Pagpakitag Pagtahod sa Atong Sagradong mga Panagkatigom

“Dad-on ko usab sila ngadto sa akong balaang bukid ug pamayaon sila sa sulod sa akong balay nga ampoanan.”—ISAIAS 56:7.

1. Unsay atong Kasulatanhong mga katarongan sa pagpakitag nahiangayng pagtahod sa atong mga tigom?

 SI Jehova nagtigom sa iyang katawhan, ang dinihogang mga Kristohanon ug ang ilang mga kauban, aron sa pagsimba kaniya diha sa iyang “balaang bukid.” Iyang gipahinabo nga magmaya sila sulod sa iyang “balay nga ampoanan,” ang iyang espirituwal nga templo, nga maoy “balay nga ampoanan alang sa tanang kanasoran.” (Isaias 56:7; Marcos 11:17) Kining maong mga kaugmaran nagpaila nga ang pagsimba kang Jehova maoy balaan, putli, ug tinuboy. Pinaagi sa pagpakita ug nahiangayng pagtahod sa atong mga tigom alang sa pagtuon ug pagsimba, atong gipamatud-an nga atong nabatonan ang panglantaw ni Jehova sa sagradong mga butang.

2. Unsay nagpaila nga giisip ni Jehova nga sagrado ang dapit nga iyang gipili alang sa pagsimba kaniya, ug giunsa pagpakita ni Jesus nga giisip usab niya kana nga sagrado?

² Sa karaang Israel, ang dapit nga gipili ni Jehova sa pagsimba kaniya angayng isipon nga sagrado. Ang tabernakulo ug ang mga kasangkapan ug mga sudlanan niini kinahanglang dihogan ug balaanon ‘aron mahimo gayod kini nga labing balaan.’ (Exodo 30:26-29) Ang duha ka lawak sa sangtuwaryo gitawag ug “ang Balaang Dapit” ug “ang Labing Balaan.” (Hebreohanon 9:2, 3) Sa ulahi ang tabernakulo giilisan sa templo didto sa Jerusalem. Ingong sentro sa pagsimba kang Jehova, ang Jerusalem gitawag nga “balaang siyudad.” (Nehemias 11:1; Mateo 27:53) Panahon sa iyang yutan-ong ministeryo, si Jesus mismo nagpakitag nahiangay nga pagtahod sa templo. Siya nasuko sa mga tawo tungod sa dili-matinahorong paggamit nila sa templo alang sa negosyo ug ingong laktoranan.—Marcos 11:15, 16.

3. Unsay nagpakita sa pagkabalaan sa mga panagkatigom sa mga Israelinhon?

³ Ang mga Israelinhon regular nga nagtigom aron sa pagsimba kang Jehova ug sa pagpamati sa pagbasa sa iyang Balaod. Ang pipila ka adlaw sa ilang mga pista gitawag ug balaang mga panagkatigom o solemne nga mga panagkatigom, nga nagpaila sa pagkasagrado niining maong mga panagkatigom. (Levitico 23:2, 3, 36, 37) Sa usa ka publikong panagkatigom sa mga adlaw ni Esdras ug Nehemias, ang mga Levihanon “nagpatin-aw sa balaod ngadto sa katawhan.” Sanglit “ang tibuok katawhan naghilak samtang ilang nadungog ang mga pulong sa balaod,” “gipahilom sa mga Levihanon ang tibuok katawhan, nga nag-ingon: ‘Hilom kamo! kay kining adlawa balaan.’” Dayon gisaulog sa mga Israelinhon ang pito-ka-adlaw nga Pista sa mga Balongbalong uban ang “dako kaayong pagmaya.” Dugang pa, “sa adlaw-adlaw gibasa sa makusog ang basahon sa balaod sa matuod nga Diyos, sukad sa unang adlaw hangtod sa kataposang adlaw; ug ilang gisaulog ang pista sulod sa pito ka adlaw, ug sa ikawalo ka adlaw dihay solemneng panagkatigom, sumala sa lagda.” (Nehemias 8:7-11, 17, 18) Kini maoy balaan gayod nga mga okasyon nga kinahanglang tahoron niadtong nanambong.

Ang Atong mga Tigom Maoy Balaang mga Panagkatigom

4, 5. Unsang mga bahin sa atong mga tigom ang nagpamatuod nga kini maoy sagradong mga panagkatigom?

⁴ Tinuod nga sa pagkakaron si Jehova wala nay literal nga balaang siyudad dinhi sa yuta, uban ang linain nga templo nga gipahinungod sa pagsimba kaniya. Bisan pa niana, kinahanglang dili nato kalimtan ang kamatuoran nga ang mga tigom sa pagsimba kang Jehova maoy sagradong mga panagkatigom. Katulo sa usa ka semana, kita magtigom aron sa pagbasa ug pagtuon sa Kasulatan. Ang Pulong ni Jehova “gipatin-aw,” ug sama sa panahon ni Nehemias, “gihatag ang kahulogan  niini.” (Nehemias 8:8) Ang tanan natong mga tigom magsugod ug matapos pinaagig pag-ampo, ug sa kadaghanan niana, kita moawit ug mga pagdayeg kang Jehova. (Salmo 26:12) Ang mga tigom sa kongregasyon maoy bahin gayod sa atong pagsimba ug nagkinahanglan ug mainampoong tinamdan ug matinahorong pagtagad sa atong bahin.

⁵ Si Jehova nagpanalangin sa iyang katawhan samtang sila nagtigom aron sa pagsimba kaniya, pagtuon sa iyang pulong, ug pagtagamtam ug maayong Kristohanong pag-ubanay. Kon panahon na sa pagtambong sa tigom, makaseguro kita nga didto ‘isugo ni Jehova nga maanaa ang panalangin.’ (Salmo 133:1, 3) Madawat nato ang maong panalangin kon kita presente ug mamati pag-ayo sa espirituwal nga programa. Dugang pa, si Jesus miingon: “Diin gani adunay duha o tulo nga nagkatigom sa akong ngalan, anaa ako sa ilang taliwala.” Sa konteksto, kining maong pahayag mapadapat sa Kristohanong mga ansiyano nga magtigom aron sa pag-atiman ug bug-at nga mga problema tali sa mga indibiduwal, apan ang prinsipyo niini mapadapat usab sa atong mga tigom. (Mateo 18:20) Kon pinaagi sa balaang espiritu si Kristo presente sa dihang ang mga Kristohanon magtigom sa iyang ngalan, dili ba angayng isipon nga sagrado ang maong mga panagkatigom?

6. Unsay ikasulti bahin sa atong dagko ug gagmay nga mga tigomanan?

⁶ Tinuod nga si Jehova dili mopuyo sa hinimog-tawo nga mga templo. Bisan pa niana, ang atong mga Kingdom Hall maoy mga dapit sa matuod nga pagsimba. (Buhat 7:48; 17:24) Kita magtigom didto aron sa pagtuon sa Pulong ni Jehova, pag-ampo kaniya, ug pag-awit ug mga pagdayeg kaniya. Tinuod usab kana sa atong mga Assembly Hall. Ang mas dagkong mga pasilidad nga giabangan para sa atong mga kombensiyon—sama sa mga awditoryum, mga lawak sa mga eksibit, o mga estadyum sa esport—mahimong mga dapit sa pagsimba samtang gigamit alang sa atong sagradong mga panagkatigom. Kining mga higayona sa pagsimba, dagko o gagmay man, takos sa atong pagtahod,  ug kinahanglang mabanaag kana sa atong tinamdan ug panggawi.

Mga Paagi sa Pagpakitag Pagtahod sa Atong mga Panagkatigom

7. Sa unsang dayag nga paagi nga kita makapakitag pagtahod sa atong mga panagkatigom?

⁷ Adunay dayag nga mga paagi diin kita makapakitag pagtahod sa atong mga panagkatigom. Ang usa ka paagi mao ang pagkaanaa na didto sa dihang magsugod ang pag-awit ug mga alawiton sa Gingharian. Daghan niini ang anaa sa dagway sa mga pag-ampo ug busa angayng awiton uban ang kataha. Nagkutlo sa Salmo 22, si apostol Pablo misulat bahin kang Jesus: “Ipahayag ko ang imong ngalan ngadto sa akong mga igsoon; sa taliwala sa kongregasyon pagadayegon ko ikaw pinaagig awit.” (Hebreohanon 2:12) Busa, tinoon nato nga nakalingkod na kita sa dili pa buksan sa tsirman ang tigom pinaagig pag-awit ug isentro ang pagtagad sa kahulogan sa mga pulong samtang mag-awit. Hinaot ang atong pag-awit magbanaag sa pagbati sa salmista nga misulat: “Pagadayegon ko si Jehova sa bug-os kong kasingkasing diha sa suod nga pundok sa mga matul-id ug sa katigoman.” (Salmo 111:1) Oo, ang pag-awit ug mga pagdayeg kang Jehova maoy usa ka maayo kaayong katarongan nga moabot ug sayo sa atong mga panagkatigom ug magpabilin hangtod kini matapos.

8. Unsang panig-ingnan sa Bibliya ang nagpakita nga ang mga pag-ampo diha sa atong mga tigom angayng hatagan natog pagtahod?

⁸ Ang laing bahin nga magpauswag sa espirituwal nga bili sa atong mga panagkatigom mao ang kinasingkasing nga pag-ampo nga gitanyag alang niadtong nagtigom. Sa usa ka higayon, ang unang-siglong mga Kristohanon sa Jerusalem nagtigom ug “nagkahiusa sa pagpatugbaw sa ilang mga tingog ngadto sa Diyos” pinaagi sa kinasingkasing nga pag-ampo. Tungod niini, sila nagpadayon ‘sa pagsulti sa pulong sa Diyos uban ang kaisog’ bisan pa sa paglutos. (Buhat 4:24-31) Mahanduraw ba nato nga dihay nanambong niadto nga ang hunahuna naglatagaw panahon sa maong pag-ampo? Wala, sila “nagkahiusa” sa pag-ampo. Ang mga pag-ampo nga gilitok panahon sa atong mga tigom nagbanaag sa pagbati sa tanan nga nanambong. Kini angayng hatagan natog pagtahod.

9. Sa unsang paagi ikapakita nato ang atong pagtahod sa sagradong mga panagkatigom pinaagi sa atong pamesti ug panggawi?

⁹ Dugang pa, ikapakita nato kon unsa ka lawom ang atong pagtahod sa pagkasagrado sa atong mga panagkatigom pinaagi sa atong pamesti. Ang atong pamesti ug estilo sa buhok dakog ikatampo sa dignidad sa atong mga tigom. Si apostol Pablo nagtambag: “Gitinguha ko nga sa tanang dapit ang mga lalaki magpadayon sa pag-ampo, nga magbayaw sa maunongong mga kamot, nga walay kapungot ug mga panaglalis. Sa ingon usab gitinguha ko nga ang mga babaye magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna, dili pinaagi sa mga estilo sa pagsalapid sa buhok ug sa bulawan o sa mga perlas o sa mahalon kaayong sapot, kondili sa paagi nga nahiangay sa mga babaye nga nagpaila nga masimbahon sa Diyos.” (1 Timoteo 2:8-10) Sa dihang motambong kita ug dagkong mga kombensiyon nga gihimo diha sa walay-atop nga mga estadyum, mahimong ipahaom nato ang atong pamesti sa panahon ug sa gihapon mahuptan ang dignidad. Dugang pa, ang atong pagtahod sa maong okasyon motabang kanato sa paglikay nga magkaon-kaon o mag-usap ug chewing gum panahon sa mga sesyon. Ang maayong pamesti ug panggawi panahon sa atong mga panagkatigom nagpasidungog kang Jehova nga Diyos, sa iyang pagsimba, ug sa atong mga isigka-magsisimba.

Panggawi nga Nahiangay sa Panimalay sa Diyos

10. Sa unsang paagi gipakita ni apostol Pablo nga ang hataas nga sukdanan sa panggawi gikinahanglan panahon sa atong Kristohanong mga tigom?

¹⁰ Sa 1 Corinto, kapitulo 14, atong makaplagan ang maalamong tambag ni apostol Pablo kon sa unsang paagi dumalahon ang Kristohanong mga panagkatigom. Gitapos niya kini pinaagi sa pag-ingon: “Himoa ang tanang butang nga may kahapsay ug pinaagig kahikayan.” (1 Corinto 14:40) Ang atong mga tigom maoy hinungdanong bahin sa kalihokan sa Kristohanong kongregasyon, ug kini nagkinahanglan ug panggawi nga nahiangay sa panimalay ni Jehova.

11, 12. (a) Unsay kinahanglang itisok sa hunahuna sa mga bata nga nanambong sa atong mga tigom? (b) Sa unsang haom nga paagi nga ang mga bata makapahayag sa ilang pagtuo diha sa atong mga tigom?

 ¹¹ Ang mga bata ilabinang gikinahanglan nga tudloan kon unsaon sa paggawi panahon sa atong mga tigom. Angayng ipatin-aw sa Kristohanong mga ginikanan ngadto sa ilang mga anak nga ang Kingdom Hall ug ang dapit diin himoon ang Pagtuon sa Libro sa Kongregasyon dili mga dapit nga dulaanan. Kini maoy mga dapit diin kita mosimba kang Jehova ug magtuon sa iyang Pulong. Ang maalamong Haring Solomon misulat: “Bantayi ang imong mga tiil kon ikaw moadto sa balay sa matuod nga Diyos; ug moduol aron sa pagpamati.” (Ecclesiastes 5:1) Gitudloan ni Moises ang mga Israelinhon sa pagtigom sa mga hamtong ug “mga bata.” Siya miingon: “Tigoma ang katawhan . . . aron sila mamati ug aron sila makakat-on, sanglit angay silang mahadlok kang Jehova nga inyong Diyos ug magmatngon sa pagtuman sa tanang pulong niini nga balaod. Ug ang ilang mga anak nga wala mahibalo kinahanglang mamati, ug sila kinahanglang makakat-on sa pagkahadlok kang Jehova.”—Deuteronomio 31:12, 13.

¹² Sa susama karon, ang mga bata motambong sa mga tigom uban sa ilang mga ginikanan sa panguna aron mamati ug makakat-on. Sa dihang makahimo na sila sa pagpamati ug pagsabot labing menos sa sukaranang mga kamatuoran sa Bibliya, ang mga bata makahimo usab sa “pagpahayag sa dayag” sa ilang pagtuo pinaagi sa paghatag ug mugbong mga komento. (Roma 10:10) Ang usa ka gamayng bata mahimong magsugod pinaagi sa pagsultig pipila ka pulong ingong tubag sa usa ka pangutana nga iyang nasabtan. Sa sinugdan, basahon tingali niya ang tubag, apan sa ngadtongadto, maningkamot siya sa pagtubag sa iyang kaugalingong mga pulong. Kini mapuslanon ug makalingaw para sa bata, ug ang maong natural nga mga pahayag sa pagtuo makapalipay sa kasingkasing sa mga gulanggulang na nga nanambong. Siyempre, ang mga ginikanan maghatag ug panig-ingnan pinaagi sa pagkomento mismo. Kon posible, maayo usab nga ang mga bata adunay ilang kaugalingong Bibliya, songbok, ug kopya sa publikasyon nga ginatun-an. Kinahanglang magpakita sila ug nahiangayng pagtahod sa maong mga publikasyon. Kining tanan magpatisok sa hunahuna sa mga bata nga ang atong mga tigom maoy sagradong mga panagkatigom.

13. Unsa ang atong gilaoman maylabot niadtong manambong sa atong mga tigom sa unang higayon?

¹³ Siyempre, dili nato buot nga ang atong mga tigom mahisama sa mga serbisyo sa simbahan sa Kakristiyanohan. Ang ilang mga tigom walay kainit ug nagpasundayag ug sinalingkapaw nga pagkabalaan o kaha banha kaayo samag mga konsiyerto nga rock. Buot nato nga ang mga tigom sa atong Kingdom Hall mahimong mainiton ug maabiabihon apan dili sa punto nga sobra ra usab kini ka impormal. Kita magtigom aron sa pagsimba kang Jehova, busa ang atong mga tigom kinahanglang dungganon kanunay. Ang atong tinguha mao nga human makapamati sa materyal nga nahisgotan ug makapaniid sa atong panggawi ug nianang sa atong mga anak, kadtong manambong sa unang higayon makaingon: “Ang Diyos anaa gayod sa inyong taliwala.”—1 Corinto 14:25.

Usa ka Permanenteng Bahin sa Atong Pagsimba

14, 15. (a) Sa unsang paagi malikayan nato ang ‘pagpasagad sa balay sa atong Diyos’? (b) Sa unsang paagi nagakatuman ang Isaias 66:23?

¹⁴ Sa nahisgotan na ganina, si Jehova nagtigom sa iyang katawhan ug nagpamaya kanila sulod sa iyang “balay nga ampoanan,” ang iyang espirituwal nga templo. (Isaias 56:7) Ang matinumanong  tawo nga si Nehemias nagpahinumdom sa iyang kaubang mga Hudiyo nga angay silang magpakita ug nahiangayng pagtahod sa literal nga templo pinaagi sa pagsuportar niana sa materyal nga paagi. Siya miingon: “Dili gayod namo pasagdan ang balay sa among Diyos.” (Nehemias 10:39) Dugang pa, dili nato isalikway ang pagdapit ni Jehova sa pagsimba kaniya sulod sa iyang “balay nga ampoanan.”

¹⁵ Sa pagpakita sa panginahanglan sa pagkaregular sa pagtigom aron sa pagsimba, si Isaias mitagna: “‘Mahitabo gayod nga sukad sa bag-ong bulan ngadto sa laing bag-ong bulan ug sukad sa igpapahulay ngadto sa laing igpapahulay ang tanang unod moanhi aron sa pagyukbo sa akong atubangan,’ nag-ingon si Jehova.” (Isaias 66:23) Kini nagakahitabo karon. Sa regular, kada semana sa matag bulan, ang dedikadong mga Kristohanon magtigom aron sa pagsimba kang Jehova. Gibuhat nila kini pinaagi sa pagtambong sa Kristohanong mga tigom ug pagpakigbahin sa publikong ministeryo, sa paghisgot lamang ug pipila. Usa ka ba niadtong regular nga ‘nagyukbo sa atubangan ni Jehova’?

16. Nganong ang regular nga pagtambong sa tigom angay nga mahimong permanenteng bahin sa atong kinabuhi karon?

¹⁶ Ang Isaias 66:23 bug-os nga mapadapat sa kinabuhi diha sa gisaad ni Jehova nga bag-ong kalibotan. Nianang panahona, “ang tanang unod,” sa literal nga diwa, kada semana ug kada bulan, ‘moyukbo sa atubangan,’ o mosimba, kang Jehova hangtod sa kahangtoran. Sanglit ang pagtigom aron sa pagsimba kang Jehova mahimong permanenteng bahin sa atong espirituwal nga kinabuhi sa bag-ong sistema sa mga butang, dili ba angay usab nga himoon natong permanenteng bahin sa atong kinabuhi karon ang regular nga pagtambong sa atong sagradong mga panagkatigom?

17. Nganong gikinahanglan nato ang atong mga tigom “ilabina gayod samtang makita [nato] nga ang adlaw nagkaduol na”?

¹⁷ Samtang nagkaduol na ang kataposan, kinahanglang mas determinado kita kay sukad masukad nga motambong sa atong Kristohanong mga tigom alang sa pagsimba. Agig pagtahod sa pagkasagrado sa atong mga tigom, dili nato tugotan ang sekular nga trabaho, homwork sa eskuylahan, o pag-eskuyla sa gabii nga mopugong kanato sa regular pagpakigtigom sa atong mga isigka-magtutuo. Gikinahanglan nato ang kalig-on nga makuha gikan sa pag-ubanay. Ang atong mga tigom sa kongregasyon naghatag kanato ug kahigayonan nga masinati ang usag usa, magpaambit ug pagdasig, ug mag-awhag sa usag usa “sa paghigugma ug sa maayong mga buhat.” Kinahanglang buhaton nato kini “ilabina gayod samtang makita [nato] nga ang adlaw nagkaduol na.” (Hebreohanon 10:24, 25) Busa, hinaot nga kita kanunayng magpakita ug nahiangayng pagtahod sa atong sagradong mga tigom pinaagi sa regular nga pagtambong, haom nga pamesti, ug maayong panggawi. Sa pagbuhat niana, atong gipakita nga atong nabatonan ang panglantaw ni Jehova sa sagradong mga butang.

Agig Pagsubli

• Unsay nagpakita nga ang mga panagkatigom sa katawhan ni Jehova angayng isipon nga sagrado?

• Unsang mga bahin sa atong mga tigom ang nagpamatuod nga kini maoy sagradong mga panagkatigom?

• Sa unsang paagi ang mga bata makapakita nga sila nagtahod sa pagkasagrado sa atong mga tigom?

• Nganong angay natong himoon nga permanenteng bahin sa atong kinabuhi ang regular nga pagtambong sa tigom?

[Mga Pangutana sa Pagtuon]

[Mga hulagway sa panid 28]

Ang mga tigom sa pagsimba kang Jehova maoy sagradong mga panagkatigom bisan asa kana himoa

[Hulagway sa panid 31]

Ang mga bata motambong sa mga tigom aron mamati ug makakat-on