“Ang Pagsunod Mas Maayo pa Kay sa Halad”

SI Saul ang unang hari sa Israel. Bisag ang matuod nga Diyos maoy nagpili kang Saul, siya nahimong masinupakon.

Unsang mga sala ang nahimo ni Saul? Malikayan ba unta niya kadto? Unsay atong makat-onan sa iyang kinabuhi?

Gipaila ni Jehova ang Iyang Gipiling Hari

Sa wala pa mahimong hari si Saul, si propeta Samuel mao ang hawas sa Diyos sa Israel. Si Samuel tigulang na, ug ang iyang mga anak lalaki wala na magmatinumanon. Ang Israel gihulga usab niadto sa mga kaaway niini. Sa dihang ang mga ansiyano sa Israel mihangyo kang Samuel sa pagtudlog hari aron maghukom ug mangulo kanila sa panggubatan, gisugo ni Jehova ang propeta sa pagdihog kang Saul ingong pangulo ug siya miingon: “Iyang luwason ang akong katawhan gikan sa kamot sa mga Filistehanon.”—1 Sam. 8:4-7, 20; 9:16.

Si Saul “batan-on ug ambongan.” Gawas nga ambongan, siya may maayong mga kinaiya usab. Siya mapainubsanon. Pananglitan, si Saul nangutana kang Samuel: “Dili ba ako usa ka Benjaminhon nga kinagamyan sa mga tribo sa Israel, ug ang akong banay mao ang labing ubos sa tanang banay sa tribo sa Benjamin? Busa nganong gisultihan mo ako sa ingon niining butanga?” Si Saul wala maghunahuna nga siya ug ang iyang pamilya labaw kay sa uban, bisag ang iyang amahan nga si Kis “gamhanan tungod sa bahandi.”—1 Sam. 9:1, 2, 21.

Tagda usab ang reaksiyon ni Saul sa dihang si Samuel nagpahibalo kon kinsay gipili ni Jehova nga hari sa Israel. Si Samuel nagdihog una kang Saul sa pribado ug miingon kaniya: “Buhata ang tanan nga mahimong buhaton sa imong kamot, tungod kay ang matuod nga Diyos magauban kanimo.” Human niadto, gitigom sa propeta ang katawhan aron ipahibalo ang hari nga gipili ni Jehova. Apan sa dihang gipahibalo ang ngalan ni Saul, siya mitago kay siya maulawon. Gipadayag ni Jehova kon diin siya, ug si Saul giproklamar nga hari.—1 Sam. 10:7, 20-24.

Sa Panggubatan

Napamatud-an ni Saul sa wala madugay nga nasayop kadtong nagduhaduha sa iyang kuwalipikasyon. Sa dihang gihulga sa mga Ammonhanon ang usa ka lungsod sa Israel, “ang espiritu ni Jehova milihok diha kang Saul.” Iyang giorganisar ang mga manggugubat sa nasod ug nanguna kanila ngadto sa kadaogan. Apan ang Diyos maoy gipasidunggan ni Saul sa ilang kadaogan, nga nag-ingon: “Niining  adlawa si Jehova naghimo ug kaluwasan sa Israel.”—1 Sam. 11:1-13.

Si Saul may maayong mga hiyas ug siya gipanalanginan sa Diyos. Iyang giila usab ang gahom ni Jehova. Apan, ang padayong kadaogan sa Israel ug sa ilang hari nagdepende sa usa ka importante kaayong butang. Si Samuel miingon sa katawhan sa Israel: “Kon kamo mahadlok kang Jehova ug mag-alagad gayod kaniya ug mamati sa iyang tingog, ug kamo dili mosukol sa sugo ni Jehova, kamo ug ang hari nga maghari sa ibabaw kaninyo mahimo gayod nga mga sumusunod ni Jehova nga inyong Diyos.” Unsay seguradong maangkon sa mga Israelinhon kon sila magmatinumanon sa Diyos? Si Samuel miingon: “Si Jehova dili motalikod sa iyang katawhan tungod sa iyang dakong ngalan, tungod kay gipangakohan ni Jehova ang paghimo kaninyo nga iyang katawhan.”—1 Sam. 12:14, 22.

Ang pagkamasinundanon mao ang yawi aron maangkon ang pag-uyon sa Diyos, ug wala kana mausab. Kon sundon sa mga alagad ni Jehova ang iyang mga sugo, siya magapanalangin kanila. Apan komosta kon sila mosupak kang Jehova?

“Milihok Ka nga Binuangbuang”

Ang sunod nga gibuhat ni Saul batok sa mga Filistehanon nakapasuko gayod kanila. Ang kasundalohan nga “sama sa balas sa baybayon ang gidaghanon” mibatok kang Saul. “Nakita sa mga tawo sa Israel nga diha sila sa kalisdanan, tungod kay ang katawhan gipit-os pag-ayo; ug ang katawhan nanago sa mga langob ug sa mga lungib ug sa dagkong bato ug sa mga tagoanan ug sa mga gahong-sa-tubig.” (1 Sam. 13:5, 6) Unsay buhaton ni Saul?

Gisultihan ni Samuel si Saul nga magkita sila sa Gilgal, diin ang propeta motanyag ug mga halad. Si Saul nagpaabot, apan nalangan si Samuel, ug ang kasundalohan ni Saul nagkatibulaag. Busa si Saul ang nangako sa paghalad. Human niadto, miabot si Samuel. Pagkadungog ni Samuel sa gihimo ni Saul, siya miingon kaniya: “Milihok ka nga binuangbuang. Wala ka magtuman sa sugo ni Jehova nga imong Diyos nga iyang gisugo kanimo, tungod kay, kon ikaw nagtuman pa unta, lig-onon unta ni Jehova ang imong gingharian ibabaw sa Israel hangtod sa panahong walay tino. Ug karon ang imong gingharian dili molungtad. Si Jehova mangita gayod ug usa ka tawo nga gikahimut-an sa iyang kasingkasing; ug si Jehova magtudlo kaniya ingon nga pangulo sa iyang katawhan, tungod kay wala ka magtuman sa gisugo ni Jehova kanimo.”—1 Sam. 10:8; 13:8, 13, 14.

Si Saul nagpakitag kakulang sa pagtuo sa dihang iyang gisupak ang sugo sa Diyos nga maghulat kang Samuel nga maoy maghalad. Sukwahi gayod ang gibuhat ni Saul kay sa kang Gideon nga kanhing pangulo sa kasundalohan sa Israel! Gisugo ni Jehova si Gideon nga kunhoran ang iyang kasundalohan gikan sa 32,000 ngadto sa 300, ug gisunod kana ni Gideon. Ngano? Kay siya may pagtuo kang Jehova. Sa tabang sa Diyos, iyang gipildi ang 135,000 ka kaaway. (Maghu. 7:1-7, 17-22; 8:10) Si Jehova makatabang usab unta kang Saul. Apan tungod sa pagkamasinupakon ni Saul, ang Israel gipukan sa mga Filistehanon.—1 Sam. 13:17, 18.

Sa dihang mag-atubang ug kalisdanan, sa unsang paagi mohimo kitag mga desisyon? Sa mga kulag pagtuo, daw praktikal ang dili pagsunod sa mga prinsipyo sa Diyos. Kay wala man si Samuel, mahimong naghunahuna si Saul nga maalamon ang iyang gihimo. Apan alang niadtong nagtinguha sa pag-uyon sa Diyos, ang pagsunod sa mga prinsipyo sa Kasulatan maylabot sa paghimog mga desisyon mao lamang ang hustong buhaton.

Si Jehova Nagsalikway Kang Saul

Sa pagpangandam sa pagsulong batok sa mga Amalekanhon, si Saul nakahimo na usab ug grabeng sala. Ang mga Amalekanhon gihukman sa Diyos nga laglagon. Tungod kadto sa ilang pag-atake sa mga Israelinhon sa wala lamay katarongan samtang ang Israel migula sa Ehipto. (Ex. 17:8; Deut. 25:17, 18) Dugang pa, ang mga Amalekanhon miduyog sa ubang nasod  sa pag-atake na usab sa piniling katawhan sa Diyos panahon sa mga Maghuhukom. (Maghu. 3:12, 13; 6:1-3, 33) Busa gipapanubag ni Jehova ang mga Amalekanhon ug iyang gisugo si Saul sa paglaglag kanila.—1 Sam. 15:1-3.

Imbes mosunod sa sugo ni Jehova sa paglaglag sa mabingkilong mga Amalekanhon ug sa ilang kabtangan, si Saul nagbihag sa ilang hari ug nagkuha sa kinamaayohang mga hayop. Unsay nahitabo sa dihang gisukmatan ni Samuel si Saul? Si Saul namasangil sa uban: “Ang katawhan naluoy sa kinamaayohan sa panon sa mga karnero ug sa mga baka, aron ikahalad kang Jehova.” Tinuod man kadto o dili, siya nagmasinupakon gayod. Si Saul dili na mapainubsanon. Busa, gipadayag sa propeta sa Diyos nga si Saul misupak sa Diyos. Dayon si Samuel miingon: “May dako bang kalipay si Jehova sa mga halad-nga-sinunog ug sa mga halad sama sa pagsunod sa tingog ni Jehova? Tan-awa! Ang pagsunod mas maayo pa kay sa halad . . . Sanglit gisalikway mo ang pulong ni Jehova, gisalikway ka usab niya sa pagkahari.”—1 Sam. 15:15, 17, 22, 23.

Sa dihang gikuha ni Jehova ang iyang espiritu ug panalangin gikan kang Saul, ang unang hari sa Israel gigamhan sa “usa ka daotang espiritu.” Si Saul nahimong maduhaduhaon ug masinahon kang David—ang gipili ni Jehova nga mopuli ingong hari. Dili lang kas-a misulay si Saul pagpatay kang David. Sa pagkakita nga “si Jehova nag-uban kang David, . . . si Saul nahimong kaaway ni David sa kanunay,” nag-ingon ang Bibliya. Si Saul migukod kaniya ug mimando pa gani nga patyon ang 85 ka saserdote ug uban pa. Dili ikatingala nga si Jehova mibiya kang Saul!—1 Sam. 16:14; 18:11, 25, 28, 29; 19:10, 11; 20:32, 33; 22:16-19.

Sa dihang ang mga Filistehanon miatake na usab sa Israel, si Saul midangop sa espiritismo aron magpatabang apan kadto kawang. Sa sunod adlaw, siya grabeng nasamdan sa panggubatan ug naghikog. (1 Sam. 28:4-8; 31:3, 4) Bahin sa masupakon nga unang hari sa Israel, ang Kasulatan nag-ingon: “Si Saul namatay tungod sa iyang pagkadili-matinumanon nga niana siya milihok sa pagkawalay-pagtuo batok kang Jehova mahitungod sa pulong ni Jehova nga wala niya tumana ug usab tungod sa pagpangutana sa usa ka espiritista aron sa pagpakisayod. Ug siya wala magpakisayod kang Jehova.”—1 Cron. 10:13, 14.

Ang daotang panig-ingnan ni Saul tin-awng nagpakita nga ang pagsunod kang Jehova mas maayo kay sa paghalad kaniya. Si apostol Juan misulat: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Hinaot dili gayod nato kalimtan kini nga kamatuoran: Ang malungtarong pagpakighigala sa Diyos nagdepende sa atong pagkamasinundanon kaniya.

[Hulagway sa panid 21]

Sa sinugdan, si Saul mapainubsanong hari

[Hulagway sa panid 23]

Nganong gisultihan ni Samuel si Saul nga “ang pagsunod mas maayo pa kay sa halad”?