Pagbuntog sa mga Babag sa Pagsangyaw sa Balay-Balay

“Kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog.”—1 TES. 2:2.

1. Unsang mga babag ang giatubang ni Jeremias, ug sa unsang paagi nabuntog niya kana?

 SI Jeremias maoy usa ka tawong may pagbati sama kanato. Sa dihang gitudlo siya ni Jehova ingong “manalagna alang sa kanasoran,” siya mimulo: “Intawon, Oh Soberanong Ginoong Jehova! Ania, ako gayod dili mahibalo nga mosulti, kay ako usa ka bata lamang.” Bisan pa niana, siya misalig kang Jehova ug midawat sa maong buluhaton. (Jer. 1:4-10) Sulod sa kapig 40 ka tuig, si Jeremias nakigbisog sa kawalay pagtagad, pagsalikway, pagbiaybiay, ug pagdagmal pa gani. (Jer. 20:1, 2) May mga panahon nga morag kaundangon na siya sa iyang buluhaton. Apan, siya nagpadayon gihapon sa pagmantala sa mensahe ngadto sa nasod diin ang kadaghanan sa mga tawo wala magtagad sa iyang mensahe. Uban sa tabang sa Diyos, nabuntog ni Jeremias ang mga babag nga dili gayod unta niya mahimo sa iyang kaugalingong kusog lamang.—Basaha ang Jeremias 20:7-9.

2, 3. Sa unsang paagi ang mga alagad sa Diyos karon nag-atubang ug mga babag nga sama nianang kang Jeremias?

² Daghan sa mga alagad sa Diyos karon ang mibati usab sa gibati ni Jeremias. Sa dihang naghunahuna bahin sa pagsangyaw sa balay-balay sa unang higayon, ang pipila tingali kanato nabalaka, ‘Morag  dili gyod ko makahimo ana.’ Apan, sa dihang napalandong nato nga kabubut-on ni Jehova nga atong iwali ang maayong balita, atong gibuntog ang atong kahadlok ug kita miuban sa pagsangyaw. Bisan pa niana, daghan kanato ang nalisdan sa pagpadayon sa pagsangyaw tungod sa mga babag nga mitungha. Tinuod nga dili gayod sayon ang pagpamalaybalay sa unang higayon ug ang pagpadayon sa pagpakigbahin nianang buluhatona hangtod sa kataposan.—Mat. 24:13.

³ Komosta na man kon taudtaod ka nang nagtuon sa Bibliya uban sa mga Saksi ni Jehova ug nagtambongan na sa mga tigom sa kongregasyon apan nagpanuko sa pagsangyaw sa balay-balay? O komosta na man kon ikaw bawtismado nang Saksi nga baskog pa ug lawas apan nalisdan sa pagpamalaybalay? Dili ka angayng mahadlok kay sa lainlaing nasod may mga tawo na nga nakabuntog sa mga babag sa pagsangyaw sa balay-balay. Uban sa tabang ni Jehova, ikaw makabuntog usab niana.

Pagbaton ug Kaisog

4. Unsay nakatabang kang apostol Pablo sa pagsulti sa maayong balita nga maisogon?

⁴ Sa walay duhaduha, uyon ka nga ang buluhatong pagsangyaw sa tibuok kalibotan nagmalamposon, dili pinaagi sa gahom ug kaalam sa tawo, kondili pinaagi sa espiritu sa Diyos. (Zac. 4:6) Tinuod usab kana maylabot sa ministeryo sa matag Kristohanon. (2 Cor. 4:7) Tagda si apostol Pablo. Sa dihang siya ug ang iyang kaubang misyonaryo gidagmalan sa mga magsusupak, siya misulat: “Human kami mag-antos una ug gipasipalahan . . . sa Filipos, kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog.” (1 Tes. 2:2; Buh. 16:22-24) Daw dili katuohan nga ang usa ka magwawali nga sama ka masiboton kang Pablo kinahanglang makigbisog usahay aron makasangyaw. Apan, sama kanato, si Pablo kinahanglang mosalig kang Jehova aron iyang masangyaw ang maayong balita nga maisogon. (Basaha ang Efeso 6:18-20.) Sa unsang paagi atong masundog ang panig-ingnan ni Pablo?

5. Unsa ang usa ka paagi nga kita makabaton ug kaisog sa pagsangyaw?

⁵ Ang usa ka paagi nga kita makabaton ug kaisog sa pagsangyaw maoy pinaagi sa pag-ampo. Ang usa ka payunir miingon: “Ako mag-ampo nga makabatog pagsalig sa kaugalingon sa pagpakigsulti sa uban, mag-ampo nga akong matugkad ang kasingkasing sa mga tawo, ug mag-ampo nga magmalipayon ako sa pagtuman sa akong ministeryo. Kay kon buot hunahunaon, kang Jehova kini nga buluhaton, dili atoa, busa wala kitay mahimo kon wala ang iyang tabang.” (1 Tes. 5:17) Kitang tanan kinahanglang magpadayon sa pag-ampo nga tabangan sa balaang espiritu sa Diyos aron makasangyaw nga maisogon.—Luc. 11:9-13.

6, 7. (a) Unsang panan-awon ang nakita ni Ezequiel, ug unsay kahulogan niini? (b) Unsang pagtulon-an ang makat-onan sa mga alagad sa Diyos karon gikan sa panan-awon ni Ezequiel?

⁶ Adunay gihisgotan ang basahon ni Ezequiel nga makatabang kanato sa pagsulti nga maisogon. Sa usa ka panan-awon, gihatagan ni Jehova si Ezequiel ug usa ka linukot nga basahon nga ang atubangan ug luyo niini adunay sulat nga “mga awit sa pagbangotan ug sa pagdanguyngoy ug sa pagminatay” ug siya gisugo sa pagkaon niini, nga nag-ingon: “Anak sa tawo, kinahanglang pakan-on mo ang imong tiyan, aron mapuno nimo ang imong mga tinai niining linukot nga gihatag ko kanimo.” Unsay kahulogan niini nga panan-awon? Kinahanglang itisok ni Ezequiel sa iyang hunahuna ug kasingkasing ang mensahe nga iyang imantala. Angay nga mahimo kining bahin niya, nga magtandog sa iyang galamhan. Ang manalagna nagpadayon sa pag-ingon: “Ako mikaon niini, ug diha sa akong baba kini matam-is sama sa dugos.” Nagustohan gayod ni Ezequiel ang pagpahayag sa mensahe sa Diyos diha sa publiko nga gipakasama niya kini sa matam-is nga dugos. Gibati niya nga usa ka dakong kadungganan ang paghawas kang Jehova ug ang pagtuman sa buluhaton nga Iyang gihatag, bisan pag kana nagkahulogan nga ipahayag ang mabug-at nga mensahe ngadto sa dili-madinawaton nga mga tawo.—Basaha ang Ezequiel 2:8–3:4, 7-9.

⁷ Ang mga alagad sa Diyos karon makakuhag bililhong pagtulon-an gikan niini nga panan-awon. Kita may mabug-at usab nga mensahe nga isulti sa mga tawong dili mapabilhon sa atong mga paningkamot. Aron padayon natong lantawon nga usa ka kadungganan ang pagtuman sa hinatag-sa-Diyos nga ministeryo, kinahanglan natong basahon ug tun-an kanunay ang Pulong sa Diyos. Dili nato masabtan  sa bug-os ang Pulong sa Diyos kon kita magdalidali sa pagtuon o kon wala kitay tinong eskedyul sa paghimo niini. Imo bang mausab ang imong batasan sa personal nga pagbasa ug pagtuon sa Bibliya? Makapamalandong ka ba nga mas subsob sa imong gibasa?—Sal. 1:2, 3.

Pagsugod ug mga Panaghisgot sa Bibliya

8. Unsay gihimo sa pipila ka magmamantala sa Gingharian nga nakatabang kanila sa pagsugod ug panaghisgot sa Bibliya diha sa ilang pagpamalaybalay?

⁸ Para sa daghang magmamantala, ang kinalisdang bahin sa pagsangyaw sa balay-balay mao ang unang pagduaw. Tinuod nga sa pipila ka teritoryo, dili sayon ang pagsugod sa panaghisgot. Nakita sa pipila ka magmamantala nga mas epektibo ang ilang pagpakigsulti sa mga tawo diha sa kabalayan kon ilang sugdan kini sa mubo ug maayong pagkaandam nga presentasyon ug dayon hatagan nila ang tagbalay ug tract, sama sa gisugyot sa kahon sa ubos. Ang ulohan sa tract o ang maanindot nga hulagway niini mahimong makadani sa pagtagad sa tagbalay, nga maghatag kanatog kahigayonan sa pagsulti kanila sa daklit kon nganong kita miduaw ug sa pagsukna kanilag pangutana. Mahimo usab nga imong pakitaan ang tagbalay ug tulo o upat ka lainlaing tract ug papilion siyag usa nga iyang nagustohan. Siyempre, ang atong tumong dili lang aron makapanagtag ug mga tract o magamit kini sa pagsangyaw diha sa matag balay kondili aron makasugod ug panaghisgot nga motultol sa pagtuon sa Bibliya.

9. Nganong hinungdanon ang maayong pagpangandam?

 ⁹ Bisan unsang paagiha ang imong gamiton, ang maayong pagpangandam makatabang kanimo nga mahimong kalmado ug madasigon sa pagsangyaw sa balay-balay. Ang usa ka payunir nag-ingon: “Mas malipayon ko kon nakapangandam ko pag-ayo. Ganahan kong makigsulti gamit ang naandam nakong presentasyon.” Ang laing payunir nag-ingon, “Kon nahibalo ko sa unod sa mga publikasyon, mas ganahan kong motanyag niini.” Adunay mga kaayohan ang pagpraktis nga hilom sa imong igsusulti, apan para sa daghan, mas epektibo ang pagpraktis sa paagi nga ila kining madunggan. Kining paagiha nakatabang kanila sa paghatag kang Jehova sa ilang kinamaayohan.—Col. 3:23; 2 Tim. 2:15.

10. Unsay buhaton aron mahimong praktikal ug mapuslanon ang mga tigom sa dayon na ang pagsangyaw?

¹⁰ Ang mga tigom sa dayon na ang pagsangyaw makatabang usab aron mahimo kitang epektibo ug malipayon diha sa atong pagpamalaybalay. Kon ang inadlawng teksto naghisgot bahin sa buluhatong pagsangyaw, kini mahimong basahon ug lakbit nga hisgotan. Apan, ang igsoon nga nagdumala sa maong tigom kinahanglang maggahin ug igong panahon sa paghisgot o sa pagpasundayag ug simpleng presentasyon nga haom sa teritoryo o sa paghatag ug ubang praktikal nga mga sugyot nga magamit sa ministeryo nianang adlawa. Kini makatabang niadtong presente nga mahimong epektibo sa ilang pagsangyaw. Kon adunay abante ug maayong pagpangandam, ang mga ansiyano ug ang uban nga nagdumala niini nga mga tigom makahimo niining tanan nga dili molapas sa gitakdang oras.—Roma 12:8.

Mga Kaayohan sa Pagpamati

11, 12. Sa unsang paagi makatabang ang mabinationg pagpamati aron atong masangyaw ang maayong balita sa mga tawo? Paghatag ug mga pananglitan.

¹¹ Gawas sa maayong pagpangandam, ang pagbaton ug dulot nga interes sa uban makatabang usab sa pagsugod ug panaghisgot sa Bibliya ug pagtugkad sa kasingkasing sa mga tawo diha sa kanataran. Atong ikapakita ang maong personal nga interes pinaagi sa pagpamati kanila. Usa ka nagapanawng magtatan-aw nag-ingon: “Kon kita mapailobon ug andam nga mamati sa mga tawo, sila mahimong madani sa pagpaminaw kanato ug kini magpakita nga interesado gayod kita kanila.” Pinaagi sa mabinationg pagpamati, atong mabuksan ang sirado nga hunahuna sa tagbalay, sama sa gipakita sa mosunod nga eksperyensiya.

¹² Sa usa ka sulat nga gipatik sa mantalaang Le Progrès, sa Saint-Étienne, Pransiya, giasoy sa usa ka babaye nga dihay duha ka tawo nga nanuktok sa iyang balay wala madugay human sa masakit nga kamatayon sa iyang tulo ka bulan nga batang babaye. “Naila dayon nako nga sila mga Saksi ni Jehova,” siya misulat. “Balibaran na unta nako sila, apan nakita ko ang brosyur nga ilang gitanyag. Naghisgot kadto kon nganong gitugotan sa Diyos ang pag-antos. Busa akong gipadayon sila sa tuyo nga tuison ang ilang mga pangatarongan. . . . Kapin sa usa ka oras nga nagpabilin ang mga Saksi. Mabination kaayo silang namati kanako, ug sa dihang nanamilit na sila, misugot ko nga ila akong duawon pag-usab.” (Roma 12:15) Sa ngadto-ngadto, ang maong babaye midawat ug pagtuon sa Bibliya. Atong makat-onan dinhi nga ang nahinumdoman sa babaye sa maong unang pagduaw, dili ang gisulti sa mga sister, kondili ang paagi sa ilang pagpamati kaniya.

13. Sa unsang paagi nato ikapahiuyon ang atong presentasyon sa maayong balita ngadto sa mga tawo nga atong mahibalag?

¹³ Kon kita mabinationg mamati sa mga tawo, atong masayran kon unsay ilang mga problema. Tungod niini, mas epektibo natong mapaambit kanila ang maayong balita sa Gingharian. Lagmit imong namatikdan nga ang hanas nga mga magwawali sagad maayong mga tigpaminaw. (Prov. 20:5) Sila magpakitag tinuod nga interes sa mga tawo nga ilang mahimamat diha sa ministeryo. Ilang timan-an dili lang ang mga ngalan ug adres sa mga tagbalay kondili ang mga punto usab nga ilang gikaikagan. Kon ang usa adunay pangutana, sila manukiduki ug mobalik aron tubagon ang maong pangutana. Sama kang apostol Pablo, ilang ipahiuyon ang ilang presentasyon sa mensahe sa Gingharian ngadto sa mga tawo nga ilang mahibalag. (Basaha ang 1 Corinto 9:19-23.) Ang maong tiunay nga pagpakitag interes makapadani sa mga tawo sa pagpamati sa maayong balita ug kana nagbanaag gayod sa “malumong kaluoy [o, pagkamabination] sa atong Diyos.”—Luc. 1:78.

 Magmapositibo Kanunay

14. Sa pagtuman sa atong ministeryo, sa unsang paagi nato mabanaag ang mga hiyas ni Jehova?

¹⁴ Gipakita ni Jehova nga kita bililhon alang kaniya pinaagi sa paghatag kanatog kagawasan sa pagpili. Bisan tuod siya ang Diyos nga Labing Gamhanan, wala niya pugsa ang mga tawo sa pag-alagad kaniya. Hinunoa, iyang gidani sila pinaagi sa gugma, nga nagpanalangin niadtong mapabilhon sa iyang kahibulongang mga tagana. (Roma 2:4) Ingong iyang mga ministro, kinahanglang andam kita sa pagbanaag sa pagkamaluluy-on sa Diyos sa matag higayon nga kita magsangyaw sa maayong balita. (2 Cor. 5:20, 21; 6:3-6) Aron mabuhat kana, kita kinahanglang magmapositibo sa atong tinamdan sa mga tawo diha sa atong teritoryo. Unsay makatabang kanato nga molampos niining bahina?

15. (a) Unsay gisulti ni Jesus nga buhaton sa iyang mga apostoles kon ang mga tawo dili mamati sa mensahe? (b) Unsay makatabang kanato sa pagpangita sa mga tawong takos?

¹⁵ Gisultian ni Jesus ang iyang mga sumusunod nga dili sila angayng magpaapekto kon ang pipila dili mamati sa mensahe, hinunoa angay nilang isentro ang ilang hunahuna sa pagpangita sa mga tawong takos. (Basaha ang Mateo 10:11-15.) Ang pagtakda ug ginagmay, daling makab-ot nga mga tumong makatabang kanato sa paghimo niini. Gipakasama sa usa ka brader ang iyang kaugalingon ngadto sa usa ka tigpangitag bulawan. Siya adunay panultihon, “Naghinamhinam ako nga makakitag bulawan karong adlawa.” Tumong usab sa laing brader nga “kada semana makahibalag siyag interesado ug balikan niya kini nianang semanahona mismo aron sa pag-ugmad sa interes niini.” Kon itugot sa kahimtang, paningkamotan sa pipila ka magmamantala nga basahan ug labing menos usa ka teksto ang tagbalay. Unsang praktikal nga mga tumong ang mahimo nimong itakda sa imong kaugalingon?

16. Nganong kinahanglan kitang magpadayon sa pagsangyaw?

¹⁶ Ang kalamposan sa pagsangyaw sa balay-balay wala lamang magdepende sa pagsanong sa mga tawo diha sa teritoryo. Tinuod, hinungdanon kaayo ang buluhatong pagsangyaw alang sa kaluwasan sa matinud-anog-kasingkasing nga mga tawo, apan mapuslanon usab kini sa laing paagi. Ang Kristohanong ministeryo naghatag kanatog kahigayonan sa pagpakita sa atong gugma kang Jehova. (1 Juan 5:3) Pinaagi niini, kita dili mahimong sad-an sa dugo. (Buh. 20:26, 27) Kini magpasidaan sa mga dili diyosnon nga ‘ang takna sa paghukom [sa Diyos] miabot na.’ (Pin. 14:6, 7) Labaw sa tanan, pinaagi sa pagsangyaw sa maayong balita, ang ngalan ni Jehova mabayaw sa tibuok yuta. (Sal. 113:3) Busa, mamati man ang mga tawo o dili, kinahanglang magpadayon kita sa pagwali sa mensahe sa Gingharian. Sa pagkatinuod, nahimuot si Jehova sa tanan natong paningkamot nga imantala ang maayong balita.—Roma 10:13-15.

17. Sa dili madugay ang mga tawo mapugos sa pag-ila sa unsa?

¹⁷ Daghan karon ang wala manumbaling sa atong pagsangyaw, apan sa dili madugay ilang maamgohan nga hinungdanon gayod ang atong buluhaton. (Mat. 24:37-39) Gipasaligan ni Jehova si Ezequiel nga sa dihang matuman na ang mga paghukom nga iyang gimantala, ang rebelyosong balay sa Israel “mahibalo gayod usab nga may manalagna diha sa ilang taliwala.” (Ezeq. 2:5) Sa susama, sa dihang ipahamtang na sa Diyos ang iyang paghukom batok niining presenteng sistema sa mga butang, ang mga tawo mapugos sa pag-ila nga ang mensahe nga gisangyaw sa mga Saksi ni Jehova sa publikong mga dapit ug sa balay-balay naggikan gayod sa bugtong matuod nga Diyos, si Jehova. Maamgohan usab nila nga siya gayod ang nagpadala sa mga Saksi. Pagkadako sa atong pribilehiyo nga makadala sa iyang ngalan ug makawali sa iyang mensahe niining kulbahinam nga panahon! Uban sa iyang tabang, hinaot padayon natong buntogon ang mga babag nga atong maatubang sa pagsangyaw sa balay-balay.

Unsay Imong Tubag?

• Sa unsang paagi kita makabaton ug kaisog nga mosangyaw?

• Unsay makatabang kanato sa pagsugod ug panaghisgot sa Bibliya diha sa atong pagpamalaybalay?

• Sa unsang paagi atong ikapakita ang tiunay nga interes sa uban?

• Unsay makatabang kanato nga magmapositibo sa atong tinamdan sa mga tawo diha sa atong teritoryo?

[Mga Pangutana sa Pagtuon]

[Kahon/Hulagway sa panid 9]

Usa ka Paagi sa Pagsugod ug Panaghisgot sa Bibliya

Sa pagsugod:

◼ Human nimo timbayaa ang tagbalay, mahimo nimo siyang hatagan ug tract ug dayon moingon, “Miduaw ko aron ipaambit nimo ang makapainteres nga punto niini nga basahon.”

◼ O mahimo nimong ipakita ang tract ug dayon moingon, “Miduaw ko nimo kay buot kong mahibalo kon unsay imong hunahuna bahin niini nga ulohan.”

Kon dawaton ang tract:

◼ Ayaw paglangan. Pangutan-a dayon ang tagbalay kon unsay iyang hunahuna bahin sa ulohan sa tract.

◼ Paminawg maayo aron imong masabtan ang panglantaw sa tagbalay. Pasalamati siya sa iyang mga komento ug hisgoti kini samtang nakigsulti kaniya.

Sa pagpadayon sa panaghisgot:

◼ Basaha ug ipatin-aw ang usa o duha ka teksto, nga magpahiuyon niana sa mga punto nga gikaikagan sa tagbalay.

◼ Kon interesado ang tagbalay, tanyagi siyag basahon ug kon posible, ipakita kon unsaon kana paggamit sa pagtuon sa Bibliya. Pakigsabot kon kanus-a ka mobalik.