Makontrolar ba Nimo ang Imong Dulnganan?

ANG ato bang ultimang dulnganan gitino nang daan? Ang mga pagpili ba nga atong himoon dili makaapekto sa atong kaugmaon?

Ibutang ta nga ang tawo maoy magkontrolar sa iyang kapalaran. Niining kahimtanga, mahimo bang gimbut-an daan nga ang usa ka tawo mobuhat ug espesipikong trabaho o molingkod sa usa ka katungdanan? Ug sa unsang paagi mapalampos sa Diyos ang iyang kabubut-on sa yuta kon makontrolar pa sa mga tawo ang ilang dulnganan? Ang Bibliya nagtaganag makapatagbawng mga tubag niining mga pangutanaha.

Predestinasyon ug Kagawasan sa Pagpili—Pareho Bang Husto?

Tagda kon giunsa kita paglalang ni Jehova nga Diyos. “Sa larawan sa Diyos iyang gilalang [ang tawo]; lalaki ug babaye iyang gilalang sila,” matod pa sa Bibliya. (Genesis 1:27) Sanglit gilalang sa dagway sa Diyos, kita adunay katakos sa pagbanaag sa iyang mga hiyas, sama sa gugma, hustisya, kaalam, ug gahom. Kita gigasahan usab sa Diyos ug kagawasan sa pagpili. Tungod niini, kita lahi sa uban niyang mga linalang sa yuta. Kita makapili kon kaha sundon nato ang moral nga giya sa Diyos o dili. Mao kanay hinungdan kon nganong ang manalagnang si Moises miingon: “Himoon ko ang mga langit ug ang yuta ingong mga saksi batok kaninyo niining adlawa, nga gibutang ko ang kinabuhi ug ang kamatayon sa imong atubangan, ang panalangin ug ang maldisyon; ug kinahanglan nga pilion mo ang kinabuhi aron ikaw magpadayong buhi, ikaw ug ang imong kaliwat, pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya.”—Deuteronomio 30:19, 20.

 Ugaling lang, kining gasa nga kagawasan sa pagpili wala magpasabot ug bug-os nga kagawasan. Wala kini magpahigawas kanato sa pisikal ug moral nga mga balaod nga gihimo sa Diyos alang sa kalig-on ug kalinaw sa uniberso. Kining maong mga balaod gilatid alang sa atong kaayohan, ug ang pagsupak sa bisan hain niana mahimong mosangpot sa kadaot. Hunahunaa lang kon unsay mahitabo kon supakon nato ang balaod sa grabidad ug molukso gikan sa atop sa usa ka habog nga tinukod!—Galacia 6:7.

Nalangkit usab sa kagawasan sa pagpili ang pipila ka responsibilidad nga wala mabatoni sa mga linalang nga walay ingon niana nga kagawasan. Ang magsusulat nga si Corliss Lamont nangutana: “Mahimo ba natong papanubagon ang mga tawo, ug silotan sila sa mga sayop nga ilang nahimo, kon gituohan nato . . . nga ang mga butang nga ilang pilion ug himoon gitino nang daan?” Siyempre, dili. Dili nato papanubagon ang mga hayop sa mga butang nga ilang gihimo tungod kay sila gipalihok lamang sa ilang kinaiyanhong mga hiyas, ni papanubagon nato ang mga kompiyuter sa mga butang nga giprograma lamang nga himoon niini. Nan, ang kagawasan sa pagpili nagsangon kanato ug bug-at nga responsibilidad ug naghimo kanatong may-tulubagon sa atong mga binuhatan.

Pagkadili-mahigugmaon ug pagkadili-makataronganon ni Jehova nga Diyos kon una pa kita matawo, iya nang gitino daan ang dalan nga atong subayon ug dayon papanubagon kita sa atong mga binuhatan! Wala niya kini buhata, tungod kay “ang Diyos gugma,” ug “ang tanan niyang dalan hustisya.” (1 Juan 4:8; Deuteronomio 32:4) Sanglit gihatagan niya kita ug kagawasan sa pagpili, wala niya ‘tinoa daan kon kinsay iyang luwason ug kon kinsay iyang pagahukman,’ nga maoy gipasiugda niadtong nagtuo sa predestinasyon. Ang kagawasan sa pagpili wala magpasabot ug predestinasyon.

Ang Bibliya tin-awng nagpakita nga ang mga pagpili nga atong himoon makapausab sa atong dulnganan. Pananglitan, ang Diyos mihangyo sa mga mamumuhat ug daotan, nga nag-ingon: “Palihog, talikod kamo, ang matag usa gikan sa iyang daotang dalan ug gikan sa pagkadaotan sa inyong mga pakiglabot . . . aron ako dili magpahinabog katalagman kaninyo.” (Jeremias 25:5, 6) Kining maong hangyo walay kapuslanan kon gitino nang daan sa Diyos ang dulnganan sa matag tawo. Dugang pa, ang Pulong sa Diyos nag-ingon: “Busa, paghinulsol kamo, ug pamalik kamo aron mapapas ang inyong mga sala, aron ang mga panahon sa kahayahay moabot gikan sa atubangan ni Jehova.” (Buhat 3:19) Nganong hangyoon pa man ni Jehova ang mga tawo sa paghinulsol ug sa pagbag-o kon nasayod na siyang daan nga wala gayod silay arang mahimo sa pag-usab sa ilang dulnganan?

Ang Kasulatan naghisgot bahin sa pipila ka tawo nga gidapit sa Diyos sa pagmando ingong mga hari didto sa langit uban kang Jesu-Kristo. (Mateo 22:14; Lucas 12:32) Apan, ang Bibliya nag-ingon  nga mawad-an sila sa maong pribilehiyo kon sila dili molahutay hangtod sa kataposan. (Pinadayag 2:10) Nganong dapiton pa man sila sa Diyos kon nakahukom na diay siyang daan nga sila dili pilion? Tagda usab ang giingon ni apostol Pablo ngadto sa iyang mga isigkamagtutuo. Siya misulat: “Kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala.” (Hebreohanon 10:26) Ang maong pasidaan walay kapuslanan kon gimbut-an daan sa Diyos ang ilang dulnganan. Apan ang uban nag-angkon nga ang Bibliya nag-ingon nga gimbut-an daan sa Diyos nga ang pipila ka indibiduwal momando uban ni Jesu-Kristo.

Gimbut-an Daan—Ingong Indibiduwal o Ingong Pundok?

‘Kita gipanalanginan sa Diyos sa tanang espirituwal nga panalangin diha sa langitnong mga dapit nga nahiusa kang Kristo,’ misulat si apostol Pablo, ‘ingon sa iyang pagpili kanato nga nahiusa kaniya sa wala pa ang pagkatukod sa kalibotan . . . Kay kita iyang gimbut-an daan nga sagopon ingon nga iyang kaugalingong mga anak pinaagi ni Jesu-Kristo.’ (Efeso 1:3-5) Unsay gimbut-an daan sa Diyos, ug unsa ang kahulogan sa pagkahimong pinili “sa wala pa ang pagkatukod sa kalibotan”?

Kining tekstoha nag-ingon nga ang Diyos nagpili ug pipila ka kaliwat sa unang tawo, si Adan, sa pagmando uban ni Kristo sa langit. (Roma 8:14-17, 28-30; Pinadayag 5:9, 10) Apan, ang paghunahuna nga gimbut-an daan ni Jehova nga Diyos ang espesipikong mga indibiduwal sa pagbaton niining maong pribilehiyo kaliboan ka tuig una pa sila matawo maoy kasukwahi sa kamatuoran nga ang mga tawo adunay kagawasan sa pagpili. Ang gimbut-an daan sa Diyos mao ang usa ka grupo, o hugpong sa mga tawo, dili ang indibiduwal nga mga membro niini.

Sa pag-ilustrar: Ibutang ta nga ang usa ka gobyerno nakahukom sa pagpundar ug usa ka ahensiya. Gitino nang daan niini kon unsa ang buluhaton, gahom, ug gidak-on niining maong ahensiya. Sa kataposan, ang ahensiya misugod sa paglihok paglabay sa pipila ka panahon human kini mapundar, ug ang mga membro niini namulong ug ingon niini: “Pipila ka tuig kanhi, gitino nang daan sa gobyerno kon unsay atong mga trabaho. Karon sugdan na nato ang trabaho nga gipabuhat kanato.” Mohinapos ka ba nga gitino nang daan sa gobyerno mga pipila ka tuig kanhi kon kinsa ang indibiduwal nga mga membro nianang maong ahensiya? Dili gayod. Sa susama, gitino nang daan ni Jehova nga magpundar siya ug usa ka linaing ahensiya nga mopapha sa mga epekto sa sala ni Adan. Gimbut-an daan niya ang hugpong sa mga tawo nga moalagad niana nga ahensiya—apan dili ang indibiduwal nga mga membro niini. Sila pagapilion sa ulahi, ug ang mga pagpili nga ilang himoon makaapektar kon kaha sila mahimong aprobado o dili.

Unsa nga kalibotan ang anaa sa hunahuna ni apostol Pablo sa dihang siya miingon: ‘Ang Diyos nagpili kanato nga mahiusa kaniya sa wala pa ang pagkatukod sa kalibotan’? Ang kalibotan nga gitumong ni Pablo dinhi dili mao ang kalibotan nga gipundar sa Diyos sa dihang gilalang niya si Adan ug Eva. Ang maong kalibotan “maayo kaayo”—wala gayoy sala ug kadunotan. (Genesis 1:31) Kini dili kinahanglang ‘ipahigawas’ gikan sa sala.—Efeso 1:7.

Ang kalibotan nga gipasabot ni Pablo mao kanang kalibotan nga mitungha human morebelde si Adan ug Eva sa Eden—usa ka kalibotan nga lahi kaayo nianang orihinal nga gilaraw sa Diyos. Mao kana ang kalibotan nga nagsugod sa dihang si Adan ug Eva nakabaton ug mga anak. Kanang kalibotana gilangkoban ug mga tawo nga nahimulag sa Diyos ug naulipon sa sala ug kadunotan. Kadto maoy kalibotan sa mga tawo nga, dili sama ni Adan ug Eva nga tinuyong nagpakasala, mahimong lukaton gikan sa kasal-anan.—Roma 5:12; 8:18-21.

Si Jehova nga Diyos nakahimo dayon ug paagi sa pagsulbad sa kahimtang nga mitungha gumikan sa rebelyon sa Eden. Sa dihang mitungha ang panginahanglan, gimbut-an daan niya ang usa ka linaing ahensiya—ang Mesiyanikong Gingharian ubos sa pagmando ni Jesu-Kristo—nga pinaagi niana iyang lukaton ang katawhan gikan sa sala nga ilang napanunod kang Adan. (Mateo 6:10) Gihimo kini sa Diyos “sa wala pa ang pagkatukod sa kalibotan” sa mga tawo nga mahimong lukaton gikan sa kasal-anan, sa ato pa, una pa makapatunghag mga anak ang rebelyosong si Adan ug Eva.

Ang mga tawo kasagarang magplano kon unsay ilang buhaton aron matuman ang ilang gustong  himoon. Ang predestinasyon nalangkit sa ideya nga ang Diyos lagmit naghupot ug detalyadong plano alang sa uniberso diin ang tanang butang gitino nang daan. Si Roy Weatherford misulat: “Daghang pilosopo ang nagtuo nga ang Soberanong Diyos aduna gayoy kompletong detalye sa tanang panghitabo.” Kinahanglan ba gayong idetalye daan sa Diyos ang tanang panghitabo?

Sanglit walay-kinutoban ang iyang gahom ug dili-hitupngan ang iyang kaalam, malamposong madumala ni Jehova ang bisan unsang kalit o wala-damhang mga kahimtang nga mahimong moresulta samtang ang iyang mga linalang naggamit sa ilang kagawasan sa pagpili. (Isaias 40:25, 26; Roma 11:33) Siya makadumala dayon niana nga dili na kinahanglang magplano daan. Dili sama sa masalaypon nga mga tawo nga may limitadong mga katakos, ang Labing Gamhanang Diyos wala magkinahanglan ug detalyado, natino-nang-daan nga plano nga naghubit daan sa dulnganan sa matag indibiduwal dinhi sa yuta. (Proverbio 19:21) Diha sa ubay-ubayng hubad sa Bibliya, ang Efeso 3:11 nag-ingon nga ang Diyos adunay “walay kataposang katuyoan,” inay kay usa ka tino nga plano.

Kon sa Unsang Paagi Maimpluwensiyahan Nimo ang Imong Kaugmaon

Ang Diyos adunay katuyoan alang sa yuta, ug gimbut-an daan niya ang maong katuyoan. Ang Pinadayag 21:3, 4 nag-ingon: “Tan-awa! Ang tolda sa Diyos anaa uban sa mga tawo, ug siya mopuyo uban kanila, ug sila mahimong iyang mga katawhan. Ug ang Diyos makig-uban kanila. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Oo, kining yutaa mahimong usa ka paraiso, sumala gayod sa gilaraw sa Diyos sa sinugdan. (Genesis 1:27, 28) Ang pangutana mao, Atua ka ba unya didto? Kana nagdepende sa mga pagpili nga imong himoon karon. Wala gimbut-i daan ni Jehova ang imong dulnganan.

Ang halad lukat sa Anak sa Diyos, si Jesu-Kristo, nagpaposible kang bisan kinsa nga magpasundayag ug pagtuo kaniya sa pagbaton ug kinabuhing walay kataposan. (Juan 3:16, 17; Buhat 10:34, 35) “Siya nga magpasundayag ug pagtuo sa Anak adunay kinabuhing walay kataposan,” nag-ingon ang Bibliya. “Siya nga dili mosugot sa Anak dili makakita sa kinabuhi.” (Juan 3:36) Mahimo nimong pilion ang kinabuhi pinaagi sa pagkat-on bahin sa Diyos, sa iyang Anak, ug sa Iyang kabubut-on gikan sa mga panid sa Bibliya ug sa pagpadapat sa imong nakat-onan. Ang tawo nga nagalihok sumala sa tinuod nga kaalam nga narekord sa Pulong sa Diyos gipasaligan nga “siya magapuyo sa kasegurohan ug dili matugaw sa kalisang sa katalagman.”—Proverbio 1:20, 33.

[Mga hulagway sa panid 5]

Dili sama sa mga hayop, ang mga tawo manubag sa ilang mga binuhatan

[Credit Line]

Eagle: Foto: Cortesía de GREFA