Asa Ka Man Unya Panahon sa Paglaglag?

SA DIHANG laglagon na ni Jehova sa Armagedon kining daotang sistema karon sa kalibotan, unsa unyay kahimtang sa mga matul-id? Ang Proverbio 2:21, 22 nagtubag: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”

Apan, sa unsang paagi magpabilin sa yuta kadtong mga walay-ikasaway? Aduna ba unya silay salipdanan? Asa man unya ang mga matul-id panahon sa paglaglag? Ipatin-aw kini sa upat ka asoy bahin sa pagluwas diha sa Kasulatan.

Sa Dihang Hinungdanon ang Usa ka Dapit

Mahitungod sa pagluwas sa mga patriarkang si Noe ug Lot, atong mabasa sa 2 Pedro 2:5-7: “[Ang Diyos] wala magpugong sa pagsilot sa usa ka karaang kalibotan, apan nagluwas kang Noe, nga usa ka magwawali sa pagkamatarong, uban sa pito pa sa dihang siya nagpadala ug lunop sa usa ka kalibotan sa dili-diyosnong katawhan; ug pinaagi sa paghimong abo sa mga siyudad sa Sodoma ug sa Gomora siya naghukom kanila, nga naghatag ug sumbanan alang sa mga tawong dili-diyosnon labot sa mga butang nga moabot; ug siya nagluwas sa matarong nga si Lot, nga naguol pag-ayo gumikan sa pagpatuyang sa mga masupilon-sa-balaod nga katawhan diha sa malaw-ayng panggawi.”

Sa unsang paagi naluwas si Noe sa Lunop? Ang Diyos miingon kang Noe: “Ang kataposan sa tanang unod miabot sa akong atubangan, tungod kay ang yuta napuno sa kapintasan gumikan kanila; ug ania, laglagon ko sila uban sa yuta. Paghimo alang kanimo ug usa ka arka gikan sa kahoyng salongon.” (Gen. 6:13, 14) Gitukod ni Noe ang usa ka arka sumala sa gisugo ni Jehova kaniya. Pito ka adlaw una mosugod pagbundak ang ulan, si Jehova nagsugo kaniya sa pagpasulod sa mga hayop sa arka ug ingon man sa tibuok niyang panimalay. Sa ikapitong adlaw, ang pultahan gisirhan, “ug ang pagbundak sa ulan diha sa yuta nagpadayon sulod sa kap-atan ka adlaw ug kap-atan ka gabii.” (Gen. 7:1-4, 11, 12, 16) Si Noe ug ang iyang pamilya “giluwas latas sa tubig.” (1 Ped. 3:20) Kinahanglang didto sila sulod sa arka aron maluwas. Walay laing dapit sa yuta ang makahatag ug kaluwasan.—Gen. 7:19, 20.

Sa kahimtang ni Lot lahi ang instruksiyon nga gihatag kaniya. Gipahibalo siya sa duha ka manulonda kon asang dapita dili siya angayng magpabilin. “Ang tanan nga imoha sa siyudad [sa Sodoma],” gisultihan si Lot sa duha ka manulonda, “dad-a sa gawas niining dapita! Kay among gun-obon kining dapita.” Kinahanglan silang ‘moikyas ngadto sa bukirong rehiyon.’—Gen. 19:12, 13, 17.

Ang mga kasinatian ni Noe ug Lot nagpamatuod nga “si Jehova mahibalo kon unsaon pagluwas sa katawhan nga may diyosnong pagkamahinalaron gikan sa pagsulay, apan nagtagana sa dili-matarong nga katawhan alang sa adlaw sa paghukom.” (2 Ped. 2:9) Sa maong duha ka pagluwas, ang ilang kaluwasan nagdepende sa dapit nga ilang nahimutangan. Si Noe kinahanglang didto sa sulod sa arka; si Lot kinahanglang didto sa gawas sa Sodoma. Apan mao ba kini kanunay ang kahimtang? Makaluwas ba si Jehova sa mga matarong bisag dili na sila mobalhin ug laing dapit? Aron matubag kana, matikdi ang duha pa ka laing asoy bahin sa pagluwas.

Ang Dapit Hinungdanon ba Kanunay?

Sa wala pa laglaga ni Jehova ang Ehipto sa panahon ni Moises pinaagi sa ikanapulong hampak, Iyang gisugo ang mga Israelinhon sa pagwisik sa dugo sa hayop sa Paskuwa diha sa ibabaw nga bahin sa pultahan ug sa mga poste sa pultahan sa ilang mga balay. Ngano? Aron nga ‘sa dihang si Jehova  moagi na sa paghampak sa mga Ehiptohanon ug makit-an ang dugo diha sa ibabaw nga bahin sa pultahan ug diha sa duha ka poste sa pultahan, tinong pagalabyan ni Jehova ang ganghaan, ug dili niya tugotang ang kalaglagan makasulod sa ilang mga balay sa paghampak kanila.’ Niadtong gabhiona mismo, “gihampak ni Jehova ang tanang panganay sa yuta sa Ehipto, gikan sa panganay ni Paraon nga naglingkod sa iyang trono hangtod sa panganay sa binihag nga didto sa bilanggoan nga gahong, ug ang tanang panganay sa mananap.” Ang panganay sa mga Israelinhon naluwas bisag sila nagpabilin diha sa ilang panimalay.—Ex. 12:22, 23, 29.

Tagda usab ang kahimtang ni Rahab, usa ka pampam nga nagpuyo sa siyudad sa Jerico. Hapit nang sugdan niadto sa mga Israelinhon ang ilang pagpamukan sa Yutang Saad. Sa pagkaamgo ni Rahab nga ang Jerico malaglag gayod, iyang gisugilon sa duha ka Israelinhong espiya nga ang katawhan sa siyudad nangalisang tungod sa pag-abante sa mga Israelinhon. Gitagoan niya ang mga espiya ug gihangyo nga manumpa sila nga siya ug ang tibuok niyang pamilya pagaluwason inigkabihag sa Jerico. Ang mga espiya nagtugon kang Rahab sa pagtigom sa iyang pamilya sulod sa iyang balay, nga nahimutang sa dapit sa paril sa siyudad. Ang paggawas sa balay magkahulogan sa kalaglagan uban sa nahibiling katawhan sa siyudad. (Jos. 2:8-13, 15, 18, 19) Apan sa ulahi, si Jehova nagsulti kang Josue nga “ang paril sa siyudad matumpag sa bug-os.” (Jos. 6:5) Ang gipasalig sa mga espiya nga luwas nga dapit sa maong higayon daw peligroso na. Sa unsang paagi maluwas si Rahab ug ang iyang panimalay?

Pag-abot sa panahong bihagon na ang Jerico, ang mga Israelinhon naninggit ug naghuyop sa mga budyong nga sungay. “Ug nahitabo nga sa pagkadungog gayod sa katawhan [sa Israel] sa tingog sa budyong, ug ang katawhan misinggit ug usa ka dakong singgit sa pakiggubat,” nag-ingon ang Josue 6:20, “niana ang paril natumpag sa bug-os.” Wala nay tawo nga makapugong sa pagkatumpag sa paril. Apan, sa milagrosong paagi ang pagkatumpag sa paril mihunong sa dapit sa balay ni Rahab. Gimandoan ni Josue ang duha ka espiya: “Sulod kamo ngadto sa balay sa babaye, ang pampam, ug pagawasa didto ang babaye ug ang tanan nga iyaha, ingon gayod sa inyong gipanumpa kaniya.” (Jos. 6:22) Naluwas ang tanan nga didto sa sulod sa balay ni Rahab.

Unsay Labing Hinungdanon?

Unsay atong makat-onan gikan sa pagluwas kang Noe, Lot, sa mga Israelinhon sa panahon ni Moises, ug kang Rahab? Sa unsang paagi makatabang kanato kining mga asoya sa pagtino kon asa unya kita inig-abot sa kalaglagan sa presenteng daotang sistema sa mga butang?

Tinuod, naluwas si Noe sa sulod sa arka. Apan nganong didto man siya sa arka? Dili ba tungod kay siya may pagtuo ug nagmasinugtanon? “Gibuhat ni Noe ang sumala sa tanan nga gisugo sa Diyos kaniya,” matod sa Bibliya. “Gibuhat  niya ang ingon gayod.” (Gen. 6:22; Heb. 11:7) Komosta man kita? Ginabuhat ba nato ang tanan nga gisugo sa Diyos kanato? Si Noe usab “usa ka magwawali sa pagkamatarong.” (2 Ped. 2:5) Sama kaniya, madasigon ba usab kita sa pagsangyaw, bisan pag ang mga tawo sa atong teritoryo dili madinawaton?

Si Lot nakalingkawas sa kalaglagan kay siya migawas sa Sodoma. Siya naluwas tungod kay siya matarong sa panan-aw sa Diyos ug naguol pag-ayo tungod sa malaw-ayng mga buhat sa malinapasong mga tawo sa Sodoma ug Gomora. Kita ba naguol pag-ayo tungod sa malaw-ayng mga buhat nga kaylap kaayo karon? O kita ba naanad na mao nga kita dili na matugaw niana? Ato bang ginabuhat ang atong maarangan aron makaplagan kita nga “walay buling ug walay lama ug anaa sa pakigdait”?—2 Ped. 3:14.

Para sa mga Israelinhon sa Ehipto ug kang Rahab sa Jerico, ang ilang kaluwasan nagdepende sa pagpabilin sa sulod sa ilang mga balay. Nagkinahanglan kadtog pagtuo ug pagkamasinugtanon. (Heb. 11:28, 30, 31) Seguradong gitutokan sa matag Israelinhong pamilya ang ilang panganay sa dihang “dihay usa ka dakong pagtiyabaw” diha sa mga balay sa mga Ehiptohanon. (Ex. 12:30) Seguradong si Rahab ug ang iyang pamilya nagtapok ug nagginaksanay sa dihang nagkaduol ang dahunog sa nangatumpag nga mga paril. Siya nagpakita gayod ug dakong pagtuo tungod sa padayong pagkamasinugtanon ug sa pagpabilin sulod sa ilang balay.

Ang daotang kalibotan ni Satanas hapit nang malaglag. Wala pa nato hisayri kon sa unsang paagi panalipdan ni Jehova ang iyang katawhan sa makalilisang nga ‘adlaw sa iyang kasuko.’ (Sof. 2:3) Bisan kon asa man unya kita ug unsay atong kahimtang nianang panahona, makapaneguro kita nga ang atong kaluwasan magdepende sa atong pagtuo kang Jehova ug sa pagkamasinugtanon kaniya. Kasamtangan, angay natong ugmaron ang tukmang tinamdan bahin sa gitawag sa tagna ni Isaias nga atong “sulod nga mga lawak.”

“Sulod Ngadto sa Inyong Sulod nga mga Lawak”

“Lakaw, akong katawhan, sulod ngadto sa inyong sulod nga mga lawak, ug sirhi ang mga pultahan luyo kaninyo,” nag-ingon ang Isaias 26:20. “Panago kamo sa makadiyot lamang hangtod nga ang mahukmanong pagsaway molabay.” Kining tagnaa unang natuman sa 539 W.K.P. sa dihang gipukan sa mga Medianhon ug Persiano ang Babilonya. Pagsulod sa Babilonya, si Ciro nga Persiano lagmit nagsugo sa tanan nga magpabilin sa sulod sa balay kay ang iyang mga sundalo gimandoan man sa pagpatay kang bisan kinsang didto sa gawas.

Sa atong adlaw, ang “sulod nga mga lawak” niining tagnaa mahimong nalangkit gayod sa kapig 100,000 ka kongregasyon sa mga Saksi ni Jehova sa tibuok kalibotan. Ang maong mga kongregasyon adunay hinungdanong papel sa atong kinabuhi sa pagkakaron ug latas pa sa “dakong kasakitan.” (Pin. 7:14) Ang katawhan sa Diyos gisugo sa pagsulod sa ilang “sulod nga mga lawak” ug pagtago diha niana “hangtod nga ang mahukmanong pagsaway molabay.” Hinungdanon gayod nga atong ugmaron ug padayong huptan ang positibong tinamdan bahin sa kongregasyon ug magmadeterminado nga magpabilin diha niana. Atong ibutang sa kasingkasing ang tambag ni Pablo: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang makita [nato] nga ang adlaw nagkaduol na.”—Heb. 10:24, 25.

[Mga hulagway sa panid 7]

Unsay atong makat-onan gikan sa nangaging mga pagluwas sa Diyos?

[Hulagway sa panid 8]

Unsay katumbas sa “sulod nga mga lawak” sa atong panahon?