Mga Pangutana Gikan sa mga Magbabasa

Sa unsang paagi atong nahibaloan nga ang paghubit sa kaalam diha sa Proverbio 8:22-31 mapadapat kang Jesu-Kristo sa iyang una-tawhanong paglungtad?

Ang inspiradong paghubit sa kaalam nga makita diha sa basahon sa Proverbio nag-ingon: “Si Jehova nagbuhat kanako ingon nga sinugdanan sa iyang dalan, ang kinaunhan sa iyang mga nahimo kanhi. . . . Sa wala pa mapahiluna ang kabukiran, nga una pa kay sa kabungtoran, ako nahimugso na nga samag inubanan ug kasakit sa pagbati . . . Sa diha nga giandam niya ang kalangitan, didto na ako; . . . unya didto ako tupad kaniya ingon nga batid nga magbubuhat, ug ako iyang gikahinangpan pag-ayo sa matag adlaw, ako nagakalipay sa iyang atubangan sa tanang panahon, . . . ug ang mga butang nga akong gikahinangpan maoy uban sa mga anak sa mga tawo.”

Kining tekstoha wala maghisgot bahin sa kaalam sa Diyos o sa kaalam ingong ideya. Ngano man? Tungod kay ang kaalam nga gihubit dinhi ‘gibuhat,’ o gilalang, ingong sinugdanan sa dalan ni Jehova. Si Jehova nga Diyos kanunayng naglungtad ug kanunayng maalamon. (Salmo 90:1, 2) Ang iyang kaalam walay sinugdanan; kini wala lalanga o buhata. Kini wala ‘mahimugso nga samag inubanan ug kasakit sa pagbati.’ Dugang pa, kining maong kaalam gihulagway nga mosulti ug molihok, nga nagrepresentar sa usa ka persona.—Proverbio 8:1.

Ang basahon sa Proverbio nag-ingon nga dugay na kanhi ang kaalam didto sa tupad ni Jehova, ang Maglalalang, ingong “batid nga magbubuhat.” Kana mapadapat gayod kang Jesus. Sa dugayng panahon sa wala pa siya moanhi sa yuta, si Jesus nakigtambayayong gayod kang Jehova nga tungod niana ang Pulong sa Diyos nag-ingon: “Siya mao ang una sa tanang ubang butang ug pinaagi kaniya ang tanang ubang butang gipatungha.”—Colosas 1:17; Pinadayag 3:14.

Haom ang paghulagway sa Anak sa Diyos ingong kaalam, tungod kay siya mao ang Usa nga nagpadayag sa maalamong mga katuyoan ug mga balaod ni Jehova. Sa wala pa siya maglungtad ingong tawo, si Jesus mao ang Pulong sa Diyos, o Tigpamaba. (Juan 1:1) Siya gihubit ingong “ang gahom sa Diyos ug ang kaalam sa Diyos.” (1 Corinto 1:24, 30) Pagkanindot nga kahubitan sa Anak sa Diyos, kansang kahinangop sa mga tawo nagpalihok kaniya sa paghatag sa iyang kinabuhi ingong lukat alang kanila!—Juan 3:16.

[Hulagway sa panid 31]

‘Sa wala pa ang kabukiran, ako nahimugso na’