Mag-awit Kang Jehova!

“Magaawit ako ug mga pagdayeg sa akong Diyos samtang ako buhi pa.”—SAL. 146:2.

1. Unsay nagtukmod sa batan-ong si David sa pagkomposo sa pipila sa iyang mga awit?

 SA BATAN-ON pa si David, siya migugol ug daghang oras sa kapatagan duol sa Betlehem nga nag-atiman sa mga karnero sa iyang amahan. Samtang nagbantay, naobserbahan ni David ang kahibulongang kalalangan ni Jehova: mga bituon, ‘mga mananap sa kapatagan,’ ug “mga langgam sa kalangitan.” Natandog gayod siya sa iyang nakita—nga natukmod sa pagkomposog makapatandog-sa-kasingkasing nga mga awit sa pagdayeg sa Magbubuhat niining kahibulongang kalalangan. Daghan sa mga gikomposo ni David anaa sa Mga Salmo. a—Basaha ang Salmo 8:3, 4, 7-9.

2. (a) Unsay mahimong epekto sa musika diha sa usa ka tawo? Paghatag ug pananglitan. (b) Unsay atong makat-onan bahin sa relasyon ni David kang Jehova diha sa Salmo 34:7, 8 ug Salmo 139:2-8?

 ² Lagmit nga sa maong yugto sa iyang kinabuhi, si David nahimong batid nga manunugtog. Tungod sa iyang kahanas, gidapit siya sa pagtugtog sa alpa alang kang Haring Saul. (Prov. 22:29) Ang musika ni David nakapahupay sa hari, nga maoy kasagarang epekto sa nindot nga musika bisan karon. Sa dihang nagtugtog si David sa iyang instrumento, “naulian si Saul ug namaayo siya.” (1 Sam. 16:23) Ang mga awit nga gikomposo sa mahadlokon-sa-Diyos nga manunugtog ug magsusulat ug awit bililhon hangtod karon. Hunahunaa kini! Karon, kapig 3,000 ka tuig human sa pagkatawo ni David, minilyong tawo nga lainlaig kahimtang ug nagpuyo sa lainlaing bahin sa yuta, ang regular nga nagbasa sa mga salmo ni David aron makabatog kahupayan ug paglaom.—2 Cron. 7:6; basaha ang Salmo 34:7, 8; 139:2-8; Amos 6:5.

Ang Hinungdanong Papel sa Musika Diha sa Matuod nga Pagsimba

3, 4. Sa unsang paagi giorganisar ang pagtugtog ug pag-awit sa sagradong musika sa adlaw ni David?

³ Si David may talento sa musika, ug gigamit niya kana sa kinamaayohang paagi—ang paghimaya kang Jehova. Sa nahimo siyang hari sa Israel, gihikay ni David nga ilakip ang nindot nga musika sa serbisyo sa tabernakulo. Sa tanang Levihanon nga nag-alagad sa templo, mga 4,000 kanila ang giasayn ingong “magdadayeg,” nga ang 288 niana “binansay sa awit alang kang Jehova, tanan mga batid.”—1 Cron. 23:3, 5; 25:7.

⁴ Si David mismo ang nagkomposo sa daghang awit nga gitugtog ug giawit sa mga Levihanon. Ang mga Israelinhon nga presente sa dihang giawit ang mga salmo ni David natandog gayod sa ilang nadungog. Sa ulahi, sa gidala ang arka sa pakigsaad sa Jerusalem, ‘giingnan ni David ang mga pangulo sa mga Levihanon sa pagbutang sa ilang mga igsoon nga mga mag-aawit uban sa mga tulonggon sa awit, kinuldasan nga mga tulonggon ug mga alpa ug mga piyangpiyang, nga magpatugtog sa makusog aron ipatugbaw ang tingog sa pagmaya.’—1 Cron. 15:16.

5, 6. (a) Nganong gihatagag dakong pagtagad ang musika sa paghari ni David? (b) Nganong nahibalo kita nga ang musika may hinungdanong papel diha sa pagsimba sa karaang Israel?

⁵ Nganong ang musika gihatagag dakong pagtagad sa adlaw ni David? Tungod lang ba kay ang hari usa ka manunugtog? Dili, may lain pang rason, nga nadayag kasiglohan sa ulahi sa dihang ang matarong nga si Haring Ezequias nagpasig-uli sa mga serbisyo sa templo. Sa 2 Cronicas 29:25, atong mabasa: “Gipapuwesto [ni Ezequias] ang mga Levihanon diha sa balay ni Jehova, uban sa mga piyangpiyang, uban sa kinuldasan nga mga tulonggon ug sa mga alpa, sumala sa sugo ni David ug ni Gad nga bisyonaryo sa hari ug ni Natan nga manalagna, kay ang sugo gikan man sa kamot ni Jehova pinaagi sa iyang mga manalagna.”

⁶ Oo, pinaagi sa iyang mga manalagna si Jehova nagsugo sa iyang mga magsisimba sa pagdayeg kaniya pinaagig awit. Ang mga mag-aawit gikan sa saserdotehanong banay gipahigawas sa mga buluhaton nga gipabuhat sa ubang Levihanon aron makagahin silag igong panahon sa pagkomposog bag-ong mga awit, ug lagmit sa pag-ensayo.—1 Cron. 9:33.

7, 8. Kon bahin sa pag-awit sa mga alawiton sa Gingharian, unsay mas bililhon kay sa kabatid?

⁷ Tingali ikaw moingon, “Kon bahin sa pag-awit, dili gyod ko maapil sa batid nga mga mag-aawit sa tabernakulo!” Apan dili tanang Levihanong musikero ang batid niana. Sumala sa 1 Cronicas 25:8, diha poy ‘mga tinun-an.’ Dayag usab nga lagmit may pipila ka batid nga musikero ug mag-aawit gikan sa ubang tribo sa Israel, apan ang mga Levihanon ang giasayn ni Jehova sa maong katungdanan. Makatino kita nga ‘mga batid’ o ‘mga tinun-an’ man sila, ang tanang matinumanong Levihanon nagtuman sa ilang asaynment kutob sa ilang maarangan.

 ⁸ Si David hilig kaayog musika ug siya batid niana. Apan talento ba lamang ang bililhon kang Jehova? Sa Salmo 33:3, si David misulat: ‘Tugtoga ninyo nga labing maayo ang mga kinuldasan uban ang malipayong pagsinggit.’ Tin-aw ang mensahe: Ang bililhon kang Jehova mao nga buhaton nato ang ‘labing maayo’ sa pagdayeg kaniya.

Ang Papel sa Musika Human sa Adlaw ni David

9. Hubita kon unsay lagmit nimong nakita ug nadungog kon didto ka sa dedikasyon sa templo panahon sa paghari ni Solomon.

⁹ Sa paghari ni Solomon, ang musika may hinungdanong bahin sa putli nga pagsimba. Panahon sa dedikasyon sa templo, dihay kompletong orkestra, diin ang seksiyon sa mga tulonggong metal may 120 ka trompeta. (Basaha ang 2 Cronicas 5:12.) Ang Bibliya nagtug-an kanato nga “ang mga tigtrompeta [nga mga saserdote tanan] ug ang mga mag-aawit nagkahiusa sa pagpalanog ug usa ka tingog sa pagdayeg ug pagpasalamat kang Jehova, . . . ‘kay siya maayo, kay hangtod sa panahong walay tino ang iyang mahigugmaong-kalulot.’” Sa dihang ang masadyaong awit milanog, “ang balay napuno sa panganod,” nga nagpaila sa pag-uyon ni Jehova. Makapalipay ug makapaukyab gayod nga makadungog sa tingog sa tanang trompeta nga giduyogan sa libolibo ka mag-aawit!—2 Cron. 5:13.

10, 11. Unsay nagpakita nga ang musika bahin sa pagsimba sa unang mga Kristohanon?

¹⁰ Ang musika bahin usab sa pagsimba sa unang mga Kristohanon. Siyempre, ang mga magsisimba sa unang siglo nagtigom sa pribadong mga balay, dili sa mga tabernakulo o templo. Tungod sa paglutos ug sa ubang hinungdan, ang kahimtang sa ilang panagkatigom sagad dili maayo. Bisan pa niana, sila nag-awit ug mga pagdayeg sa Diyos.

¹¹ Si apostol Pablo nag-awhag sa mga igsoon sa Colosas: “Magpadayon . . . sa pagpahimangno sa usag usa uban ang mga salmo, mga pagdayeg sa Diyos, espirituwal nga mga awit uban ang pagkamadanihon.” (Col. 3:16) Sa dihang gibilanggo si Pablo ug Silas, sila “nanagdayeg sa Diyos pinaagig awit,” bisag wala silay gitamdan nga basahon sa alawiton. (Buh. 16:25) Kon ikaw bilanggoon, pila kaha ka alawiton sa Gingharian ang memoryado nimong makanta?

12. Sa unsang paagi nato ikapakita ang pagpabili sa atong mga alawiton sa Gingharian?

¹² Sanglit ang musika may hinungdanong papel sa atong pagsimba, maayong pangutan-on nato ang atong kaugalingon: ‘Gipabilhan ko ba gayod kini? Naningkamot ba ko nga makaabot ug sayo sa mga tigom, asembliya, ug kombensiyon aron makaduyog sa pangbukas nga awit, ug moawit nga kinasingkasing? Gitudloan ko ba ang akong mga anak nga dili isipong intermisyon ang panahon sa pag-awit tali sa Teokratikanhong Tunghaan sa Ministeryo ug sa Tigom sa Pag-alagad o tali sa pakigpulong publiko ug sa Pagtuon sa Bantayanang Torre, ingong kahigayonan sa pagbiya sa lingkoranan bisag wala kinahanglana, aron lang makalakawlakaw?’ Ang pag-awit maoy bahin sa atong pagsimba. Oo, ‘mga batid’ o ‘mga tinun-an’ man kita, kitang tanan makaduyog—ug angayng moduyog—sa pag-awit alang sa kadayeganan ni Jehova.—Itandi ang 2 Corinto 8:12.

Mga Panginahanglan Nausab Paglabay sa Panahon

13, 14. Unsa ka hinungdanon ang kinasingkasing nga pag-awit panahon sa mga tigom? Iilustrar.

¹³ Kapig 100 ka tuig kanhi, gisaysay sa Zion’s Watch Tower ang usa ka rason kon nganong hinungdanon kaayo ang mga alawiton sa Gingharian. Kini nag-ingon: “Ang pag-awit sa kamatuoran maoy usa ka maayong paagi aron masilsil kana sa hunahuna ug kasingkasing sa katawhan sa Diyos.” Daghan sa liriko sa atong mga awit gibase sa mga teksto sa Kasulatan, busa ang pagsabot sa mga pulong bisan sa pipila lang ka awit mahimong ekselenteng paagi aron motuhop ang kamatuoran sa atong kasingkasing. Sagad, ang motambong sa unang  higayon sa tigom matandog gayod sa kinasingkasing nga pag-awit sa kongregasyon.

¹⁴ Usa ka gabii niadtong 1869, samtang mipauli si C. T. Russell gikan sa trabaho, siya nakadungog ug awit gikan sa usa ka bilding. Nianang yugtoa sa iyang kinabuhi, siya nagtuo nga dili na gayod niya makaplagan ang kamatuoran bahin sa Diyos. Busa midesisyon siya nga magpokus na lang sa iyang negosyo. Siya nangatarongan nga kon siya madato, siya makatabang sa mga tawo sa materyal bisag dili sa espirituwal. Si Brader Russell misulod niadtong abogon ug ngiob nga lawak, ug iyang nakita nga may relihiyosong serbisyo didto. Siya milingkod ug namati. Siya misulat sa ulahi nga tungod sa iyang nadungog niadtong gabhiona, sa tabang sa Diyos, nalig-on pag-usab ang iyang pagtuo sa pagkainspirado sa Bibliya. Matikdi nga ang pag-awit maoy nagtukmod kang Brader Russell sa pagtambong sa tigom.

15. Unsay hinungdan nga girebisar ang atong songbok?

¹⁵ Sa lakat sa panahon, may bag-ong mga kahayag sa Kasulatan nga gipadayag. Ang Proverbio 4:18 nag-ingon: “Ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw.” Tungod sa mas masanag nga kahayag, adunay kausaban sa mga pulong sa alawiton. Sa miaging 25 ka tuig, ang mga Saksi ni Jehova sa daghang kayutaan naggamit sa songbok nga Mag-awit ug mga Pagdayeg Kang Jehova. b Sukad sa unang pagpatik niana, ang kahayag bahin sa daghang topiko mas nagakasanag, ug ang pipila ka ekspresyon nga gigamit sa maong songbok dili na haom. Pananglitan, ang terminong “bag-ong kahikayan” gipulihan na ug “bag-ong kalibotan.” Ug moingon kita karon nga ang ngalan ni Jehova “balaanon,” dili “bayawon.” Tin-aw nga sa doktrinal nga panglantaw, kinahanglang ipahaom ang atong songbok sa bag-ong kahayag.

16. Sa unsang paagi ang bag-ong songbok makatabang kanato sa pagsunod sa tambag ni Pablo sa Efeso 5:19?

¹⁶ Tungod niana ug sa uban pang rason, giaprobahan sa Nagamandong Lawas ang pagpatik sa bag-ong songbok nga Mag-awit Kang Jehova. Kini may 135 na lang ka alawiton. Kay diyutay ra ang tun-an, mamemorya nato ang pipila sa bag-ong mga awit. Nahiuyon kini sa tambag ni Pablo sa Efeso 5:19.—Basaha.

Ikapakita Mo ang Imong Pagpabili

17. Unsay angay natong hunahunaon aron mabuntog ang kahadlok nga maulawan kon bahin sa pag-awit diha sa kongregasyon?

¹⁷ Hinay ba ang atong tingog sa dihang mag-awit panahon sa mga tigom kay mahadlok nga maulawan? Hunahunaa kini: Kon bahin sa sinultihan, dili ba tinuod nga “kitang tanan mangapandol sa makadaghan”? (Sant. 3:2) Bisan pag dili hingpit ang atong sinultihan, padayon kitang nagdayeg kang Jehova diha sa pagsangyaw sa balay-balay. Nan, nganong magpanuko  man kita sa pag-awit ug mga pagdayeg sa Diyos tungod sa atong dili nindot nga tingog? Si Jehova, kinsa “naghatag sa baba sa tawo,” malipay nga maminaw sa atong mga tingog nga nag-awit ug mga pagdayeg kaniya.—Ex. 4:11.

18. Paghatag ug mga sugyot aron mamemorya ang liriko sa mga awit.

¹⁸ Ang CD nga Sing to Jehovah—Vocal Renditions mabatonan sa daghang pinulongan, apil ang Cebuano. Kana naglakip sa koro sa atong bag-ong mga awit nga giduyogan sa nindot nga mga tugtog. Makalingaw gayod ang pagpamati sa maong mga musika. Pamati kanunay niana; sa dili madugay imong mamemorya ang liriko sa pipila sa atong bag-ong mga awit. Ang liriko sa daghang awit gikomposo sa paagi nga sa dihang kantahon ang usa ka linya, mahibalo ka na kon unsay sunod nga linya. Busa sa dihang imong patokaron ang CD, sulayi ang pagduyog niana. Kon sinati ka na sa liriko ug sa tono diha sa inyong balay, seguradong makakanta ka nag kusog diha sa Kingdom Hall.

19. Unsang mga lakang ang nalangkit sa pag-andam sa musika alang sa orkestra sa mga awit sa Gingharian?

¹⁹ Usahay dili nato mahatagag pagtagad ang musika nga ipatokar sa dili pa ang sesyon sa atong mga espesyal nga asembliya, sirkitong asembliya, ug distritong kombensiyon. Dako kaayong trabaho ang nalangkit sa pag-andam niana. Human mapili ang usa ka awit, maampingong andamon ang komposisyon nga tugtogon sa orkestra sa Watchtower nga may 64 ka membro. Dayon, tun-an sa mga musikero sa daghang oras ang komposisyon, ensayohon kana, ug sa kataposan ilang irekord diha sa atong mga studio sa Patterson, New York. Ang napulo kanila wala magpuyo sa Amerika. Giisip nilang tanan nga pribilehiyo ang pagpakigbahin sa pagtaganag nindot nga musika alang sa teokratikanhong mga tigom. Atong ikapakita ang atong pagpabili sa ilang mahigugmaong paningkamot. Sa dihang ang tsirman sa asembliya ug sa kombensiyon moawhag kanato sa paglingkod ug pagpamati sa musika nga mahigugmaong giandam alang kanato, angay kitang manglingkod dayon ug mamati niana.

20. Unsay determinado nimong buhaton?

²⁰ Si Jehova namati sa atong mga awit sa pagdayeg. Kana bililhon kaniya. Ato siyang lipayon pinaagi sa kusog ug kinasingkasing nga pag-awit sa dihang kita magtigom alang sa pagsimba. Oo, batid man kita o tinun-an, kita “magaawit kang Jehova”!—Sal. 104:33.

[Mga footnote]

Unsay Imong Hunahuna?

• Unsang mga panig-ingnan sa Bibliya ang nagpakita nga ang musika may hinungdanong bahin sa atong pagsimba?

• Unsa ang kalangkitan tali sa pagsunod sa sugo ni Jesus sa Mateo 22:37 ug sa kinasingkasing nga pag-awit sa mga alawiton sa Gingharian?

• Unsa ang pipila ka paagi diin atong ikapakita ang atong pagpabili sa mga alawiton sa Gingharian?

[Mga Pangutana sa Pagtuon]

[Hulagway sa panid 23]

Gitudloan mo ba ang imong mga anak nga dili mobiya sa lingkoranan kon wala kinahanglana panahon sa pag-awit?

[Hulagway sa panid 24]

Gitun-an mo ba ang liriko sa bag-ong mga awit diha sa balay?