Mga Pangutana Gikan sa mga Magbabasa

Nganong nasuko si Moises sa mga anak lalaki ni Aaron nga si Eleasar ug Itamar human mamatay ang ilang mga igsoon nga si Nadab ug Abihu, ug sa unsang paagi napuypoy ang iyang kasuko?—Lev. 10:16-20.

Sa bag-o pang gibutang sa katungdanan ang mga saserdote sa tabernakulo, gilaglag ni Jehova ang mga anak ni Aaron nga si Nadab ug Abihu kay sila naghalad ug gidiling kalayo. (Lev. 10:1, 2) Si Moises nagsugo sa nahibiling mga anak ni Aaron nga dili magbangotan sa ilang namatayng mga igsoon. Sa wala madugay, si Moises nasuko kang Eleasar ug Itamar tungod kay wala sila mokaon sa kanding nga halad-sa-sala. (Lev. 9:3) Nganong ingon niana ang reaksiyon ni Moises?

Ang balaod nga gihatag ni Jehova kang Moises espesipikong nagsugo nga ang saserdote nga motanyag sa halad-sa-sala kinahanglang mokaon sa usa ka bahin niana diha sa sawang sa tolda nga tagboanan. Ang pagkaon niana giisip nga pagpanubag sa sala niadtong mihimog halad. Apan, kon ang dugo sa halad dad-on ngadto sa Balaang Dapit, ang unang lawak sa sangtuwaryo, ang halad dili pagakan-on. Hinunoa, kini pagasunogon.—Lev. 6:24-26, 30.

Mopatim-aw nga human sa pagkalaglag ni Nadab ug Abihu, gisusi ni Moises kon gisunod ba sa mga saserdote ang tanang sugo ni Jehova. Sa dihang iyang nadiskobrehan nga gisunog ang kanding nga halad-sa-sala, siya nasuko kang Eleasar ug Itamar ug nangutana kon nganong wala nila kini kan-a sumala sa sugo, sanglit ang dugo niini wala itanyag kang Jehova diha sa Balaang Dapit.—Lev. 10:17, 18.

Si Aaron ang mitubag sa pangutana ni Moises kay mopatim-aw nga iyang giuyonan ang gihimo sa nahibiling mga saserdote. Tungod sa pagkamatay sa iyang duha ka anak, si Aaron lagmit naghunahuna nga basin walay usa sa mga saserdote ang takos mokaon sa halad-sa-sala nianang adlawa. Tingali iyang gibati nga ang ilang pagkaon niana dili makapahimuot kang Jehova, bisan pag wala silay labot sa sala nga nahimo ni Nadab ug Abihu.—Lev. 10:19.

Si Aaron lagmit nangatarongan nga sa adlaw nga ang mga membro sa iyang pamilya unang nagtuman sa ilang papel ingong saserdote, angay silang mag-amping pag-ayo bisan sa kinagamyang detalye aron mahimuot ang Diyos. Bisan pa niana, ang ngalan ni Jehova gipasipalahan ni Nadab ug Abihu, ug ang kapungot sa Diyos misilaob batok kanila. Busa, si Aaron lagmit naghunahuna nga ang nahibiling membro sa saserdotehanong pamilya, diin nakaplagan ang maong sala, dili angayng mokaon sa balaang halad.

Mopatim-aw nga gidawat ni Moises ang tubag sa iyang igsoon, kay ang teksto mihinapos: “Sa nadunggan kadto ni Moises, kadto nakapahimuot sa iyang mga mata.” (Lev. 10:20) Dayag nga gidawat usab ni Jehova ang tubag ni Aaron.