Determinado sa Paghatag ug Bug-os nga Pamatuod
Determinado sa Paghatag ug Bug-os nga Pamatuod
“Siya nagsugo kanamo nga magwali ngadto sa katawhan ug maghatag ug bug-os nga pamatuod.”—BUH. 10:42.
1. Unsang sugo ang gipasiugda ni Pedro sa dihang siya nakigsulti kang Cornelio?
SI Cornelio, nga usa ka Italyanong opisyal sa kasundalohan ug mahinadlokon sa Diyos, nagtigom sa iyang kaparyentehan ug mga higala. Niadtong higayona nagsugod ang dakong kausaban sa pagpakiglabot sa Diyos sa mga tawo. Gisultihan sila ni apostol Pedro nga ang mga apostoles gisugo nga “magwali ngadto sa katawhan ug maghatag ug bug-os nga pamatuod” bahin kang Jesus. Nagmabungahon gayod ang pagpamatuod ni Pedro. Ang dili-tinuli nga mga Hentil nakadawat sa espiritu sa Diyos, nabawtismohan, ug nakabatog paglaom nga mahimong mga hari sa langit uban ni Jesus. Pagkadako sa nalampos sa bug-os nga pagpamatuod ni Pedro!—Buh. 10:22, 34-48.
2. Sa unsang paagi atong nahibaloan nga ang sugo sa pagpamatuod dili lamang alang sa 12 ka apostoles?
2 Nahitabo kana niadtong 36 K.P. Mga duha ka tuig una pa niana, ang usa ka bangis nga magsusupak sa Kristiyanidad nakasinatig dakong kausaban sa iyang kinabuhi. Siya mao si Saulo nga taga-Tarso. Sa iyang pagpadulong sa Damasco, si Jesus mitungha ug miingon: “Sulod sa siyudad, ug kon unsay kinahanglan nimong pagabuhaton isulti ra kanimo.” Gitino ni Jesus sa tinun-an nga si Ananias nga si Saulo magpamatuod ngadto “sa tanang kanasoran maingon man sa mga hari ug sa mga anak sa Israel.” (Basaha ang Buhat 9:3-6, 13-20.) Sa nagkita na sila, si Ananias miingon: “Ang Diyos sa atong mga katigulangan nagpili kanimo . . . kay ikaw mahimong usa ka saksi alang kaniya ngadto sa tanang tawo.” (Buh. 22:12-16) Unsa ka masiboton si Saulo, nga sa ulahi nailhang Pablo, sa pagtuman sa maong sugo?
Siya Bug-os nga Nagpamatuod!
3. (a) Unsay atong tun-an niining artikuloha? (b) Unsay sanong sa mga ansiyano sa Efeso sa mensahe ni Pablo, ug unsang panig-ingnan ang ilang gipakita?
3 Makapadasig gayod kon detalyado natong tun-an ang tanang nahimo ni Pablo human ihatag ang maong sugo, apan karon ato unang tun-an ang iyang pakigpulong niadtong mga 56 K.P., sumala sa natala sa Buhat kapitulo 20. Gihatag niya kini sa hapit nang matapos ang iyang ikatulong misyonaryong panaw. Iyang gipaadtoan ang mga ansiyano sa kongregasyon sa Efeso human sa iyang pagkawas sa Mileto, nga usa ka pantalan sa Aegean Sea. Ang gilay-on sa Efeso maoy mga 50 kilometros, apan mas dugay ang biyahe tungod sa naglikoliko nga kadalanan. Imong mahanduraw ang kalipay sa mga ansiyano sa Efeso sa dihang ilang nadawat ang mensahe ni Pablo. (Itandi ang Proverbio 10:28.) Apan, sila kinahanglang mohimog mga kahikayan aron moadto sa Mileto. Ang pipila kanila lagmit wala motrabaho o kaha nanirado sa ilang mga tindahan. Mao kanay gihimo sa daghang Kristohanon karon aron gayod sila makatambong sa tanang sesyon sa distritong kombensiyon.
4. Sulod sa pipila ka tuig, unsay gibuhat ni Pablo samtang didto siya sa Efeso?
4 Unsa kahay gihimo ni Pablo didto sa Mileto mga tulo o upat ka adlaw sa wala pa moabot ang mga ansiyano? Kon ikaw si Pablo, unsa kahay imong himoon? (Itandi ang Buhat 17:16, 17.) Ang gisulti ni Pablo sa mga ansiyano sa Efeso motabang kanato sa pagtubag niana. Iyang gihubit ang iyang buluhaton sa pagsangyaw latas sa katuigan, lakip na sa dihang didto pa siya sa Efeso. (Basaha ang Buhat 20:18-21.) Kay nahibalo nga ang tanan mouyon kaniya, siya miingon: “Kamo nahibalo pag-ayo kon sa unsang paagi ako nakig-uban kaninyo sa tibuok panahon sukad pa sa unang adlaw nga ako mitunob sa distrito sa Asia . . . ako bug-os nga nagpamatuod.” Oo, siya determinado sa pagtuman sa sugo ni Jesus. Sa unsang paagi iyang gituman kana sa Efeso? Ang usa ka paagi mao ang pagpamatuod ngadto sa mga Hudiyo, ug siya miadto sa mga lugar nga sila makaplagan. Si Lucas nagtaho nga sa dihang si Pablo didto sa Efeso sa mga 52-55 K.P., siya ‘naghatag ug mga pakigpulong ug nangombinsir’ diha sa sinagoga. Sa dihang ang mga Hudiyo “nagpatig-a ug wala motuo,” si Pablo miadto sa ubang mga tawo diha sa siyudad ug nagpadayon sa pagsangyaw. Busa siya nagpamatuod sa mga Hudiyo ug sa mga Grego sa maong dakong siyudad.—Buh. 19:1, 8, 9.
5, 6. Nganong segurado kita nga ang pagpamalaybalay ni Pablo naglakip sa mga dili magtutuo?
5 Miabot ang panahon nga ang pipila ka Kristohanon mikuwalipikar sa pagkaansiyano, ug sila ang gipakig-estoryahan ni Pablo didto sa Mileto. Gipahinumdoman sila ni Pablo sa iyang paagi sa pagsangyaw: “Ako wala magpugong sa pagsulti kaninyo sa bisan unsa man sa mga butang nga makaayo ni sa pagtudlo kaninyo sa publiko ug sa balay ug balay.” Sa atong panahon, ang ubang tawo nag-ingon nga si Pablo naghisgot lamang kono sa iyang pagduaw ug pag-atiman sa mga isigka-Kristohanon. Apan dili. Ang paghubit dinhi nga siya ‘nagtudlo kanila sa publiko ug sa balay ug balay’ nagtumong gayod sa pagwali ngadto sa mga dili magtutuo. Mao kanay atong masabtan sa iyang sunod nga gisulti sa dihang siya miingon nga siya nagpamatuod “ngadto sa mga Hudiyo ug sa mga Grego mahitungod sa paghinulsol ngadto sa Diyos ug sa pagtuo diha sa atong Ginoong Jesus.” Busa dayag nga si Pablo nagpamatuod ngadto sa mga dili magtutuo—mga tawo nga kinahanglang maghinulsol ug motuo kang Jesus.—Buh. 20:20, 21.
6 Ang usa ka eskolar nga nagtuon ug maayo sa Kristohanon Gregong Kasulatan mikomento bahin sa Buhat 20:20: “Si Pablo migugol ug tulo ka tuig sa Efeso. Miduaw siya sa tanang balay, o labing menos misangyaw sa tanang tawo (bersikulo 26). Kini maoy pamatuod gikan sa Bibliya bahin sa pagsangyaw sa balay ug balay ug sa publiko.” Tinuod man o dili nga naduaw niya ang tanang balay, dili gayod buot ni Pablo nga malimtan sa mga ansiyano sa Efeso kon sa unsang paagi siya nagpamatuod ug kon unsay nalampos niini. Si Lucas nagtaho: “Ang tanang nagpuyo sa distrito sa Asia nakadungog sa pulong sa Ginoo, mga Hudiyo ug mga Grego.” (Buh. 19:10) Sa unsang paagi ang “tanan” sa Asia nakadungog sa mensahe, ug unsay ipasabot niini bahin sa atong pagpamatuod?
7. Sa unsang paagi ang pagsangyaw ni Pablo lagmit nakaapektar dili lamang sa mga tawong iyang gisangyawan?
7 Pinaagi sa pagsangyaw ni Pablo diha sa publiko ug sa balaybalay, daghan ang nakadungog sa iyang mensahe. Sa imong hunahuna, nagpabilin lang kaha sa Efeso ang tanang nakadungog kaniya? Wala kahay mibalhin sa laing lugar aron magnegosyo, miadto sa ilang mga paryente, o migawas sa siyudad aron magpuyo sa baryo? Imposible kana. Gani daghan karon ang naghimo niana, ug ikaw lagmit naghimo usab niana. Gawas pa, daghang tawo kaniadto ang nangabot sa Efeso aron magnegosyo o maghimog uban pang mga kalihokan. Samtang didto sila, lagmit nahimamat nila si Pablo o nakadungog kaniya nga nagsangyaw. Unsay nahitabo sa ilang pagpamauli? Kadtong midawat sa kamatuoran nagpamatuod usab. Ang uban wala tingali mahimong mga magtutuo, apan lagmit ilang gisulti ngadto sa ubang tawo ang ilang napamatian didto sa Efeso. Busa ang ilang mga paryente, silingan, o mga suki lagmit nakadungog sa kamatuoran, ug posible nga ang pipila midawat niana. (Itandi ang Marcos 5:14.) Unsay gipakita niini bahin sa posibleng epekto sa imong bug-os nga pagpamatuod?
8. Sa unsang paagi ang mga tawo sa tibuok distrito sa Asia nakadungog sa kamatuoran?
8 Bahin sa iyang ministeryo sa Efeso, si Pablo misulat nga ‘nabuksan kaniya ang usa ka dakong pultahan nga nagatultol ngadto sa kalihokan.’ (1 Cor. 16:8, 9) Unsang pultahana, ug sa unsang paagi kana nabuksan alang kaniya? Tungod sa pagsangyaw ni Pablo sa Efeso, mikaylap ang maayong balita. Tagda ang tulo ka siyudad unahan sa Efeso, ang Colosas, Laodicea, ug Hierapolis. Wala gayod kini maduaw ni Pablo, apan nakaabot didto ang maayong balita. Si Epafras gikan sa maong dapit. (Col. 2:1; 4:12, 13) Si Epafras ba nahimong Kristohanon tungod kay siya nakadungog sa pagpamatuod ni Pablo didto sa Efeso? Wala kana gidetalye sa Bibliya. Apan, sa iyang pagsangyaw sa kamatuoran sa ilang lugar, lagmit siyay gihimong hawas ni Pablo. (Col. 1:7) Ang mensahe ni Kristo lagmit nakaabot usab sa mga siyudad sa Filadelfia, Sardis, ug Tiatira sulod sa mga tuig nga si Pablo nagpamatuod didto sa Efeso.
9. (a) Unsay kinasingkasing nga tinguha ni Pablo? (b) Unsay tinuig nga teksto sa 2009?
9 Busa, ang mga ansiyano sa Efeso dakog katarongan nga modawat sa gisulti ni Pablo: “Wala ko pakamahala ang akong kalag, basta lamang akong mahuman ang akong ginadagan ug ang ministeryo nga akong nadawat sa Ginoong Jesus, nga bug-os magpamatuod sa maayong balita bahin sa dili-takos nga kalulot sa Diyos.” Kanang bersikulo naundan sa makapadasig ug makapalihok nga tinuig nga teksto sa 2009: “Bug-os magpamatuod sa maayong balita.”—Buh. 20:24.
Bug-os nga Pagpamatuod Karon
10. Giunsa nato pagkahibalo nga kita usab angayng magpamatuod sa bug-os?
10 Ang sugo nga “magwali ngadto sa katawhan ug maghatag ug bug-os nga pamatuod” naglangkit usab sa uban gawas pa sa mga apostoles. Sa dihang si Jesus nakigsulti sa iyang mga tinun-an nga nagtigom sa Galilea human sa iyang pagkabanhaw, siya nagsugo: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” Kanang sugoa mapadapat usab sa tanang matuod nga Kristohanon karon, sama sa gipakita sa mga pulong ni Jesus: “Tan-awa! ako magauban kaninyo sa tanang adlaw hangtod sa kataposan sa sistema sa mga butang.”—Mat. 28:19, 20.
11. Ang mga Saksi ni Jehova nailhan tungod sa unsang hinungdanong buluhaton?
11 Ang masibotong mga Kristohanon padayon nga magsunod nianang sugoa ug maningkamot nga “bug-os magpamatuod sa maayong balita.” Ang pangunang paagi sa pagbuhat niana mao ang pagpamalaybalay, sama sa gisulti ni Pablo sa mga ansiyano sa Efeso. Sa usa ka basahon niadtong 2007 bahin sa epektibong pagmisyonaryo, si David G. Stewart, Jr., nag-ingon: “Ang paagi sa mga Saksi ni Jehova nga ilang tudloan ang mga indibiduwal kon unsaon pagpaambit sa uban sa ilang tinuohan, mas epektibo pa kay sa dili tin-aw . . . nga [mga sermon diha sa mga pulpito]. Alang sa daghang Saksi ni Jehova, ang pagpaambit sa ilang tinuohan ngadto sa uban maoy usa ka gikalipayang buluhaton.” Unsay resulta? “Niadtong 1999, diha lamay 2 ngadto sa 4 porsiyento sa mga tawong akong gisurbi sa duha ka kaulohan sa Sidlakang Uropa ang miingon nga sila giduol sa mga misyonaryo sa mga ‘Mormon.’ Apan kapin sa 70 porsiyento ang personal nga giduol sa mga Saksi ni Jehova, ug sagad sa makadaghang higayon.”
12. (a) Nganong kita moduaw sa “makadaghang higayon” sa mga tawo sa atong teritoryo? (b) Makaasoy ka bag usa ka kasinatian bahin sa usa ka tawo nga nabag-o ang iyang tinamdan sa atong mensahe?
12 Lagmit ingon usab niana ang nasinati sa mga tawo sa inyong lugar. Posible nga nakaamot ka niana. Samtang personal nimong giduol ang mga tawo sa imong pagpamalaybalay, ikaw nakig-estorya sa mga lalaki, mga babaye, ug mga batan-on. Ang uban tingali wala maminaw bisag giduol sa “makadaghang higayon.” Ang uban basin naminaw lang makadiyot samtang imong gipaambit ang usa ka teksto o punto sa Kasulatan. Apan ngadto sa uban ikaw nakapamatuod ug maayo ug ilang gidawat ang mensahe. Kanang tanan posibleng mahitabo samtang kita “bug-os magpamatuod sa maayong balita.” Sama sa imong nahibaloan, daghang tawo ang dili interesado sa dihang sila atong giduol sa “makadaghang higayon,” apan sila nainteres sa ulahi. Lagmit dihay nahitabo kanila, o sa ilang minahal nga nagbukas sa ilang hunahuna ug kasingkasing sa kamatuoran. Karon, sila ato nang mga igsoon. Busa, ayawg hunong, bisan pag walay naminaw kanimo niining ulahi. Wala kita magdahom nga ang tanan ma-Saksi. Apan ang Diyos nagdahom nga kita padayong magmakugihon ug magmasiboton sa pagpamatuod sa bug-os.
Mga Resulta nga Lagmit Dili Nato Mahibaloan
13. Sa unsang paagi magbunga ang atong pagpamatuod bisag dili tingali nato kana mahibaloan?
13 Ang ministeryo ni Pablo nakaapektar dili lamang niadtong direkta niyang gitabangan nga mahimong mga Kristohanon. Ingon usab niana sa atong kahimtang. Maningkamot gayod kita nga kanunayng mosangyaw ug magpamatuod sa daghang tawo kutob sa maarangan. Kita mosulti sa maayong balita ngadto sa mga silingan, kauban sa trabaho, eskolmet, ug kaparyentehan. Mahibalo ba kita sa tanang resulta niana? Mahibalo tingali kita sa pipila tungod kay sila mosanong dayon, apan ang uban kanila mahimong maghulat pag hustong panahon aron ang mga binhi sa kamatuoran mogamot ug mogitib diha sa ilang kasingkasing. Bisan pag dili kana mahitabo, ang mga tawong atong gikaestorya mahimong mosulti sa uban bahin sa atong gisulti, gituohan, o panggawi. Oo, tingali dili nila tuyoon nga ang maong mga binhi matisok diha sa usa ka tabunok nga kasingkasing.
14, 15. Unsay resulta sa pagsangyaw sa usa ka igsoon?
14 Pananglitan, tagda si Ryan ug ang iyang asawang si Mandi, nga taga-Florida, sa Amerika. Sa trabahoan, gisangyawan ni Ryan ang iyang kauban. Hindu ang maong tawo ug siya nakadayeg sa binestihan ug sinultihan ni Ryan. Lakip sa ilang nahisgotan mao ang pagkabanhaw ug kahimtang sa mga patay. Usa ka gabii niana sa bulan sa Enero, ang maong tawo nangutana sa iyang asawa nga si Jodi kon unsay iyang nahibaloan bahin sa mga Saksi ni Jehova. Katoliko si Jodi ug siya miingon nga ang iya lamang nahibaloan sa mga Saksi mao ang ilang “pagpamalaybalay.” Busa gitayp ni Jodi ang “Jehovah’s Witnesses” diha sa Internet ug naablihan niya ang atong Web site nga www.watchtower.org. Mga tulo ka bulan nga si Jodi tigbasahan sa Bibliya ug sa ubang makapainteres nga mga artikulo nga naa sa maong site.
15 Miabot ang higayon nga nahimamat ni Jodi si Mandi kay mga nars man sila. Nalipay si Mandi sa pagtubag sa mga pangutana ni Jodi. Sa paglabay sa pipila ka panahon, si Jodi miingon nga ilang nahisgotan ang daghang tema sa Bibliya. Gidawat ni Jodi ang pagtuon sa Bibliya ug mitambong sa Kingdom Hall. Pagka-Oktubre, siya nahimong di-bawtismadong magmamantala, ug siya nabawtismohan pagka-Pebrero. Siya misulat: “Karon nga ako nakakat-on sa kamatuoran, ako malipayon na kaayo ug matagbawon.”
16. Unsay gipakita sa kasinatian sa usa ka brader sa Florida bahin sa atong paningkamot sa pagpamatuod sa bug-os?
16 Walay kalibotan si Ryan nga tungod sa iyang pagsangyaw sa usa ka tawo, laing tawo ang ma-Saksi. Hinuon, iyang nahibaloan sa ulahi kon unsay epekto sa iyang pagpaningkamot sa ‘pagpamatuod sa bug-os.’ Sa imong bahin, ikaw tingali mosangyaw sa balaybalay, sa trabahoan, sa eskuylahan, o sa ubang dapit, ug pinaagi niana ang kamatuoran mokaylap. Sama nga si Pablo wala mahibalo sa tanang resulta sa iyang pagsangyaw “sa distrito sa Asia,” ikaw usab dili mahibalo sa tanang resulta sa imong bug-os nga pagpamatuod. (Basaha ang Buhat 23:11; 28:23.) Apan pagkahinungdanon nga ikaw magpadayon sa pagpamatuod!
17. Unsay determinado nimong himoon sa 2009?
17 Sa 2009, hinaot nga determinado kita sa pagtuman sa sugo sa pagsangyaw diha sa balaybalay ug sa ubang mga paagi. Busa, kita makasulti sama kang Pablo: “Wala ko pakamahala ang akong kalag, basta lamang akong mahuman ang akong ginadagan ug ang ministeryo nga akong nadawat sa Ginoong Jesus, nga bug-os magpamatuod sa maayong balita bahin sa dili-takos nga kalulot sa Diyos.”
Unsay Imong Tubag?
• Sa unsang paagi bug-os nga nagpamatuod sila apostol Pedro ug Pablo ug ang uban pang mga Kristohanon sa unang siglo?
• Nganong ang epekto sa atong pagsangyaw tingali mas dako pa kay sa atong nahibaloan?
• Unsay tinuig nga teksto sa 2009, ug nganong gibati nimo nga kana haom?
[Mga Pangutana sa Pagtuon]
[Blurb sa panid 19]
Ang tinuig nga teksto sa 2009: “Bug-os magpamatuod sa maayong balita.”—Buh. 20:24.
[Hulagway sa panid 17]
Ang mga ansiyano sa Efeso nahibalo nga si Pablo kanunayng nagpamatuod sa balaybalay
[Hulagway sa panid 18]
Unsa ka dako ang epekto sa imong bug-os nga pagpamatuod?