“Magmabinantayon”

“Ang kataposan sa tanang butang haduol na. . . . Magmabinantayon labot sa mga pag-ampo.”—1 PED. 4:7.

1. Unsa ang tema sa pagpanudlo ni Jesus?

 SA DINHI pa si Jesu-Kristo sa yuta, ang tema sa iyang pagpanudlo mao ang Gingharian sa Diyos. Pinaagi sa maong Gingharian, si Jehova magbindikar sa iyang unibersohanong pagkasoberano ug magbalaan sa iyang ngalan. Busa, gitudloan ni Jesus ang iyang mga tinun-an sa pag-ampo sa Diyos: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mat. 4:17; 6:9, 10) Sa dili na madugay, ang maong Ginghariang kagamhanan magtapos sa kalibotan ni Satanas ug dayon magdumala sa pagpatuman sa kabubut-on sa Diyos sa tibuok yuta. Ingon sa gitagna ni Daniel, ang Gingharian sa Diyos “magadugmok ug magatapos niining tanang gingharian [nga naglungtad karon], ug kini mobarog hangtod sa panahong walay tino.”—Dan. 2:44.

2. (a) Sa unsang paagi mahibalo ang mga sumusunod ni Jesus nga siya nagmando na sa Gingharian? (b) Unsa pay ipaila sa maong ilhanan?

² Sanglit ang pag-abot sa Gingharian sa Diyos hinungdanon kaayo para sa mga sumusunod ni Jesus, sila nangutana kaniya: “Unsa man unya ang ilhanan sa imong presensiya ug sa kataposan sa sistema sa mga butang?” (Mat. 24:3) Aduna gayoy makita nga ilhanan sanglit ang presensiya ni Kristo ingong magmamando sa Gingharian dili man makita dinhi sa yuta. Ang maong ilhanan langkoban sa lainlaing panghitabo nga gitagna sa Kasulatan. Busa, ang mga sumusunod ni Jesus nga buhi nianang panahona makasabot nga siya nagsugod na sa pagmando sa langit. Kana magtimaan usab sa sinugdanan sa yugto sa panahon nga nailhan diha sa Bibliya ingong “kataposang mga adlaw” sa daotang sistema sa mga butang nga nagdominar karon sa yuta.—2 Tim. 3:1-5, 13; Mat. 24:7-14.

Magmabinantayon sa Kataposang mga Adlaw

3. Nganong kinahanglang magmabinantayon ang mga Kristohanon?

³ Si apostol Pedro misulat: “Ang kataposan sa tanang butang haduol na. Busa, batoni ang maayong panghunahuna, ug magmabinantayon labot sa mga pag-ampo.” (1 Ped. 4:7) Ang  mga sumusunod ni Jesus kinahanglang magmabinantayon sa mga panghitabo sa kalibotan nga nagpaila nga siya nagmando na sa Gingharian. Ug magmabinantayon pa gayod sila samtang magkaduol ang kataposan sa presenteng daotang sistema sa mga butang. Giingnan ni Jesus ang iyang mga tinun-an: “Magpadayon sa pagbantay, kay kamo wala mahibalo kon kanus-a moabot ang agalon sa balay [sa pagpahamtang ug paghukom sa kalibotan ni Satanas].”—Mar. 13:35, 36.

4. Itandi ang tinamdan sa mga tawong bahin sa kalibotan ni Satanas ug nianang iya sa mga alagad ni Jehova. (Ilakip ang kahon.)

⁴ Kadaghanan sa mga tawo nailalom sa pagmando ni Satanas, ug sila wala magmabinantayon sa kahulogan sa mga panghitabo sa kalibotan. Wala sila mahibalo nga si Kristo nagmando na sa Gingharian. Apan ang matuod nga mga sumusunod ni Kristo nagmabinantayon ug nakasabot sa tinuod nga kahulogan sa mga panghitabo sa miaging siglo. Sukad sa 1925, ang mga Saksi ni Jehova nakasabot nga ang Gubat sa Kalibotan I ug ang mga panghitabo human niana maoy lig-ong pamatuod nga si Kristo nagsugod pagmando sa langit niadtong 1914. Busa, nagsugod na ang kataposang mga adlaw niining daotang sistema sa mga butang ilalom ni Satanas. Bisan tuod wala sila mahibalo sa kahulogan niana, daghang tawo nga naniid sa mga panghitabo ang nakaamgo sa dakong kalainan tali sa yugto una pa ang Gubat sa Kalibotan I ug sa yugto human niana.—Tan-awa ang kahong  “Ang Yugto sa Kagubot Nagsugod.”

5. Nganong hinungdanon kaayo nga magpadayon sa pagbantay?

⁵ Halos usa na ka siglo karon, ang makalilisang nga mga panghitabo sa tibuok kalibotan nagpamatuod nga kita nagkinabuhi na sa kataposang mga adlaw. Diyutay na lang kaayo ang panahon nga nahibilin sa dili pa mandoan ni Jehova si Kristo sa pagpanguna sa gamhanang mga manulonda sa paglaglag sa kalibotan ni Satanas. (Pin. 19:11-21) Ang matuod nga mga Kristohanon gisugo sa pagpadayon sa pagbantay. Busa, kinahanglang padayon nato kanang buhaton samtang kita nagapaabot sa kataposan niining sistemaha. (Mat. 24:42) Kinahanglang magmabinantayon kita, ug ilalom sa pagtultol ni Kristo, kinahanglang buhaton nato ang usa ka espesipikong buluhaton sa tibuok yuta.

 Usa ka Tibuok-Yutang Buluhaton

6, 7. Sa unsang paagi miuswag ang buluhatong pagsangyaw sa Gingharian niining kataposang mga adlaw?

⁶ Ang buluhaton nga kinahanglang himoon sa mga alagad ni Jehova gitagna ingong bahin sa mga ilhanan nga kita anaa na sa kataposang mga adlaw niining daotang sistema sa mga butang. Gihubit ni Jesus kining tibuok-kalibotang buluhaton sa dihang iyang gihisgotan ang lainlaing butang nga mahitabo sa panahon sa kataposan. Nalakip sa iyang tagna kining makahuloganong pamulong: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mat. 24:14.

⁷ Hunahunaa ang pipila ka panghitabo nga nalangkit nianang bahina sa tagna ni Jesus. Diyutay ra kaayo ang nagmantala sa maayong balita sa dihang nagsugod ang kataposang mga adlaw niadtong 1914. Sa pagkakaron, daghan na kaayo sila. Aduna nay kapin sa 7,000,000 ka Saksi ni Jehova nga nagsangyaw sa tibuok yuta, nga nagtigom diha sa kapin sa 100,000 ka kongregasyon. Aduna pay 10,000,000 nga nakig-uban sa mga Saksi ni Jehova niadtong 2008 panahon sa Memoryal sa kamatayon ni Kristo. Dako gayod kana nga pag-uswag kay sa miaging tuig.

8. Nganong ang pagsupak wala makapugong sa kalamposan sa atong pagsangyaw?

⁸ Usa gayod ka dakong pamatuod mahitungod sa Gingharian sa Diyos ang ginahatag ngadto sa tanang kanasoran sa dili pa matapos kining sistemaha! Napalampos kana bisan pag si Satanas “ang Diyos niini nga sistema sa mga butang.” (2 Cor. 4:4) Iyang giimpluwensiyahan ang tanang politikanhon, relihiyoso, ug komersiyal nga mga elemento niining kalibotana maingon man ang mga paagi niini sa pagpakaylap ug impormasyon. Nan, unsa may hinungdan sa makapahinganghang kalamposan sa buluhatong pagsangyaw? Ang pagpaluyo ni Jehova niini. Busa, ang pagsangyaw sa Gingharian nagapadayon gayod bisan pag gipaningkamotan ni Satanas nga pahunongon kana.

9. Nganong matawag ug milagro ang atong espirituwal nga pag-uswag?

⁹ Ang kalamposan sa pagsangyaw sa Gingharian, ang pag-usbaw sa gidaghanon sa katawhan ni Jehova, ug ang ilang espirituwal nga pag-uswag matawag nga usa ka milagro. Kon wala ang pagpaluyo sa Diyos, nga naglakip sa iyang paggiya ug  pagpanalipod sa iyang katawhan, dili gayod molampos ang buluhatong pagsangyaw. (Basaha ang Mateo 19:26.) Makaseguro kita nga sa paglihok sa balaang espiritu sa Diyos diha sa kasingkasing sa mga tawong mabinantayon ug andam moalagad, kining buluhatong pagsangyaw magmalamposon, “ug unya moabot ang kataposan.” Hapit na gayod kanang moabot.

Ang “Dakong Kasakitan”

10. Giunsa paghubit ni Jesus ang umaabot nga dakong kasakitan?

¹⁰ Ang kataposan niining daotang sistema mahitabo sa yugto nga gitawag ug “dakong kasakitan.” (Pin. 7:14) Ang Bibliya wala magtug-an kanato kon unsa kadugaya kanang yugtoa, apan si Jesus miingon: “Aduna unyay dakong kasakitan nga ang ingon niana wala pa mahitabo sukad sa sinugdan sa kalibotan hangtod karon, ug dili na gayod mahitabo pa.” (Mat. 24:21) Kon atong itandi ang kasakitan nga naagoman na niining kalibotana, sama niadtong sa Gubat sa Kalibotan II diin mga 50 ngadto sa 60 ka milyong kinabuhi ang nakalas, ang umaabot nga dakong kasakitan mas grabe pa gayod. Kini matapos sa gubat sa Armagedon. Nianang panahona gamiton ni Jehova ang iyang mga tiglaglag aron mahanaw ang tanang bahin sa yutan-ong sistema ni Satanas.—Pin. 16:14, 16.

11, 12. Unsang panghitabo ang magtimaan sa pagsugod sa dakong kasakitan?

¹¹ Ang tagna sa Bibliya wala maghatag ug petsa kon kanus-a magsugod ang unang hugna sa dakong kasakitan, apan nagtug-an kini kanato kon unsang talagsaong panghitabo ang magtimaan sa pagsugod niini. Kana mao ang paglaglag sa tanang bakak nga relihiyon pinaagi sa politikanhong mga gahom. Sa mga tagna sa Bibliya nga makita diha sa Pinadayag kapitulo 17 ug 18, ang bakak nga relihiyon gipakasama sa usa ka bigaon nga nakighilawas sa politikal nga mga sistema sa yuta. Gipakita sa Pinadayag 17:16 nga sa dili madugay kining politikal nga mga elemento “magadumot sa bigaon ug magalaglag ug magahubo kaniya, ug magakaon sa iyang unod ug magaugdaw kaniya sa kalayo.”

¹² Sa dihang moabot na ang panahon nga mahitabo kana, ‘ibutang kini sa Diyos sa kasingkasing [sa politikal nga mga magmamando] aron buhaton ang iyang hunahuna’ nga mao ang paglaglag sa tanang bakak nga relihiyon. (Pin. 17:17) Busa ikaingon nga kining maong kalaglagan naggikan sa Diyos. Mao kini ang iyang paghukom batok sa salingkapaw nga relihiyon nga dugay nang nagtudlog mga doktrina nga supak sa kabubut-on sa Diyos ug naglutos sa iyang mga alagad. Ang kalibotan sa katibuk-an wala magdahom niining umaabot nga kalaglagan sa bakak nga relihiyon. Apan gidahom kana sa matinumanong mga alagad ni Jehova. Ug niining kataposang mga adlaw, sila nagpahibalo niana sa mga tawo.

13. Unsay nagpakita nga ang paglaglag sa bakak nga relihiyon dali rang matapos?

¹³ Makurat gayod ang mga tawo nga makita ang pagkalaglag sa bakak nga relihiyon. Ang tagna sa Bibliya nagpakita nga bisan ang pipila sa “mga hari sa yuta” moingon bahin sa maong kalaglagan: “Pagkaalaot, pagkaalaot, . . . tungod kay sa usa lamang ka takna nahiabot ang paghukom batok kanimo!” (Pin. 18:9, 10, 16, 19) Ang paggamit sa Bibliya sa mga pulong ‘usa ka takna’ nagpakita nga dali ra kining matapos.

14. Sa dihang ang mga kaaway ni Jehova moatake na sa iyang mga alagad, unsay iyang buhaton?

¹⁴ Atong nasabtan nga human malaglag ang bakak nga relihiyon, atakehon sa mga kaaway ang mga alagad ni Jehova, nga nagmantala sa iyang mga mensahe sa paghukom. (Ezeq. 38:14-16) Sa dihang magsugod ang maong pag-atake, ang mga kaaway atubangon ni Jehova, kinsa nagsaad nga iyang panalipdan ang iyang matinumanong katawhan. Si Jehova nag-ingon: “Sa akong kainit, sa kalayo sa akong mabangis nga kasuko, ako mosulti  gayod. . . . Ug sila makaila gayod nga ako mao si Jehova.” (Basaha ang Ezequiel 38:18-23.) Ang Diyos nag-ingon diha sa iyang Pulong: “Siya nga nagahilabot kaninyo [sa iyang matinumanong mga alagad] nagahilabot sa kalimutaw sa akong mata.” (Zac. 2:8) Busa sa dihang ang iyang mga kaaway magsugod na sa ilang tibuok-yutang pag-atake sa iyang mga alagad, si Jehova molihok. Mosangko kini sa kataposang hugna sa dakong kasakitan—ang Armagedon. Ubos sa pagdumala ni Kristo, ang gamhanang mga manulonda magpahamtang sa paghukom ni Jehova batok sa kalibotan ni Satanas.

Kon sa Unsang Paagi Kita Angayng Maapektohan

15. Sa unsang paagi kita angayng maapektohan sa pagkahibalo nga hapit nang matapos kining sistemaha?

¹⁵ Sa unsang paagi kita angayng maapektohan sa pagkahibalo nga haduol na kaayo ang kataposan niining daotang sistema? Si apostol Pedro misulat: “Sanglit kining tanang butanga pagatunawon man sa ingon, angay nga unsang matanga nga mga tawo kamo unya diha sa balaang mga buhat sa panggawi ug mga buhat sa diyosnong pagkamahinalaron!” (2 Ped. 3:11) Ang maong mga pulong nagpasiugda sa panginahanglan nga magmabinantayon pag-ayo aron maseguro nga ang atong panggawi nahiuyon sa mga kinahanglanon sa Diyos ug ang atong kinabuhi naglakip sa mga buhat sa diyosnong pagkamahinalaron, nga nagpakita sa atong gugma kang Jehova. Ang maong mga buhat naglakip sa paghimo sa atong maarangan sa pagsangyaw sa maayong balita sa Gingharian sa dili pa moabot ang kataposan. Misulat usab si Pedro: “Ang kataposan sa tanang butang haduol na. . . . Magmabinantayon labot sa mga pag-ampo.” (1 Ped. 4:7) Kita makigsuod kang Jehova ug atong ipakita ang atong gugma kaniya pinaagi sa kanunayng pagduol kaniya diha sa pag-ampo, nga mangayo sa iyang giya pinaagi sa iyang balaang espiritu ug sa iyang tibuok-kalibotang kongregasyon.

16. Nganong kinahanglan kitang mosunod gayod sa tambag sa Diyos?

¹⁶ Niining peligrosong panahon, kinahanglang sundon gayod nato ang tambag sa Pulong sa Diyos: “Pagbantay pag-ayo nga ang inyong paglakaw dili ingon sa dili-maalamon kondili ingon sa maalamon nga mga tawo, nga magapalit sa nahiangay nga panahon alang sa inyong kaugalingon, tungod kay ang mga adlaw daotan.” (Efe. 5:15, 16) Ang pagkadaotan mas kaylap karon kay sa ubang mga yugto sa kasaysayan. Si Satanas nagmugna ug daghang butang nga mopugong sa mga tawo sa pagbuhat sa kabubut-on ni Jehova o kaha makapalinga kanila. Ingong mga alagad sa Diyos, nahibalo kita niini, ug dili nato tugotan ang bisan unsa nga magbungkag sa atong pagkamaunongon sa Diyos. Nahibalo usab kita kon unsay hapit nang mahitabo, ug kita nagasalig kang Jehova ug sa iyang mga katuyoan.—Basaha ang 1 Juan 2:15-17.

17. Hubita kon unsay bation sa mga nakalabang-buhi sa Armagedon sa dihang mahitabo ang pagkabanhaw.

¹⁷ Matuman unya ang kahibulongang saad sa Diyos nga mabuhi pag-usab ang mga patay, kay “aduna unyay pagkabanhaw sa mga matarong ug sa mga dili-matarong.” (Buh. 24:15) Matikdi kon unsa ka tino ang maong saad: “Aduna unyay pagkabanhaw”! Segurado kanang mahitabo, kay si Jehova nagsaad niana! Ang Isaias 26:19 nagsaad: “Ang imong mga patay mangabuhi. . . . Pagmata ug paghugyaw sa kalipay, kamong mga pumoluyo sa abog! . . . Ang yuta magtugot bisan niadtong walay gahom sa kamatayon nga mahimugso.” Ang maong mga pulong unang natuman sa dihang napasig-uli ang katawhan sa Diyos kaniadto sa ilang yutang natawhan, nga nagpalig-on sa atong pagsalig sa umaabot nga literal nga katumanan niini sa bag-ong kalibotan. Pagkadako unya sa kalipay sa dihang ang mga binanhaw mahiusa sa ilang mga minahal! Oo, ang kataposan sa kalibotan ni Satanas haduol na, mao man usab ang bag-ong kalibotan sa Diyos. Hinungdanon gayod nga kita magmabinantayon!

Nahinumdom Ka Ba?

• Unsay tema sa pagpanudlo ni Jesus?

• Unsa ka kaylap karon ang pagsangyaw sa Gingharian?

• Nganong hinungdanon nga magmabinantayon?

• Unsay nakapadasig nimo sa saad sa Buhat 24:15?

[Mga Pangutana sa Pagtuon]

[Kahon/Hulagway sa panid 16, 17]

 ANG YUGTO SA KAGUBOT NAGSUGOD

Ang The Age of Turbulence: Adventures in a New World maoy ulohan sa libro ni Alan Greenspan nga giluwatan niadtong 2007. Sa halos 20 ka tuig, siya ang tsirman sa United States Federal Reserve Board, nga maoy nagdumala sa sentral nga sistema sa pamangko sa tibuok nasod. Gipasiugda ni Greenspan ang dakong kalainan tali sa kahimtang sa kalibotan una pa sa 1914 ug sa mga panghitabo human niana:

“Sumala sa mga balita, ang kalibotan sa wala pa ang 1914 morag mas sibilisado ug mauswagon; daw makab-ot na sa tawo ang kahingpitan. Ang way-kokaluoy nga pagnegosyog mga ulipon natapos sa ika-19ng siglo. Daw nagkamenos ang kapintasan. . . . Miuswag ang teknolohiya sa ika-19ng siglo, nga nakapatunghag mga riles, telepono, sugang dekoryente, sinehan, demotor nga mga sakyanan, ug daghan kaayong kasangkapan sa balay. Ang siyensiya sa medisina, mas maayong nutrisyon, ug ang pagsuplay ug tubig nga mainom ngadto sa mas daghang tawo nakapataas sa kinabuhi . . . Ang tanan mibati nga magpadayon ang maong pag-uswag.”

Apan . . . “ang Gubat sa Kalibotan I labawng nakadaot sa kinaiya sa tawo ug sa sibilisasyon kay sa Gubat sa Kalibotan II nga nakakalas ug mas daghang kinabuhi: ang nag-unang gubat nagpapha sa usa ka ideya. Dili mapapas sa akong panumdoman ang kahimtang sa wala pa ang Gubat sa Kalibotan I, sa dihang morag walay kinutoban ang tulin nga pag-uswag sa katawhan. Sa pagkakaron ang atong panglantaw lahi na kaayo kay sa miaging siglo apan mas nahiuyon kini sa tinuod nga kahimtang. Ang kalisang, pag-init sa globo, o ang grabeng pagpamolitika makadaot ba usab kaha sa nakapauswag-sa-kinabuhi nga globalisasyon maingon nga ang Gubat sa Kalibotan I nakadaot sa sibilisasyon kaniadto? Walay makaseguro sa tubag niana.”

Si Greenspan nahinumdom sa gisulti kaniadto sa iyang maestro sa Economics nga si Propesor Benjamin M. Anderson (1886-1949): “Kadtong may igo nang kabuot nga mahinumdom ug makasabot kon sama sa unsa ang kalibotan sa wala pa ang Gubat sa Kalibotan I maghandom gayod niana. Dihay kasegurohan nga wala na gayod maglungtad karon.”—Economics and the Public Welfare.

Mao usab kanay panghinapos diha sa basahong A World Undone, ni G. J. Meyer, nga gipatik sa 2006. Atong mabasa: “Ang mga hitabo sa kasaysayan sagad ikaingon nga ‘nag-usab sa tanan.’ Mao kini ang gipahinabo sa Dakong Gubat [1914-1918]. Ang maong gubat nag-usab gayod sa tanan: dili lang sa mga utlanan, dili lang sa mga gobyerno ug sa dulnganan sa kanasoran, kondili sa panglantaw sa mga tawo sa kalibotan ug sa ilang kaugalingon. Nakapatungha kana ug usa ka modernong kalibotan nga dili sama sa may-kasegurohang kalibotan nga nag-una niana.”

[Hulagway sa panid 18]

Sa Armagedon, gamiton ni Jehova ang iyang gamhanang mga manulonda