Armagedon—Usa ka Malaglagong Kataposan?

ARMAGEDON! Kini bang pulonga magpahunahuna kanimo bahin sa dinaghan nga pagpamatay o pagkasunog sa uniberso? Ang “Armagedon” maoy usa sa pipila ka pulong sa Bibliya nga nahimo nang bahin sa adlaw-adlawng panagsultihay diha sa daghang dapit sa kalibotan. Ang maong pulong kaylap nang gigamit sa paghubit sa dulom nga palaaboton nga giatubang sa katawhan. Ang industriya sa pelikula, telebisyon, ug video nagpuno sa handurawan sa mga tawo ug makalilisang nga mga panghitabo bahin sa umaabot nga “Armagedon.” Ang maong pulong giliminan sa misteryo ug sayop nga mga pagsabot. Bisan pag nagkadaiya ang ideya bahin sa kahulogan niini, ang kadaghanan niini dili kaharmonya sa gitudlo sa Bibliya—ang tinubdan sa pulong nga naghisgot sa Armagedon.

Tungod kay gilangkit sa Bibliya ang Armagedon uban sa “kataposan sa kalibotan,” dili ka ba mouyon nga hinungdanon ang pagbaton ug tin-aw nga pagsabot kon unsa gayoy gipasabot nianang pulonga? (Mateo 24:3, King James Version) Ug dili ba makataronganong modangop sa kinalabwang tinubdan sa kamatuoran, ang Pulong sa Diyos, aron makaplagan ang mga tubag bahin sa kon unsa ang Armagedon ug kon sa unsang paagi makaapekto kini kanimo ug sa imong pamilya?

Madayag sa maong pagsusi nga inay magdalag malaglagong kataposan, ang Armagedon magpahinabog usa ka malipayong sinugdanan alang sa mga tawo nga nagtinguhang mabuhi ug mouswag diha sa usa ka matarong nga bag-ong kalibotan. Ikaw pagagantihan ug tin-awng pagsabot bahin niining hinungdanong Kasulatanhong kamatuoran samtang imong tagdon ang mosunod nga artikulo nga naghisgot bahin sa tinuod nga kahulogan sa Armagedon.

[Kahon/Hulagway sa panid 3]

UNSAY IMONG HUNAHUNA BAHIN SA ARMAGEDON?

• Usa ka nukleyar nga katalagman

• Usa ka katalagman sa kalikopan

• Usa ka pagbanggaay sa langitnong mga butang ug sa planetang yuta

• Paglaglag sa Diyos sa mga daotan