Tinguhaa ang Panalangin ni Jehova

“[Ang Diyos] maoy tigganti sa mga matinuorong nagapangita kaniya.”—HEB. 11:6.

1, 2. (a) Unsay gihimo sa mga tawo aron mabatonan ang panalangin sa Diyos? (b) Nganong ilabina kitang mainteres nga mabatonan ang panalangin ni Jehova?

 “PANALANGINAN ka unta sa Diyos!” Sa pipila ka dapit, mao kanay sagad isulti sa mga tawo sa dihang dunay moatsi. Ang mga lider sa lainlaing relihiyon nagbendisyon sa mga tawo, hayop, ug mga butang. Ang uban nangadto sa mga dapit nga giisip nilang balaan kay naglaom nga makadawat ug panalangin. Ang mga politiko kanunayng naghangyo sa Diyos nga bendisyonan ang ilang nasod. Sa imong hunahuna, haom ba ang ilang pangamuyo? Nadawat ba nila ang ilang gipangayo? Kinsa ba gayoy makadawat sa panalangin sa Diyos, ug ngano?

² Si Jehova nagtagna nga sa kataposang mga adlaw, aduna siyay hinlo ug makigdaitong katawhan gikan sa tanang kanasoran, nga magsangyaw sa maayong balita sa Gingharian sa tibuok yuta bisan pag sila dumtan ug lutoson. (Isa. 2:2-4; Mat. 24:14; Pin. 7:9, 14) Kitang midawat sa responsibilidad nga mahimong bahin niini nga katawhan nagtinguha—ug nagkinahanglan—sa panalangin sa Diyos, kay kon wala kana dili gayod kita molampos. (Sal. 127:1) Apan sa unsang paagi nato mabatonan ang panalangin sa Diyos?

Dagayang Panalanginan ang mga Masinugtanon

3. Unsa untay resulta kon nagmasinugtanon pa ang mga Israelinhon?

³ Basaha ang Proverbio 10:6, 7. Sa wala pa mosulod sa Yutang Saad ang nasod sa Israel, gipaila ni Jehova nga ilang mabatonan ang talagsaong kadagaya ug proteksiyon kon magmasinugtanon sila kaniya. (Deut. 28:1, 2) Ang mga panalangin  ni Jehova “modangat” sa iyang katawhan. Kadtong magmasinugtanon kaniya, makadawat gayod ug mga panalangin.

4. Unsay nalangkit sa sinserong pagsugot?

⁴ Unsay angayng tinamdan sa mga Israelinhon sa ilang pagsugot kang Jehova? Ang Balaod sa Diyos nag-ingon nga dili siya mahimuot kon ang iyang katawhan dili mag-alagad kaniya ‘uban ang pagmaya ug kalipay sa kasingkasing.’ (Basaha ang Deuteronomio 28:45-47.) Si Jehova takos hatagan ug labaw pa kay sa basta pagsugot lamang sa espesipikong mga sugo, kay mahimo kining buhaton bisan sa mga mananap o mga demonyo. (Mar. 1:27; Sant. 3:3) Ang sinserong pagsugot sa Diyos maoy pamatuod sa atong gugma kaniya. Ang maong pagsugot adunay kalipay nga nagsumikad sa pagtuo nga ang mga sugo sa Diyos dili mabug-at ug nga “siya maoy tigganti sa mga matinuorong nagapangita kaniya.”—Heb. 11:6; 1 Juan 5:3.

5. Sa unsang paagi ang pagsalig sa saad ni Jehova makatabang sa usa sa pagsunod sa balaod nga nasulat sa Deuteronomio 15:7, 8?

⁵ Tagda kon unsaon pagpasundayag ang may-pagsalig nga pagsugot pinaagi sa pagtuman sa balaod nga nasulat sa Deuteronomio 15:7, 8. (Basaha.) Ang kontra-gustong pagsunod sa maong balaod makahatag tingalig temporaryong kahupayan sa mga kabos, apan makapatungha ba kanag maayong relasyon taliwala sa katawhan sa Diyos? Labaw sa tanan, mapasundayag ba niana ang pagtuo sa katakos ni Jehova sa pagtagana alang sa iyang mga alagad ug ang apresasyon sa kahigayonan nga masundog ang iyang pagkamahinatagon? Dili gayod! Nakita sa Diyos ang kasingkasing sa tinuod nga manggihatagon ug nagsaad siya nga panalanginan ang maong indibiduwal sa tanan niyang pagabuhaton. (Deut. 15:10) Ang pagtuo sa maong saad magpalihok sa usa sa pagsunod sa maong balaod ug moresulta sa dagayang panalangin.—Prov. 28:20.

6. Unsay gipasalig kanato sa Hebreohanon 11:6?

⁶ Gawas pa sa pagtuo kang Jehova ingong Tigganti, gipasiugda sa Hebreohanon 11:6 ang laing hiyas nga gikinahanglan aron madawat ang panalangin sa Diyos. Matikdi nga si Jehova nagapanalangin niadtong “matinuorong nagapangita kaniya.” Ang orihinal nga pulong niini nagpasabot ug pagpanglimbasog. Garantiya kana nga modangat gayod kanato ang iyang panalangin kon kita manglimbasog. Ang tinubdan niana mao ang bugtong matuod nga Diyos, “nga dili makabakak.” (Tito 1:2) Iyang gipakita latas sa libolibong katuigan nga kasaligan gayod ang iyang mga saad. Ang iyang pulong dili gayod mapakyas; matuman gayod kini. (Isa. 55:11) Busa kon kita magpasundayag ug tim-os nga pagtuo, kita makasalig gayod nga siya mahimong atong Tigganti.

7. Sa unsang paagi nato mabatonan ang panalangin pinaagi sa “binhi” ni Abraham?

⁷ Si Jesu-Kristo ang pangunang bahin sa “binhi” ni Abraham. Ang dinihogang mga Kristohanon mao ang ikaduhang bahin nianang gitagna nga “binhi.” Sila gisugo nga “ipahayag ang mga kahamili sa usa nga nagtawag [kanila] gikan sa kangitngit ngadto sa iyang katingalahang kahayag.” (Gal. 3:7-9, 14, 16, 26-29; 1 Ped. 2:9) Dili kita makabaton ug maayong relasyon kang Jehova kon atong ibalewala ang gipiyalan ni Jesus sa iyang kabtangan. Kon dili pa tungod sa tabang sa “matinumanon ug maalamong ulipon,” dili nato bug-os masabtan ang atong mabasa diha sa Pulong sa Diyos ni mahibaloan kon unsaon kana pagpadapat. (Mat. 24:45-47) Pinaagi sa pagpadapat sa atong nakat-onan gikan sa Kasulatan, atong mabatonan ang panalangin sa Diyos.

Isentro ang Pagtagad sa Kabubut-on sa Diyos

8, 9. Sa unsang paagi ang patriarkang si Jacob milihok nga kaharmonya sa iyang pangamuyo?

⁸ Ang pagpanglimbasog aron mabatonan ang panalangin sa Diyos magpahinumdom kanato sa patriarkang si Jacob. Wala siya mahibalo kon sa unsang paagi matuman ang saad sa Diyos kang Abraham, apan nagtuo siya nga padaghanon pag-ayo ni Jehova ang kaliwat sa iyang apohan ug mahimo kining usa ka dakong nasod. Busa, niadtong 1781 W.K.P., si Jacob miadto sa Haran aron mangitag asawa. Wala lamang siya mangitag buotan nga babaye; hinunoa, siya nangitag mahunahunaon-sa-espirituwal nga magsisimba ni Jehova nga mahimong maayong inahan sa iyang mga anak.

 ⁹ Nahibalo kita nga nahimamat ni Jacob ang iyang paryenteng si Raquel. Siya nahigugma kang Raquel ug miuyon nga motrabaho alang sa amahan niini nga si Laban sulod sa pito ka tuig aron mapangasawa niya si Raquel. Kini dili lamang usa ka talagsaong sugilanon sa gugma. Si Jacob tinong nahibalo sa saad sa Labing Gamhanang Diyos ngadto sa iyang apohang si Abraham nga gisubli ngadto sa iyang amahan nga si Isaac. (Gen. 18:18; 22:17, 18; 26:3-5, 24, 25) Sa baylo, si Isaac miingon sa iyang anak nga si Jacob: “Ang Diyos nga Labing Gamhanan magpanalangin kanimo ug maghimo kanimong mabungahon ug magpadaghan kanimo, ug ikaw tinong mahimo nga usa ka kongregasyon sa mga katawhan. Ug iyang ihatag kanimo ang panalangin ni Abraham, nganha kanimo ug sa imong binhi uban kanimo, aron ikaw manag-iya sa yuta nga imong gipuy-an ingong langyaw, nga gihatag sa Diyos kang Abraham.” (Gen. 28:3, 4) Busa ang paningkamot ni Jacob nga makakitag takos nga asawa ug makabatog mga anak nagbanaag sa iyang pagsalig sa saad ni Jehova.

10. Nganong nalipay si Jehova nga panalanginan si Jacob?

¹⁰ Si Jacob wala mangagpas ug bahandi alang sa iyang pamilya. Kanunay siyang naghunahuna sa saad sa Diyos. Gisentro niya ang iyang pagtagad sa pagbuhat sa kabubut-on ni Jehova. Si Jacob determinado nga mobuhat sa iyang maarangan aron mabatonan ang panalangin sa Diyos bisan pa sa kababagan. Nahuptan niya ang maong tinamdan hangtod sa pagkatigulang, ug gipanalanginan siya ni Jehova tungod niana.—Basaha ang Genesis 32:24-29.

11. Unsay angay natong buhaton kaharmonya sa kabubut-on sa Diyos?

¹¹ Sama kang Jacob, wala kita mahibalo sa tanang detalye sa katumanan sa katuyoan ni Jehova. Apan, pinaagi sa pagtuon sa Pulong sa Diyos, aduna kitay ideya kon unsay mahitabo sa “adlaw ni Jehova.” (2 Ped. 3:10, 17) Pananglitan, wala kita mahibalo kon kanus-a gayod moabot ang maong adlaw, apan nasayod kita nga haduol na kana. Kita nagtuo sa giingon sa Pulong sa Diyos nga pinaagi sa paghatag ug bug-os nga pagpamatuod sulod sa mubong panahon nga nahibilin, atong maluwas ang atong kaugalingon ug kadtong mamati kanato.—1 Tim. 4:16.

12. Sa unsa kita makaseguro?

¹² Kita nahibalo nga ang kataposan mahimong moabot sa bisan unsang takna; dili kinahanglang  hulaton ni Jehova nga masangyawan ang tanang tawo. (Mat. 10:23) Apan, gihatagan kitag instruksiyon kon sa unsang paagi mahimong epektibo diha sa buluhatong pagsangyaw. Uban ang pagsalig, kita nakigbahin niining buluhatona kutob sa atong maarangan, nga naggamit sa atong kahinguhaan. Ato bang dahomon nga daghan ang mosanong? Sa pagkatinuod, wala kita masayod kon unsay mahimong resulta sa atong pagsangyaw. (Basaha ang Ecclesiastes 11:5, 6.) Ang atong buluhaton mao ang pagsangyaw, nga nagasalig nga si Jehova magpanalangin kanato. (1 Cor. 3:6, 7) Makaseguro kita nga iyang nakita ang atong mga paghago, ug pinaagi sa iyang balaang espiritu, iyang itagana ang giya nga atong gikinahanglan.—Sal. 32:8.

Tinguhaa ang Balaang Espiritu

13, 14. Sa unsang paagi napasundayag ang katakos sa espiritu sa Diyos sa pagkuwalipikar sa iyang mga alagad?

¹³ Komosta kon mobati kitang dili takos nga mohimo sa usa ka asaynment o makigbahin sa pagsangyaw? Angay natong pangayoon kang Jehova ang iyang balaang espiritu aron mouswag ang atong mga katakos diha sa pag-alagad kaniya. (Basaha ang Lucas 11:13.) Ang espiritu sa Diyos mahimong magkuwalipikar sa usa ka tawo alang sa usa ka buluhaton o pribilehiyo bisag unsa pay iyang kasinatian o kahimtang kaniadto. Pananglitan, human sa paggula sa mga Israelinhon gikan sa Ehipto, ang espiritu sa Diyos naghatag ug kaisog sa mga magbalantay ug mga ulipon sa pagparot sa ilang mga kaaway bisag wala silay kasinatian sa pagpakiggubat. (Ex. 17:8-13) Wala madugay human niana, ang mao gihapong espiritu nagtabang kang Bezalel ug Oholiab nga masunod ang maanindot, hinatag-sa-Diyos nga disenyo alang sa tabernakulo.—Ex. 31:2-6; 35:30-35.

¹⁴ Ang maong gamhanang espiritu nagtabang sa mga alagad sa Diyos karon sa pag-atiman sa panginahanglan sa organisasyon sa dihang kinahanglan na silang magsugod pag-imprenta. Diha sa usa ka sulat, gisaysay sa tagdumala sa imprentahan nga si Brader R. J. Martin ang ilang nalampos niadtong 1927. ‘Sa hustong panahon, gibuksan sa Ginoo ang kahigayonan; ug among nabatonan ang dakong imprentahanan, bisan tuod wala kami mahibalo kon unsaon kini pag-instalar ug pagpaandar. Apan ang Ginoo nahibalo kon unsaon pagtabang niadtong naghatag sa ilang kinamaayohan kaniya. Sulod lamang sa pipila ka semana, napaandar namo kini; ug nagpadayon kini sa pag-imprenta nga labaw pa sa gidahom sa naggama niini.’ Hangtod karon, padayong gipanalanginan ni Jehova ang maong paningkamot.

15. Sa unsang paagi ang Roma 8:11 makapadasig niadtong nag-atubang ug tentasyon?

¹⁵ Ang espiritu ni Jehova nagalihok sa lainlaing paagi. Mahimo kanang mabatonan sa tanang alagad sa Diyos ug motabang kana kanila sa pagbuntog sa dagkong kababagan. Komosta kon nag-atubang  kitag mga tentasyon? Mapalig-on kita sa gipamulong ni Pablo sa Roma 7:21, 25 ug 8:11. Oo, “ang espiritu niya nga nagbangon kang Jesus gikan sa mga patay” molihok alang kanato, nga magpalig-on kanato diha sa atong pagpakigbugno batok sa unodnong mga tinguha. Ang maong mensahe gisulat alang sa dinihogan-sa-espiritung mga Kristohanon, apan ang prinsipyo niana mapadapat sa tanang alagad sa Diyos. Kitang tanan makabaton ug kinabuhi pinaagi sa pagpasundayag ug pagtuo kang Kristo, pagpanglimbasog nga mabuntog ang sayop nga mga tinguha, ug sa pagkinabuhi nga nahiuyon sa pagtultol sa espiritu.

16. Unsay angay natong buhaton aron madawat ang balaang espiritu sa Diyos?

¹⁶ Makadahom ba kita nga hatagan kita sa Diyos sa iyang aktibong puwersa nga walay pagpaningkamot sa atong bahin? Dili. Gawas nga ato kanang iampo, kinahanglan nga makugihon kitang magtuon sa inspiradong Pulong sa Diyos. (Prov. 2:1-6) Lain pa, ang espiritu sa Diyos anaa sa Kristohanong kongregasyon. Ang atong regular nga pagtambong sa mga tigom magpakita nga gusto natong “magpatalinghog sa ginaingon sa espiritu ngadto sa mga kongregasyon.” (Pin. 3:6) Dugang pa, kinahanglan nga mapainubsanon natong ipadapat ang atong nakat-onan. Ang Proverbio 1:23 nagtambag kanato: “Balik kamo tungod sa akong pagbadlong. Unya pasugwakon ko ang akong espiritu nganha kaninyo.” Sa pagkatinuod, ang Diyos magahatag sa iyang balaang espiritu “niadtong nagasugot kaniya ingon nga magmamando.”—Buh. 5:32.

17. Sa unsa nato ikatandi ang resulta sa pagpanalangin sa Diyos sa atong mga paningkamot?

¹⁷ Bisan tuod gikinahanglan ang pagpanglimbasog aron mabatonan ang panalangin sa Diyos, hinumdomi nga ang paghago dili lang maoy rason nga si Jehova dagayang nagpanalangin sa iyang katawhan. Ang resulta sa iyang pagpanalangin sa atong mga paningkamot ikatandi sa benepisyo nga makuha sa atong lawas gikan sa sustansiyadong pagkaon. Ang Diyos nagdisenyo sa atong lawas sa paagi nga ganahan kitang mokaon ug makakuha kitag sustansiya gikan sa atong gikaon. Siya usab ang nagtagana sa pagkaon. Wala kita masayod sa bug-os kon sa unsang paagi nahimong sustansiyado ang atong pagkaon, ni masaysay sa kadaghanan kanato kon sa unsang paagi ang atong lawas magpatunghag enerhiya gikan sa atong gikaon. Igo lamang kitang nahibalo nga ang maong proseso naglihok ug nga kita nakigkooperar niana pinaagi sa pagkaon. Kon mokaon kitag sustansiyadong pagkaon, mas maayo pa gani ang resulta. Sa susama, si Jehova nagtakdag mga kinahanglanon aron kita mabuhi sa walay kataposan, ug siya nagtabang kanato aron makab-ot kana. Tin-aw nga dako siyag natabang kanato ug takos siya sa atong pagdayeg. Apan, kinahanglan gihapon natong makigkooperar kaniya, nga molihok nga kaharmonya sa iyang kabubut-on, aron madawat ang panalangin.—Hag. 2:18, 19.

18. Unsay determinado nimong buhaton, ug ngano?

¹⁸ Busa himoa ang imong kinamaayohan sa pagtuman sa matag asaynment nga imong madawat. Salig kanunay kang Jehova aron molampos ka niana. (Mar. 11:23, 24) Samtang buhaton nimo kana, makaseguro ka nga “ang matag usa nga nagapangita makakaplag.” (Mat. 7:8) Ang mga dinihogan panalanginan ug “purongpurong sa kinabuhi” didto sa langit. (Sant. 1:12) Ang “ubang mga karnero” ni Kristo, kinsa naningkamot nga makadawat usab ug panalangin pinaagi sa binhi ni Abraham, malipay nga makadungog Kaniya nga moingon: “Umari, kamong gipanalanginan sa akong Amahan, panunda ninyo ang gingharian nga giandam alang kaninyo sukad pa sa pagkatukod sa kalibotan.” (Juan 10:16; Mat. 25:34) Oo, “sila nga ginapanalanginan [sa Diyos] magapanag-iya sa yuta, . . . ug sila magapuyo sa ibabaw niini hangtod sa kahangtoran.”—Sal. 37:22, 29.

Makapatin-aw Ka Ba?

• Unsay nalangkit sa sinserong pagsugot?

• Unsay gikinahanglan aron mabatonan ang panalangin sa Diyos?

• Sa unsang paagi nato madawat ang balaang espiritu sa Diyos, ug sa unsang paagi kana molihok alang kanato?

[Mga Pangutana sa Pagtuon]

[Mga hulagway sa panid 9]

Si Jacob nakiglayog sa manulonda aron madawat ang panalangin ni Jehova.

Nanglimbasog ka ba usab aron mabatonan kana?

[Hulagway sa panid 10]

Ang balaang espiritu sa Diyos nagtabang kang Bezalel ug Oholiab nga mahimong hanas