa Bibliya makaamot sa kalipay sa ministeryo?
8 Unsa ka seryoso si Pablo sa iyang ministeryo? Siya andam “magpaulipon” kang Jehova ug sa tanan nga maminaw sa mensahe sa kamatuoran. (Roma 12:11; 1 Cor. 9:19) Pagkadawat nato sa responsabilidad sa pagtudlo sa mga tawo sa Pulong sa Diyos—sa pagdumalag pagtuon sa Bibliya, Kristohanong panagkatigom, o Pamilyahanong Pagsimba—nagmahunahunaon ba kita sa atong responsabilidad niadtong atong gitudloan? Tingali atong gibati nga bug-at ra kaayo ang pagdumalag regular nga pagtuon sa Bibliya. Sagad nga kinahanglang kuhaan natog panahon ang personal nga kalihokan aron makatabang sa uban. Dili ba kana nahiuyon sa giingon ni Jesus nga “adunay labaw nga kalipay sa paghatag kay sa pagdawat”? (Buh. 20:35) Walay laing buluhaton ang makahatag kanatog dakong kalipay kay sa atong pagtudlo sa uban sa dalan sa kaluwasan.
9, 10. (a) Ang pagkaseryoso nagpasabot ba nga dili na kita makarelaks ug makalingawlingaw? Ipatin-aw. (b) Unsay makatabang sa usa ka ansiyano aron siya mahimong makapalig-on ug daling duolon?
9 Ang pagkaseryoso wala magpasabot nga dili na kita makarelaks ug makalingawlingaw. Si Jesus maoy hingpit nga panig-ingnan bahin sa paggahig panahon dili lamang sa pagtudlo kondili sa pagrelaks usab ug sa pagpakigsuod sa uban. (Luc. 5:27-29; Juan 12:1, 2) Ang pagkaseryoso wala usab magpasabot nga ang atong dagway kanunayng seryoso. Kon si Jesus sobra pa ka seryoso, ang mga tawo dili gayod ganahang moduol niya. Apan, bisan gani ang mga bata gustong makig-uban kaniya. (Mar. 10:13-16) Sa unsang paagi nato masundog ang balanseng tinamdan ni Jesus?
10 Ang usa ka brader miingon bahin sa usa ka ansiyano, “Taas siyag sukdanan alang sa iyang kaugalingon pero wala siya magdahom ug kahingpitan sa uban.” Ingon ka ba niana? Magmakataronganon sa imong mga pagdahom sa uban. Pananglitan, ang mga anak andam mosunod sa dihang ang mga ginikanan magtakdag makataronganong mga tumong ug motabang kanila sa pagkab-ot niana. Sa susama, ang mga ansiyano makadasig sa mga membro sa kongregasyon nga mouswag sa ilang espirituwalidad ug mohatag kanilag tinong mga sugyot bahin niana. Dugang pa, kon ang usa ka ansiyano adunay balanseng tinamdan sa kaugalingon, siya makapalig-on ug daling duolon. (Roma 12:3) Ang usa ka sister miingon: “Dili ko gusto sa usa ka ansiyano nga dili seryoso. Pero kon siya seryoso sab kanunay, lisod siya nga duolon.” Ang lain miingon nga ang pipila ka ansiyano “katahaan kaayo kay sobra ka seryoso.” Dili gayod gusto sa mga ansiyano nga ilang makunhoran ang kalipay sa tanang magsisimba ni Jehova, ang “malipayong Diyos.”—1 Tim. 1:11.
Pagbaton ug Responsabilidad Diha sa Kongregasyon
11. Unsay ipasabot sa ‘pagpangab-ot’ diha sa kongregasyon?
11 Sa dihang gidasig ni Pablo ang mga lalaki sa kongregasyon sa pagkab-ot ug mas dakong responsabilidad, ang iyang tuyo dili mao ang pagtagbaw sa ilang personal nga ambisyon. Hinunoa, siya misulat: “Kon adunay magapangab-ot sa katungdanan sa pagkamagtatan-aw, siya matinguhaon sa usa ka maayong buhat.” (1 Tim. 3:1, 4) Ang ‘pagpangab-ot’ nagpasabot nga ang mga igsoong lalaki kinahanglang maningkamot sa pagbaton ug espirituwal nga mga hiyas aron makaalagad sa ilang mga igsoon. Kon ang usa ka brader bawtismado na sa labing menos usa ka tuig ug nakakab-ot na sa mga kuwalipikasyon alang sa ministeryal nga alagad diha sa 1 Timoteo 3:8-13, siya ikarekomendar sa maong katungdanan. Matikdi nga ang bersikulo 8 nag-ingon: “Ang ministeryal nga mga alagad angay nga magmaugdang [seryoso].”
12, 13. Sa unsang mga paagi ang batan-ong mga brader makapangab-ot ug responsabilidad?
12 Ikaw ba seryoso nga bawtismadong brader nga hapit nang mag-20 anyos? Adunay daghang paagi nga ikaw makapangab-ot. Ang usa mao ang pagpauswag sa imong ministeryo sa kanataran. Makigpartner ka ba sa mga igsoon nga lainlaig edad diha sa pagsangyaw? Naningkamot ka bang makabaton ug pagtuon sa Bibliya? Kon imong sundon ang mga sugyot bahin sa pagdumalag pagtuon sa Bibliya, mouswag ang imong katakos sa pagtudlo. Dugang pa, makakat-on ka sa pagpakitag empatiya sa usa nga nagtuon sa mga dalan ni Jehova. Sa dihang masabtan sa imong ginatun-an nga kinahanglan siyang mohimog kausaban, makakat-on ka nga magmapailobon ug magmataktikanhon sa pagtabang kaniya sa pagpadapat sa mga prinsipyo sa Bibliya.
13 Kamong batan-ong mga brader, magmaandam sa pagtabang sa mga edaran sa kongregasyon. Makapakita usab kamog interes sa hitsura sa Kingdom Hall pinaagi sa pagtabang nga mahuptan kining hinlo ug hapsay. Ang imong pagtabang magpamatuod nga ikaw seryoso sa imong ministeryo. Sama kang Timoteo, makakat-on ka sa pag-atiman sa panginahanglan sa kongregasyon.—Basaha ang Filipos 2:19-22.
14. Sa unsang paagi ang batan-ong mga brader ‘masulayan kon angayan ba’ nga mag-alagad sa kongregasyon?
14 Mga ansiyano, magmahunahunaon sa batan-ong mga brader nga naningkamot sa ‘pagkalagiw gikan sa mga tinguha nga iya sa pagkabatan-on ug nagtinguha sa pagkamatarong, pagtuo, gugma, pakigdait,’ ug ubang maayong hiyas. (2 Tim. 2:22) Pinaagi sa paghatag kanilag mga buluhaton sa kongregasyon, sila ‘masulayan kon angayan ba’ nga moabaga ug responsabilidad, aron ang ilang “pag-uswag madayag sa tanan nga mga tawo.”—1 Tim. 3:10; 4:15.
Pagpakitag Kaseryoso Diha sa Kongregasyon ug sa Pamilya
15. Sumala sa 1 Timoteo 5:1, 2, sa unsang paagi nato ikapakita nga kita may seryosong tinamdan sa uban?
15 Ang pagkaseryoso naglakip sa paghatag ug dignidad sa atong mga igsoon. Si Pablo nagtambag kang Timoteo nga kinahanglang tahoron ang uban. (Basaha ang 1 Timoteo 5:1, 2.) Kini ilabinang hinungdanon sa dihang makiglabot sa kaatbang nga sekso. Ang panig-ingnan ni Job sa pagpakitag pagtahod sa mga babaye, ilabina sa iyang asawa, takos nga sundogon. Naningkamot siya nga dili motan-aw nga maibogon sa laing babaye. (Job 31:1) Kon kita may seryosong tinamdan sa atong mga igsoon, dili kita mobirigbirig o molihok nga mobati silag kahilas. Ang paghatag ug dignidad ilabinang hinungdanon sa managtrato. Ang usa ka seryosong Kristohanon dili gayod magtiawtiaw sa emosyon sa kaatbang nga sekso.—Prov. 12:22.
16. Itandi ang tinamdan sa pipila sa kalibotan bahin sa papel sa bana ug amahan ug sa kon unsay giingon sa Bibliya.
16 Kinahanglan sab natong seryosohon ang atong papel diha sa pamilya. Ang kalibotan ni Satanas nagbiaybiay sa papel sa bana ug amahan. Ang ulo sa pamilya gihimong kataw-anan ug gibugalbugalan diha sa mga salida sa TV ug sine, ug ubang kalingawan. Apan, ang Kasulatan naghatag ug dakong responsabilidad sa bana, nga nagtudlo kaniya ingong “ulo sa iyang asawa.”—Efe. 5:23; 1 Cor. 11:3.
17. Ipatin-aw kon sa unsang paagi ang atong pagpakigbahin sa pamilyahanong pagsimba magpakita nga kita seryoso sa atong mga responsabilidad.
17 Ang usa ka bana tingali nagtagana sa materyal nga panginahanglan sa iyang pamilya. Apan kon dili siya magtagana ug espirituwal nga giya, kana nagpakita nga kulang siyag pagsabot ug kaalam. (Deut. 6:6, 7) Busa, ang 1 Timoteo 3:4 nag-ingon nga kon ikaw ulo sa pamilya ug nagapangab-ot ug dugang pribilehiyo sa kongregasyon, kinahanglang ikaw ‘nagdumala sa imong kaugalingong panimalay sa maayong paagi, nga may mga anak nga nagpasakop uban ang bug-os nga kaugdang.’ Bahin niini, pangutan-a ang kaugalingon, ‘Regular ba kong nagdumala sa among pamilyahanong pagsimba?’ Ang ubang asawa magpakiluoy pa sa ilang bana sa pagpanguna kanila sa espirituwal nga kalihokan. Angay nga seryosong susihon sa bana ang iyang tinamdan sa maong responsabilidad. Siyempre, ang Kristohanong asawa angayng mosuportar sa kahikayan sa Pamilyahanong Pagsimba ug mokooperar sa iyang bana aron molampos kini.
18. Sa unsang paagi ang mga bata makakat-on nga magseryoso?
18 Ang mga bata gidasig usab nga magseryoso o magmahunahunaon sa mas importanteng mga butang. (Eccl. 12:1) Maayo nga makakat-on sila sa pagkugi, nga hatagan ug mga trabaho sa balay nga angay sa ilang edad ug katakos. (Lam. 3:27) Sa bata pa si Haring David, siya nahimong maayong magbalantay sa karnero. Siya nakakat-on usab sa pagpanugtog ug pagkomposog awit—mga kahanas nga tungod niana siya nakaalagad sa hari sa Israel. (1 Sam. 16:11, 12, 18-21) Sa binatilyo pa si David, segurado nga tigdula siya, apan nakakat-on sab siya ug mapuslanong mga kahanas nga iyang gigamit sa ulahi sa pagdayeg kang Jehova. Ang iyang pagkamagbalantay nakatabang kaniya nga magmapailobon sa pagpanguna sa nasod sa Israel. Mga batan-on, unsang mga kahanas ang inyong ginatun-an nga makatabang kaninyo sa pag-alagad sa inyong Maglalalang ug mag-andam kaninyo sa umaabot nga mga responsabilidad?
Pagbaton ug Balanseng Tinamdan
19, 20. Unsang balanseng tinamdan sa imong kaugalingon ug sa imong pagsimba ang determinado nimong huptan?
19 Kitang tanan makapanlimbasog sa pagbatog balanseng tinamdan sa kaugalingon—nga dili mahimong sobra ka seryoso. Dili nato buot nga ‘magpalabi sa pagkamatarong.’ (Eccl. 7:16) Ang diyutayng pasiaw makahanaw sa tensiyon, diha man sa balay, trabahoan, o sa dihang makiglabot sa mga igsoon. Ang mga membro sa pamilya magbantay nga dili mahimong sobra ka hinawayon aron mahuptan ang kalinaw sa panimalay. Sa kongregasyon, ang tanan makakat-on sa malipayong panag-ubanay, nga himoong makapalig-on ug makapadasig ang atong panag-estoryahay.—2 Cor. 13:10; Efe. 4:29.
20 Kita nagkinabuhi sa kalibotan nga wala magpabili kang Jehova o sa iyang mga balaod. Sa kasukwahi, ang katawhan ni Jehova nag-isip nga hinungdanon kaayo ang ilang pagkamasinugtanon ug pagkamaunongon ngadto sa Diyos. Pagkamapasalamaton nato nga kita bahin sa dakong kapunongan sa katawhan nga nagsimba kang Jehova “uban ang bug-os nga kaugdang”! Hinaot magmadeterminado kita nga mahuptan ang seryosong tinamdan sa atong kinabuhi ug pagsimba.
Unsay Imong Tubag?
• Nganong angay natong panalipdan ang atong kaugalingon batok sa dili-seryosong tinamdan sa kalibotan bahin sa kinabuhi?
• Sa unsang paagi kita magmalipayon apan seryoso sa atong ministeryo?
• Sa unsang paagi ang atong tinamdan bahin sa pagdawat ug responsabilidad magpakita kon kita seryoso ba o dili?
• Ipatin-aw kon nganong seryoso ang paghatag ug dignidad sa mga igsoon sa kongregasyon ug sa mga membro sa pamilya.
[Mga Pangutana sa Pagtuon]
[Mga hulagway sa panid 12]
Ang bana kinahanglang magtagana sa materyal ug espirituwal nga panginahanglan sa iyang pamilya
