Magkinabuhi Ka ba Alang Lamang Karon?

“DILI gayod ko maghunahuna bahin sa ugma. Dali ra kaayo kanang moabot.” Kanang mga pulonga nga sigeng gikutlo gipahayag sa iladong siyentipiko nga si Albert Einstein. Daghang tawo ang adunay susamang hunahuna. Tingali sila moingon: “Nganong mabalaka ka man sa ugma?” O tingali nakadungog kag mga tawo nga moingon: “Ipadayon lang ang imong ginabuhat sa adlaw-adlaw.” “Magkinabuhi alang lamang karon.” “Ayaw lag hunahunaa ang ugma.”

Hinuon, dili bag-o ang maong tinamdan. “Kaon, inom, ug maglingawlingaw. Ang ubang butang dili na hinungdanon.” Kini ang panultihon sa karaang mga Epicureano. Ang pipila ka katalirongan ni apostol Pablo may susamang hunahuna. “Mangaon kita ug manginom, kay ugma kita mangamatay.” (1 Corinto 15:32) Nagtuo sila nga ang atong mubong kinabuhi karon mao ray atong mabatonan ug busa ilang gipasiugda nga ato kining pahimuslan sa bug-os.

Alang sa milyonmilyong molupyo sa yuta, ang pagpahimulos sa bug-os niining kinabuhia wala gayod magpasabot sa paglingawlingaw kanunay. Daghan karon ang nag-ilaid sa kakabos mao nga ang ilang kahimtang maoy kakha-tuka. Nganong maghunahuna pa man sila bahin sa “ugma” nga maorag mangiob man kini ug dili masaaron?

Angay Ka Bang Magplano Alang sa Ugma?

Bisan gani ang mga tawo nga dili kaayo lisod ug panginabuhi naghunahuna nga walay kapuslanan ang pagplano alang sa ugma. “Nganong magplano pa man?” mahimong mangutana sila. Ang pipila tingali mangatarongan nga kadtong mga nagplano nahigawad lamang. Bisan ang patriarkang si Job sa karaang panahon naguol pag-ayo sa dihang iyang nakita nga ang iyang mga plano “nangagun-ob,” nga nagdaot sa malipayon unta niyang kaugmaon ug sa iyang pamilya.—Job 17:11; Ecclesiastes 9:11.

Gipanig-ingon sa magbabalak nga taga-Scotland nga si Robert Burns ang atong lisod nga kahimtang ngadto sa usa ka gamitoy nga ilaga sa uma kansang puy-anan wala tuyoa nga nabugwalan sa pagdaro. Ang ilaga nagkalisodlisod sa kinabuhi human maguba ang iyang puy-anan. Matod sa magbabalak: ‘Pagkasubsob nga mobati kitang walay mahimo sa dihang makasagubang ug mga panghitabo nga dili nato mapugngan mao nga  bisan ang maayong mga plano kasagarang mapakyas.’

Busa wala bay kapuslanan ang pagplano alang sa ugma? Ang tinuod mao nga ang kakulang sa igong pagplano mahimong may daotang mga resulta sa dihang mohapak ang mga bagyo o ubang kinaiyanhong mga katalagman. Pananglitan, walay tawo ang makapugong sa Bagyong Katrina. Apan dili ba diyutay ra unta ang kadaot sa siyudad ug sa mga molupyo niini kon diha pay mas maayong pagpangandam ug pagplano?

Unsay imong hunahuna? Makataronganon ba nga kita magkinabuhi alang lamang karon ug dili maghunahuna sa ugma? Tagda kon unsay hisgotan sa sunod artikulo bahin niining ulohana.

[Mga hulagway sa panid 3]

“Kaon, inom, ug maglingawlingaw. Ang ubang butang dili na hinungdanon”

[Hulagway sa panid 4]

Dili ba diyutay ra unta ang nadaot sa Bagyong Katrina kon diha pay mas maayong pagpangandam ug pagplano?

[Credit Line]

U.S. Coast Guard Digital