Sa Sinugdan Gilutos Apan sa Ngadtongadto Gimahal

Pipila ka tuig kanhi, si Santiago ug ang iyang asawa, si Lourdes, mibalhin ngadto sa matahom nga lungsod sa Huillcapata, Peru, aron ipaambit sa mga tawo didto ang mensahe sa paglaom nga gikan sa Bibliya. Apan sa wala madugay, miabot ang usa ka pari gikan sa Cuzco ug iyang gitigom ang mga residente sa lungsod. Ang pari nagpasidaan kanila nga ang presensiya sa mga Saksi ni Jehova magdalag makamatay nga hampak ug kusog nga ulan sa niyebe nga mopatay sa ilang mga baka ug modaot sa ilang mga pananom.

Daghan ang naimpluwensiyahan niining “tagnaa,” ug kapin sa tunga sa tuig nga walay bisan usa sa lungsod ang midawat sa imbitasyon nila ni Santiago ug Lourdes nga magtuon sa Bibliya. Usa ka opisyal sa lungsod nga ginganlag Miguel, ang gobernador-tenyente, migukod kang Santiago ug kang Lourdes diha sa karsada, nga nagbato kanila. Apan sila kanunay milihok sa makigdaiton, Kristohanong paagi.

Sa ngadtongadto, ang pipila ka tawo sa lungsod midawat ug pagtuon sa Bibliya. Bisan si Miguel, nag-usab sa iyang tinamdan. Siya misugod pagtuon sa Bibliya uban kang Santiago, mihunong sa sobrang pag-inom, ug nahimong makigdaitong tawo. Wala madugay, si Miguel, iyang asawa, ug duha sa iyang mga anak nga babaye, midawat sa kamatuoran sa Bibliya.

Sa pagkakaron, adunay mauswagong kongregasyon sa mga Saksi ni Jehova niining lungsora. Si Miguel malipayon nga kadaghanan sa mga bato nga iyang gipanglabay kang Santiago ug kang Lourdes wala makaigo kanila, ug siya mapasalamaton sa magtiayon sa ilang maayong panig-ingnan sa pagkamakigdaiton.

[Mga hulagway sa panid 32]

Ang makigdaitong tinamdan nila ni Santiago ug Lourdes (ibabaw) nakapausab sa tinamdan ni Miguel (tuo)