Tubagon ni Jehova ang Kinasingkasing nga Pag-ampo

“Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.”—SAL. 83:18.

1, 2. Unsay kasinatian sa kadaghanang tawo, ug unsang mga pangutana ang mahimong isukna?

 PIPILA ka tuig kanhi, usa ka babaye ang natugaw pag-ayo sa trahedya nga nahitabo sa ilang dapit. Kay nagdako diha sa Romano Katoliko nga pamilya, siya nangayog tabang sa ilang pari, apan wala gani kini makigsulti kaniya. Busa siya miampo sa Diyos: “Wala ko makaila nimo . . . , apan nahibalo ko nga buhi ka. Palihog tabangi ako nga makaila nimo!” Wala madugay human niana, siya giduaw sa mga Saksi ni Jehova nga naghupay ug nagtudlo kaniya bahin sa Bibliya. Lakip sa daghang butang nga gitudlo kaniya mao ang ngalan sa Diyos, nga Jehova. Natandog gayod siya sa pagkahibalo niini. Siya miingon: “Mao gayod kini ang Diyos nga gusto nakong mailhan sukad pa sa akong pagkabata!”

² Daghan ang adunay susama niana nga kasinatian. Kasagaran, nahibaloan lamang nila ang ngalan ni Jehova sa dihang nabasa nila ang Salmo 83:18 diha sa Bibliya. Sa Bag-ong Kalibotang Hubad, kana mabasa: “Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok yuta.” Apan, nakapangutana ka na ba sukad kon nganong gisulat ang Salmo 83? Nganong mapugos ang matag usa sa pag-ila nga si Jehova lamang ang matuod nga Diyos? Unsay atong makat-onan sa maong salmo? Atong hisgotan kanang mga pangutanaha niining artikuloha. a

Panagkunsabo Batok sa Katawhan ni Jehova

3, 4. Kinsay nagsulat sa Salmo 83, ug unsang kapeligrohan ang iyang gihisgotan?

³ Sumala sa superskripsiyon, ang Salmo 83 maoy “usa ka salmo ni Asap.” Ang nagsulat sa maong salmo lagmit kaliwat sa Levihanon nga si Asap, nga usa ka inilang musikero panahon sa pagmando ni Haring David. Diha sa salmo, ang salmista mihangyo nga unta si Jehova molihok aron sa pagbindikar sa Iyang pagkasoberano ug sa pagpaila sa Iyang ngalan. Kini lagmit gisulat human mamatay si Solomon. Ngano man? Tungod kay panahon sa pagmando ni David ug Solomon, ang hari sa Tiro mahigalaon pa ngadto sa Israel. Sa dihang gisulat ang Salmo 83, ang mga molupyo sa Tiro nakigbatok na sa Israel ug midapig sa mga kaaway.

⁴ Ang salmista nagngalan sa napulo ka nasod nga nagkunsabo aron sa pagpuo sa katawhan sa Diyos. Ang maong mga kaaway anaa ra sa palibot sa Israel ug kini gisulat sumala sa mosunod: “Ang mga tolda sa Edom ug sa mga Ismaelinhon, sa Moab ug sa mga Hagrihanon, sa Gebal ug sa Ammon ug sa Amalek, sa Pilistia uban ang mga molupyo sa Tiro. Ang Asirya usab miduyog kanila.” (Sal. 83:6-8) Unsang panghitabo sa kasaysayan  ang gitumong sa salmo? Ang pipila nag-ingon nga kini nagtumong sa panagkunsabo sa Ammon, Moab, ug sa mga molupyo sa Bukid sa Seir batok sa Israel sa mga adlaw ni Jehosapat. (2 Cron. 20:1-26) Ang uban nagtuo nga kini naghisgot sa kasagarang mga pag-atake sa kasikbit nga nasod batok sa Israel.

5. Sa unsang paagi ang Salmo 83 makatabang sa mga Kristohanon karon?

⁵ Bisan unsa pay gitumong niana nga salmo, tataw nga gipaluyohan ni Jehova nga Diyos ang pagsulat niini sa salmista sa panahon nga nameligro ang iyang katawhan. Nagpalig-on usab kini sa mga alagad sa Diyos karon, kinsa sa tibuok nilang kasaysayan nakasinatig sunodsunod nga pag-atake sa mga kaaway nga determinadong mopuo kanila. Ug kini magpalig-on gayod kanato sa dihang tigomon na unya ni Gog sa Magog ang iyang mga demonyo sa ilang kataposang pagsulay sa pagpuo sa tanan nga nagsimba sa Diyos sa espiritu ug sa kamatuoran.—Basaha ang Ezequiel 38:2, 8, 9, 16.

Ang Pangunang Gikabalak-an sa Salmista

6, 7. (a) Unsay giampo sa salmista diha sa pangbukas nga mga pulong sa Salmo 83? (b) Unsay pangunang gikabalak-an sa salmista?

⁶ Pamati samtang ipahayag sa salmista ang iyang gibati diha sa pag-ampo: “Oh Diyos, ayaw pagpakahilom sa imong bahin; ayaw pagpabiling walay timik, ug ayaw pagpabiling walay lihok, Oh Diyos. Kay, tan-awa! nagkagubot ang imong mga kaaway; ug ang mga nagadumot pag-ayo kanimo nagpatuyhakaw sa ilang ulo. Sa kamalipatlipaton sila nagahimog kompidensiyal nga panagsultihanay batok sa imong katawhan . . . Kay sa kasingkasing sila nagkausa sa pagsabotsabot; sila naghimo ug usa ka pakigsaad batok kanimo.”—Sal. 83:1-3, 5.

⁷ Unsay pangunang gikabalak-an sa salmista? Siyempre, siya nabalaka pag-ayo bahin sa iyang kaluwasan ug nianang sa iyang pamilya. Apan diha sa iyang pag-ampo, mas nabalaka siya sa kaulawan nga ipahinabo diha sa ngalan ni Jehova ug sa mga panghulga batok sa nasod nga nagdala nianang ngalana. Hinaot atong huptan ang susamang timbang nga hunahuna samtang atong ginaantos ang kalisod sa kataposang mga adlaw niining daang sistema sa mga butang.—Basaha ang Mateo 6:9, 10.

8. Nganong nagkunsabo ang mga nasod batok sa Israel?

⁸ Ang salmista naghisgot sa mga kaaway sa Israel nga nag-ingon: “Umari kamo ug paphaon nato sila ingon nga usa ka nasod, aron dili na hinumdoman ang ngalan sa Israel.” (Sal. 83:4) Gidumtan gayod sa maong mga nasod ang pinili nga katawhan sa Diyos! Apan aduna silay laing motibo sa ilang panagkunsabo. Ilang gitinguha ang yuta sa Israel ug nanghambog: “Atong panag-iyahon ang puloy-anang mga dapit sa Diyos alang sa atong kaugalingon.” (Sal. 83:12) Nahitabo ba usab kini sa atong adlaw? Oo!

“Imong Balaang Puloy-anang Dapit”

9, 10. (a) Sa karaang panahon, unsa ang balaang puloy-anang dapit sa Diyos? (b) Unsang mga panalangin ang gipahimuslan karon sa dinihogang nanghibilin ug sa “ubang mga karnero”?

⁹ Sa karaang panahon, ang Yutang Saad nagtumong sa balaang puloy-anang dapit sa Diyos. Hinumdomi ang awit sa kadaogan nga giawit sa mga Israelinhon human sila luwasa gikan sa Ehipto: “Sa imong mahigugmaong-kalulot ikaw nagtultol sa katawhan nga imong gibawi; sa imong kusog ikaw tinong maghatod kanila ngadto sa imong balaang puloy-anang dapit.” (Ex. 15:13) Sa ulahi, kanang “puloy-anang dapit” naglakip sa templo nga may mga saserdote ug kaulohang siyudad, ang Jerusalem. Kini usab may kaliwat sa mga hari nga naggikan kang David ug milingkod sa trono ni Jehova. (1 Cron. 29:23) Haom lamang nga gitawag ni Jesus ang Jerusalem ingong “siyudad sa dakong Hari.”—Mat. 5:35.

¹⁰ Komosta sa atong adlaw? Sa 33 K.P., natawo ang usa ka bag-ong nasod, ang “Israel sa Diyos.” (Gal. 6:16) Ang maong nasod, nga gilangkoban sa dinihogang mga igsoon ni Jesu-Kristo, nagtuman sa buluhaton nga wala matuman sa unodnong Israel, ang pagkahimong mga saksi sa ngalan sa Diyos. (Isa. 43:10; 1 Ped. 2:9) Si Jehova nagsaad kanila sama sa iyang gisaad sa karaang Israel: “Ako mahimong ilang Diyos, ug sila mahimong  akong katawhan.” (2 Cor. 6:16; Lev. 26:12) Sa 1919, gidala ni Jehova ang mga nahibilin sa “Israel sa Diyos” ngadto sa usa ka linain nga relasyon. Ug nianang panahona, ilang gipanag-iya ang “yuta,” usa ka espirituwal nga natad sa kalihokan diin ilang napahimuslan ang espirituwal nga paraiso. (Isa. 66:8) Sukad sa katuigan sa 1930, minilyon sa “ubang mga karnero” ang miuban kanila. (Juan 10:16) Ang kalipay ug ang espirituwal nga pag-uswag niining modernong-adlaw nga mga Kristohanon nagpamatuod gayod sa pagkamatarong sa pagkasoberano ni Jehova. (Basaha ang Salmo 91:1, 2.) Nasuko gayod niini si Satanas!

11. Unsa ang pangunang tumong sa mga kaaway sa Diyos?

¹¹ Latas sa panahon sa kataposan, gisulsolan ni Satanas ang iyang mga ginsakpan sa yuta sa pagsupak sa dinihogang nanghibilin ug sa ubang mga karnero. Nahitabo kana sa Kasadpang Uropa ilalom sa mga Nazi ug sa Sidlakang Uropa ilalom sa gobyernong Komunista sa Unyon Sobyet. Nahitabo usab kini sa uban pang mga dapit, ug kini mahitabo pa pag-usab, ilabina sa kataposang pag-atake ni Gog sa Magog. Sa maong pag-atake, lagmit ilogon sa mga magsusupak ang propiedad ug kabtangan sa katawhan ni Jehova, sama sa gibuhat sa mga kaaway sa kanhing panahon. Apan, ang pangunang tumong ni Satanas mao ang pagbungkag kanato ingong organisasyon aron malubong sa kalimot ang ngalan nga gihatag sa Diyos kanato. Unsay buhaton ni Jehova sa maong pagsupak sa iyang pagkasoberano? Tagdon nato pag-usab ang mga pulong sa salmista.

Pamatuod nga si Jehova Magmadaogon

12-14. Unsay gisulat sa salmista bahin sa duha ka makasaysayanhong kadaogan duol sa siyudad sa Megido?

¹² Matikdi ang lig-ong pagsalig sa salmista sa katakos ni Jehova nga pakyason ang mga plano sa kaaway nga mga nasod. Gilakip niya sa iyang salmo ang duha ka dagkong kadaogan sa Israel batok sa ilang mga kaaway duol sa karaang siyudad sa Megido, nga nag-umbaw sa walog nga samag ngalan niana. Panahon sa ting-init, ang naugang Suba sa Kison makita nga naglikoliko latas sa walog. Human sa pagbunok sa ulan sa tingtugnaw, motaas ang tubig sa suba nga tungod niana mabahaan ang patag. Lagmit mao kanay rason kon nganong ang maong suba gitawag usab ug “katubigan sa Megido.”—Maghu. 4:13; 5:19.

¹³ Mga 15 kilometros tabok sa walog gikan sa Megido nahimutang ang bungtod sa More diin sa mga adlaw ni Maghuhukom Gideon, ang hiniusang kasundalohan sa mga Midianhon, Amalekanhon, ug ang mga taga-Sidlakan nagkatigom aron makiggubat. (Maghu. 7:1, 12) Ang gamayng kasundalohan ni Gideon, sa kataposan mikabat lamang ug 300 ka lalaki, apan sa tabang ni Jehova, ilang gipildi ang dakong kasundalohan sa mga kaaway. Sa unsang paagi? Pinaagi sa pagsunod sa sugo sa Diyos, ilang gilibotan ang kampo sa mga kaaway sa takna sa kagabhion nga nagdalag mga tadyaw nga maoy gitagoan sa nagsigang mga sulo. Sa usa ka pagsenyas ni Gideon, gibuak sa iyang kasundalohan ang mga tadyaw ug nadayag ang mga sulo. Dayon, ilang gihuyop ang ilang mga budyong ug misinggit: “Ang espada ni Jehova ug ni Gideon!” Tungod niana nagkaguliyang ang mga kaaway, ug sila nagpinatyanay; ang mga nahibiling buhi mikalagiw tabok sa Suba sa Jordan. Apan, ang ubang mga Israelinhon mitabang usab sa paggukod kanila. Mao nga tanantanan, 120,000 ka kaawayng mga sundalo ang gipamatay.—Maghu. 7:19-25; 8:10.

¹⁴ Mga sayis kilometros saylo sa bungtod sa More, latas sa walog gikan sa Megido, nahimutang ang Bukid sa Tabor. Didto, si Maghuhukom Barak nagtigom ug 10,000 ka sundalong Israelinhon aron makigsangka sa kasundalohan ni Jabin, ang Canaanhong hari sa Hazor, ilalom sa pagpanguna sa iyang pangulo sa kasundalohan nga si Sisera.  Kining Canaanhong kasundalohan adunay 900 ka karong iggugubat nga ang mga ligid niini gitaorag tag-as ug hait nga mga puthaw. Samtang ang kasundalohan sa Israel nga ordinaryo rag mga hinagiban nagpahiluna sa Bukid sa Tabor, ang kasundalohan ni Sisera kompiyansa kaayong miadto sa walog. Dayon, “gipahinabo ni Jehova nga magkaguliyang si Sisera ug ang tanan niyang mga karong iggugubat ug ang tibuok kampo.” Lagmit, ang kalit nga pagbunok sa ulan ug pagtaas sa tubig sa Suba sa Kison maoy hinungdan nga nalubong sa lapok ang mga karo. Ug gipamatay sa mga Israelinhon ang tanang kasundalohan.—Maghu. 4:13-16; 5:19-21.

15. (a) Unsay giampo sa salmista nga buhaton unta ni Jehova? (b) Ang ngalan sa kataposang gubat sa Diyos magpahinumdom kanato sa unsa?

¹⁵ Ang salmista mihangyo kang Jehova nga unta ingon usab niana ang iyang buhaton sa mga nasod nga nanghulga sa pagpuo sa Israel sa iyang adlaw. Siya miampo: “Buhata kanila ang ingon sa gibuhat mo sa Midian, ang ingon sa gibuhat mo kang Sisera, ang ingon sa gibuhat mo kang Jabin didto sa bul-oganang walog sa Kison. Nalaglag sila didto sa En-dor; nahimo sila nga kinalibang alang sa yuta.” (Sal. 83:9, 10) Makaiikag, ang kataposang gubat sa Diyos batok sa kalibotan ni Satanas gitawag ug Har–Magedon (nga nagkahulogan ug “Bukid sa Megido”), o Armagedon. Kanang ngalana magpahinumdom kanato sa mahukmanong mga gubat nga nahitabo duol sa Megido. Ang kadaogan ni Jehova sa mga gubat sa karaang panahon nagpasalig kanato nga siya modaog gayod sa gubat sa Armagedon.—Pin. 16:13-16.

Mag-ampo Alang sa Pagbindikar Kang Jehova

16. Sa unsang paagi ‘napuno sa kaulawan’ ang mga magsusupak karon?

¹⁶ Niining “kataposang mga adlaw,” gipakyas ni Jehova ang tanang paningkamot nga puohon ang iyang katawhan. (2 Tim. 3:1) Tungod niana, naulawan ang mga magsusupak. Mao kanay gilandongan sa Salmo 83:16 nga nag-ingon: “Pun-a ang ilang mga nawong sa kaulawan, aron ang katawhan mangita sa imong ngalan, Oh Jehova.” Diha sa lainlaing nasod, napakyas gayod ang mga kaaway sa ilang paningkamot nga pahilomon ang mga Saksi ni Jehova. Sa maong mga dapit, ang pagkamaunongon ug pagkamalahutayon sa mga magsisimba sa bugtong matuod nga Diyos nagsilbing pamatuod sa mga mahigugmaon sa pagkamatarong, ug daghan ang ‘nangita sa ngalan ni Jehova.’ Diha sa ubay-ubayng dapit nga kanhi grabeng gilutos ang mga Saksi, mikabat na sa libolibo, gani ginatos pa ka libo, ang malipayong mga magdadayeg ni Jehova. Pagkadako nga kadaogan alang kang Jehova! Ug kaulawan gayod alang sa iyang mga kaaway!—Basaha ang Jeremias 1:19.

17. Unsang makuyaw nga kahimtang ang giatubang karon sa katawhan, ug unsang mga pulonga ang ato unyang mahinumdoman?

¹⁷ Siyempre, nahibalo kita nga ang paglutos magpadayon. Ug padayon natong isangyaw ang maayong balita—bisan ngadto sa mga magsusupak. (Mat. 24:14, 21) Apan, ang kahigayonan nga sila maghinulsol ug maluwas matapos na sa dili madugay. Mas labaw nga hinungdanon ang pagbalaan sa ngalan ni Jehova kay sa kaluwasan sa tawo. (Basaha ang Ezequiel 38:23.) Sa dihang matuman na ang gitagna sa Bibliya, nga ang mga nasod sa tibuok kalibotan magtigom aron sa pagpuo sa katawhan sa Diyos, ato unyang mahinumdoman ang mga pulong sa pag-ampo sa salmista: “Oh maulawan ug matugaw unta sila sa tanang panahon, ug manglipaghong unta sila ug malaglag.”—Sal. 83:17.

18, 19. (a) Unsay nagpaabot niadtong tinuyong mosupak sa pagkasoberano ni Jehova? (b) Unsay epekto kanimo ang pagkahibalo nga duol na ang pagbindikar sa pagkasoberano ni Jehova?

 ¹⁸ Usa ka makauulawng kalaglagan ang nagpaabot niadtong tinuyong mosupak sa pagkasoberano ni Jehova. Ang pulong sa Diyos nagpadayag nga kadtong “wala magsunod sa maayong balita” pagapatyon sa Armagedon ug makaagom sa “walay kataposang kalaglagan.” (2 Tes. 1:7-9) Ang ilang kalaglagan ug ang kaluwasan niadtong nagasimba sa Diyos maoy lig-ong pamatuod nga si Jehova lamang ang matuod nga Diyos. Sa bag-ong kalibotan, ang maong dakong kadaogan dili gayod makalimtan. Kadtong mabuhi pag-usab sa “pagkabanhaw sa mga matarong ug sa mga dili-matarong” makakat-on sa gamhanang buhat ni Jehova. (Buh. 24:15) Sa bag-ong kalibotan, ilang makita ang lig-ong ebidensiya nga maalamon gayod ang pagpasakop sa pagkasoberano ni Jehova. Ug ang mga maaghop sa ilang taliwala dihadiha makombinsir gayod nga si Jehova lamang ang matuod nga Diyos.

¹⁹ Pagkatalagsaong umaabot ang giandam sa atong mahigugmaon nga langitnong Amahan alang sa iyang matinumanong mga magsisimba! Ang salmista miampo kang Jehova nga nag-ingon: “Manglipaghong unta [ang imong mga kaaway] ug malaglag; aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” Wala ka ba matukmod sa pag-ampo nga unta bug-os nang tubagon ni Jehova ang maong pag-ampo sa salmista?—Sal. 83:17, 18.

[Footnote]

Makapatin-aw Ka Ba?

• Unsang kahimtang ang giatubang sa Israel sa dihang gisulat ang Salmo 83?

• Unsa ang pangunang gikabalak-an sa magsusulat sa Salmo 83?

• Kinsay tumong sa pagdumot ni Satanas karon?

• Sa unsang paagi bug-os tubagon ni Jehova ang pag-ampo diha sa Salmo 83:18?

[Mga Pangutana sa Pagtuon]

[Mapa sa panid 15]

(Alang sa aktual nga pagkahan-ay, tan-awa ang publikasyon)

Sa unsang paagi nalangkit sa atong umaabot ang mga gubat nga nahitabo duol sa karaang Megido?

Suba sa Kison

Haroset

Bkd. sa Carmelo

Walog sa Jezreel

Megido

Taanak

Bkd. sa Gilboa

Atabay ni Harod

More

En-dor

Bkd. sa Tabor

Dagat sa Galilea

Suba sa Jordan

[Hulagway sa panid 12]

Unsay nagtukmod sa usa ka salmista sa pagsulat ug kinasingkasing nga pag-ampo?