Unsay Mahitabo sa Adlaw ni Jehova?

“Ang adlaw ni Jehova moabot ingon sa usa ka kawatan, . . . ug ang yuta ug ang mga buhat diha niana mahikyad.”—2 PED. 3:10.

1, 2. (a) Sa unsang paagi matapos ang presenteng daotang sistema sa mga butang? (b) Unsang mga pangutana ang pagatubagon?

 ANG presenteng daotang sistema sa mga butang naglungtad pinasukad sa bakak nga ang tawo molampos sa pagmando nga bulag kang Jehova. (Sal. 2:2, 3) Ang bisan unsa ba nga gipasukad sa kabakakan magpabilin sa walay kataposan? Dili gayod! Apan, dili kita kinahanglang maghulat nga ang kalibotan ni Satanas magtapos sa kaugalingon niini. Hinunoa, kini pagalaglagon sa Diyos sa iyang tinudlong panahon ug sa iyang paagi. Ang pagahimoon sa Diyos batok niining daotang kalibotan hingpit nga magpasundayag sa iyang hustisya ug gugma.—Sal. 92:7; Prov. 2:21, 22.

² Si apostol Pedro misulat: “Ang adlaw ni Jehova moabot ingon sa usa ka kawatan, diin ang mga langit mahanaw uban ang nagsagitsit nga kabanha, apan ang mga elemento tungod sa hilabihang kainit mangatunaw, ug ang yuta ug ang mga buhat diha niana mahikyad.” (2 Ped. 3:10) Unsa ang “mga langit” ug ang “yuta” nga gihisgotan dinhi? Unsa ang “mga elemento” nga pagatunawon? Ug unsay gipasabot ni Pedro sa mga pulong nga “ang yuta ug ang mga buhat diha niana mahikyad”? Ang pagkahibalo sa tubag niini motabang kanato nga mahimong andam sa makalilisang nga mga panghitabo sa duol nga umaabot.

Ang mga Langit ug ang Yuta nga Mahanaw

3. Unsa ang “mga langit” nga gihisgotan sa 2 Pedro 3:10, ug sa unsang paagi kini mahanaw?

³ Kon gamiton diha sa Bibliya sa simbolikong paagi, ang “mga langit” sagad magtumong sa mga magmamando, kinsa mas labaw sa ilang ginsakpan. (Isa. 14:13, 14; Pin. 21:1, 2) “Ang mga langit [nga] mahanaw” naghawas sa pagmando sa tawo ibabaw sa dili-diyosnong katilingban. Ang pagkahanaw niini nga mga langit uban ang “nagsagitsit nga kabanha”—o “pagdahunog,” sumala sa laing hubad—mahimong magpaila sa kalit nga pagkalaglag niini.

4. Unsa ang “yuta,” ug sa unsang paagi kini pagalaglagon?

⁴ Ang “yuta” naghawas sa kalibotan sa katawhan nga nahimulag sa Diyos. Ang ingon niana nga kalibotan naglungtad sa adlaw ni Noe ug, sa sugo sa Diyos, kini nalaglag sa Lunop. “Pinaagi sa mao gihapon nga pulong ang mga langit ug ang yuta nga naglungtad karon gitagana alang sa kalayo ug gigahin alang sa adlaw sa paghukom ug sa kalaglagan sa mga tawong dili-diyosnon.” (2 Ped. 3:7) Samtang ang Lunop naglaglag sa tanang dili-diyosnon sa usa lang ka higayon, ang umaabot nga paglaglag panahon sa “dakong kasakitan” anam-anam nga mahitabo. (Pin. 7:14) Sa unang hugna sa maong kasakitan, palihokon sa Diyos ang politikal nga mga magmamando niining kalibotana sa paglaglag sa “Dakong Babilonya,” sa ingon magpakita sa iyang pagtamay nianang relihiyosong bigaon. (Pin. 17:5, 16; 18:8) Dayon, sa gubat sa Armagedon, ang kataposang hugna sa dakong kasakitan, si Jehova mismo magpapha sa nahibiling bahin sa kalibotan ni Satanas.—Pin. 16:14, 16; 19:19-21.

“Ang mga Elemento . . . Mangatunaw”

5. Unsay nalakip sa simbolikong mga elemento?

⁵ Unsa ang “mga elemento” nga “mangatunaw”? Ang usa ka diksiyonaryo sa Bibliya naghubit sa “mga elemento” ingong “sukaranang  mga prinsipyo.” Kana nag-ingon nga ang maong termino gigamit maylabot sa mga letra sa alpabeto. Sanglit ang mga letra sa alpabeto maoy sukaranang bahin sa pinulongan, nan ang ekspresyong “mga elemento” nga gihisgotan ni Pedro nagtumong sa paninugdang mga butang nga nagpatungha sa dili-diyosnong mga hiyas, tinamdan, paagi, ug mga tumong sa kalibotan. Ang “mga elemento” naglakip sa “espiritu sa kalibotan,” nga ‘nagalihok diha sa mga anak sa pagkadili-masinugtanon.’ (1 Cor. 2:12; basaha ang Efeso 2:1-3.) Ang maong espiritu, o “hangin,” mikuyanap sa kalibotan ni Satanas. Kini maoy nagtukmod sa mga tawo sa paghunahuna, pagplano, pagsulti, ug paglihok sa paagi nga nagbanaag sa hunahuna ni Satanas, ang mapahitas-on ug rebelyosong “magmamando sa awtoridad sa hangin.”

6. Unsang mga tinamdan ang nagpasundayag sa espiritu sa kalibotan?

⁶ Busa, nasayran man nila o wala, kadtong naapektohan sa espiritu sa kalibotan nagtugot nga ang ilang hunahuna ug kasingkasing maimpluwensiyahan ni Satanas, mao nga sila nagbanaag sa iyang hunahuna ug tinamdan. Ingong resulta, sila nagbuhat kon unsay ilang gusto, nga wala manumbaling sa kabubut-on sa Diyos. Sila nagpakitag pagkamapahitas-on, pagkamahakogon, pagkarebelyoso sa awtoridad, ug pagkamapatuyangon diha sa ‘tinguha sa unod ug tinguha sa mga mata.’—Basaha ang 1 Juan 2:15-17. a

7. Nganong angay natong ‘ampingan ang atong kasingkasing’?

⁷ Nan, hinungdanon gayod nga atong ‘ampingan ang atong kasingkasing’ pinaagi sa pagpasundayag ug diyosnong kaalam diha sa atong pagpilig mga kauban, basahon, kalingawan, ug mga Web site sa Internet! (Prov. 4:23) Si apostol Pablo misulat: “Pagbantay kamo: basin adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.” (Col. 2:8) Mas dinalian ang pagsugot sa maong sugo samtang nagkaduol ang adlaw ni Jehova, kay ang hilabihang “kainit” niini magtunaw sa tanang “elemento” sa sistema ni Satanas, nga magpaila nga dili kini makasugakod sa kainit sa kasuko sa Diyos. Magpahinumdom kini kanato sa giingon sa Malaquias 4:1: “Ang adlaw moabot nga nagdilaab sama sa hudno, ug ang tanang mapangahason ug ang tanan nga nagabuhat sa pagkadaotan mahimong sama sa dagami. Ug ang adlaw nga moabot molamoy gayod kanila.”

“Ang Yuta ug ang mga Buhat Diha Niana Mahikyad”

8. Sa unsang paagi “mahikyad” ang yuta ug ang mga buhat diha niana?

⁸ Unsay gipasabot ni Pedro sa dihang siya misulat nga ang “yuta ug ang mga buhat diha niana mahikyad”? Ang pulong “mahikyad” mahimong hubaron usab nga “madiskobrehan” o “mayagyag.” Gipasabot ni Pedro nga panahon sa dakong kasakitan, iyagyag ni Jehova nga ang kalibotan ni Satanas nakigbatok Kaniya ug sa Iyang Gingharian ug busa angay kining laglagon. Ang Isaias 26:21 nagtagna bahin nianang panahona: “Si Jehova mogula gikan sa iyang dapit aron maningil sa kasaypanan sa molupyo sa yuta batok kaniya, ug ang yuta tinong magpadayag sa iyang pagpabanaw ug dugo ug dili na magtabon sa iyang mga pinatay.”

9. (a) Unsay angay natong isalikway, ug ngano? (b) Unsay angay natong ugmaron, ug ngano?

⁹ Sa adlaw ni Jehova, kadtong nagpaumol sa kalibotan ug sa daotang espiritu niini magpadayag sa ilang tinuod nga kinaiya, nga magpinatyanay pa gani. Sa pagkatinuod, posible nga ang daghang matang sa mapintas nga kalingawan nga popular karon nagkondisyon sa hunahuna sa mga tawo alang sa panahon nga ang matag usa “mobakyaw batok sa kamot sa iyang isigkatawo.” (Zac. 14:13) Nan, hinungdanon gayod nga atong isalikway ang bisan unsa—mga salida, libro, dula sa video, ug uban pa—nga mag-ahat kanato sa pag-ugmad ug mga kinaiya nga dulumtanan sa Diyos, sama sa pagkamapahitas-on ug gugma sa kapintasan! (2 Sam. 22:28; Sal. 11:5) Hinunoa, ugmaron nato ang bunga sa balaang espiritu sa Diyos, kay ang maong mga hiyas  motabang kanato sa paglahutay sa kainit sa kasuko ni Jehova.—Gal. 5:22, 23.

‘Bag-ong mga Langit ug Bag-ong Yuta’

10, 11. Unsa ang “bag-ong mga langit” ug “bag-ong yuta”?

¹⁰ Basaha ang 2 Pedro 3:13. Ang “bag-ong mga langit” mao ang langitnong Gingharian sa Diyos, nga natukod niadtong 1914 sa dihang natapos ang “tinudlong mga panahon sa mga nasod.” (Luc. 21:24) Kining harianong kagamhanan gilangkoban ni Kristo Jesus ug sa iyang 144,000 nga kaubang magmamando, nga ang kadaghanan nakadawat na sa ilang langitnong ganti. Sa basahon sa Pinadayag, kini nga mga pinili gihulagway ingong “balaang siyudad, ang Bag-ong Jerusalem, nga nanaog gikan sa langit gikan sa Diyos ug giandam ingong usa ka pangasaw-onon nga gidayandayanan alang sa iyang bana.” (Pin. 21:1, 2, 22-24) Maingon nga ang yutan-ong Jerusalem mao ang kaulohan sa karaang Israel, ang Bag-ong Jerusalem ug ang iyang Pamanhonon maoy naglangkob sa kagamhanan sa bag-ong sistema sa mga butang. Kining langitnong siyudad ‘manaog gikan sa langit’ pinaagi sa pagpunting sa pagtagad niini sa yuta.

¹¹ Ang “bag-ong yuta” nagtumong sa bag-ong yutan-ong katilingban nga nagpasundayag sa ilang kinabubut-ong pagpasakop sa Gingharian sa Diyos. Ang espirituwal nga paraiso nga natagamtam sa katawhan sa Diyos bisan karon mahimutang na gayod sa hustong dapit niini sa matahom nga “puloy-anang yuta sa umaabot.” (Heb. 2:5) Sa unsang paagi kita mahimong bahin nianang bag-ong sistema sa mga butang?

Mangandam Alang sa Dakong Adlaw ni Jehova

12. Nganong makurat ang kalibotan sa pag-abot sa adlaw ni Jehova?

¹² Si Pablo ug Pedro nagtagna nga ang adlaw ni Jehova moabot “sama sa kawatan”—dili mamatikdan ug kalit nga moabot. (Basaha ang 1 Tesalonica 5:1, 2.) Bisan ang matuod nga mga Kristohanon nga nagpaabot nianang adlawa makurat sa kalit nga pag-abot niana. (Mat. 24:44) Apan, mas makurat pa ang kalibotan. Si Pablo misulat: “Sa dihang sila [kadtong nahimulag kang Jehova] magaingon: ‘Kalinaw ug kasegurohan!’ unya ang kalit nga kalaglagan modangat dihadiha kanila sama sa pag-ul-ol sa kasakit sa usa ka babayeng mabdos; ug dili gayod sila makaikyas.”—1 Tes. 5:3.

13. Unsay atong buhaton aron dili kita malimbongan sa pagsinggit nilag “Kalinaw ug kasegurohan!”?

¹³ Ang pagsinggit ug “Kalinaw ug kasegurohan!” maoy lain na usab nga bakak nga gipaluyohan sa mga demonyo; apan, dili malimbongan niini ang mga alagad ni Jehova. “Kamo wala diha sa kangitngit,” misulat si Pablo, “nga tungod niana makalitan kamo nianang adlawa nga moabot sama sa mga kawatan, kay kamong tanan mga anak sa kahayag ug mga anak sa adlaw.” (1 Tes. 5:4, 5) Busa magpabilin kita sa kahayag, nga halayo sa kangitngit sa kalibotan ni Satanas. Si Pedro misulat: “Mga hinigugma, kay nasayod na kamong daan niini, pagbantay kamo nga dili madaldal uban kanila pinaagi sa kasaypanan sa masupilon-sa-balaod nga katawhan ug mangahulog gikan sa inyong kaugalingong kalig-on.”—2 Ped. 3:17.

14, 15. (a) Sa unsang paagi kita gipakitaag importansiya ni Jehova? (b) Unsang inspiradong mga pulong ang angay natong palandongon?

¹⁴ Matikdi nga si Jehova wala lang mag-ingon  nga “magbantay kamo” ug dayon wala na siyay gibuhat. Hinunoa, gipakitaan niya kitag importansiya pinaagi sa paghatag kanatog ‘abanteng kasayoran’ bahin sa pipila ka butang nga mahitabo sa umaabot.

¹⁵ Apan, ikasubo nga ang uban wala na manumbaling o nagtamay pa gani sa mga pahinumdom bahin sa panginahanglan nga magtukaw. Tingali moingon sila, ‘Kanunay na namong nadunggan ang maong pahinumdom.’ Hinunoa, angayng hinumdoman sa maong mga indibiduwal nga sa pagsulti nila niana, sila nagduhaduha kang Jehova ug sa iyang Anak, dili lang sa matinumanong ulipon. “Padayon sa pagpaabot,” miingon si Jehova. (Hab. 2:3) Si Jesus miingon usab: “Magpadayon sa pagbantay tungod kay kamo wala mahibalo kon unsang adlawa moabot ang inyong Ginoo.” (Mat. 24:42) Dugang pa, si Pedro misulat: “Unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron, nga nagapaabot ug nagabutang kanunay sa hunahuna sa presensiya sa adlaw ni Jehova!” (2 Ped. 3:11, 12) Dili gayod pakamenoson sa matinumanong ulipon ug sa Nagamandong Lawas niini ang maong hinungdanong mensahe!

16. Unsang tinamdan ang angay natong likayan, ug ngano?

¹⁶ Sa pagkatinuod, ang “daotang ulipon” mao ang nag-ingon nga nalangan ang Agalon. (Mat. 24:48) Ang maong daotang ulipon nalakip niadtong gihubit sa 2 Pedro 3:3, 4. Kana nag-ingon nga “sa kataposang mga adlaw, adunay mangabot nga mga mabiaybiayon,” kinsa, nga ‘nahiuyon sa ilang kaugalingong mga tinguha,’ nagbugalbugal niadtong naghunahuna kanunay sa adlaw ni Jehova. Oo, imbes isentro ang pagtagad sa intereses sa Gingharian, ang maong mga mabiaybiayon naghunahuna lamang sa ilang kaugalingon ug sa ilang hakog nga mga tinguha. Hinaot nga dili gayod nato maugmad kanang masinupakon ug peligrosong tinamdan! Hinunoa, atong ‘isipon ang pailob sa atong Ginoo ingong kaluwasan’ pinaagi sa pagkahimong puliki sa pagsangyaw sa Gingharian ug paghimog mga tinun-an, ug sa dili sobrang pagkabalaka bahin sa eksaktong petsa kon kanus-a moabot ang adlaw ni Jehova kay iya lamang ang pagtakda niana.—2 Ped. 3:15; basaha ang Buhat 1:6, 7.

Salig sa Diyos sa Kaluwasan

17. Unsay sanong sa matinumanong mga Kristohanon sa pasidaan ni Jesus nga mokalagiw gikan sa Jerusalem, ug ngano?

¹⁷ Sa dihang miatras ang Romanong kasundalohan sa Judea niadtong 66 K.P., gisunod sa matinumanong mga Kristohanon ang pasidaan ni Jesus nga mokalagiw dayon gikan sa siyudad sa Jerusalem. (Luc. 21:20-23) Nganong milihok dayon sila? Walay duhaduha nga kanunay silang naghunahuna sa pasidaan ni Jesus. Seguradong nasayod sila nga makaagom silag kalisdanan sa pagsunod niana, ingon sa gipasidaan ni Kristo. Apan sa samang higayon, nahibalo sila nga dili  gayod biyaan ni Jehova ang mga maunongon kaniya.—Sal. 55:22.

18. Unsay epekto sa giingon ni Jesus diha sa Lucas 21:25-28 sa imong panglantaw sa umaabot nga dakong kasakitan?

¹⁸ Angay usab nga bug-os kitang mosalig kang Jehova, kay siya lamang ang makaluwas kanato sa dihang ang presenteng sistema makaagom sa labing dakong kasakitan nga mahitabo sa kasaysayan. Sa usa ka yugto human magsugod ang dakong kasakitan apan sa dili pa ipahamtang ni Jehova ang iyang paghukom sa nahibiling bahin sa kalibotan ni Satanas, ang mga tawo “panguyapan sa kahadlok ug sa pagpaabot sa mga butang nga mahitabo diha sa gipuy-ang yuta.” Apan, samtang ang mga kaaway sa Diyos mangurog sa kahadlok, ang maunongong mga alagad ni Jehova dili mobatig kahadlok. Sila magmaya kay sila nahibalo nga haduol na ang ilang kaluwasan.—Basaha ang Lucas 21:25-28.

19. Unsay hisgotan sa sunod nga artikulo?

¹⁹ Oo, pagkanindot nga kaugmaon ang nagpaabot niadtong nagpabiling bulag sa kalibotan ug sa “mga elemento” niini! Hinunoa, ingon sa ipatin-aw sa sunod nga artikulo, dili igo nga molikay lamang kita kon unsay daotan aron makabatog kinabuhi. Kinahanglan natong ugmaron ang mga hiyas nga makapahimuot kang Jehova ug buhaton ang mga butang nga dalawaton kaniya.—2 Ped. 3:11.

[Footnote]

Makapatin-aw Ka Ba?

• Unsay gihawasan sa . . .

presenteng ‘mga langit ug yuta’?

“mga elemento”?

‘bag-ong mga langit ug bag-ong yuta’?

• Nganong bug-os kitang mosalig sa Diyos?

[Mga Pangutana sa Pagtuon]

[Hulagway sa panid 5]

Sa unsang paagi nimo ‘maampingan ang imong kasingkasing’ ug makapabiling bulag sa kalibotan?

[Hulagway sa panid 6]

Unsaon nato pagpakita nga atong ‘giisip ang pailob sa atong Ginoo ingong kaluwasan’?