Andam Ka ba sa Pagdepensa sa Imong Pagtuo?

NAKASINATI ka bag situwasyon diin mibati ka nga kinahanglan nimong depensahan ang imong pagtuo? Tagda ang kasinatian ni Susana, usa ka 16-anyos nga sister sa Paraguay. Panahon sa klase, adunay mikomento nga ang mga Saksi ni Jehova dili motuo sa “Daang Testamento,” kang Jesu-Kristo, o kang Maria. Ang uban miingon usab nga panatiko ang mga Saksi tungod kay mas pilion pa nilang mamatay kay sa magpatambal. Kon ikaw anaa sa iyang kahimtang, unsaon nimo kini pagtubag?

Nag-ampo si Susana kang Jehova ug gipataas niya ang iyang kamot. Sanglit hapit na mahuman ang klase, iyang gihangyo ang iyang maestra nga hatagan siyag higayon sa pagsaysay sa iyang tinuohan ingong usa ka Saksi ni Jehova. Misugot ang magtutudlo. Sulod sa duha ka semana, si Susana nangandam sa iyang presentasyon gamit ang brosyur nga Mga Saksi ni Jehova—Kinsa Sila? Unsay Ilang Gituohan?

Sa dihang miabot na ang adlaw sa iyang presentasyon, gisaysay ni Susana kon nganong kita gitawag nga mga Saksi ni Jehova. Gisaysay usab niya ang atong paglaom sa umaabot ug kon nganong dili kita magpaabonog dugo. Dayon gidapit niya ang iyang mga klasmet sa pagpangutana. Kadaghanan sa mga estudyante nagpataas sa ilang kamot. Nakadayeg gayod ang magtutudlo sa mga tubag ni Susana nga binase sa Kasulatan.

Ang usa ka estudyante mikomento, “Nakasulod na ko sa Kingdom Hall kas-a, ug wala gyod koy nakitang imahen.” Buot masayod ang magtutudlo kon ngano. Gibasa ni Susana ang Salmo 115:4-8 ug Exodo 20:4. Nahibulong gayod ang magtutudlo ug miingon, “Nganong ang among mga simbahan napuno man ug mga imahen nga sumala sa Bibliya sayop man diay ang paggamit niana?”

Ang pangutanag-tubag nga panaghisgot nagpadayon sulod sa 40 minutos. Sa dihang nangutana si Susana kon buot ba nilang motan-aw sa video nga No Blood—Medicine Meets the Challenge, ang tanan mitubag ug oo. Busa ang magtutudlo naggahin na usab ug laing sesyon pagkasunod adlaw. Human sa video, gisaysay ni Susana ang laing mga paagi sa pagpanambal nga gidawat sa pipila ka Saksi ni Jehova. Mahitungod niana, ang magtutudlo mikomento: “Wala ako masayod nga daghan diayng alternatibo sa pagpanambal ug mga kaayohan sa dili pagpaabonog dugo. Kini bang matanga sa pagpanambal alang lamang sa mga Saksi ni Jehova?” Sa dihang iyang nasayran nga puwede diay kana sa tanan, siya miingon, “Sa sunod higayon nga may mga Saksi ni Jehova nga moduaw kanako, makig-estorya gyod ko nila.”

Ang 20-minutos nga presentasyon nga giandam ni Susana naabtag tulo ka oras. Human sa usa ka semana, ang  ubang estudyante mihatag usab ug presentasyon maylabot sa ilang tinuohan. Pagkahuman sa mga presentasyon, daghan ang nangutana, apan wala sila makadepensa sa ilang tinuohan. Ang magtutudlo nangutana kanila, “Nganong dili man mo makadepensa sa inyong tinuohan, nga nahimo man kana sa inyong klasmet nga Saksi ni Jehova?”

Sila mitubag: “Nagtuon man god na silag Bibliya, kami wala.”

Ang magtutudlo miingon kang Susana: “Ikaw nagtuon gayod sa Bibliya ug naningkamot sa pagpadapat niana. Maayo kaayo nang imong gihimo.”

Mahimo ra untang magpakahilom si Susana. Apan sa iyang pagpamatuod, iyang gisunod ang maayong panig-ingnan sa usa ka Israelinhong batang babaye nga nabihag sa mga Siryanhon. Ang maong babaye nag-alagad sa balay sa Siryanhong heneral nga si Naaman nga adunay makaluod nga sakit sa panit. Ang Israelinhong babaye misulti nga maisogon sa iyang agalong babaye: “Kon ang akong ginoo atua pa unta sa atubangan sa manalagna sa Samaria! Niana siya mag-ayo kaniya sa iyang sanla.” Wala gayod magpanuko ang maong babaye sa pagsaksi bahin sa matuod nga Diyos. Kini nagtultol kang Naaman, ang iyang agalon, nga mahimong magsisimba ni Jehova.—2 Hari 5:3, 17.

Sa samang paagi, si Susana wala usab magpanuko sa pagpamatuod bahin kang Jehova ug sa iyang katawhan. Ang iyang pagdepensa sa iyang tinuohan sa dihang kini gihagit, nagpakita nga gituman ni Susana ang sugo sa Bibliya: “Balaana si Kristo ingong Ginoo diha sa inyong mga kasingkasing, nga andam kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot ug halawom nga pagtahod.” (1 Ped. 3:15) Andam ka ba usab sa pagdepensa sa imong pagtuo kon gikinahanglan?

[Hulagway sa panid 17]

Kini nga mga himan makatabang kanimo sa pagdepensa sa imong pagtuo